1. Ngua ngera kerresel a klengar er kid er osengel a Jehovah?

 KA MOLATK omko sechelim a meskau a blai. Ngmla metamk a chesbereberel e ngar ngii a bebil chemars. Alta ngngar ngii aika el telemellel engdi tia worth er a betok el miliol el udoud. Me ke locha kmal oba omereng el saul el kirel e mo omekerreu er ngii. Ngdi osisiu a Jehovah mla meskid a kmal mekreos el sengk, el ngii a sengk er a klengar. Ngulechotii el kmo a klengar er kid a kmal mekreos er osengel er a lebeskid a Ngelekel el olubet el tenget.​—Jn. 3:16.

2. Ngua losaod er ngii a 2 Korinth 7:1, ngera ngmengerechir er ngii er kid a Jehovah?

² A Jehovah a Uchul a rokui el klengar. (Psa. 36:9) A apostol Paulus me ngdirrek el kmal uluumerang er tiang e dilu el kmo: “Ngii a uchul e kede outeliil, e mengitengtik e ngar ngii a klengar er kid.” (Rel. 17:25, 28) Me ngsebeched el melekoi el kmo a klengar er kid a sengk el mlara Dios. Ngmeskid aike el rokui el dousbech el mo melemolem el ngar. (Rel. 14:15-17) Engdi Jehovah diak loruul ongasireng el kired me dolemolem el ngar. E ngbai mengerechir er kid el mora tkurrebab el sebeched lomekerreu er a health er kid me a klereng er kid. (Monguiu er a 2 Korinth 7:1.) Ngera uchul me ngkired el omekerreu er a health er kid me a klengar er kid, e mekera doruul el uaisei?

3. Ngera ta er a uchul me kede melasem el meruul er a health er kid el mo ungil?

³ A ta er a uchul me ngkired el melasem el mo ungil a health  er kid, a me bo lsebeched el mesiou er a Jehovah el ngar er a tkurrebab el sebeched. (Mk. 12:30) Ngsoad el ‘odars a klengar er kid el tonget el kirel omesiungel a Dios ma deuil a rengul,’ me kede mengeroid er kid er aike el tekoi el sebechel tomellii a health er kid. (Rom 12:1) Me alta kede mora tkurrebab el sebeched el omekerreu er a health er kid engdi ngdiak lebelkul a kmo ngdiak bo desecher. Me nguaisei, engdi kede meruul aike el rokui el sebeched e le ngsoad lochotii er a Demad el ngar er a eanged el kmo kede mengreos er a sengk er a klengar.

4. Ngera mle soal el meruul er ngii a King David?

⁴ King David a silodii a uchul me ngmilengreos er a klengar el sengk er a Dios er a loluches el kmo: “Ngera klungiolel a kodellek, a lsekum ak mor a debull? A chebechab ng mo oldanges er kau? Ng mo ouchais er a blakerreng er kau?” (Psalm 30:9) A David a locha lilechesii tiang er a ulebengelel a klengar er ngii. Ngmle soal mora tkurrebab el sebechel el omekerreu er a klengar er ngii e melemolem el ngar me lsebechel loldanges er a Jehovah. Me kid el rokui me ngulterekokl el uaisei a uldesued.

5. Alta kede kmal smecher me a lechub e kede chudelang, engdi ngera dirk sebeched el meruul er ngii?

⁵ A secher me a cheluodel a sebechel mo uchul e ngdiak el sebeched el meruul a tekoi el durruul er a uchei. A uchul me nglocha mo mekngit a rengud. Me nguaisei engdi ngdirk kired el mora tkurrebab el sebeched el omekerreu er a health er kid. E ngerang? E le ngdirk sebeched el loldanges er a Jehovah el ua King David. Ngkmal rutechii a rengud sel dodengei el kmo alta kede smecher me a lechub e kede chudelang engdi kede kmal mekreos er osengel a Dios. (Mt. 10:29-31) Mo lmuut me a lsekum kede mad, e ngurungulel el mo olekiis er kid. (Job 14:14, 15) Me chelecha el dengar e ngsoad el meruul aike el rokui el sebeched el mo omekerreu er a health er kid me a klengar er kid.

6. Ngera ng expect er ngii er kid a Jehovah el kirel a omengang me a omelim?

⁶ Alta Biblia diak el babier er a health me a diet, engdi ngouchais a uldesuel a Jehovah el kirel aika el tekoi. El ua tiang, Jehovah mengelechel er kid el kmo, “mongeroid er kau er a tekoi el melemall” el sebechel tomellii a bedengem. (Oli. 11:10, NW) A Biblia ouketui a omengur el mo imis me a omelim el mo imis. Aika sebechel mo uchul a klengar er kid. (Osi. 23:20) Jehovah expect er kid el mo oba ulserechakl el reng sel dolilt a ildisel a kall el dongang me a ilumel el dolim.​—1 Ko. 6:12; 9:25, NW.

7. Ngmekera Osisechakl 2:11 e ngosukid el mo ungil melilt el kirel a health er kid?

⁷ Ngsebeched el meruul omelilt el ngii ochotii a dmolech el omereng el saul el kirel a klengar el sengk er a Dios loeak sel bo dungil omdasu. (Psa. 119:99, 100; monguiu er a Osisechakl 2:11.) El ua tiang, kede kerekikl el melatk a kall el dongang. A lsekum e ngkmal soad el menga er a ileakl el kall engdi nguchul a secher, e ngkmal diak bo donga er ngii. Kede dirrek el lochotii el kmo kede ungil omdasu sel lungil a cheliued, blechoel el exercise, e lungil a bedenged, e le clean a blid.

8. Ngera ngochotii a Biblia el kirel a uldesuel a Dios el kirel a tekoi er a safety?

⁸ A Llechul a Jehovah el mora renged er a Israel a mla er ngii a ulekrael el kirir  el oltirakl me lak leduubech a meklou el tellemall sel lengar er a blai me a loureor. (Exo. 21:28, 29; Dut. 22:8) A chad a nguu a oberaod el blals a lsekum ngdiak er a rengul e mekodir a chad. (Dut. 19:4, 5) A llach a milengerechir me lobals tirke el diak er a rengrir e tomellii a ngalek el ngar er a diil. (Exo. 21:22, 23, NW) A Bades a bleketakl lochotii el kmo a Jehovah soal a dekerekikl er a rolel a tekoi er a safety.

9. Ngera sebeched el meruul me dolemolem el safe? (Mdirrek lomes a siasing.)

⁹ Kede ochotii el kmo kede oba omereng el saul el kirel a klengar el sengk er a Dios sel dolasem el mo safe sel dengar er a blid me a urered. El ua tiang, kede ngmai a mekedorm el klalo, chemicals, me a kar el locha er a safe el basio el diak el sebechir a rengalek el remutech. Kede kerekikl sel domkard a ngau, dongeald a ralm, me a dousbech a dongu, e diak dechoit el diak a chad lomes. Ngdiak domekall a mlai a lsekum kede melai a kar el rullii el mo kengaol er kid omekall, melim a rrom, me a lechub e kede omeksulaul. Me a diak debeldoel er a dengua er kid e domekall.

10. Ngera sebeched el meruul er ngii er a uchei er a leduubech a tellemall me a dirrek el temel a tellemall?

¹⁰ A lebebil e ngdiak a klisiched er a tekoi el duubech, el ngii a sebechel mo uchul a klengar er kid. Ngmo uaisei sel lebo er ngii a telemellel a beluu, rakt, me a uldikel. Me nguaisei sel leduubech chouaika el blekeradel, e ngsebeched el olengeasek a tellemall e mo uchul osebeled sel doltirakl a ulekrael er a beluu el ua mo evacuate me a lechub e nglmuut el bebil er a ulekrael. (Rom 13:1, 5-7) A bebil tekoi er a rolel a emergency a sebeched el mengetmokl er kid el kirel, me ngungil doltirakl a ulekrael er a beluu me bo dekltmokl. El ua tiang, ngmo ngosukid sel deketmokl a ralm me a diak el metemall el kall me a first-aid kit.

11. Sel leduubech a bekoiuiuul el rakt er a beluu el dekiei er ngii, e ngera kired el kongei el meruul?

¹¹ Kede mo mekerang a lsekum e ngduubech a bekoiuiuul el rakt er a beluu el dekiei er ngii? Ngkired el oltirakl a rokui el ulekrael lomeskid a kabelment, el ua omeriso el chim, social distancing, ou mask, me a quarantine. A blakerreng er kid el meruul aika el tekoi ochotii el kmo kede kmal oba omereng el saul el kirel a klengar el sengk er a Dios.

12. Ngmekera omellach el debetik er ngii er a Osisechakl 14:15 e ngosukid el mo ungil melilt a tekoi el doumerang sel leduubech a tellemall?

¹² Sel leduubech a tekoi er a rolel a emergency, e a lebebil kede mo remenges a chais er a resechelid, retonari er kid, me a media el ngii a diak el klemerang. Ngdiak bo de “oumerang a rokui el tekoi” el derenges, e ngbai soad el mo orrenges aike el melemalt el information loltobed a kabelment me a retoktang. (Monguiu er a Osisechakl 14:15.) A Governing Body me aike el branch office a meruul aike el rokui el sebechir el mo medengei a melemalt el information er a uchei er a loltobed a ulekrael el kirel a miting er a ongdibel me a berkel a klumech. (Heb. 13:17) Sel doltirakl a ulekrael e kede mukerreu e dirrek el mo uchul me ngdiak el duubech a tellemall el mora rebebil. Ngdirrek el rullii a ungil chisel ongdibel el mora rechad er a beluu.​—1 Pe. 2:12.

13. Kede mekera ochotii el kmo kede mengreos er a sengk er a Dios er a klengar sel dolengesenges er a llechul el kirel a rasech?

¹³ A Resioning er a Jehovah lodengelterir a rechad el kmo te oumerang el kmo a rasech a chedaol. Kede olengesenges a llechul a Jehovah el kirel a rasech sel lak dekengei el mo melai a rasech, mo lmuut me a leduubech a emergency. (Rel. 15:28, 29, BT) Me nguaisei, engdi tia diak lebelkul a kmo ngsoad el mad. Kid a kmal mengreos er a klengar el sengk er a Dios. Kede osiik a ngeso er a retoktang el tir a kongei el meskid a kot lungil ukeruul el diak lousbech a rasech.

14. Ngmekera sebeched lolengeasek a emergency er a rolel a ukeruul?

¹⁴ A lsekum kede mo omekerreu er a health er kid loeak sel doltirakl aike el bla desuub er tia el suobel, e nglocha diak bo dousbech a botk me a lechub e ngkuk ta er a oberaod el rolel a ukeruul. E a lsekum ngmelemolem el lungil a bedenged e kede mo mereched el mo ungil sel bo dousbech a botk. Ngdirrek el sebeched el olengeasek a blekeradel el mo uchul a tellemall loeak sel doterekeklii el kmo a blid me a urered a safe e mo oltirakl a llach er a traffic.

15. (a) Ngera uchul me ngklou a ultutelel el deblechoel loba DPA er kid er a bek el taem? (Mdirrek lomes er a siasing.) (b) Ngua desa er a video, ngmekera sebeched el mo ungil melilt sel lebo er ngii a sodel a usbechel a rasech?

¹⁵ Kede kmal oba omereng el saul el kirel a  sengk er a klengar a uchul me kede fill out er a durable power of attorney e obang er a bek el taem. b Ngoeak tia el babier e kede ouchais a uldesued el kirel a usbechel a rasech me a bebil er a rolel a ukeruul. Ng up-to-date a DPA er kau? A lsekum e ngkirem el fill out me a lechub e ke update er ngii, e lak mongudel a blachel. Sel deluches aike lsoad e ngmo ngosukid el mo mereched el metik a rolel a ukeruul e le ngdiak bo de waste a taem el mengedecheduch er a toktang el kirel. Ngdirrek el oterekeklii el kmo ngdiak bo denguu a ukeruul me a lechub e ngkar el sebechel tomellid. c

16. Ngera sebeched el meruul er ngii a lsekum e ngdiak lulterekokl a rengud er a rolel a de fill out er a DPA?

¹⁶ A demeklou me a demekekerei, me ngii a sebechel a ngii di el chad el mo smecher me a lechub e ngduubech a accident el mo er ngii. (Oli. 9:11, NW) Sei a uchul me ngolechotel a llomeserreng om fill out er a DPA er kau. A lsekum e ngdiak lulterekokl a rengum er a rolel a de fill out er ngii e mongedecheduch er a remechuodel er a ongdibel er kau. Te melasem el mo medengei aike el rokui el omesodel a de fill out er tia el babier engdi ngkmal diak bo lolilt el kirem. Tia ngerechelem. (Gal. 6:4, 5) Me nguaisei, engdi ngsebechir el mo ngosukau el mo medengei a belkul aike el option el ngar ngii el kirem e ngosukau el fill out er ngii.

17. Ngmekera dochotii el kmo ngtabesul a uldesued el kirel a tekoi er a rolel a health?

¹⁷ A betok er a omelilt er kid el kirel a health er kid me a rolel a ukeruul a oltirakl er a ukltked el mla mosisechakl er a Biblia. (Rel. 24:16; 1 Ti. 3:9) Me sel doruul omelilt e dosaod lobengterir a rebebil e ngsoad loltaut er a omellach el ngar er a Filipi 4:5 (NW): “A tabesul el uldesuiu bo lodengelii a rokui el chad.” Sel bo doba tabesul el uldasu e ngdiak di debekikl el kirel a health er kid, me a ka dolasem el meruul er a rechad el mo omes a tekoi er a health el uaikid. Ngbetik a rengud er a rudam me a rudos er kid e mengull a uldesuir, mo lmuut me a lsekum omelilt er tir a ngodech er kid.​—Rom 14:10-12.

18. Ngmekera dochotii omereng el saul er kid el kirel a sengk er a klengar?

¹⁸ Kede ochotii er a Jehovah el ngike el uchul a klengar, a omereng el saul er kid sel domekerreu er a klengar er kid e debsang sel kot lungil er kid. (Och. 4:11) Chelechang e kede chelebangel a secher me a tellemall, engdi tia diak el sel klengar el mle moktek er a Ulemeob el kired. Ngdi kmedung e ngmo meskid a diak a ulebengelel el klengar el diak a ringel me a kodall. (Och. 21:4) Engdi chelecha el dongiil e ngmera el dmeu a rengud el ngar e mesiou er a Demad el ngar er a eanged el kmal betik a rengul er kid, el Jehovah!