1. Woo väl wieet es ons Läwen fa Jehova?

 STAL die mol väa, du kjrichst von eenen Frint een sea oolet un dieret jemoldet Bilt – een gaunz besondret. Daut es aul een bät utjeplakjt, de Foaw es een beskje veräten un daut haft een bät Plakjes. Oba wan daut uk een poa Fälakjes haft, es dit Bilt doawäajen noch millionende Dola wieet. Soon Jeschenkj wurscht du secha sea väl räakjnen un sea no oppaussen. Biejlikj soo haft Jehova ons uk een sea wieetvollet Jeschenkj jejäft – daut es ons Läwen. Woo väl Jehova ons Läwen räakjend, wees hee, aus hee sienen Sän aus Leesjelt fa ons jeef (Joh. 3:16).

2. Waut velangt Jehova von ons, soo aus daut en 2. Korinta 7:1 sajcht?

² Von Jehova kjemt aulet Läwen (Psa. 36:10). De Apostel Paulus jleewd daut uk. Hee säd: “Daut wie läwen, ons bewäajen un äwahaupt doa sent, es aula en am” (Apj. 17:25, 28). Doawäajen kjenn wie sajen, daut ons Läwen een Jeschenkj von Gott es. Hee jeft ons aules, waut ons fält, daut wie aum Läwen bliewen kjennen (Apj. 14:15-17). En dise Tiet helt Jehova ons nich derch een Wunda aum Läwen. Hee velangt, daut wie ons bastet doonen, om no onse Jesuntheit opptopaussen, soo daut wie am wieda deenen kjennen (läs 2. Korinta 7:1). Wuarom sell wie no onse Jesuntheit un no ons Läwen oppaussen? Un woo kjenn wie daut?

3. Waut es een Grunt, wuarom wie proowen sellen, jesunt to bliewen?

³ Een Grunt, wuarom wie proowen sellen, jesunt to bliewen, es, daut wie Jehova dan noch mea jäwen kjennen (Mar.  12:30). Wie wellen onsen “Kjarpa Gott . . . jäwen aus een heiljet, läwendjet Opfa, daut Gott aunnämen kaun” (Reem. 12:1). Doawäajen doo wie nich soone Sachen, waut ons krank moaken kunnen. Krakjt endoont waut wie aules doonen, om jesunt to bliewen, wie kjennen daut nich gaunz väabieejen, daut wie nich krank woaren. Oba wie doonen, waut wie kjennen, daut wie onsen Voda em Himmel wiesen, daut wie daut Läwen sea väl räakjnen.

4. Waut wull de Kjennich David?

⁴ De Kjennich David säd, wuarom hee daut soo väl räakjend, daut Gott am daut Läwen jejäft haud. Hee schreef: “Waut es en mien Doot fa een Jewenst, wan ekj em Grauf ligj? Woat de Stoff die lowen, un woat dee doavon räden, woo tru du best?” (Psa. 30:10). David schreef dise Wieed veleicht aum Enj von sien Läwen opp. Oba hee wull soo lang aus mäajlich koasch sennen un aum Läwen bliewen, daut hee Jehova wieda deenen kunn. Ons jeit daut secha krakjt soo.

5. Waut kjenn wie aula doonen, endoont woo oolt ooda prost auf wie sent?

⁵ Wan eena aul ella es ooda schaubich es, dan kaun eena veleicht nich mea daut doonen, waut eena ea kunn. Dan kaun daut sennen, daut eena sikj truarich ooda mootloos feelt. Oba daut wudd nich goot sennen, dan bloos opptojäwen ooda endoontich to woaren äwa de Jesuntheit. Wuarom nich? Wäajen endoont woo oolt ooda woo krank wie sent, wie kjennen Jehova doawäajen preisen, krakjt soo aus de Kjennich David daut deed. Treest ons daut nich sea to weeten, daut wie doawäajen wieetvoll sent fa Gott, wan wie uk krank ooda oolt sent? (Mat. 10:29-31). Wan wie uk stoawen, wudd Jehova oba een Velangen haben, ons wada opptowakjen (Hiob 14:14-15). Doawäajen well wie aules doonen, waut wie kjennen, om onse Jesuntheit un ons Läwen to beschitzen.

6. Waut velangt Jehova von ons, wan daut om äten un drinkjen jeit?

⁶ De Bibel es nich uzhent een Buak, waut ons sajcht, woo wie no onse Jesuntheit oppaussen sellen ooda waut wie äten sellen. Oba dee wiest ons, woo Jehova äwa soont denkjt. Daut sajcht biejlikj: “Schoon dienen Kjarpa von Schoden” (Liera 11:10). De Bibel veuadeelt daut, too väl to äten ooda too väl stoakjet to drinkjen, wäajen daut kaun onse Jesuntheit schoden un wie kjennen mau rajcht doaraun stoawen (Spr. 23:20). Jehova velangt von ons, daut wie ons beoabeiden, wan daut doarom jeit, woo väl wie äten un drinkjen (1. Kor. 6:12; 9:25, NW).

7. Woo halpt de Rot von Spricha 2:11 ons, goode Entscheidungen to moaken, wan daut om onse Jesuntheit jeit?

⁷ Wan wie ons Vestaunt goot brucken, kjenn wie goode Entscheidungen trafen, waut wiesen, daut wie dankboa sent fa daut Läwen (Psa. 119:99-100; läs Spricha 2:11). Wie kjennen biejlikj goot doaräwa nodenkjen, waut wie äten. Wan wie eene Sort Äten sea jleichen, oba wie weeten, daut ons daut krank moakt, dan woa wie daut nich äten. Wie bewiesen uk, daut wie ons Vestaunt goot brucken, wan wie jenuach schlopen, pinkjlich ekserseisen un onsen Kjarpa un ons Hus reinhoolen.

8. Waut lia wie en de Bibel doaräwa, woo Gott äwa onse Sechaheit denkjt?

⁸ Jehova jeef de Israeliten Jesazen, woo dee sikj beschitzen kunnen, daut dee tus ooda biem schaufen nich tosplät kjeemen (2. Mo. 21:28-29; 5. Mo. 22:8). Wan eena eenen aundren derch een Ojjlekj ombrocht, haud daut groote Foljen (5. Mo. 19:4-5). Daut Jesaz velangd, daut mau  rajcht soona jestroft wort, waut derch een Ojjlekj een ojjebuarnet Bäbe velazt haud (2. Mo. 21:22-23, NW). De Schreft moakt daut gaunz dietlich, daut Jehova well, daut wie ons bastet doonen, om Ojjlekjs väatobieejen.

9. Waut kjenn wie doonen, om Ojjlekjs väatobieejen? (See uk de Bilda.)

⁹ Wie wiesen, daut wie daut Läwen, waut wie von Gott jekjräajen haben, väl räakjnen, wan wie tus un oppe Oabeit proowen, en Sechaheit to schaufen. Wan wie biejlikj waut wajchschmieten, soo aus Medizien ooda schoape ooda jeftje Sachen, dan well wie daut soo doonen, daut et kjeenem schoden kaun. Wie woaren uk doano oppaussen, daut wie soont nich wua hansaten, wua Kjinja hankjennen. Wie motten uk sea väasechtich sennen, wan wie biejlikj met soowaut schaufen aus Fia, koakendet Wota ooda aundret heetet Flissendet un ellektrischet Jereetschoft, un wie wellen daut uk nich eefach irjentwua romligjen haben. Wie woaren ons uk nich aum Stia saten, wan wie Medizien enjenomen haben, waut ons schleeprich moakt ooda beteipt ooda wan wie too väl Alkohol jedrunken haben. Wie  woaren uk nich foaren, wan wie too meed sent un ons uk nich von ons Fon auflenkjen loten.

10. Waut kjenn wie aul ea doonen, ea een Nootfaul oppkjemt?

¹⁰ Bieaun kjenn wie daut nich väabieejen, daut wie en eene jefäadelje Loag nennkomen. Besonda haustich kaun daut sennen, wan doa een Owwada, eene wiet vespreede Krankheit ooda Orru em Launt es. Wan soon schlemmet passieet, kjenn wie doawäajen proowen, soo secha to bliewen aus mäajlich un to äwaläwen. Daut kjenn wie, wan wie ons no daut rechten, waut de Veauntwuatelje sajen; aus daut nu es, daut wie sellen tus bliewen, daut wie ons sellen fuatbrinjen ooda daut wie sestwaut doonen sellen (Reem. 13:1, 5-7). Fa eenje Jefoaren kaun eena sikj aul ea reedmoaken. Doawäajen wudd daut goot sennen, daut wie no de Aunwiesungen von de Rejierunk horchen, waut wie ver eenen Nootfaul doonen sellen. Daut wudd biejlikj goot sennen, wan wie Wota un soon Äten tus hauden, waut nich schlajcht woat, un uk een Medizienkaustje, wua daut needichste bennen es.

11. Waut sell wie doonen, wan sikj en onse Jäajent eene äwaschlapende Krankheit vebreet?

¹¹ Waut wudd wie sellen doonen, wan sikj en onse Jäajent eene äwaschlapende Krankheit vebreed? Wie wudden sellen de Aunwiesungen nokomen, waut de Rejierunk ons jeft, soo aus foaken de Henj wauschen, von aundre uteneen bliewen, eenen Näs- un Mulschutz brucken ooda tus bliewen, wan wie krank sent. Wan wie aul daut doonen, dan wies wie, woo väl wie daut räakjnen, daut Gott ons daut Läwen jejäft haft.

12. Woo kaun Spricha 14:15 ons halpen to entscheiden, no waut wie horchen, wan doa waut schlemmet passieet?

¹² Wan doa een Nootfaul es, dan kjrie wie eenjemol veleicht waut von onse Frind, onse Nobasch ooda en de Norechten to hieren, waut goanich soo es. Dan well wie nich eefach irjentwaut jleewen, oba wie wellen no soont horchen, waut opp to veloten es un veleicht von de Rejierunk ooda Doktasch kjemt (läs Spricha 14:15). De Väastaunt un de Betels strenjen sikj sea aun, daut dee om eene Sach krakjt omweeten, ea dee fa de Toopkomes ooda daut Prädichtwoakj Aunwiesungen jäwen (Heb. 13:17). Wan wie dise Aunwiesungen nokomen, pauss wie no ons selfst un no aundre opp, daut ons nich soo leicht waut woat. Doaderch kjenn wie uk methalpen, daut aundre goot äwa Jehova siene Zeijen denkjen (1. Pet. 2:12).

13. Woo wies wie, daut wie daut Läwen väl räakjnen, wan daut om daut Bloot jeit?

¹³ Jehova siene Zeijen sent doafäa bekaunt, daut dee faust doaraun jleewen, daut daut Bloot heilich es. Wie wellen Jehova sien Jesaz äwa daut Bloot jehorchen un ons nich Bloot enlakjen loten, nich mol, wan daut om eene drinjende Doktarie jeit (Apj. 15:28-29). Oba daut meent nich, daut wie stoawen wellen. Daut Gott ons daut Läwen jeschonken haft, es fa ons sea väl wieet. Wie sieekjen ons goode Doktasch ut, waut eene sea feine Oabeit doonen wellen, wua nich Bloot met en es.

14. Waut kjenn wie doonen, daut ons nich soo leicht eene drinjende Doktarie fält?

¹⁴ Wan wie doano kjikjen, daut wie jesunt bliewen un dee Sachen doonen, wua wie en disen Artikjel aul ea von jerät haben, woat daut nich soo leicht bat doa komen, daut ons haustich een Oppereeschen fält ooda eene aundre groote Doktarie. Je koascha wie sent, je bosja woa wie wada utjeheelt sennen. Un ons woat uk nich soo leicht onverhofs een Oppereeschen fälen, wan wie  doano seenen, daut daut bie ons Tus un oppe Oabeit secha es un wie ons biem foaren krakjt aun de Jesazen hoolen.

15. (a) Wuarom es daut wichtich, daut wie soonen Boagen fa Nootfaul un Doktarie methaben, waut noch jeltich es? (See uk daut Bilt.) (b) Wan wie waut entscheiden wellen äwa Doktarieen, mott wie doa goot omweeten. Waut wiest daut Video, waut ons doabie halpen kaun?

¹⁵ Wäajen wie daut Läwen väl räakjnen, fell wie uk dän Boagen fa Nootfaul un Doktarie ut (een Boagen, wua bowen steit, waut wie fa Doktarieen haben wellen) un haben dän uk emma met. b Opp disen Boagen schriew wie nopp, waut wie haben wellen, wan daut om Bloot enlakjen ooda om aundre Doktarieen jeit. Paust daut noch, waut opp dienen Boagen steit? Wan du dienen Boagen oppfreschen ooda utfellen motst, dan doo daut nu fuaz. Wan du daut, waut du haben west, dietlich oppschrifst, dan kaun daut halpen, daut et met diene Doktarie bosja jeit, wäajen du nich Tiet vesiemst un de Doktasch daut ieescht utlajen motst. Soo kjenn wie daut uk väabieejen, daut wie nich soone Doktarie ooda Medizien kjrieen, waut jefäadlich fa ons sennen kaun. c

16. Waut kaust du doonen, wan du nich krakjt weetst, woo du dän Boagen fa Nootfaul un Doktarie utfellen saust?

 ¹⁶ Wan wie uk noch junk ooda uk gaunz jesunt sent, kjenn wie doch aula haustich een Ojjlekj haben ooda krank woaren (Liera 9:11). Doawäajen wudd daut sea kluak sennen, wan wie dän Boagen fa Nootfaul un Doktarie utfellen deeden. Wan du nich weetst, woo daut krakjt mott, kaust du de Eltestasch von diene Vesaumlunk no Help froagen. Dee strenjen sikj aun, dän Boagen goot to kjanen, oba dee woaren nich Entscheidungen fa die trafen. Daut motst du selfst doonen (Gal. 6:4-5). Oba dee kjennen die halpen to vestonen, waut vonne Mäajlichkjeiten du hast un daut dan opp dienen Boagen nopptoschriewen.

17. Woo kjenn wie wiesen, daut wie derchjedocht sent, wan daut om de Jesuntheit jeit?

¹⁷ Wäajen wie ons Jewessen met de Bibel oppjeschoapt haben, traf wie väl Entscheidungen äwa onse Jesuntheit ooda Doktarieen doano (Apj. 24:16; 1. Tim. 3:9). Wan wie Entscheidungen trafen un met aundre doaräwa räden, wudd daut goot sennen, wan wie dän Gruntsauz von Filippa 4:5 (NW) nokjeemen: “Lot aule Menschen daut seenen, woo derchjedocht jie sent.” Wan wie derchjedocht sent, dan woa wie ons nich too sea doaräwa sorjen, woo daut met onse Jesuntheit steit un wie woaren uk nich aundre bat doa brinjen wellen, daut dee krakjt soo entscheiden aus wie. Wie respakjten un räakjnen onse Breeda un Sestren sea väl, wan dee uk aundre Entscheidungen moaken aus wie (Reem. 14:10-12).

18. Woo kjenn wie wiesen, daut wie fa daut Läwen dankboa sent?

¹⁸ Wan wie goot oppaussen no ons Läwen un Jehova ons bastet jäwen, dan wies wie, daut wie Jehova, von dän aulet Läwen kjemt, sea dankboa sent (Opb. 4:11). Nu mott wie noch met Krankheiten un Schwierichkjeiten foadich woaren, oba daut es nich daut Läwen, waut ons Schepfa fa ons haben wull. Hee woat ons boolt eewjet Läwen jäwen onen Weedoag un Doot (Opb. 21:4). Bat daut bat doa es, well wie ons freien, daut wie aum Läwen sent un onsen himlischen Voda Jehova deenen kjennen!