1.‏ یہوواہ دی نظر چ ساڈی زندگی کِنّی قیمتی اے؟‏

 ذرا تصور کر‌و کہ تواڈا اِک دوست توانوں اِک بوہت ای پرانی پر بڑی قیمتی گڈی دیندا اے۔ایہدا پینٹ تھوڑا اُکھڑیا ہویا اے، ایہدے تے تھوڑا زنگ لگیا ہویا اے نالے کجھ چبِ وی پئے ہوئے نیں۔ ایہناں ساریاں گلاں دے باوجود وی ایس گڈی دی قیمت لکھاں وچ اے۔ یقیناً تُسی ایہدی بڑی قدر کر‌و گے نالے ایہنوں بڑا سانبھ کے رکھو گے۔ ایسے طرحاں یہوواہ نے وی سانوں اِک بوہت ای قیمتی تحفہ دِتا اے تے ایہہ تحفہ ساڈی زندگی اے۔ یہوواہ نے اپنے پُتر نُوں ساڈے لئی قربان کر کے ایہہ ثابت کیتا اے کہ اوہدی نظر چ ساڈی زندگی کِنّی قیمتی اے۔—‏یوحنا 3:‏16‏۔‏

2.‏ 2-‏کُرنتھیوں 7:‏1 دے مطابق یہوواہ ساڈے کولوں کیہہ چاہندا اے؟‏

² یہوواہ زندگی دین والا خدا اے۔ (‏زبور 36:‏9‏)‏ پولس نُوں وی ایس گل تے یقین سی۔ اوہنے یہوواہ بارے کہیا:‏ اوہدے ذریعے ای اَسی زندہ واں، چلنے پھرنے آں تے موجود آں۔ (‏اعمال17:‏25، 28)‏ ایس لئی ایہہ کہنا غلط نئیں ہوئے گا کہ زندگی یہوواہ وَلّوں اِک نعمت اے۔ اوہ سانوں بڑے پیار نال اوہ سب کجھ دیندا اے جدی سانوں زندہ رہن لئی ضرورت اے۔ (‏اعمال 14:‏15-‏17‏)‏ پر یہوواہ سانوں زندہ رکھن لئی کوئی معجزے نئیں کر‌دا۔ ایہدی بجائے اوہ چاہندا اے کہ اَسی آپ اوہ سارے کم کر‌یئے جیہڑے صحت‌مند رہن لئی تے اوہدی عبادت کر‌دے رہن لئی ضروری نیں۔ ‏(‏2-‏کُرنتھیوں 7:‏1 نُوں پڑھو۔)‏ پر سانوں اپنی صحت دا خیال کیوں رکھنا چاہی دا اے تے اپنی زندگی دی حفاظت کیوں کر‌نی چاہی دی اے؟تے اَسی اِنج کیویں کر سکنے آں؟‏

3.‏ اپنی صحت دا خیال رکھن دی اِک وجہ کیہہ اے؟‏

³ اپنی صحت دا خیال رکھن دی اِک وجہ ایہہ وے کہ اَسی جی جان نال یہوواہ دی عبادت کر سکئے۔ (‏مرقس 12:‏30‏)‏ ساڈی خواہش اے کہ اَسی اپنے جسم اِک ایہو جہی قربانی دے طور تے پیش کر‌یئے جیہڑی زندہ، پاک تے خدا نُوں پسند اے۔ ایس لئی اَسی کوئی وی ایہو جیہا کم نئیں کر‌دے جدی وجہ توں ساڈی صحت نُوں نقصان پونچے۔ (‏رومیوں 12:‏1‏)‏ ایہہ گل سچ اے کہ اَسی بھانویں جو کجھ وی کر لئیے، فیر وی  اَسی پورے یقین نال ایہہ نئیں کہہ سکدے کہ اَسی کدی بیمار نئیں ہوواں گے۔ پر اَسی اپنی صحت دا خیال رکھن لئی اوہ سب کجھ ضرور کر‌نے آں جیہڑا ساڈے وَس چ اے کیونکہ اَسی ثابت کر‌نا چاہنے کہ اَسی اپنے اسمانی باپ وَلّوں مِلن والی ایس نعمت دی قدر کر نے آں۔‏

4.‏ بادشاہ داؤد دی کیہہ خواہش سی؟‏

⁴ بادشاہ داؤد نے دَسیا کہ اوہ زندگی دی نعمت دی اینی قدر کیوں کر‌دا اے۔ اوہنے کہیا:‏ کیہہ فائدہ جے میں مر کے قبر وچ چلا گیا؟ کیہہ مٹی تیری وڈیائی کر‌ے گی؟ کیہہ ایہہ تیری وفاداری نُوں بیان کر‌ے گی؟ (‏زبور 30:‏9‏)‏ داؤد نے شاید ایہہ الفاظ اوس ویلے لکھے جدوں اوہدی زندگی ختم ہون والی سی۔ پر اوہدی ایہہ خواہش سی کہ اوہ زندہ رہوے تے جدوں تک ممکن ہووے یہوواہ دی وڈیائی کر‌ے۔ یقیناً ساڈے ساریاں دی وی ایہی خواہش اے۔‏

5.‏ اَسی ودھدی عمر یاں بیماری دے باوجود وی کیہہ کر سکنے آں؟‏

⁵ بیماری تے بڑھاپے دی وجہ توں شاید اَسی اوہ سب کجھ نہ کر سکئے جو اَسی پہلے کر‌دے ہوندے ساں۔ شاید اَسی ایس وجہ توں چڑچڑے یاں دُکھی ہو جائیے۔ پر سانوں ہمت نئیں ہارنی چاہی دی تے اپنی صحت دا خیال رکھن دی پوری کوشش کر‌نی چاہی دی اے۔ سانوں اِنج کیوں کر‌نا چاہی دا اے؟ بھانویں ساڈی عمر جِنّی وی ہووے یاں اَسی جِنّے وی بیمار ہوئیے، اَسی یہوواہ دی وڈیائی کر سکنے آں جیویں بادشاہ داؤد نے کیتی سی۔ سانوں ایس گل توں بڑی تسلی مِلدی اے کہ بھانویں اَسی بُڈھے ہو جائیے یاں بیمار، فیر وی اَسی یہوواہ دی نظر چ خاص ای رہنے آں۔ (‏متی 10:‏29-‏31‏)‏ جے اَسی مر وی جائیے تے فیر وی یہوواہ دی ایہہ خواہش ہوئے گی کہ اوہ سانوں زندہ کر‌ے۔ (‏ایوب 14:‏14، 15‏)‏ جدوں تک اَسی زندہ واں، اَسی اپنی زندگی دی حفاظت تے اپنی صحت دا خیال رکھن لئی اوہ سب کجھ کر‌نا چاہنے آں جو اَسی کر سکنے آں۔‏

6.‏ کھان پین دے معاملے چ یہوواہ ساڈے کولوں کیہہ توقع کر‌دا اے؟‏

⁶ بائبل کوئی ایہو جہی کتاب نئیں اے جدے چ دَسیا جائے کہ سانوں اپنی صحت دا خیال کیویں رکھنا چاہی دا اے یاں کیہہ کھانا پینا چاہی دا اے۔ پر ایہدے چ ایہہ ضرور دَسیا گیا اے کہ ایہناں چیزاں بارے یہوواہ دی کیہہ سوچ اے۔ مثال لئی، بائبل چ سانوں نصیحت کیتی گئی اے کہ اَسی اپنے جسم چوں بدی کڈھ دَئیے یعنی اوہناں ساریاں چیزاں توں دُور رہیے جیہڑیاں ساڈے جسم نُوں نقصان پونچا سکدیاں نیں۔ (‏واعظ 11:‏10‏)‏ بائبل چ سانوں حد توں زیادہ کھانا کھان تے شراب پین توں منع کیتا گیا اے کیونکہ ایہدی وجہ توں ساڈی صحت خراب ہو سکدی اے، ایتھوں تک کہ ساڈی جان وی جا سکدی اے۔ (‏امثال 23:‏20‏)‏ یہوواہ چاہندا اے کہ جدوں اَسی ایہہ فیصلے کر رہے ہوئیے کہ اَسی کیہہ تے کِنّاں کھانواں پیواں گے تے اوس ویلے اَسی اپنے آپ تے قابو رکھئے۔—‏1-‏کُرنتھیوں 6:‏12؛‏ 9:‏25‏۔‏

7.‏ امثال 2:‏11 چ لکھی گل صحت بارے صحی فیصلے کر‌ن چ ساڈی مدد کیویں کر‌دی اے؟‏

⁷ جدوں اَسی اپنی سوچن سمجھن دی صلاحیت نُوں صحی طرحاں استمال کر کے فیصلے کر‌نے آں تے اَسی ثابت کر‌نے آں کہ اَسی زندگی دی نعمت دی بوہت قدر کر‌نے آں۔ (‏زبور 119:‏99، 100؛‏ امثال 2:‏11 نُوں پڑھو۔)‏ مثال لئی، اَسی سوچ سمجھ کے فیصلہ کر‌نے آں کہ اَسی کیہہ کھانواں گے۔ جے سانوں لگدا اے کہ کسے کھانے دی وجہ توں اَسی بیمار ہو سکنے آں تے اَسی اوہنوں نئیں کھانواں گے۔ ایہدے علاوہ جدوں اَسی اپنی نیندر پوری کر نے آں،روزانہ ورزش کر‌نے آں نالے اپنے آپ نُوں تے اپنے گھر نُوں صاف ستھرا رکھنے آں تے اَسی ثابت کر‌نے آں کہ اَسی سمجھدار آں۔‏

8.‏ بائبل توں کیویں پتہ چلدا اے کہ یہوواہ دی نظر چ ایہہ گل بڑی اہم اے کہ اَسی اپنی جان دی حفاظت کر‌یئے؟‏

⁸ یہوواہ نے بنی‌اِسرائیل نُوں جیہڑی شریعت دِتی سی، اوہدے چ ایہو جہے حکم وی سن جنہاں تے عمل کر کے اوہ اپنے گھر تے کم دی جگہ تے حادثیاں توں بچ سکدے سن۔ (‏خروج 21:‏28، 29؛‏ اِستثنا 22:‏8‏)‏ جے کسے بندے کولوں غلطی نال وی کوئی بندہ مر جاندا سی تے اوہنوں ایہدے نتیجے بُھگتنے پیندے سن۔ (‏اِستثنا 19:‏4، 5‏)‏ شریعت چ ایہہ وی دَسیا گیا سی کہ جے کسے بندے کولوں غلطی نال کسے حاملہ عورت دے بچے نُوں نقصان پونچے تے اوہنوں ایہدی سزا دِتی جائے۔ (‏خروج 21:‏22، 23‏)‏ بائبل توں صاف صاف پتہ چلدا اے کہ یہوواہ چاہندا اے کہ اَسی حادثیاں توں بچن دی پوری کوشش کر‌یئے۔‏

9.‏ اَسی حادثیاں توں بچن لئی کیہہ کر سکنے آں؟ (‏تصویراں نُوں وی ویکھو۔)‏

 ⁹ جدوں اَسی اپنے گھر تے کم دی جگہ تے احتیاط نال کم کر‌نے آں تے اَسی ثابت کر‌نے آں کہ اَسی زندگی دی نعمت دی قدر کر‌نے آں۔ مثال لئی جدوں سانوں کوئی زہریلے کیمیکل، دوائیاں یاں ایہو جہیاں چیزاں سُٹنیاں پیندیاں نیں جیہڑیاں ہتھ تے پھر سکدیاں نیں تے اَسی ایہناں نُوں اِنج سُٹنے آں کہ ایہدے توں دُوجیاں نُوں نقصان نہ پونچے تے اَسی ایس گل دا وی خیال رکھنے آں کہ ایہہ چیزاں بچیاں دے ہتھے نہ چڑھ جان۔ ایہدے علاوہ سانوں اَگ بال کے، پانی چولہے تے دھر کے یاں بجلی نال چلن والی کوئی مشین چلا کے ایتھے اوتھے نئیں چلے جانا چاہی دا کیونکہ ایہدے توں نقصان ہو سکدا اے۔ سانوں اوس ویلے گڈی نئیں چلانی چاہی دی جدوں اَسی شراب پیتی ہووے،ساڈی نیندر نہ پوری ہوئی ہووے یاں اَسی کوئی ایہو جہی دَوائی کھادی ہووے جدے نال نیندر آندی اے کیونکہ ایہو جہی حالت چ ساڈا ذہن صحی طرحاں کم نئیں کر‌دا۔ ایہدے علاوہ اَسی گڈی چلاندے ویلے اپنا فون یاں ٹیبلٹ وغیرہ استمال نئیں کر‌دے۔‏

10.‏ کسے آفت دے آن توں پہلے تے ایہدے دوران اَسی کیہہ کر سکنے آں؟‏

¹⁰ کدی کدار ایہو جہی صورتحال توں بچنا ممکن نئیں ہوندا جدے چ ساڈی زندگی نُوں خطرہ ہووے۔ اِنج خاص طور تے اوس ویلے ہو سکدا اے  جدوں کوئی قدرتی آفت آ جاندی اے،کوئی وبا پھیل جاندی اے یاں دنگے فساد شروع ہو جاندے نیں۔ پر جدوں اِنج ہوندا اے تے سانوں اپنے آپ نُوں محفوظ رکھن دی پوری کوشش کر‌نی چاہی دی اے۔ ایس لئی جدوں حکومت سانوں کسے علاقے نُوں چھڈن دی ہدیت دیندی اے یاں ساڈے گھروں باہر نِکلن تے پابندی لاندی اے یاں فیر کوئی ہور ہدیتاں دیندی اے تے سانوں ایہناں نُوں فوراً مننا چاہی دا اے۔ (‏رومیوں 13:‏1،‏ 5-‏7‏)‏ کجھ خطرناک صورتحال لئی پہلے توں تیاری کیتی جا سکدی اے۔ ایس لئی جدوں حکومت سانوں ایس حوالے نال کوئی ہدیت دیندی اے تے سانوں ایہدے تے عمل کر‌نا چاہی دا اے۔ مثال لئی اَسی اپنے کول کھان پین دِیاں ایہو جہیاں چیزاں رکھ سکنے آں جیہڑیاں چھیتی خراب نہ ہون۔ اَسی اپنے کول پانی دِیاں کجھ بوتلاں تے مرہم‌پٹی دا سامان وی رکھ سکنے آں۔‏

11.‏ جدوں کوئی وبا پھیل جاندی اے تے سانوں کیہہ کر‌ن لئی تیار رہنا چاہی دا اے؟‏

¹¹ سانوں اوس ویلے کیہہ کر‌نا چاہی دا اے جدوں ساڈے علاقے چ کوئی وبا پھیل جاندی اے؟ سانوں حکومت وَلّوں مِلن والیاں ہدیتاں تے عمل کر‌نا چاہی دا اے۔ مثال لئی شاید حکومت ہتھ دھون، دُوجیاں توں فاصلہ رکھن، ماسک پان تے اپنے آپ نُوں دُوجیاں توں الگ رکھن بارے ہدیتاں دَوے۔ جدوں اَسی ایہناں ہدیتاں نُوں مناں گے تے اَسی ثابت کر‌اں گے کہ اَسی زندگی دی نعمت دی قدر کر‌نے آں۔‏

12.‏ امثال 14‏:‏15چ لکھی گل ایہہ فیصلہ کر‌ن چ ساڈی مدد کیویں کر‌دی اے کہ آفت دے دوران اَسی کیہڑیاں گلاں تے یقین کر‌اں گے؟‏

¹² جدوں کوئی آفت آندی اے تے شاید سانوں اپنے دوستاں، گوانڈھیاں تے میڈیا توں ایہو جہیاں خبراں سُنن نُوں مِلن جیہڑیاں سچیاں نہ ہون۔ ہر گل تے یقین کر‌ن دی بجائے سانوں اوس معلومات تے دھیان دینا چاہی دا اے جیہڑی سانوں بھروسےمند سرکاری اِداریاں تے ڈاکٹراں وَلّوں مِلدی اے۔ ‏(‏امثال 14:‏15 نُوں پڑھو۔)‏ گورننگ باڈی تے برانچ دے دفتر پوری کوشش کر‌دے نیں کہ اوہ مُنادی تے عبادتاں بارے ہدیتاں دین توں پہلے صحی معلومات کٹھی کر‌ن۔ (‏عبرانیوں 13:‏17‏)‏ جدوں اَسی ایہناں ہدیتاں تے عمل کر‌اں گے تے اَسی اپنے آپ نُوں تے دُوجیاں نُوں محفوظ رکھاں گے۔ ایہدے علاوہ اِنج دُوجیاں دی نظر چ یہوواہ دے گواہواں دی نیک نامی قائم رہوے گی۔—‏1-‏پطرس 2:‏12‏۔‏

13.‏ جدوں خون لوان دی گل آندی اے تے اَسی کیویں ثابت کر‌نے آں کہ اَسی زندگی دی نعمت دی قدر کر‌نے آں؟‏

¹³ بوہت سارے لوک ایہہ گل جاندے نیں کہ یہوواہ دے گواہ خون نُوں بوہت پاک خیال کر‌دے نیں۔ جدوں کسے ایمرجنسی چ وی سانوں خون لوان لئی کہیا جاندا اے تے اَسی ایہنوں لوان توں اِنکار کر‌نے آں۔ اِنج اَسی ظاہر کر‌نے آں کہ اَسی خون بارے یہوواہ دے حکم تے عمل کر رہے آں۔ (‏اعمال 15:‏28، 29‏)‏ پر ایہدا ایہہ مطلب نئیں اے کہ اَسی مرنا چاہنے آں۔ ایہدی بجائے اَسی زندگی نُوں یہوواہ وَلّوں اِک نعمت خیال کر‌نے آں۔ ایس لئی اَسی ایہو جہے ڈاکٹراں کولوں مدد لینے آں جیہڑے خون دے بغیر وی چنگے توں چنگا علاج کر‌ن لئی تیار نیں۔‏

14.‏ اَسی ایہو جہے حادثیاں توں کیویں بچ سکنے آں جنہاں دی وجہ توں سانوں آپریشن کر‌انا پے سکدا اے؟‏

¹⁴ ایس مضمون چ دَسیاں گلاں تے عمل کر‌ن نال اَسی اپنی صحت دا خیال رکھ سکنے آں تے ایہو جہے حادثیاں توں بچ سکنے آں جنہاں دی وجہ توں سانوں کوئی آپریشن کر‌انا پے سکدا اے۔ پر فیر وی ہو سکدا اے کہ سانوں کوئی آپریشن کر‌انا ای پووے۔ ایس لئی ساڈی صحت جِنّی چنگی ہوئے گی، اَسی اونی چھیتی کسے آپریشن توں بعد ٹھیک ہو جاواں گے، نالے آپریشن دے دوران وی کوئی مسئلہ نئیں ہوئے گا۔ایہدے علاوہ جے اَسی ٹریفک دے قانوناں تے عمل کر‌اں گے نالے اپنے گھر تے کم دی جگہ توں خطرناک چیزاں نُوں ہٹا دواں گے تے اَسی ایہو جہے حادثیاں توں بچ سکاں گے جنہاں چ اچانک آپریشن کر‌انا پے سکدا اے۔‏

15.‏ (‏الف)‏ ایہہ کیوں ضروری اے کہ اَسی ‏”‏خون سے میرے علاج کے سلسلے میں پیشگی ہدایات“‏ والے کارڈ نُوں ہر ویلے اپنے کول رکھئے؟ (‏تصویر نُوں وی ویکھو۔)‏ (‏ب)‏ جیویں کہ ویڈیو چ وکھایا گیا اے، اَسی علاج چ خون دے استمال بارے صحی فیصلے کیویں کر‌سکنے آں؟‏

¹⁵ اَسی زندگی دی نعمت دی بوہت قدر کر‌نے آں۔ ایس لئی اَسی ‏”‏خون سے میرے علاج کے سلسلے میں پیشگی ہدایات“‏ والے کارڈ نُوں  بھرنے آں تے ایہنوں ہر ویلے اپنے کول رکھنے آں۔‏ b ایس کارڈ اُتے اَسی خون دے استمال تے علاج بارے اپنے فیصلے لکھ سکنے آں۔ کیہہ تواڈے کول ایہہ نواں والا کارڈ ہے وے؟ جے توانوں ایس نویں کارڈ نُوں بھرن یاں ایہدے چ تازہ معلومات لکھن دی لوڑ اے تے اِنج کر‌ن چ دیر نہ کر‌و۔ جے اَسی اپنے فیصلیاں بارے صاف صاف لکھیا ہوئے گا تے ساڈا علاج شروع ہون چ دیر نئیں ہوئے گی۔ نالے ایہدے توں ڈاکٹراں تے نرساں نُوں وی مدد ملے گی تے اوہ سانوں کوئی ایہو جہی دَوائی نئیں دین گے یاں ساڈا کوئی ایہو جیہا علاج نئیں کر‌ن گے جدے توں سانوں نقصان ہو سکدا اے۔‏ c

16.‏ جے سانوں ‏”‏خون سے میرے علاج کے سلسلے میں پیشگی ہدایات“‏ والے کارڈ نُوں بھرنا مشکل لگدا اے تے اَسی کیہہ کر‌سکنے آں؟‏

¹⁶ بھانویں اَسی جوان یاں کِنّے ای صحت‌مند کیوں نہ ہوئیے، ساڈے ساریاں نال کدی وی کوئی حادثہ ہوسکدا اے یاں اَسی بیمار ہو سکنے آں۔ (‏واعظ 9:‏11‏)‏ ایس لئی ایہہ سمجھ‌داری دی گل ہوئے گی کہ اَسی ‏”‏خون سے میرے علاج کے سلسلے میں پیشگی ہدایات“‏والے کارڈ نُوں بھر کے رکھئے۔ جے توانوں ایس کارڈ نُوں بھرنا نئیں آندا تے تُسی اپنی کلیسیا دے بزرگاں کولوں مدد لے سکدے او۔ اوہ جان‌دے نیں کہ ایہنوں کیویں بھرنا اے۔ پر علاج دے سلسلے چ اوہ تواڈے لئی فیصلہ نئیں کر‌ن گے۔ ایہہ تواڈی اپنی ذمےداری اے۔ (‏گلتیوں 6:‏4، 5‏)‏ اوہ توانوں ایہہ سمجھن چ مدد کر‌ن گے کہ علاج لئی کیہڑے کیہڑے طریقے  موجود نیں تے اوہ تواڈے فیصلے نُوں ایس کارڈ تے لکھن چ تواڈی مدد کر‌ن گے۔‏

17.‏ اَسی کیویں ثابت کر سکنے آں کہ اَسی صحت دے معاملے چ سمجھ‌داری نال کم لینے آں؟‏

¹⁷ اَسی اپنے ضمیر دی تربیت بائبل دے اصولاں مطابق کیتی ہوئی اے تے ایسے ضمیر دے مطابق اَسی اپنی صحت تے علاج بارے فیصلے کر‌نے آں۔ (‏اعمال 24:‏16؛‏ 1-‏تیمُتھیُس 3:‏9‏)‏ ایہو جہے فیصلے کر‌دے ویلے تے ایہدے بارے دُوجیاں نال گل بات کر‌دے ویلے سانوں اوہ گل یاد رکھنی چاہی دی اے جیہڑی فِلپّیوں 4:‏5 چ لکھی اے۔ ایس ایت چ لکھیا اے:‏ تواڈی سمجھ‌داری ساریاں نُوں نظر آوے۔ جدوں اَسی سمجھ‌داری نال کم لینے آں تے اَسی ہر ویلے اپنی صحت بارے نئیں سوچدے رہندے۔ نالے اَسی صحت دے معاملے چ اپنی سوچ دُوجیاں تے نئیں تھوپدے۔ اَسی اوس ویلے وی اپنے بھین بھراواں لئی محبت تے عزت وکھانے آں جدوں اوہناں دے فیصلے ساڈے فیصلیاں توں فرق ہوندے نیں۔—‏رومیوں 14:‏10-‏12‏۔‏

18.‏ اَسی کیویں ثابت کر‌سکنے آں کہ اَسی زندگی دی نعمت دی قدر کر‌نے آں؟‏

¹⁸ جدوں اَسی اپنی زندگی دی حفاظت کر‌نے آں تے جی جان نال یہوواہ دی عبادت کر‌نے آں تے اَسی ایہہ ثابت کر‌نے آں کہ اَسی زندگی دی نعمت دی قدر کر‌نے آں۔ (‏مکاشفہ 4:‏11‏)‏ اَج سانوں بیماریاں تے آفتاں دا سامنا کر‌نا پیندا اے۔ پر ساڈا خالق کدی وی ایہہ نئیں چاہندا سی کہ اَسی ایہو جہی زندگی گزاریئے۔چھیتی ای اوہ سانوں ہمیشاں دی زندگی دَوے گا جدے چ نہ موت ہوئے گی تے نہ درد۔ (‏مکاشفہ 21:‏4‏)‏ پر جدوں تک اوہ ویلا نئیں آندا، اَسی اپنا خیال رکھاں گے تاکہ اَسی اپنے شفیق اسمانی باپ دی خدمت کر‌دے رہیے۔‏