1. Ia uwen Siohwa eh ketin kesempwalki atail mour?

 MEDEWEHLA me kompoakepahmw men kihong uhk ihmw ehu. Litopw en ihmwo sarasangehr oh mie impwi. Mendahki kahpwal pwukat, ihmwo mwahu oh kak netila ni tala rar rar kei. Ke pahn uhdahn kesempwalki oh kanahieng ihmw wet. Pil duwehte met, Siohwa ketikihong kitail kisakis kesempwal ehu, me iei kisakis en mour. Ni mehlel, Siohwa ketin kasalehda ia uwen eh ketin kesempwalki atail mour sang ni eh ketikihda sapwellime Ohlo nin duwen pweinen pweipwei sapahl ehu ong kitail.—Sohn 3:16.

2. Nin duwen me 2 Korint 7:1 mahsanih, dahme Siohwa ketin kupwurki kitail en wia?

² Siohwa iei Utupen mour. (Mel. 36:9) Wahnpoaron Pohl pohnese mehlelpen met ni eh koasoia: “Kitail kin momour oh mwekimwekid oh mihmi pwehki ih.” (Wiewia 17:25, 28) Eri kitail kak nda me atail mour wia kisakis ehu sang rehn Koht. Ni limpoak e ketikihong kitail dahme kitail anahne pwe kitail en momour. (Wiewia 14:15-17) Ahpw Siohwa sohte kin ketin wiahda manaman kan ahnsou wet pwe kitail en momourte. E ketin kupwurki kitail en wia uwen atail kak pwehn pousehlahte ahneki roson mwahu oh papah ih. (Wadek 2 Korint 7:1.) Dahme kahrehda kitail anahne wia met, oh ia duwen atail kak wia met?

3. Ia ehu kahrepe me kitail en pousehlahte ahneki roson mwahu?

³ Ehu kahrepen kitail en nantihong ahneki roson mwahu iei pwe kitail en kak papah Siohwa ni uwen me kitail kak. (Mark 12:30) Kitail men patohwanda ‘paliwaratail kan nin duwen meirong momour ehu, me sarawi oh me Koht ketin kupwurki,’  eri kitail sohte kin wia soahng kan me kitail ese kak kahrehiong kitail en soumwahuda. (Rom 12:1) Mehlel, sohte lipilipil dahme kitail kin wia, kitail sohte kak uhdahn ese me kitail pahn soumwahuda. Ahpw kitail kin wia dahme kitail kak, pwehki kitail men kasalehiong Samatailo nanleng me kitail kalahnganki kisakis en mour.

4. Dahme Nanmwarki Depit men wia?

⁴ Nanmwarki Depit kawehwehda kahrepen eh kesempwalki sapwellimen Koht kisakis en mour ni eh ntingihedi: “Dahme komw pahn paieki sang ei pahn mehla? Kamwahu dah me komw pahn ketikihsang ei pahn mwerpeseng nan sousou? Ia duwe, me melahr akan kak kapinga komwi? Re kak lohkiseli sapwellimomwi kalahngan poatopoat?” (Mel. 30:9) Ele Depit ntingihdi mahsen pwukat ni eh mour pahn kereniong imwisekla. Ahpw e koasoanehdi teng en kehlailte oh wie momourte pwe en kak papah Siohwa. Ele kitail koaros kin ahneki soangen madamadauohte.

5. Sohte lipilipil ma kitail mahla de soumwahula, dahme kitail kak wia?

⁵ Ma kitail soumwahu oh mahmahla, mwein kitail sohla kak wia soahng tohto me kitail kin wia mahso. Pwehki met, ele kitail kin nsensuwedla oh mworusala. Ahpw kitail en dehr uhdi oh sohla nsenohki atail roson mwahu. Dahme kahrehda? Pwehki sohte lipilipil ma kitail mahla de soumwahula, kitail kak papahte Siohwa duwehte Nanmwarki Depit. Ia uwen kansenamwahu en ese me atail Kohto kin ketin kesempwalkin kitail mendahki atail soh unsek! (Mad. 10:29-31) Mehnda ma kitail mehla, e pahn ketin kupwurki kaiaskitailda. (Sohp 14:14, 15) Eri erein atail wie momour, kitail men wia dahme kitail kak pwehn pere atail roson oh mour.

6. Dahme Siohwa ketin kupwurki kitail en wia me pid mwenge oh nim?

⁶ Mendahki Paipel kaidehn pwuhk ehu duwen palien roson, e kin kasalehda sapwellimen Siohwa madamadau ong ire pwukat. Karasepe, e ketin kangoange kitail en ‘dehr mweidohng mehkot en . . . kamedekeikitailla.’ (Ekl. 11:10) Paipel mahsanih me kitail en dehr kin kapehden mwenge oh kamamsakau. Soahng pwukat kin kauwehla atail roson oh pil kemeikitailla. (Lep. Pad. 23:20, 21) Siohwa ketin kasik kitail en kaunda pein kitail ni atail kin pilada ia uwen laud me kitail pahn kang de nim.—1 Kor. 6:12; 9:25.

7. Ia duwen kaweido nan Lepin Padahk 2:11 eh sewese kitail en wiahda pilipil mwahu me pid atail roson?

⁷ Kitail kak wiahda pilipil kan me kasalehda atail kin uhdahn kalahnganki sapwellimen Koht kisakis en mour sang ni atail kin doadoahngki atail koahiek en madamadau. (Mel. 119:99, 100; wadek Lepin Padahk 2:11.) Karasepe, kitail kin kasalehda koahiek en madamadau me pid dahme kitail pahn kang. Ma kitail perenki soangen mwenge ehu ahpw kitail ese me kitail kin soumwahukihda, kitail kin kanahieng pwe kitail en dehr kang. Kitail pil kin kasalehda koahiek en madamadau ma kitail meir mwahu, kaukaule eksersais, oh nantihong pwe paliwaratail oh imwatail en kin mwakelekel.

8. Dahme Paipel kasalehda duwen sapwellimen Koht madamadau ong atail en soikala soahng keper kan?

⁸ Siohwa ketikihong mehn Israel ko kosonned kan ong ia duwen arail kak pereirailsang soahng keper kan nan imwarail de ni arail kin doadoahk. (Eks. 21:28, 29; Deud. 22:8) Ma  emen sapwungala kemehla aramas emen, e pahn ale kalokepe. (Deud. 19:4, 5) Kosonnedo kasalehda me irail kan me sapwungala kemehla seri me saik ipwidi pahn pil ale kalokepe. (Eks. 21:22, 23) Paipel kasalehda ni sansal me Siohwa ketin kupwurki kitail en wia uwen atail kak en soikala soahng keper kan.

9. Dahme kitail kak wia pwe kitail en soikala soahng keper kan? (Menlau pil kilang kilel kan.)

⁹ Kitail kin kasalehda me kitail kin kalahnganki sapwellimen Koht kisakis en mour sang ni atail kin song en dehr wia soahng keper kan nan imwatail oh wasahn doadoahk. Karasepe, ma kitail anahne kesehla soangen dipwisou kan me keng, pwoisin, de wini kan, kitail kin wia met ni ahl me sohte pahn keper ong meteikan. Kitail pil kin tehk mwahu me seri kan sohte pahn diar soahng pwukat. Kitail pil kin kanahieng ni atail kin saunda kisiniei, pwoailih pihl, oh doadoahngki dipwisou en doadoahk kan. Oh kitail kin kanahieng kitail en dehr uhdahte kohkohsang soahng pwukat. Kitail sohte kin tangahki sidohsa ma kitail kin kangkang wini me keper ong diraip, nim sakau, de sohte meir mwahu. Oh kitail  pil sohte kin doadoahngki sehlpwohn ni atail kin tangahki sidohsa.

10. Dahme kitail kak wia mwohn oh erein irair keper ehu eh wiawi?

¹⁰ Ekei pak, kitail sohte kak irehdi irair keper kan en wiawi. Ni mehlel soahng kan me duwehte melimel, soumwahu lusulus, oh mahwen. Ahpw ni ahnsou me soahng pwukat kin wiawi, kitail kak wia uwen atail kak pwehn pere atail mour oh pitsang keper kan sang ni atail peikiong kaweid kan duwen kohkohsang wasao oh pil kaweid teikan sang palien koperment. (Rom 13:1, 5-7) Irair karuwaru kan kakete wiawi, kahrehda kitail anahne rong kaweid kan me kohsang palien koperment pwehn kaunopada mwahu mwohn mepwukat wiawi. Karasepe, ele e pahn mwahu ma ke tehkada ma mie omw pihl me itar, mwenge me sohte pahn kiteila oh pil first-aid kan.

11. Ma soumwahu lusulus ehu doupeseng wasa me kitail kin kousoan ie, dahme kitail pahn men wia?

¹¹ Dahme kitail anahne wia ma soumwahu lusulus ehu doupeseng wasa me kitail kin kousoan ie? Kitail anahne peikiong kaweid kan me koperment kihda, me duwehte omwiomw, dohpeseng, doadoahngki mask oh tohrohrasang meteikan. Ma kitail kin wia soahng pwukat, kitail kin kasalehda me kitail kin uhdahn kalahnganki sapwellimen Koht kisakis en mour.

12. Ia duwen Lepin Padahk 14:15 eh kak sewese kitail en pilada soangen ire kan me kitail en rong ni kahpwal ehu eh wiawi?

¹² Erein ahnsou me kahpwal wiawi, ekei pak kitail kin rongasang kompoakepatail kan, mehn mpatail kan, de rohng kan duwen soahng kan me sohte mehlel. Kitail en dehr kamehlele “mehkoaros” me kitail rong, ahpw e mwahu kitail en rong soahng kan me keieu pwung sang koperment oh toahkte kan. (Wadek Lepin Padahk 14:15.) Pwihn me Kin Apwalih Mwomwohdiso nan Sampah Pwon oh ohpis en Sounkadehdehn Siohwa kan kin nantihong alehdi ire pwung kan mwohn ar kihda kaweid me pid mihting en mwomwohdiso kan oh doadoahk en kalohk. (Ipru 13:17) Ni atail idawehn kaweid wet, kitail kin pere pein kitail oh meteikan sang keper. Ele kitail pil kak sewese meteikan en medewe soahng mwahu kan duwen Sounkadehdehn Siohwa kan.—1 Pit. 2:12.

13. Ia duwen atail kin kasalehda me kitail kin kesempwalki mour ni atail peikiong sapwellimen Siohwa kosonned me pid nta?

¹³ Aramas tohto ese me Sounkadehdehn Siohwa kan kin kamehlele me nta sarawi. Kitail kin peikiong sapwellimen Siohwa kosonned me pid nta sang ni atail sohte kin ale doken nta, pil ahnsou me kitail lelohng irair karuwaru ehu me pid pelien wini. (Wiewia 15:28, 29) Ahpw met sohte wehwehki me kitail men mehla. Kitail kin kesempwalki sapwellimen Koht kisakis en mour. Kitail kin rapahki sawas rehn toahkte kan me kin men kihda epwel me keieu mwahu me sohte kin pidada doken nta.

14. Ia duwen atail kak katikala anahnepen ale pwal de soangen epwelpen wini teikan?

¹⁴ Ma kitail kin apwalih mwahu atail roson sang ni atail kin wia soahng kan me kitail koasoiapene nan iren onop wet, ele kitail sohte pahn anahne ale pwal de soangen epwelpen wini teikan. Oh ma kitail kin ahnekihte roson mwahu, kitail pahn mwadang mwahula ni ahnsou me kitail anahne pwal. Kitail pil kak katikala anahnepen ale pwal ni ahnsou karuwaru sang ni atail kin wiahiong imwatail oh wasahn doadoahk en sohte keper oh sang  ni atail peikiong kosonned en tangatang en sidohsa.

15. (a) Dahme kahrehda e kesempwal kitail en weuwa doaropwehn DPA me kapw? (Menlau pil kilang kilelo.) (b) Duwehte me sansalda nan kisin kasdou, ia duwen atail kak wiahda pilipil mwahu kan duwen en ale epwelpen wini me pid nta?

¹⁵ Pwehki kitail kin kesempwalki kisakis en mour, kitail kin audehda doaropwehn Durable Power of Attorney (DPA) oh weuwa rahn koaros. b Sang ni doaropwe wet, kitail kin kasalehda atail pwuhng me pid doken nta oh ekei epwelpen wini kan. Ke naineki doaropwehn DPA me kapw? Ma ke anahne audehda ehu me kapw, mwadang wia met. Ni atail ntingihdi dahme kitail mwahuki ni sansal, e pahn sewese kitail en mwadang ale sawas pwehki kitail sohte pahn kauwehla mwahl ahnsou koasoakoasoia soahng pwukat rehn atail toahkte kan. Kitail pil pahn tehk mwahu me kitail sohte pahn ale sawas de wini me keper ong kitail. c

16. Dahme kitail kak wia ma kitail peikasalki ia duwen atail pahn audehda doaropwehn DPA?

¹⁶ Sohte lipilipil ia uwen atail pwulopwul de roson mwahu, koaros kak lelohng aksident de soumwahuda. (Ekl. 9:11) Eri e pahn wia elen erpit en audehda doaropwehn DPA. Ma  ke peikasalki ia duwen omw pahn audehda doaropwe wet, peki sawas rehn elder kan nan omw mwomwohdiso. Irail kin nantihong ese duwen audehda doaropwe wet, ahpw irail sohte pahn wiahiong uhk omw pilipil me pid epwelpen wini. Met omw pwukoa. (Kal. 6:4, 5) Ahpw irail kak seweseiuk ni omw audehda doaropwe wet.

17. Ia duwen atail kak kasalehda me kitail ahneki madamadau pwung oh toupahrek ong me pid roson?

¹⁷ Pali laud en pilipil kan me kitail wiahda me pid atail roson oh sawasepen palien wini kin poahsoanda sang dahme kitail sukuhlkier nan Paipel. (Wiewia 24:16; 1 Tim. 3:9) Ni atail kin wiahda pilipil kan oh koasoiaiong meteikan dahme kitail pilada, kitail anahne tamataman dahme Pilipai 4:5 mahsanih: “Aramas koaros en ese amwail madamadau toupahrek.” Ni atail kin ahneki madamadau pwung oh toupahrek, kitail sohte pahn kin pwunodki atail roson ahnsou koaros; de pil idingkihong meteikan en pwungki atail madamadau me pid roson. Kitail kin poakohng oh wauneki riatail Kristian kan, mehnda ma arail pilipil kan weksang atail.—Rom 14:10-12.

18. Ia duwen atail kak kasalehda atail kalahnganki kisakis en mour?

¹⁸ Kitail kin kasalehiong Siohwa me Utupen mour, atail kalahngan, sang ni atail kin pere atail mour oh patohwanohng ih uwen atail kak koaros. (Kaud. 4:11) Ong ahnsou wet, kitail anahne dadaur pahn kahpwal oh soumwahu kan. Ahpw kaidehn ih soangen mour wet me Sounkapikpatailo ketin kupwurki ong kitail. Ahnsou keren e pahn ketikihong kitail mour soutuk me sohte medek oh mehla. (Kaud. 21:4) Ni atail awiawih met, ia uwen eh mwahu en momour oh papah Samatail limpoako nanleng, Siohwa!