1. Jehová Diosca ñucanchi causaitaca ¿imashinata ricun?

 SHUJ amigo quiquinman shuj huasita carashcapi pensaripai. Huasigu ashata huaglirishca, ña despintado cashpapash huasica ashtacatapachami valin. Chaimandami chai huasigumandaca ninanda agradicishpa ashtahuan cuidashpa catipanguiman. Shina cuendallatami Jehová Diospash ñucanchimanga shuj valishca regalota carashca. Chai regaloca causaigumi can. Jehová Diosca Jesús ñucanchipa juchacunamanda huañuchun saquishpami causaita ninanda valichishcata ricuchishca (Juan 3:16).

2. 2 Corintios 7:1​pi nishcashnaca Jehová Diosca ñucanchicuna ¿imata rurachunda munan?

² Jehová Diosca “causaita cuj” Diosmi can (Sal. 36:9). Apóstol Pabloca: “Paimandami causaita charinchi, purinchi y caipi capanchi” nircami (Hech. 17:25, 28). Chaimandami causaitaca Taita Diosmi carashca nipanchi. Paica ñucanchita juyaimandami causachunga tucui minishtirishcata carashca (Hech. 14:15-17). Shinapash Jehová Diosca causashpa catichunga imapash milagrotaimanga na rurangachu. Ashtahuangarin paica ñucanchillata físicamente, espiritualmente cuidarichunmi munan (2 Corintios 7:1​ta liipangui). ¿Imamandata ñucanchi saludta, ñucanchi causaita cuidana capanchi? ¿Imashinata cuidai ushapanchi?

3. ¿Imashpata sano cangapaj munapanchi?

³ Jehová Diosta aliguta sirvingapami sano cangapaj munapanchi (Mar. 12:30). ‘Ñucanchi cuerpota, ñucanchi causaita  Taita Diosman shuj sacrificiota caranshna cungapaj’ munaimandami imapash ñucanchi saludta llaquichina cosascunamandaca caruyangapaj munapanchi (Rom. 12:1). Masqui mashnata cuidarijushpapash huaquinbica unguringallatami. Shinapash tucui ñucanchi usharishcapi cuidarishpami Jehová Dios ñucanchiman causaita carashcataca valichishcata ricuchipanchi.

4. Rey Davidca ¿imata rurangapata munarca?

⁴ Rey Davidca Jehová carashca causaigutaca ninandami valichirca. Chaimandami paica: “Ñuca huañujpi, pambana utujuman urai rishpaca, ¿imapashi ali canga? ¿Ñutu alpaca, canda alicachingachu? ¿Can na llullaj cajtapash villangachu?” nishpa escribirca (Sal. 30:9). Rey Davidca cai shimicunataca talvez ña huañunalla cashpami escribishcanga. Ña huañunalla cashpapash paica Jehová Diosta sirvishpa catingapaj ashtahuan causashpa catinatami munarca. Ñucanchicunapash Jehovata sirvingapaca causashpa catinatami munapanchi.

5. Mayorlla cashpa, ungushca cashpapash ¿imata rurashpata cati ushapanchi?

⁵ Ña mayorllagucuna cashpa o ungushca cashpaca ñana pundashna imatapash rurai ushashpami talvez preocupado, llaquilla sintirita ushanchi. Shina cashpapash ¿imamandata ñucanchi saludta cuidanataca na saquina capanchi? Mayorlla cashpa, ungushca cashpapash rey Davidshnallata Jehová Diosta sirvishpa cati ushaimandami cuidarina capanchi. Shinallata imperfecto cajpipash Jehová Dios ñucanchita juyashcata, ñucanchita valorashcata yachashpaca ninandami cushijupanchi (Mat. 10:29-31). Jehová Diosca ñucanchita ninanda valoraimandami huañujpipash causachishami nishpa prometishca (Job 14:14, 15). Shinaca ñucanchi causanajushpallata ñucanchi saludta, ñucanchi causaita cuidangapaj esforzarishpaca alitami ruranajupanchi.

6. Imata micunata, mashnata micunata decidijujpica Jehová Diosca ¿ñucanchicuna imata rurachunda munan?

⁶ Bibliaca ñucanchi saludta cuidanamanda o imacunatalla micunamanda parlaj libroca na canllu. Shinapash Jehová Dios caicunamanda imata pensajtami ricuchin. Por ejemplo, “cambaj cuerpohuan ima nalita ruranamandapash anchuringui” nishpami consejan (Ecl. 11:10). Bibliapica yapata micuna, yapa tragota ufiana nalipacha cashcatami ricuchin. Chaicunata rurashpaca huañuitapashmi huañuita ushanchiman (Prov. 23:20). Shinaca imata micunata, mashnata micunata decidijujpi Jehová Diosca ñucanchicuna controlarichunmi munan (1 Cor. 6:12; 9:25).

7. Ali saludta charingapaca ¿imashinata Proverbios 2:11​pi consejocunataca pactachi ushapanchi?

⁷ Ali decisiongunata agllashpami Jehová Dios causaita carashcamanda agradicishcata ricuchipanchi. Chaipaca imata ruragrijushpapash aligutami pensarina capanchi (Sal. 119:99, 100; Proverbios 2:11​ta liipangui). Por ejemplo, micunamanda parlashpaca huaquinbica ima micunatapash ninandami gushtapanchi. Shinapash huaquinbica ñucanchipa saludmanda na micui ushana cashpaca aligutami pensarina capanchi. Ali saludta charingapaca puñuitapash suficiente tiempoguta puñuna, ejerciciotapash siempre rurana, ñucanchi cuerpotapash limpio charingapaj esforzarina, ñucanchi huasigutapash limpio charinami minishtirin.

8. Bibliapica ¿imashinata Jehová Dios ñucanchicuna cuidarichun munashcataca ricuchin?

⁸ Jehová Diosca israelitacunamanga paicunapa huasipi, trabajopi accidentecunata ama charichunmi leycunata curca (Éx. 21: 28, 29; Deut. 22:8). Por ejemplo, por accidente pitapash huañuchishpaca paitapash ama huañuchichunmi pacajushpa rina tucurca (Deut. 19:4, 5). Shinallata leycunapica nara nacirishca vijsapi huahuaguta pipash imamandapash dañota rurashpaca castigai tucushcami cana can nijurcami (Éx. 21:22, 23). Accidentecunata ama charingapaj cuidarichun Jehová Dios munashcatami Bibliapica ricuchin.

9. Huasipi o trabajopi ama accidentecunata charingapaca ¿imatallata rurana capanchi? (Fotocunata ricupangui).

⁹ Ñucanchi huasipi, trabajopi accidentecunata ama charingapaj cuidarishpami Jehová Dios causaita carashcamanda agradicishca cashcata ricuchipashun. Por ejemplo filo filo cosascunata, químico productocunata o jambicunata shitagrijushpaca, chai cosascuna ama pitapash llaquichichunmi asegurarina capanchi. Chaicunata huasipi charishpaca huahuacuna na ricui ushanalla pushtucunapimi charina capanchi. Shinallata ninata japichijushpa, yacuta timbuchijushpa o imapash herramientacunata utilizajushpaca na yangata chaicunataca saquinallachu capanchi. Nali sintichij, puñuchij jambicunata, tragota ufiashca cashpa o  nali samashca cashpaca carrotaca na manejanachu capanchi. Manejajushpaca telefonotaca na maquipica charijunachu capanchi.

10. Nara llaquicunapi cashpa o ña llaquicunapi cashpaca ¿imatata rurai ushapanchi?

¹⁰ Unguicuna ama mirachun jatun llaquicuna, guerracuna, huelgacuna, shuj peligroso cosascunapash ama tiachun imatapash ruraitaca na ushapanchichu. Pero ama llaqui apangapaca autoridadcuna huasimanda na llujshinachu nijpi o causajushca pushtumanda shuj ladomanmi rina nijpi, na cashpaca imapash instrucciongunata cujpi chaicunata cazushpaca talvez ñucanchi causai peligropi canamandami jarcarita ushapashun (Rom. 13:1, 5-7). Shinapash huaquin llaquicunapaca prepararishcalla caitaca ushapanchimi. Chaimandami shina prepararishcalla cangapaj autoridadcuna cushca instrucciongunataca catina capanchi. Por ejemplo, talvez yacuta japishpa alichina, na huaglinalla micunagucunatapash alichina o minishtirishca jambicunata alichishpa charinaca alimi canman.

11. Shuj ungui ninanda mirajpica ¿imatata rurana capanchi?

¹¹ Ñucanchi causajuj llactapi shuj ungui ninanda mirajpica ¿imatata rurana capanchi? Maquicunata maillarina, gentecunapuramanda carullapi cana, mascarillata churajuna o cuarentenata rurana nishpa autoridadcuna mandashcataca cazunami capanchi. Chai mandashcacunata cazushpaca Jehová Dios carashca causaita valorashcatami ricuchipashun.

12. Jatun llaquicuna tiajpi Proverbios 14:15​pi nishca consejoca ¿imashinata ama yangata tucuita crichunga ayudan?

¹² Jatun llaquicuna tiajpica ñucanchi amigocunamanda, vecinocunamanda o noticiacunapipashmi na cabal villashcacunata uyanchi. Chai uyashcacunata yangata tucuillata crinapa randica gobiernocunapa nishcata, doctorcunapa nishcatami uyana capanchi (Proverbios 14:15​ta liipangui). Cuerpo Gobernantemanda, sucursalmanda huauquicunaca imapash decisiongunata japingapaca cabal informacionda charingapami esforzarin. Chaimandami reuniongunamanda, predicanamanda paicunapa instrucciongunata catingapaj esforzarina capanchi (Heb. 13:17). Paicunata cazushpaca ñucanchillatami ñucanchi saludta, shujcunapa saludtapash cuidapanchi. Ashtahuangarin shuj gentecunapash testigo de Jehovacunamanda ali parlachunmi ayudapanchi (1 Ped. 2:12).

13. Yahuarmanda Jehová cushca leyta respetashpaca ¿imashinata causaita valorashcata ricuchipanchi?

¹³ Testigo de Jehovacunaca yahuar sagrado cashcatami crinchi. Chaitaca ashtaca gentecunami yachan. Jehová Dios mandashca leyta respetaimandami ñucanchi saludhuan emergenciata charishpapash yahuartaca na churarinchi (Hech. 15:28, 29). Pero huañungapaca napacha munapanchichu. Jehová Dios carashca causaigutaca ninandami valorapanchi. Chaimandami yahuar illa ali tratamientocunahuan ayudangapaj munaj doctorcunata mascapanchi.

14. Operarina o jatun tratamientocunamandaiman jarcaringapaca ¿imatata rurana capanchi?

¹⁴ Cai temapi yachajushca consejocunata catishpaca operarina o jatun tratamientocunata catinamandaimanmi talvez jarcarita usharinga. Pero operarinaiman tucujpica pundata ñucanchi saludta ali cuidarishca cashpaca uchallami ali tucui ushapashun. Ñucanchi huasipi, ñucanchi trabajopi ama peligroso cosascunata charingapaj esforzarishpa, shinallata manejajushpa leycunata tucuipi  cazushpaca accidentecunata charinamanda, operaciongunaman yaicunamandami jarcaripashun.

15. a) Yahuarta ama churaringapaj tarjetata jundachina, chai tarjetata siempre apashpa purinaca ¿imamandata importante can? (Fotota ricupangui). b) Cai videopi ricuchishcashnaca yahuarmanda ali decisiongunata japingapaca ¿imatata rurana capanchi?

¹⁵ Yahuarta ama churaringapaj tarjetata jundachina, chai tarjetata siempre apashpa purinami Jehová Dios carashca causaita valorashcataca ricuchin. b Cai documentoca yahuarta churarinamanda, shuj tratamientocunamandapash ñucanchicuna imata decidishcatami ricuchin. Yahuarta ama churaringapaj quiquinba tarjetataca ¿ñachu jundachipashcangui? Cai tarjetata nara jundachishca cashpa o mushuj datocunata churana cashpaca uchalla rurapangui. Ñucanchi imata decidishcata tarjetapi escribishcalla charishpaca ima pasajpipash na doctorcunaman chaira explicajuna tucushunllu. Shinami doctorcunaca uchalla atindi ushanga. Ashtahuanbash cai documentoca ñucanchita dañota ruraj tratamientocunata ama yangata doctorcuna churachunmi ayudanga. c

16. Yahuarta ama churaringapaj tarjetata imashna jundachinata na yachashpaca ¿imatata rurana capangui?

 ¹⁶ Joven cashpa, ali saludta charishpapash tucuicunallatami imapash accidentecunata charita o unguitapash ushanchi (Ecl. 9:12). Chaimandami yahuarta ama churaringapaj tarjetata siempre apashpa purinaca ali can. Pero chai tarjetata imashna jundachinata na atinashpapash na preocuparinachu capangui. Congregacionmanda anciano huauquicunaca chai tarjetata imashna jundachinataca alimi yachan. Paicunami ayudaita ushan. Shinapash anciano huauquicunaca quiquin imata decidina cashcataca na ningachu. Quiquinllatami chai responsabilidadtaca charipangui (Gál. 6:4, 5). Shina cajpipash ancianocunaca tarjetapi imata nishcata intindichun, quiquinllata imata decidishcata escribichunmi ayudaita ushan.

17. Ñucanchi saludmanda parlashpaca na tucuicuna igual pensajta yachashcataca ¿imashinata ricuchipanchi?

¹⁷ Ñucanchica Bibliapa yachachishcacunata catishpami imatapash ñucanchi saludpaca decidipanchi (Hech. 24:16; 1 Tim. 3:9). Chaimandami imapash decisiongunata japishpa, chai decisiongunamanda shujcunahuan parlashpaca Filipenses 4:5​pi imata nishcata yarina capanchi. Chaipica: “Na quiquingunapa nishcahuan yalingapaj munajcuna cashcataca, tucuicunami ricuna can” ninmi. Cai shimicunata pactachingapaca na yapata ñucanchi saludpi preocuparinachu canchi. Shinallata ñucanchishna pensachunbash shujcunataca na obliganachu canchi. Ñucanchi huauquipanicuna na ñucanchishnallata pensajpipashmi paicunata juyashpa respetapanchi (Rom. 14:10-12).

18. Jehová Dios causaita carashcamanda agradicishcataca ¿imashinata ricuchi ushapanchi?

¹⁸ Cai yachajuipica Jehová Diosca causaita cuj Diosmi can niparcanchimi. Jehová Diosta tucui shungu sirvishpa, ñucanchi causaitapash aliguta cuidangapaj esforzarishpami Jehová ñucanchiman causaita carashcamanda agradicishca cashcataca ricuchipanchi (Apoc. 4:11). Jehová Diosca cunanbishna unguicunahuan, llaquicunahuan causachunga na munarcachu. Chaimandami Jehová Diospa ayudahuanga ñalla llaquicuna illa, huañuicunapash illa causai ushapashun (Apoc. 21:4). Chaicamanga ñucanchi causaita valorashpa, causaita caraj Jehová Diosta sirvishpa catipashunchi.