1. Mei teaa ra te puapinga i to tatou oraanga kia Iehova?

 AKAMANAKO ana e kua oronga mai toou oa i tetai tutu taito apinganui​—taurekareka tikai. Kua toutou, parapara e kua ngaangaa tetai au ngai. Noatu tetai ngai kinokino o te tutu, e mirioni tara tona puapinga. Papu e ka akaperepere e ka paruru koe i te reira tutu. Aite katoa rai, ki tei akaperepere maataia e Iehova, ko te oraanga. Akaperepere maata a Iehova i to tatou oraanga e kua oronga anga mai i tana Tamaiti ei oko ia tatou.​—Ioa. 3:16.

2. Ia 2 Korinetia 7:1, eaa ta Iehova e tapapa maira mei ia tatou?

² Ko Iehova te Tumu o te ora. (Sala. 36:9) Kua āriki te apotetoro ko Paulo i teia i tona karanga anga: “Nona oki to tatou ora, e i aaere ei, e i noo ei oki.” (Anga. 17:25, 28) No reira tatou ka karanga ai e e apinga aroa te oraanga no ko mai i te Atua. Kua oronga aroa mai aia i te au mea kia ora tatou. (Anga. 14:15-17) Kare ra aia e paruru temeio i to tatou oraanga. Mari ra, te tapapa maira aia e kia akono meitaki tatou i to tatou oraanga kopapa e to te pae vaerua. (E tatau ia 2 Korinetia 7:1.) Eaa ra tatou ka akono meitaki ei i to tatou oraanga, e ka akapeea?

3. Eaa tetai tumu ka tauta tatou kia vai matutu?

³ Tetai tumu kia vai matutu tatou koia oki kia rauka ia tatou i te tavini pu ia Iehova. (Mare. 12:30) Inangaro  tatou i te oronga i to tatou “au kopapa ei atinga ora, e te tapu, e tau oki i te Atua,” no reira ka kopae tatou i te au angaanga ka akatupu i te kino ki to tatou kopapa. (Roma 12:1) E tika, kua kotingaia ta tatou ka rave kia vai maroiroi. Inara ka rave tatou i tei rauka no te mea kua inangaro tatou i te akaari ki to tatou Metua i te rangi e te akaperepere ra tatou i tana apinga aroa te oraanga.

4. Eaa ta te Ariki ko Davida i inangaro i te rave?

⁴ Kua akamārama mai te Ariki ko Davida i te tumu i akaperepere ei aia i ta te Atua apinga aroa te oraanga, i tona tataanga: “Eaa te puapinga kia rave mate roaia au; kia riro roa au ki raro i te vaarua? e akameitaki ainei te one ia koe? e akakite ainei i te tuatua-mou naau ra?” (Sala. 30:9) Penei kua tata a Davida i teia i te openga o tona oraanga. Inara, kua tauta aia kia vai maroiroi e kia meitaki kia rauka iaia i te akapaapaa ia Iehova. E te inangaro katoa ra tatou i te rave i te reira.

5. Noatu te ruaine e te maki, eaa ta tatou ka rauka i te rave?

⁵ Penei ka arai te maki e te ruaine ia tatou kia rave pu i tei rauka ana ia tatou. No teia penei ka tupu te riri e te maromaroa. Inara, auraka e tuku i te au e kia kore e akamatutu i to tatou kopapa. No teaa ra? Noatu te ruaine e te makimaki ia tatou, ka rauka rai ia tatou i te akapaapaa ia Iehova, mei te ariki ra ko Davida. E mea pumaana i te kite e te akaperepere ra to tatou Atua ia tatou noatu te turanga apa ua! (Mata. 10:29-31) Noatu me mate tatou, te tapapa maira aia i te akaora akaou ia tatou. (Iobu 14:14, 15) Ia tatou e ora nei, ka inangaro tatou i te paruru i to tatou oraanga.

6. Eaa ta Iehova e tapapa maira ia tatou kia rave no te au peu o te kai e te inu?

⁶ Noatu kare Pipiria i te puka no te akono i te oraanga, te akakite maira te reira i to Iehova manako. Ei akaraanga, te ako maira aia kia “akataka ke atu oki [tatou] i te mea kino” te ka akamaki i to tatou kopapa. (Kohe. 11:10) Kua akaapa te Pipiria i te peu kaituauau e te kona kava, te takinga kino anga i te oraanga. (Mase. 23:20) Te tapapa maira a Iehova kia akatere-uaorai ia tatou me iki e eaa te maata ka kai e ka inu.​—1 Kori. 6:12; 9:25.

7. Akapeea te ako ia Maseli 2:11 me tauturu ia tatou kia iki i te au ikianga meitaki no te oraanga?

⁷ Ka iki tatou i te au ikianga te akaperepere maata ra i ta te Atua apinga aroa te oraanga, na roto i te tu akono meitaki. (Sala. 119:99, 100; e tatau ia Maseli 2:11.) Ei akaraanga, kia matakite i ta tatou ka kai. Me reka tatou i tetai kai e kua kite e ka makiia tatou mei te reira, auraka e kai i te reira. Te akaari ra tatou i te kite na te moe vave anga, akaetaeta i te kopapa, paʼi putuputu, e te tamā i to tatou kainga.

8. Eaa ta te Pipiria e akakite maira i to te Atua manako no te turanga meitaki o tetai?

⁸ Kua kapiti mai ki roto i ta Iehova Ture ki to Iseraela te au aratakianga te ka tauturu ia ratou kia kore e rokoia e te tumatetenga i te kainga e te angaanga. (Exo. 21:28, 29; Deu. 22:8) Ka akautungaia te aronga ta kare i akakoro mei te au tumatetenga kino tei tupu poitirere. (Deu. 19:4, 5) Kua umuumu katoa te Ture e kia akautungaia tetai tei tukia ki tetai vaine nui e  kua mate tana tamaiti, kare i akakoro ra. (Exo. 21:22, 23) Kua akataka meitaki te au Tuatua Tapu e kia akono ua tatou i te au turanga meitaki o tetai.

9. Eaa te au akamatakiteanga kia kore e tupu poitirere te tumatetenga? (Akara katoa i te tutu.)

⁹ Ka akaari tatou e te akaperepere ra tatou i ta te Atua apinga aroa o te oraanga na te akono anga kia meitaki te turanga i te kainga e te angaanga. Ei akaraanga, kia matakite me titiri i te au mea kokoi, te au kemikara poitini, e te au mea vairakau, e kia akaruke i te reira ki tetai ngai kare e itaeia e te tamariki ou. Ka matakite tatou me tutungi i te aʼi, te vai vera, te au apinga uira, eiaa e akaruke i te reira ma te kore e akaraia. Kare e akaoro i to tatou motoka e kua roiroi te mata mei te vairakau, te kava, kare e rava ana te moe, e kia kore e tamanataia e te au apinga apaipai.

10. Eaa ta tatou ka rave i mua ake e i te tuatau o tetai tumatetenga?

¹⁰ Tetai taime kare e rauka ia tatou i te kopae i te au tupuanga ka tamate i te oraanga.  Mei te au tumatetenga natura, te au maki kino e totoa ra, e te takinokino anga ta ua. Inara, me tupu ake te reira, ka tauta tatou i te akaiti i te kino e te akameitaki mai i to tatou tu na te kauraro anga ki te au ture tei akamanaia, akaateaanga, e te akamatakite anga poitirere i te pae o te maki. (Roma 13:1, 5-7) Ka tapapaia tetai au tumatetenga, no reira e mea meitaki kia aru tatou i te au akauenga tei orongaia mai e te aronga mana kia papa tatou me tupu ake te au tumatetenga natura. Penei ka riro ei mea tauturu kia akapae i te au vai, kai punu e te au vairakau.

11. Me tupu ake te maki totoa, eaa ta tatou ka inangaro ua i te rave?

¹¹ Eaa ta tatou ka rave me totoa te maki ki te ngai e noo ra tatou? E akarongo ki te au ture paruru maki, mei te orei i te rima, kia akataka ke, kia aao i te arai vaa, e kia noo ua ko koe anake. Ia tatou e aru ra i te au akamatakite anga te akaari ra tatou i te tu akaperepere i ta te Atua apinga aroa te oraanga.

12. Akapeea te kaveinga ia Maseli 14:15 me tauturu ia tatou kia matakite i ta tatou ka akarongo me tupu ake te tumatetenga?

¹² I te au tuatau tumatetenga, penei ka akakiteia te au tuatua tarevake e te au oa, tangata tupu, e te media katoa. Kare e ka irinaki ua i te “au tuatua katoa” i akarongo ra, ka meitaki tatou i te akarongo ki te au karere tau a te kavamani e to te pae vairakau. (E tatau ia Maseli 14:15.) E aruaru ua ana te Pupu Akaaere e te au opati Betela kia rauka te au tuatua akakite tika i mua ake ka oronga mai ei ratou te aratakianga ki te putuputuanga no te au uipaanga e te angaanga tutu aere. (Ebe. 13:17) Na te taokotai anga, te paruru ra tatou ia tatou e tetai pae mei te kino. Penei ka akatupu teia i te rongo meitaki no te putuputuanga i to tatou ngai tangata.​—1 Pete. 2:12.

13. Akapeea tatou me akaari e te akaperepere ra tatou i ta te Atua apinga aroa o te oraanga, no te rapakauanga te o maira te toto?

¹³ Kua kiteaia te Au Kite o Iehova no to ratou akangateitei i te tu tapu o te toto. Ka kauraro tatou i ta Iehova ture no te toto na te patoianga i te pamu anga toto, me tupu poitirere mai tetai maki. (Anga. 15:28, 29) Kare ra te aiteanga e ka inangaro tatou i te mate. Mari ra, te akaperepere ra tatou i ta te Atua apinga aroa o te oraanga. Ka inangaro tatou i te tauturu a te au taote kite tei inangaro i te oronga mai i te rapakauanga kare e o mai te toto.

14. Akapeea tatou me akaiti mai i te kino i te tua o te rapakauanga?

¹⁴ Ka rauka ia tatou te akaiti i te kino o tetai rapakauanga na te akono anga i te au aratakianga o te oraanga tei taikuia i roto i teia atikara. Me matutu to tatou kopapa, ka maroiroi viviki tatou i te tuatau vaʼi anga e i muri ake i te reira. Ka rauka katoa ia tatou te akaiti mai te tumatetenga i te kainga na te akanoo anga i te au mea kia kore e tupu te kino i te kainga e te angaanga, e te aru anga i te ture o te mataara.

15. (a) Eaa i puapinga ai kia apai ua tatou te au kāti durable power of attorney? (Akara katoa i te tutu.) (e) Tei akaariia i roto i te vitio, akapeea tatou me rave i te au ikianga taka meitaki kia kore e taangaanga i te toto?

¹⁵ No to tatou inangaro i te apinga aroa o te oraanga, ka akaki tatou i te  kāti durable power of attorney (advance health-care directive) e te apai i te reira i te au taime ravarai. b Na roto i teia, te akakite ra tatou i to tatou anoano kare kia pamuia ki te toto e ka āriki i tetai atu au rapakauanga meitaki. Te ou ra toou kāti durable power of attorney? Me ka akaki koe i tetai kāti e me ka akaou, auraka e tavarevare. Na te tata taka meitaki i taau ka inangaro ka riro te reira ei kopae i te au manamanata no taau rapakauanga tau. Ka tauturu katoa tatou i te aronga angaanga i te pae vairakau kia akakore i te au manamanata no tatou. c

16. Eaa ta tatou ka rave me kare i papu akapeea me akaki i te kāti durable power of attorney?

¹⁶ Noatu e e mapu me kua matutu, ka rokoia rai tatou e te tumatetenga e te maki. (Kohe. 9:11) No reira, e tu kite pakari kia akaki i te kāti durable power of attorney. Me kare i papu ia koe akapeea me akaki i teia kāti, e pati i te tauturu a te aronga pakari. Kua aruaru ratou kia kite akapeea me akaki i teia pepa, inara kare  ratou e iki i taau ikianga. Naau rai teia apainga. (Gala. 6:4, 5) Ka rauka ia ratou i te tauturu ia koe kia mārama i taau au ikianga e taau i anoano kia tataia.

17. Akapeea tatou me akaari e e tu maru to tatou no te au ikianga i te pae o te oraanga?

¹⁷ Maata anga o ta tatou ikianga no te oraanga e tetai au rapakauanga kua aratakiia teia e to tatou akava ngakau tereniia e te Pipiria. (Anga. 24:16; 1 Timo. 3:9) Me tuku i te au ikianga e te uriuri i te reira ki tetai, ka riro ei meitaki no tatou me taangaanga i te kaveinga ia Philipi 4:5: “Kia kitea meitakiia oki to kotou maru i te tangata katoa.” Me e tu maru to tatou, kare tatou e manata maata no runga i to tatou oraanga; kare katoa e māro i to tatou manako ki tetai. Ka inangaro e ka akangateitei tatou i to tatou au taeake e te au tuaine, noatu me kare e aite ta ratou ikianga ki ta tatou.​—Roma 14:10-12.

18. Akapeea tatou me akaari i te ngakau āriki no te apinga aroa te oraanga?

¹⁸ Ka akaari tatou i te ngakau āriki kia Iehova, te Tumu o te ora, na te paruruanga i to tatou oraanga e te oronga i to tatou meitaki kiaia. (Apo. 4:11) Teianei, kia akakoromaki tatou i te au maki e te au tumatetenga ka tupu poitirere ua mai. Inara kare e ko teia te oraanga ta Tei Anga ia tatou i anoano no tatou. Kare e roa atu ka oronga mai aia i te oraanga mutu kore kare e mamae e te mate. (Apo. 21:4) I teianei, mei teaa ra te meitaki e te ora nei tatou e kia tavini i to tatou Metua akaperepere i te rangi, ko Iehova!