1. Кобор врединела е Јеховаске амаро живото?

 ЗАМИСЛИН туке кај јекх амал дела тут пурани слика со бут врединела хем тани единствено ко свето. Шај нашавѓа хари пли боја, иси ла негде флеке хем тани хари пхаравди. Сепак, ој врединела милиоња доларија. Адалеске сигурно бут ка ценине ла хем ка заштитине ла. Слично, о Јехова денѓа амен јекх бут скапоцено поклон, амаро живото. Уствари, о Јеховаске сикавела кобор ценинела амаро живото адалеа со денѓа пле Чхаве сар откупнина аменге (Јован 3:16).

2. Спрема 2. Коринќаните 7:1, со очекујнела амендар о Јехова?

² О Јехова тано о извор е животоскоро (Пс. 36:9). О апостол Павле халило адава чачипе кеда вакерѓа: „Преку лесте иси амен живото, движинаја амен хем постојнаја“ (Дела 17:25, 28). Адалеске шај те вакера кај амаро живото тано поклон таро Девел. Ов љубезно дела амен са со ваљани аменге те шај те ачхова џивде (Дела 14:15-17). Ама о Јехова на керела чудија те шај те икерел амен ко живото. Наместо адава, ов очекујнела амендар те грижина амен најшукар со шај башо амаро физичко хем духовно састипе. (Читин 2. Коринќаните 7:1.) Соске ваљани те заштитина амаро састипе хем живото хем сар шај те кера адава?

3. Која тани јекх причина соске ваљани те трудина амен те ачхова састе?

³ Јекх причина соске ваљани те ачхова састе тани адаја со  аѓаар шај те служина е Јеховаске најшукар со шај (Мар. 12:30). Амен мангаја те да амаро тело сар „џивди жртва, свето хем прифатливо е Девлеске“, хем адалеске избегинаја те кера буќа кола со џанаја кај ка керен штета амаре састипаске (Рим. 12:1). Џанѓола пе, бизи разлика кобор хем те аракха амен јекх диве шај палем те насваљова. Ама даја амендар са соске мангаја те сикава амаре небесно Дадеске кај ценинаја о живото сар поклон.

4. Со мангља о цари о Давид те керел?

⁴ О цари о Давид објаснинѓа соске ценинела о живото сар поклон таро Девел кеда пишинѓа: „Со врединела мло мерибе, адава со ка џав ко гробо? Ка фалинел тут ли о право? Ка вакерел ли баши тли верност?“ (Пс. 30:9). О Давид шај пишинѓа акала лафија кратко англедер те мерел. Ама ов сине одлучно те ачхол џивдо хем кобор со шај састо те шај те фалинел е Јехова. Сарине амен сием одлучна те кера о исто.

5. Со шај те кера бизи разлика кобор сием пхуре или насвале?

⁵ О насвалипе хем о пхурипе шај те спречинен амен те кера бут буќа со кераја сине англедер. Адалеске шај те осетина амен тажна хем разочариме. Ама сепак ваљани те да амаро најшукар те шај те аракха амаро састипе. Соске? Адалеске со бизи разлика кобор сием пхуре или кобор сием насвале, амен шај исто сар о Давид те фалина е Јехова. Кобор утешно тано адава со џанаја кај амаро Девел ценинела амен иако сием насвале или пхуре (Мат. 10:29-31). Чак те мера, ле ка овел ле бари желба те воскреснинел амен (Јов 14:14, 15). Џикоте сием џивде мангаја те кера са те шај те аракха амаро састипе хем живото.

6. Со очекујнела амендар о Јехова кеда керела пе лафи башо хајбе хем пијбе?

⁶ Иако и Библија нане прирачнико башо састипе хем исхрана, сепак вакерела аменге сар о Јехова размислинела башо акала буќа. На пример, о Јехова предупрединела амен те цида амен таро лошна буќа со шај те керен штета амаре телоске (Проп. 11:10). И Библија вакерела те на претерина хајбаја хем пијбаја алкохол соске акала буќа шај те керен штета амаре састипаске па чак те мударен амен (Изр. 23:20). О Јехова очекујнела амендар те сикава самоконтрола кеда одлучинаја со хаја хем кобор хаја хем пијаја (1. Кор. 6:12; 9:25).

7. Сар о совет со аракхљола ко Изреки 2:11 поможинела амен те ана шукар одлуке башо амаро састипе?

⁷ Шај те ана одлуке кола со сикавена кај бут ценинаја амаро живото сар поклон таро Девел аѓаар со ка ова прониклива (Пс. 119:99, 100; Читин Изреки 2:11). На пример, шукар ка размислина башо адава со хаја. Ако мангаја јекх хајбе, а џанаја кај тано штетно аменге, тегани ка избегина ле. Исто аѓаар сикаваја проникливост аѓаар со доволно соваја, редовно вежбинаја, иси амен шукар навике баши лично хигиена хем икераја амаро кхер чисто.

8. Со сикавела амен и Библија башо адава кобор тано важно е Јеховаске те ова безбедна?

⁸ О Јехова денѓа е Израелцонге закони башо адава сар те заштитинен пе таро опасна ситуацие кхере хем ки бути (2. Мој. 21:28, 29; 5. Мој. 22:8). Ако некој ненамерно мударѓа некас тегани ле сине ле сериозна последице (5. Мој. 19:4, 5). Ко закони пишинела сине кај чак окола со ненамерно поврединѓе јекхе бебе со панда  на бијандило ваљани сине те овен казниме (2. Мој. 21:22, 23). И Библија јасно сикавела кај о Јехова мангела те да амендар са те шај те избегина опасна ситуацие.

9. Со шај те кера те шај те избегина опасна ситуацие? (Дикх хем о слике.)

⁹ Сикаваја кај ценинаја о живото аѓаар со кхере хем ки бути пазинаја ки безбедност. На пример, ако мангаја те фрда оштра предметија, отровна хемикалије или иљачија пазинаја сар хем коте фрдаја лен, исто аѓаар асавке буќа на мукхаја лен ко тхана коте со шај о чхаве те аракхен лен. Исто аѓаар, пазинаја кеда тхараја јаг, кеда кераваја нешто или користинаја електрична апаратија хем кеда икљоваја кхералдан пазинаја те на мукха акала буќа вклучиме ки струја. Пазинаја те на возина ако пилем јака хапија, ако пилем алкохол или ако на суќем доволно, хем исто аѓаар на икераја ко васта телефони џикоте возинаја.

10. Со шај те кера англедер хем џикоте трајнела несави неволја?

¹⁰ Понекогаш ка случинен пе опасна ситуацие  сар на пример, природна катастрофе, епидемие хем граѓанска немирија. Кеда ка случинен пе асавке неволје шај те трудина амен те ачхова безбедна кобор со шај хем те преживина и опасност аѓаар со ка ова послушна ко упатствија те наша таро адава тхан хем ка шуна јавера упатствија со дена о властија (Рим. 13:1, 5-7). Несаве опасностија шај англедер те предвидинен пе. Адалеске ваљани те шуна о упатствија таро властија кола со ка поможинен амен те спремина амен баши ленде. На пример, ка овел шукар те чхива ки страна некобор шишија пани хем хајбе со на руминѓовела хем исто аѓаар те овел амен кутија баши прва помош.

11. Со ваљани те кера кеда појавинела пе несаво заразно насвалипе?

¹¹ Со ваљани те кера ако ко тхан коте со живинаја ширинела пе заразно насвалипе? Ваљани те ова послушна ко упатствија со добинаја лен таро властија, сар сој редовно те тхова амаре васта, те икера дистанца, те пхирава маска хем те ова ко карантин. Амари послушност ко акала буќа сикавела кобор ценинаја о живото.

12. Сар о начело со аракхљола ко Изреки 14:15 поможинела амен те одлучина ко саве информацие ка верујна кеда случинела пе несави неволја?

¹² Понекогаш џикоте трајнела несави вонредно ситуација шај ка шуна буќа кола со нане точна таро амаре амала, комшие или вестија. Наместо те верујна ко „секова лафи“ со шунаја ле, ваљани те шуна о најточна информацие со авена таро властија хем докторија. (Читин Изреки 14:15.) О Водечко тело хем и подружница трудинена пе те шај те дознајнен о најточна информацие англедер те ден упатствија башо состанокија хем баши служба (Евр. 13:17). Кеда сием послушна ко упатствија заштитинаја коркори амен хем е јаверен. Адава исто аѓаар шај те поможинел е манушенге те овел лен шукар мислење башо е Јеховаскере сведокија (1. Пет. 2:12).

13. Сар сикаваја кај ценинаја о живото кеда керела пе лафи башо рат?

¹³ Е Јеховаскере сведокија тане пенџарде сар мануша со верујнена кај о рат тано свето. Амен поштујнаја е Јеховаскоро закони башо рат аѓаар со на прифатинаја трансфузија чак ко итно медицинско случај (Дела 15:28, 29). Ама адава на значинела кај мангаја те мера. Амен ценинаја о живото хем адалеске родаја помош таро специјалистија кола сој спремна те поможинен аменге бизо те користинен рат.

14. Со ваљани те кера те шај те на ана амен ки ситуација те ова операција или те овел амен потреба тари итно медицинско помош?

¹⁴ Ако аракхаја амаро састипе аѓаар со ка шуна о советија тари акаја статија, тегани шај нане те овел амен потреба тари операција или тари несави јавер итно медицинско постапка. Ако акана аракхаја амаро састипе, тегани полокхе ка накха ако ваљани те ова несави операција. Исто аѓаар, шај нане те овел амен потреба тари несави итно медицинско помош или операција ако англедер више кераја нешто те шај амаро кхер хем о тхан коте со кераја бути те овел безбедно хем ако пазинаја ко сообраќајна знакија.

15. а) Соске тано важно те пхирава аменцар и актуелно ТП картичка? (Дикх хем и слика.) б) Сар сој сикавдо ко видео, сар шај те ана шукар одлуке башо користибе рат?

¹⁵ Адалеске со ценинаја амаро живото амен пхераја и картичка Трајно полномоштво за здравствена грижа хем пхираваја ла секогаш аменцар. b Преку акава документи  амен објаснинаја амаро стави баши трансфузија хем башо јавера медицинска третманија. Дали тли ТП картичка тани актуелно? Ако ваљани те менине нешто, ма аџикер. Адава со јасно ка пишина саве медицинска постапке прифатинаја ка поможинел аменге посигате те добина несаво лекување хем нане те нашава време. Исто аѓаар ка ова сигурна кај нане те добина несаво третмани кова со ка керел аменге штета. c

16. Со шај те кера ако на сием сигурна сар те пхера и ТП картичка?

¹⁶ Бизи разлика кобор терне или састе сием сарине амен шај те доживина несреќа или те насваљова (Проп. 9:11). Адалеске мудро ка овел те пхера и ТП картичка. Ако на сиан сигурно сар те пхере акава документи, роде помош таро старешине. Ола трудинена пе те џанен сар пхерела пе акава документи ама нане те анен одлуке туке ко тхан. Адаја тани тли одговорност (Гал. 6:4, 5). Сепак ола шај те поможинен туке те дикхе саве методе иси хем те пишине саво лекување мангеа те добине.

17. Сар сикаваја кај сием разумна кеда керела пе лафи башо састипе?

¹⁷ Бут одлуке со анаја лен башо амаро  састипе хем медицинска третманија темелинена пе ки амари библиско школујми совест (Дела 24:16; 1. Тим. 3:9). Кеда анаја одлуке хем кераја лафи е јаверенцар башо адава ка овел шукар те применина о начело сој пишимо ко Филипјаните 4:5: „Тли разумност нека овел пенџарди англо са о мануша“. Кеда сием разумна тегани на секиринаја амен превише башо амаро састипе ни на теринаја е јаверен те овел лен о исто мислење сар амаро. Амен мангаја хем поштујнаја амаре пхрален чак ако на анена о иста одлуке сар аменде (Рим. 14:10-12).

18. Сар шај те сикава кај сием благодарна башо живото?

¹⁸ Сикаваја кај сием благодарна е Јеховаске, о извор е животоскоро, аѓаар со аракхаја амаро живото хем аѓаар со даја амаро најшукар леске (Отк. 4:11). Моментално мора панда те соочина амен насвалипаја хем неволјенцар. Ама амаро Створители на мангља те живина аѓаар. Панда хари ов ка дел амен вечно живото бизо дукха хем мерибе (Отк. 21:4). Ама џикоте на авела адава време, ваљани те ова благодарна со сием џивде хем со шај те служина амаре небесно Дадеске е Јеховаске.