1. Chichi de cuci si anda o Iehova amari viața?

 IMAGINISAR tuche că iech lașio amal cherel tuche sar daro iech șucar chăr. Chiar cana cado chăr silo purano hai siles chichiva buchia cai sile rimome, vo silo zurales cuci hai daștil te avel bichindo pe milioanea de dolari. Si ciaces, anda tute si cuci cado chăr hai va avela te les sama mișto pe leste. Sa cadea, o Iehova dea-ame iech cuci daro: i viața. O Iehova sicadea chichi de cuci si amari viața, cana dea pesche Șiaves sar jertfa anda amende. (Ioan 3:16)

2. Cadea sar phenel-pe ando 2 Corinteni 7:1, so ajucărel o Iehova amendar?

² O Iehova si i Haing la viațachi. (Ps. 36:9) O apostolo Pavel sicadea cado ciacimos cana phendea: „Prin leste si amen viața, cheras sea hai existisaras”. (Fap. 17:25, 28) Cadea că, daisaras te phenas anda sea o ilo că i viața si iech daro catar o Del. Vo del-ame, pherdo iubirea, sea so si amen nevoia caște traisaras. (Fap. 14:15-17) Cu sea cadala, aghies o Iehova ci cherel miracolea caște feril amari viața. Vo ajucărel te cheras sea so încărel amendar caște avas sasteveste hai te slujisaras lesche. (Citisar 2 Corinteni 7:1.) Sostar trebul te las sama pe amaro sastimos hai viața hai sar daisaras te cheras cadai buchi?

3. Sostar trebul te las sama pe amaro sastimos?

³ Camas te las sama pe amaro sastimos caște slujisaras le Iehovasche pherde zuralimos. (Mar. 12:30) Camas te sicavas amare „corpuri sar iech jertfa jiuvindi, sfânto hai plăcuto le Devlesche”, cadea că duriaras amendar le buchia cai jianas că daștin te rimosaren amaro sastimos. (Rom. 12:1) Si ciaces, orichichi de but las sama pe amaro sastimos, ci daisaras te phenas că niciechdata ci va avela te peras nasfale. Cu sea cadala, cheras sea so încărel amendar caște sicavas amare Dadesche cerisco că dichas cuci i viața, o șucar daro cai vo dea-les amenghe.

4. So camelas o rege David te cherel?

⁴ O rege David dichlea zurales cuci o daro la viațaco hai sicadea cadai buchi prin le pușimata cai vo șiutea-le: „So miștimos anelas mânro merimos, ca so folosilas te jiav tele andi hâv? Va așiarela-tu i phuv? Va dela duma voi anda chi loialitatea?”. (Ps. 30:9) Daștil-pe că o David scriisardea cadal dumes țâra timpoia angla so te merel. Cu sea cadala, vo camelas te traisarel chichi mai but timpo hai te avel sastevesto caște așarel le Iehovas. Si ciaces, vi amen camas te cheras sa cadai buchi.

5. So daisaras te cheras, vi cana sam nasfale sau phure?

⁵ Daștil-pe că, o nasfalimos sau o phurimos, ci mai mechen-ame te cheras cadea de but sar mai anglal. Cadaia daștil te cherel-ame te simțosaras-ame duchade hai perade. Cu sea cadala, trebul te las sama mai dur pe amaro sastimos. Sostar? Anda codoia că, vi dacă sam nasfale sau phurileam, daisaras te așiaras mai dur le Iehovas, cadea sar cărdea vi o rege David. Zuriarel-ame but te jianas că sam cuci andel iacha le Iehovasche, vi cana sam nasfale sau phure! (Mat. 10:29-31) Hai vi dacă va avela te meras, le Iehovasche va avela lesche doro amendar hai va anela-ame parpale viațate. (Iov 14:14, 15) Chichi timpo sam andi viața, camas te cheras sea so daisaras caște las sama pe amaro sastimos hai pe amari viața.

6. Sar camel o Iehova te dichas o haben hai o pimos?

⁶ Chiar cana i Biblia ci si iech lil cai phenel amenghe sar te las sama pe amaro sastimos sau so te has, voi sicavel amenghe sar dichel o Iehova cadal buchia. Sar exemplo, vo zuriarel-ame te duriaras amendar „sea so si jiungalo” anda amaro corpo, adică sea so rimosarel amaro sastimos. (Ecl. 11:10) I Biblia phenel amenghe te na has hai te pias prea but. (Prov. 23:20) Cadal buchia daștin te rimosaren amaro sastimos, hai chiar te mudaren-ame. O Iehova camel te sicavas că jianas te încăras-ame parpale cana alosaras so hai chichi te has hai te pias. (1 Cor. 6:12; 9:25)

7. Sar ajutil-ame o sfato anda Proverbe 2:11 te cheras alosarimata goghiaver anda amaro sastimos?

⁷ Daisaras te folosisaras amari goghi cana cheras alosarimata cai sicaven chichi de cuci si o daro la viațaco anda amende. (Ps. 119:99, 100; citisar Proverbe 2:11.) Sar exemplo, daisaras te alosaras goghiaver so te has. Dacă placial-ame iech anumime haben, tha jianas că ci perel amenghe mișto, o goghiaverimos cherel-ame te na has-les. Sa cadea, sicavas că sam goghiaver dacă sovas chichi trebul, cheras exerciții fizico hai încăras amaro corpo hai chăr uje.

8. So sicavel i Biblia anda o modo sar dichel o Iehova i siguranța?

⁸ O Iehova dea le israelițenghe legi anda sar daștinas von te ferin-pe catar le bare accidente  cana sas-le chăre sau cana cherenas buchi. (Ex. 21:28, 29; Deut. 22:8) Iech jeno cai mudarelas bi te camel aver varecas trebulas te suportil le phare urmări. (Deut. 19:4, 5) Cadea sar sicavelas i Legea, trebunas pedepsime chiar vi codola cai cherenas bi te camen iech nasul ieche șiavorresche cai ci sas-lo năștime. (Ex. 21:22, 23) I Biblia sicavel claro că o Iehova camel te avas zurales atento ca i siguranța.

9. So măsuri de siguranță trebul te las amenghe caște evitosaras le accidentea? (Dich le imagini.)

⁹ Sicavas că si cuci anda amende o daro la viațaco dacă las amenghe măsuri de siguranță cana sam chăre hai ca i buchi. Sar exemplo, cana șiudas le buchia cai șinen, le buchia toxico sau draba, las sama te cheras cadaia bi te cherenas nasul averenghe. Sa cadea, ci șioas-le ande iech than cai daștin te aven arachle catar le șiave. Cana astaras i iag, șioas te chiradiol o haben sau folosisaras aver uneltea, ci camas te mechas-le code hai te tiliaras. Ci tradas i mașina dacă leam draba cai covliaren amare simțuri, pileam sau sam lindrale, hai nici na încăras andel vasta dispozitivea cai daștin te țârden amari atenția.

10. So daisaras te cheras angla te avel iech dezastro hai cana nachas prin leste?

¹⁰ Poiechdata, ci daisaras te cheras chanci caște na întâmplon-pe anumime buchia cai daștinas te șion ando pericolo amari viața, sar si le dezastrea naturalo, le bare nasfalimata cai len-pe hai le marimata mașcar le manușa. Cu sea cadala, cana întâmplon-pe cadal buchia, daisaras te așias andi viața dacă așunas catar le autorități hai cheras so phenen amenghe von. (Rom. 13:1, 5-7) Daisaras te pregătisaras-ame anda chichiva dezastrea cai daștinas te aven. Cadea că, si mișto te așunas so phenen amenghe le autorități caște avas pregătime anda iech dezastro. Sar exemplo, si mișto dacă șioas amenghe de iech rig mai but pai hai haben cai ci rimosarel-pe sigo, tha vi iech trusa medicalo.

11. So trebulas te cheras cana astarel iech baro nasfalimos cai lel-pe?

¹¹ So trebulas te cheras dacă ando than cai beșas astarel iech baro nasfalimos cai lel-pe? Trebulas te încăras conto catar so phenen amenghe le autorități, sar avelas te halavas amare vasta, te beșas dur catar le manușa, te phiravas i masca hai te beșas ando chăr dacă sam nasfale. Cana cheras cadea, sicavas chichi de cuci si anda amende o daro la viațaco.

12. Sar ajutil-ame o verseto anda Proverbe 14:15 cana nachas prin iech situația de urgență?

¹² Cana si iech situația de urgență, poiechdata, amen așunas informații catar amare amala, pașarde sau catar le știri cai nai-le ciace. Ando than ‘te pachias orisavo cuvânto’, si mișto te pachias numai le informații cai aven catar o guverno hai catar le doctori. (Citisar Proverbe 14:15.) O Corpo de Guvernare hai le filiale den sea penghi zor caște avel-len informații lașe angla so te den îndrumări anda le întruniri la congregațiache hai anda i lucrarea de predicare. (Evr. 13:17) Cana așunas cadal îndrumări, ferisaras vi amen, hai vi averen. Cana cheras cadea, ajutisaras averen te dichen lașe iachența le Martoren le Iehovasche anda o than cai beșas. (1 Pet. 2:12)

13. Sar daisaras te sicavas că si cuci anda amende o daro la viațaco cana nachas prin iech urgența medicalo?

¹³ But manușa jianen că le Martori le Iehovasche pachian că o rat silo sfânto. Amen așunas catar i legea le Iehovaschi hai ci las rat, vi cana si iech urgența medicalo. (Fap. 15:28, 29) Cadaia ci însemnol că amen camas te meras. Mai but, amen dichas zurales cuci o daro la viațaco. Anda codoia, amen rodas o ajutorii ca le mai lașe medici, cai daștin te len sama mișto pe amende bi te den-ame rat.

14. So daisaras te cheras caște na nachas prin iech problema medicalo mai phari?

¹⁴ Dacă încăras so sas amenghe phendo ande cado articolo anda sar te las sama pe amaro sastimos, daștil-pe că ci va avela te nachas prin iech problema medicalo mai phari. Hai dacă trebul te cheras iech operația, dacă sam sasteveste, i recuperarea va avela mai ușoro. Sa cadea, daștil-pe că ci va avela te nachas prin iech operația de urgență dacă încăras conto catar le măsuri de siguranță vi chăre, vi ca i buchi hai dacă încăras le reguli de circulație.

15. a) Sostar si importanto te avel amende i declarația de voință? b) Cadea sar sicavel o materialo video, sar daisaras te las lașe decizii ande soste priveal i folosirea le rateschi?

¹⁵ Anda codoia că dichas cuci o daro la viațaco, amen cheras iech declarația de voință andai îngrijirea medicalo hai las sama te avel sea o timpo amende. Cado documento sicavel sar  dichas amen le transfuzii ratesche hai vi chichiva tratamentea medicalo. Si vi chi declarația actualo? Dacă trebul te cheres-la sau te neviares-la anda codoia că le informații trebun te aven parude, na mech cadaia de pe iech ghies pe aver. Cher cadai buchi chichi mai sigo. Dacă si amen cărdi cadai declarația, va avela but mai ușoro te primisaras o tratamento cai trebul amenghe. Sa cadea, ande cado documento, le doctori va arachena le informații anda le draba sau le tratamentea cai cheren amenghe nasul b.

16. So daisaras te cheras dacă ci jianas so te scriisaras ande iech declarația de voință?

¹⁶ Chiar cana sam tărne hai sasteveste, savore daisaras te peras nasfale sau te nachas prin iech accidento. (Ecl. 9:11) Anda codoia, si goghiaver te cheras iech declarația de voință. Dacă ci jianes sar te cheres cado documento, mang o ajutorii ieche phuresco anda chi congregația. Le phure den sea penghi zor te jianen sar trebul cărdo cado documento, tha von niciechdata ci va alosarena ande chio than. Tu trebul te cheres cadaia. (Gal. 6:4, 5) Cu sea cadala, von daștin te ajutin-tu te hachiares save si le buchia cai daștis te alosares-le hai te scriis-le.

17. Sar sicavas că si amen echilibro cana las sama pe amaro sastimos?

¹⁷ So sichileam anda o Cuvânto le Devlesco ajutil-ame te jianas sar te las sama pe amaro sastimos hai so tratamentea medicalo te alosaras. (Fap. 24:16; 1 Tim. 3:9) Cana alosaras so te cheras hai das duma vi averența anda cadaia, si goghiaver te cheras so phenel-pe ando Filipeni 4:5: „Te aven prinjiande savore manușendar că mechen tumendar”. Cana las-ame pala cado principio sicavas că si amen echilibro hai ci sam prea îngrijorime anda amaro sastimos sea o timpo. Sa cadea, amen mechas amendar hai ci camas te cheras vi averen te dichen le buchia cadea sar amen ande soste priveal o sastimos. Chiar cana le buchia cai alosaras-le sile diferime, amen iubisaras vi mai dur amare phralen hai sicavas lenghe pachiv. (Rom. 14:10-12)

18. Sar daisaras te sicavas că sam recunoscători anda o daro la viațaco?

¹⁸ Sicavas amari recunoștința caring o Iehova, cai si i Haing la viațachi, cana dichas cuci o daro cai vo dea-les amenghe hai slujisaras lesche pherde zuralimos. (Rev. 4:11) Aghies, nachas prin nasfalimata sau dezastrea. Tha Codo cai cărdea-ame ci camel te avel amen iech viața sar cadaia. Na pa but timpo, o Iehova va dela-ame iech șucar viața veșnico, ande savi ci va avela niciech duch hai nici merimos. (Rev. 21:4) Ji atunci, bucurisaras-ame but că traisaras hai slujisaras amare Dadesche cerisco, Iehova.