1. O le ā le silafaga a Ieova i le ola o le tagata?

 SEʻI faapea ua foaʻi atu e sau uō se ata tusi ua leva ma e matuā taugatā. E iai vaega o le ata ua matafi le lanu, pisipisia, ma ua iai ni nai māvaevae i le vali. E ui i na faalētonu ae e faitau miliona tālā le tau o le ata. E mautinoa e te talisapaia ma faapelepele i lenā ata. E faapena foʻi le meaalofa tautele ua foaʻi mai e Ieova, o le meaalofa o le ola. O le mea moni, ua faaalia e Ieova e tautele iā te ia o tatou ola e ala i le foaʻi mai o lona Alo e fai ma togiola mo i tatou.​—Ioa. 3:16.

2. E pei ona taʻua i le 2 Korinito 7:1, o le ā e faatalitalia e Ieova mai iā i tatou?

² O Ieova o le Puna o le ola. (Sala. 36:9) Na taʻua e le aposetolo o Paulo lenā upu moni ina ua ia faapea mai: “O ia ua tatou ola ai, gaoioi ai, ma ua tatou iai foʻi ona o ia.” (Galu. 17:25, 28) O lea, ua talafeagai ona tatou faapea atu o o tatou ola o se meaalofa mai i le Atua. Ua saunia ma le alofa e Ieova mea e tatou te manaʻomia ina ia tatou ola ai pea. (Galu. 14:15-17) Ae e lē faapea ai o le a faia e Ieova ni vavega ina ia tatou ola ai pea. E na te faatalitalia i tatou e faia le mea sili e tausia ai o tatou itu faaletino ma le itu faaleagaga. (Faitau le 2 Korinito 7:1.) Aiseā e tatau ai ona tausia lo tatou soifua mālōlōina ma faapelepele i o tatou ola, ma o le ā le auala e tatou te faia ai faapea?

3. O le ā se tasi o māfuaaga e tatou te mananaʻo ai e tausia lo tatou soifua mālōlōina?

³ O se tasi o māfuaaga e tatau ai ona tausia lo tatou soifua mālōlōina, ina ia mafai ai ona tatou auauna iā Ieova i le mea e gata ai lo tatou mafai. (Mare. 12:30) E tatou te faanaunau e tuuina atu o tatou tino o se “taulaga ola, e paia, ma e mālie i le Atua.” O lea, ia ʻalofia le faia o mea e tatou te iloa e faaleagaina ai lo tatou soifua mālōlōina. (Roma 12:1) O le mea moni, po o le ā lava le tele o taumafaiga e faatumauina ai lo tatou soifua mālōlōina, ae e tatou te aafia pea i maʻi o le tino. E tatou te faia le mea e mafai, ona e tatou te mananaʻo e faailoa atu i lo tatou Tamā i le lagi e tatou te talisapaia le meaalofa o le ola.

4. O le ā na manaʻo le tupu o Tavita e fai?

⁴ Na faamatala e le tupu o Tavita le māfuaaga e faapelepele ai i le meaalofa a le Atua o le ola, ina ua ia tusi: “O le ā le aogā o loʻu oti pe a ou alu ifo i le lua? Pe e vivii atu iā te oe le efuefu? Pe e na te taʻutaʻu atu lou faamaoni?” (Sala. 30:9) Atonu na tusia e Tavita nei upu a o lata ina maliu. Ae na ia maumauaʻi ia ola pea ina ia mafai ai ona ia vivii atu iā Ieova. E mautinoa e faapena foʻi o tatou faalogona.

5. Po o le ā lava lo tatou matutua ma maʻi e tatou te aafia ai, ae o le ā e mafai ona tatou faia?

⁵ O le maʻi ma le soifua matua, e ono taofia ai i tatou mai i le faia o le tele o mea na tatou faia muamua. O le iʻuga, e tatou te lagona ai le lē fiafia ma le faanoanoa. Ae aua lava neʻi o tatou lotovaivai ma faapalapala ai i le tausia o lo tatou soifua mālōlōina. Aiseā? Auā po o le ā lava lo tatou matutua ma maʻi e tatou te aafia ai, e mafai lava ona tatou vivii atu iā Ieova e pei ona sa faia e le tupu o Tavita. E pāʻia o tatou loto i le iloa, e tautele i tatou i le Atua e ui lava e tatou te lē lelei atoatoa. (Mata. 10:29-31) E tusa foʻi pe oo mai le oti, e matuā naunau o ia e toe faatūina i tatou. (Iopu 14:14, 15) O lea a o tatou maua pea le ola, e tatau ona tausia lo tatou soifua mālōlōina ma o tatou ola.

6. O le ā e faatalitalia e Ieova mai iā i tatou e faatatau i a tatou masaniga o le ʻai ma le inu?

⁶ E ui lava o le Tusi Paia e lē o se tusi faafomaʻi po o se tusi e aumai ai fautuaga i meaʻai paleni, ae o loo faailoa mai ai le finagalo o Ieova e tusa ai o nei mataupu. O se faaaʻoaʻoga, ua lapataʻia i tatou e Ieova ina ia “puipuia [o tatou] tino mai i mea e leaga ai.” (Fai. 11:10) O le ʻai tele ma le inu tele i le uaina e lē gata e lamatia ai o tatou ola ae e taʻusalaina foʻi e le Tusi Paia. (Faata. 23:20) O lea, e faatalitalia i tatou e Ieova e pulea le tele o mea e tatou te aai ma inu ai.​—1 Kori. 6:12; 9:25.

7. E faapefea ona fesoasoani le fautuaga o loo i le Faataoto 2:11 i a tatou filifiliga i le tausia o o tatou soifua mālōlōina?

⁷ E mafai ona tatou faia filifiliga e faaalia ai lo tatou matuā talisapaia o le meaalofa a le Atua o le ola, e ala i le faaaogā lelei o le tomai e mafaufau ai. (Sala. 119:99, 100; faitau le Faataoto 2:11.) O se faaaʻoaʻoga, e faaalia lo tatou mafaufau lelei i mea e tatou te filifili e aai ai. Pe a tatou fiafia i se meaʻai e tatou te iloa e tatou te mamaʻi ai, o le mafaufau lelei e uunaʻia ai i tatou e ʻalofia le ʻai i na meaʻai. E faaalia foʻi lo tatou mafaufau lelei pe a lava lelei la tatou mālōlō, faamalositino e lē aunoa, ia faatumauina le mamā o o tatou tino, ma o tatou fale.

8. O le ā ua faaalia i le Tusi Paia e faatatau i le finagalo o Ieova i lo tatou saogalemu?

⁸ O le Tulafono a Ieova na avatu i le nuu o Isaraelu, na aofia ai taʻiala na fesoasoani e puipuia ai i latou mai le aafia i faalavelave matuiā, e tutupu faafuaseʻi i o latou fale ma i galuega. (Eso. 21:28, 29; Teu. 22:8) E tugā āuga e oo i se fasioti tagata paʻivalea. (Teu. 19:4, 5) Na faasalaina i le Tulafono i latou na maliu faafuaseʻi ai se pepe e leʻi fanau mai. (Eso. 21:22, 23) E manino mai i le Tusi Paia, e finagalo Ieova ia faia taumafaiga uma e puipuia ai i tatou mai i faalavelave e tutupu faafuaseʻi.

9. O ā mea e tatau ona tatou faia ina ia ʻalofia ai faalavelave faafuaseʻi? (Tagaʻi foʻi i ata.)

⁹ E faaalia lo tatou talisapaia o le meaalofa a le Atua o le ola, e ala i le faia o taumafaiga uma e puipuia ai i tatou i o tatou fale ma galuega. O se faaaʻoaʻoga, e tatou te teuina i se nofoaga saogalemu mea maamaʻai, vailaau oona, po o fualaau mai i le fomaʻi, ma faamautinoa e lē fetagofi i ai tamaiti. E tatou te  faaeteete pe a tafuina ni afi i fafo, paʻi i se mea o loo iai se vai vevela, pe faaaogā foʻi ni meafaigaluega e alu i le uila. Ia faamautinoa ua tapē nei mea a o tatou leʻi ō ese. E tatou te lē aveina se taavale pe a inuina ni fualaau e ono faalētonu ai la tatou vaai, taumafaina o le ʻava malosi, po o le fia moe foʻi. E tatou te lē faaaogāina foʻi ni masini faaonapōnei e tosina ese ai a o aveina le taavale.

10. O le ā e mafai ona tatou faia a o leʻi tupu ma pe a tupu se mala?

¹⁰ E iai taimi e lē mafai ai ona tatou ʻalofia mea e tutupu faafuaseʻi e lamatia ai le ola, e pei o mala faalenatura, faamaʻi, ma fetauaʻiga. E ui i lea, pe a tutupu na mea ia tatou taumafai e ʻalofia lamatiaga e ala i le usitaʻia o vavao, o faatonuga i nofoaga e sosola i ai mo le saogalemu, ma isi faatonuga mai i le malo. (Roma 13:1, 5-7) E mafai ona tatou ʻalofia nisi lamatiaga, pe afai e mulimuli i so o se taʻiala mai i le malo lea e fesoasoani iā i tatou e sauniuni ai mo se mala. O se faataʻitaʻiga, o se mea atamai le saunia o ni vai, meaʻai tuuapa, ma se ato o loo iai mea manaʻomia mo le fesoasoani muamua.

11. O le ā e tatau ona tatou faia pe a pipisi se faamaʻi?

¹¹ O le ā e tatau ona tatou faia pe a pipisi se faamaʻi i lo tatou vaipanoa? E tatau ona tatou usitaʻia faatonuga a le malo e pei o le fufulu mamā o lima, iai o se vā faatulagaina, faaaogāina o tali fofoga, ma le faanofoesea. O le vave o lo tatou usitaʻia o na faatonuga e faaalia ai lo tatou talisapaia o le meaalofa a le Atua o le ola.

12. E faapefea ona fesoasoani iā i tatou le mataupu silisili i le Faataoto 14:15, e filifili ai faamatalaga e talitonu i ai pe a tupu se mala?

¹² Pe a tutupu ni faalavelave faafuaseʻi, atonu e faasalalau e ni uō, tuaoi, po o le ʻaufaasalalau ni tala lē moni. Nai lo o le talitonu i “upu uma” e tatou te faalogo i ai, e ao ona tatou faalogo i faamatalaga maufaatuatuaina mai i le malo ma fomaʻi. (Faitau le Faataoto 14:15.) E faia e le Vaega Pule ma ofisa o lālā taumafaiga uma, ina ia maua faamatalaga saʻo a o leʻi avatu faatonuga e faatatau i sauniga a le faapotopotoga ma le galuega talaʻi. (Epe. 13:17) O le galulue felagolagomaʻi e puipuia ai i tatou ma isi mai i lamatiaga, ma e ono taʻuleleia ai foʻi Molimau a Ieova.​—1 Pete. 2:12.

13. E faapefea ona faailoa atu e tāua iā i tatou le meaalofa a le Atua o le ola, pe a fesiligia i tatou i le faaaogāina o le toto?

¹³ E lauiloa Molimau a Ieova i le faatāuaina o le paia o le toto. E tatou te usitaʻi i le tulafono a Ieova e faatatau i le toto, e ala i le teena o tuigātoto e tusa lava po o se faalavelave faafuaseʻi. (Galu. 15:28, 29) Ae e lē faapea ai e tatou te mananaʻo e feoti. E tatou te faapelepele i le meaalofa a le Atua o le ola. E tatou te saʻilia le fesoasoani a fomaʻi o ē e lotomalilie e saunia togafitiga e sili ona lelei lea e lē faaaogāina ai le toto.

14. E faapefea ona tatou ʻalofia le ono faia o se taotoga telē faafomaʻi?

¹⁴ Pe a tatou faatatauina mea na tatou talanoaina i le amataga o lenei suʻesuʻega, e ono lē manaʻomia ai ona faia se taotoga telē faafomaʻi. O le lelei o le tausiaina o le soifua mālōlōina i le taimi lenei, o le a vave ai ona toe malosi pe afai e manaʻomia ona faia se taotoga. E mafai foʻi ona faaitiitia lamatiaga lea e iʻu ai i le faia o taotoga faafuaseʻi, e ala i le aveesea o mea e lamatia ai le ola mai i o tatou fale ma fale faigaluega, ma usitaʻia tulafono o le auala.

15. (a) Aiseā e tāua ai lo tatou tauaveina o se pepa o le toto ua toe faafou? (Tagaʻi foʻi i le ata.) (e) E pei ona faaalia i le vitiō, e faapefea ona tatou faia filifiliga atamai e faatatau i le faaaogāina o le toto?

 ¹⁵ Talu ai e tatou te talisapaia le meaalofa o le ola, e tatou te faatumuina ai le pepa o le toto (Faatonuga Faafomaʻi ua Muaʻi Saunia) ma tauave i taimi uma. b O lenei pepa ua faailoa atu ai mea ua tatou malilie e fai e tusa ai o tuigātoto ma nisi togafitiga faafomaʻi. Po ua uma ona faafou lau pepa o le toto? Pe a manaʻomia ona faatumu pe faafou lau pepa o le toto, aua e te faatuai. O se mea atamai le tusi i lalo o lau filifiliga ina ia ʻalofia ai le tuai ona maua o se togafitiga. E fesoasoani foʻi i fomaʻi e ʻalofia ai le lē femalamalamaaʻi lea e ono lamatia ai i tatou. c

16. Pe a tatou lē mautinoa i le auala e faatumu ai le pepa o le toto, o le ā e mafai ona tatou faia?

¹⁶ E tusa lava pe e tatou te talavou pe malolosi, ae e tatou te mamaʻi uma ma e tatou te aafia uma i faalavelave faafuaseʻi. (Fai. 9:11) O le mea lea e atamai ai le faatumu o le pepa o le toto. Pe a e lē mautinoa i le auala e faatumu ai, saʻili le fesoasoani a toeaina a la  outou faapotopotoga ona ua latou malamalama lelei i le auala e faatumu ai lenei pepa. Ae e latou te lē faia ni filifiliga faafomaʻi mo oe. O lau matafaioi lenā. (Kala. 6:4, 5) E fesoasoani toeaina ina ia e malamalama i mea e mafai ona e faia ma le auala e faatumu ai lau pepa o le toto.

17. E faapefea ona tatou faaalia le magafagafa i mataupu tau i le soifua mālōlōina?

¹⁷ E faavae le tele o a tatou filifiliga e faatatau i lo tatou soifua mālōlōina ma togafitiga faafomaʻi, mai i mea ua tatou aʻoaʻoina i le Tusi Paia. (Galu. 24:16; 1 Timo. 3:9) Pe a tatou faia ni filifiliga ma taʻu atu i isi na filifiliga, e lelei ona tatou faatatauina le mataupu silisili o loo i le Filipi 4:5: “Ia iloa e tagata uma lo outou magafagafa.” Pe a tatou magafagafa, e tatou te lē soona popole i lo tatou soifua mālōlōina, pe faamalosia isi e faia filifiliga ua tatou faia. E tatou te alolofa ma faaaloalo i o tatou uso ma tuafāfine, e tusa lava pe ese a latou filifiliga mai i a tatou filifiliga.​—Roma 14:10-12.

18. E faapefea ona faaalia lo tatou lotofaafetai mo le meaalofa o le ola?

¹⁸ E tatou te faaalia le lotofaafetai iā Ieova le Puna o le ola, e ala i le tausia lelei o o tatou ola ma faia le mea e sili e auauna ai iā te ia. (Faaa. 4:11) O loo tatou feagai pea ma maʻi ma mala, e ui lava e lē o le olaga lea na finagalo Lē na foafoaina i tatou e tatou te ola ai. E lē o toe umi ae ia aumaia loa le ola e faavavau e aunoa ma ni tigā ma le oti. (Faaa. 21:4) Maʻeu le matagofie o le ola ma auauna iā Ieova lo tatou Tamā alofa i le lagi!