1. Unfa Jehovah kai di libi fuu gaan soni tjika?

 BOO taa wan mati fii da i wan wosu, nöö kulölu fëën puu a so kamian, söseei a ta kule a so kamian. Hii fa a dë sö, tökuseei di wosu aki dii sömëni milion Amëëkandala. Wë a musu u dë taa i bi o tei ën u bigi seei taa i abi sö wan soni, söseei i bi o mbei möiti fu an kaba a sösö. Sö nöö a dë ku di libi di Jehovah da u. A dë kuma wan gaan dii kado. Fuu taki ën kumafa a dë, nöö Jehovah lei unfa a kai di libi di a da u gaan soni tjika, u di a manda di Womi Mii fëën ko dëdë da u.​—Joh. 3:16.

2. Andi Jehovah kë fuu du, te u luku 2 Kolenti 7:1?

² Jehovah hën da di Sëmbë di ta da libi (Ps. 36:9). Apösutu Paulosu seei bi ta biibi di soni dë, nöö fëën mbei a bi taki taa: „Hën ta da u libi, mbei u ta dë ta buli” (Tjab. 17:25, 28). Fëën mbei u sa taki taa di libi fuu da wan kado di Jehovah Gadu da u. A ta da u dee soni dee u abi fanöudu fuu sa dë a libi (Tjab. 14:15-17). Jehovah an ta du foombo soni u tjubi di libi fuu. Ma a kë taa u musu du soni fuu sa abi wan bunu gösöntu, söseei fuu sa dini ën go dou. (Lesi 2 Kolenti 7:1.) Faandi mbei u musu ta köni ku di libi fuu, söseei unfa u sa du di soni dë?

3. Faandi mbei u musu mbei möiti fuu ta dë gösöntu?

³ Wan u dee soni di ta mbei taa u musu mbei möiti fuu ta  dë gösöntu, hën da u di woo sa dini Jehovah möön bunu (Maik. 12:30). U di u kë ’hopo useei ku telu da Gadu, kuma wan libilibi paima apaiti wan di u ta tuwë dëën’, mbei wa ta du soni di sa mbei u ko dë ku suwaki (Lom. 12:1). A dë sö taa aluwasi andi u ta du, wa sa dë seiki taa wa o ko dë ku suwaki. Ma u ta du andi u sa du fuu dë gösöntu, u di u kë lei di Tata fuu di dë a liba ala taa u kai di libi di a da u gaan soni.

4. Andi Könu Dafiti bi kë du?

⁴ Könu Dafiti bi taki faandi mbei a bi ta kai di libi di Gadu dëën gaan soni. A bi sikifi taa: „Un wini seei joo feni ee mi dëdë? Di doti o sa gafa i nö? A o sa konda da sëmbë taa tuutuu soni wanwan i ta taki nö?” (Ps. 30:9) A kan taa Dafiti bi sikifi dee soni aki di a bi o lasi libi. Ma a bi kë fika a libi, söseei a bi kë dë gösöntu go dou, sö taa a bi sa ta gafa Jehovah. An dë u taki taa hii u tuu dë kabakaba u du di soni aki tu.

5. Andi u sa du aluwasi ee u ko gaandi nasö u ko dë ku suwaki?

⁵ Te u dë ku suwaki, söseei te u ko gaandi, nöö kandë wa o sa du sömëni u dee soni dee u bi ta du möön. Di soni aki sa mbei taa u fii bookosaka. Ma tökuseei u musu ta mbei möiti go dou fuu sa dë gösöntu. Faandi mbei? U di aluwasi ee u ko gaandi, nasö u dë ku suwaki, tökuseei woo sa gafa Jehovah go dou kuma Könu Dafiti. Di sabi di u sabi taa di Gadu fuu ta kai u gaan soni aluwasi u dë ku suwaki nasö u ko gaandi kaa, ta da u kötöhati (Mat. 10:29-31). Aluwasi ee u ko lasi libi, a o weki u ko a libi baka (Jöpu 14:14, 15). A dë fanöudu fuu du andi u sa du fuu dë gösöntu, söseei fuu tjubi di libi fuu.

6. Andi Jehovah kë fuu du te a nama ku di fasi fa u ta njan ku di fasi fa u ta bebe?

⁶ Hii fa di Bëibel an dë wan buku di ta lei sëmbë unfa de sa du u de dë gösöntu nasö unfa de musu ta njan, tökuseei a ta lei u unfa Jehovah ta si dee soni aki. A ta piki u taa u musu ta köni ku dee soni dee sa poi di sinkii fuu (Peleik. 11:10). Di Bëibel ta piki u taa wa musu ta njan pasa maaka, söseei wa musu ta bebe pasa maaka, u di dee soni aki sa mbei u ko dë ku suwaki nasö de sa kii u (Nöng. 23:20). Jehovah kë fuu ta duwengi useei fu wa njan soni di an bunu, fu wa njan pasa maaka, söseei fu wa bebe pasa maaka.​—1 Kol. 6:12; 9:25.

7. Unfa di soni di sikifi a Nöngö 2:11 ta heepi u fuu ta du soni di o mbei u dë gösöntu?

⁷ Te u ta kai pakisei ufö u du wan soni, nöö a sö wan fasi u sa lei taa u ta kai di libi di Gadu da u gaan soni. (Ps. 119:99, 100; lesi Nöngö 2:11.) U ta du di soni dë, te u ta buta mëni a dee soni dee u ta njan. Ee u lobi wan soni, ma u sabi taa te u njan mën a ta mbei u ko suwaki, nöö u ta köni fu wa njan mën möön. U ta lei tu taa u ta buta mëni a useei te u ta duumi bunu, te u ta sport, te u ta seeka sinkii, söseei te u ta seeka di wosu fuu fa sa ta dë limbolimbo.

8. Unfa Jehovah kë fuu ta köni ku useei tjika, te u luku di soni di Bëibel ta taki?

⁸ Di Wëti di Jehovah bi da dee Isaëli sëmbë bi ta taki unfa de bi musu du soni u hogi an miti de te de bi dë a wosu, nasö te de bi ta wooko (Ëki. 21:28, 29; Deto. 22:8). Ee wan sëmbë bi kii wan wotowan, hii fa an bi du ën ku hënseei kë, tökuseei a bi o kisi sitaafu fëën (Deto. 19:4, 5). Di Wëti bi ta  taki taa ee wan sëmbë bi du wan soni ku wan mii di bi dë nëën mama bëë, nöö de bi musu sitaafu ën (Ëki. 21:22, 23). Di Bëibel ta lei u gbelingbelin taa Jehovah kë fuu ta köni be hogi an miti u.

9. Unfa u sa köni be hogi an miti u? (Luku dee peentje.)

⁹ U ta lei taa u ta kai di libi gaan soni, te u ta köni u soni an du u te u dë a wosu nasö te u dë a wooko. Ee u abi saapusaapu soni, soni u duweli wosu, nasö deesi, nöö u ta buta de a wan bumbuu kamian. Söseei u ta buta de a wan kamian ka miii an o sa dou a de. U ta köni tu te u ta du soni ku faja, te u ta këndë wata, nasö te u ta wooko ku wookolai. Wa ta lëi wagi ee u ta bebe wan deesi di sa toobi u te u ta lëi di wagi. Söseei ee wa o sa lëi di wagi bumbuu u di u bebe daan nasö u di wa duumi tjika, nöö wa ta lëi ën. Boiti di dë, wa ta lëi wagi ta luku tëlëfön.

10. Andi u sa du ufö wan hogi pasa, nasö te wan hogi ta pasa?

¹⁰ Aluwasi u ta köni seei, tökuseei so juu  hogi soni ta pasa. Dee soni aki sa dë gaan ventu nasö gaan wata, taku siki, nasö feti. Ma te dee soni aki pasa, nöö u sa köni u hogi an miti u. U sa du di soni aki te u ta du dee soni dee lanti ta piki u. Kandë de o piki u na un ten u sa go a sitaati, nasö taa u musu fusi kumutu a di kamian ka u ta libi, nasö de sa piki u woto soni (Lom. 13:1, 5-7). U sa tei seeka a fesi ufö so soni pasa. Fëën mbei u musu ta haika dee soni dee lanti ta piki u fuu du, sö taa u sa dë seekaseeka. A sa bunu fuu abi wata u bebe ku soni u njan di an ta poi hesi a wan kamian, söseei a sa bunu fuu abi wan dosu di dë ku wantu deesi a dendu.

11. Andi u musu du ee wan taku siki ta paaja a di pisiwata ka u ta libi?

¹¹ Andi u musu du ee wan taku siki ta paaja a di pisiwata ka u ta libi? U musu haika dee soni dee lanti ta piki u. Kandë de o piki u fuu ta wasi u maun, fuu ta bisi soni tapa nusu, fu wa nango zuntu ku sëmbë poi, söseei fuu fika a wosu u wan pisiten. Te u ta du dee soni aki, nöö u ta lei taa u ta kai di libi di Gadu da u gaan soni.

12. Unfa di mama wëti di sikifi a Nöngö 14:15 ta heepi u fu wa biibi hii soni te wan hogi ta pasa?

¹² Te wan hogi ta pasa, nöö so juu u sa ta jei soni di an dë tuu a dee mati fuu, a dee sëmbë u di pisiwata ka u ta dë, nasö a njunsu. Ka fuu biibi „hii dee soni” dee u ta jei, a bi o möön bunu fuu haika dee soni dee lanti ku dee data dee sa’ fa u di soni ta taki. (Lesi Nöngö 14:15.) Di Tii Kulupu ku dee bëikantoo ta mbei hii möiti u de ko sabi unfa soni dë tuutuu, ufö de piki u unfa u musu hoi dee komakandi, söseei unfa u musu du di peleikiwooko (Heb. 13:17). Te u ta du soni kumafa de piki u, nöö a o dë taa u ta köni u soni an miti u, söseei u soni an miti wotowan. Di soni aki sa mbei tu taa sëmbë an taki hogi fuu.​—1 Pet. 2:12.

13. Unfa u ta lei taa u ta kai di libi di Gadu da u gaan soni, te a nama ku buuu?

¹³ Sömëni sëmbë sabi taa dee Jehovah Kotoigi ta si buuu kuma wan santa soni. Jehovah da u wëti di nama ku buuu. U ta piki Jehovah buka te wa ta tei buuu, aluwasi u suwaki gaanfa seei (Tjab. 15:28, 29). Ma di soni aki an kë taki taa u kë dëdë. U ta kai di libi di Gadu da u gaan soni. U ta suku data di sa heepi u a wan bunu fasi, söndö u de kula u ku buuu.

14. Andi sa heepi u fu wa suwaki gaan suwaki, nasö fu wa kisi makei go a hatiwosu u de opalasi u?

¹⁴ Ee u ta buta mëni a useei kumafa u taki a di woto aki, nöö di soni dë sa heepi u fu wa kisi gaan makei, nasö fu wa ko suwaki sö tee taa de musu opalasi u. Möön u dë gösöntu, möön woo sa kisi useei hesihesi ee a ko dë taa de musu opalasi u. Ee u ta buta mëni a useei te u dë a wosu, a wooko, nasö te u ta lëi wagi, nöö di soni dë sa heepi u tu fu wa kisi gaan makei go a hatiwosu u de opalasi u.

15. (a) Faandi mbei a dë fanöudu fuu ta tja wan pampia di ta lei taa wa kë u de da u buuu? (Luku di peentje.) (b) Te u luku di fëlön, nöö unfa u sa mbei dee data ko sabi unfa u kë u de kula u, te a nama ku di da di de ta da sëmbë buuu?

¹⁵ U di u ta kai di libi gaan soni, mbei u ta fuu wan pampia di ta lei taa wa kë u de da u buuu, nöö u ta tjëën a hiniwan kamian ka u nango. b U ta sikifi a di pampia aki tu unfa u  bi o kë u data kula u. Di pampia di i ta fuu u lei sëmbë taa ja kë buuu dë seekaseeka u? Ee i musu fuu wan njunjunwan, nöö du ën wantewante. Te u sikifi buta a pampia unfa u kë u data kula u, nöö de o sa heepi u möön hesi te wan soni du u. Di soni dë o heepi dee data u de fusutan gbelingbelin andi u kë, sö taa de an da u wan deesi di an bunu da u. c

16. Andi u sa du ee wa kaba sabi unfa u musu fuu di pampia di ta lei unfa u kë u data musu kula u?

¹⁶ Aluwasi u njönku nasö u dë gösöntu, tökuseei hiniwan fuu sa kisi makei nasö u sa ko dë ku suwaki (Peleik. 9:11). Fëën mbei a bi o dë wan köni soni fuu fuu di pampia di ta lei unfa u kë u data musu kula u. Ee ja kaba sabi unfa i musu fuu di pampia aki, nöö i sa hakisi dee gaanwomi u di kemeente ka i dë u de heepi i. De ta mbei möiti u de sabi unfa de musu heepi sëmbë fuu di pampia aki, ma de an o piki i un fasi u kula i musu tei. Ju hën abi di faantiwöutu dë (Gal. 6:4, 5). Ma de sa heepi i fii ko fusutan dee peipei fasi fa data sa kula i, söseei de sa heepi i fii fuu di pampia u dee data sa sabi unfa i kë u de kula i.

17. Unfa u sa lei taa wa ta du soni pasa maaka, te a nama ku di gösöntu fuu?

¹⁷ Dee soni dee u lei a Bëibel de ta heepi u fuu sabi andi u musu du te a nama ku di gösöntu fuu, söseei de ta heepi u fuu sa taki unfa u bi o kë u data kula u (Tjab. 24:16; 1 Tim. 3:9). Te woo du soni, söseei te woo piki wotowan unfa u buta taa woo du soni, nöö a bunu fuu buta mëni a di soni di sikifi a Filipi 4:5. A sikifi dë taa: „Un musu ta libi ku saka fasi a hii sëmbë dendu be de ta si.” Te u abi sakafasi, nöö wa o ta booko u hedi ku di gösöntu fuu tumisi poi, söseei wa o ta suku u mbei wotowan ko ta si soni kuma u, te a nama ku di gösöntu u de. U lobi dee baaa ku dee sisa fuu, söseei u ta lesipeki de, aluwasi de an ta du soni di seei fasi kuma u.​—Lom. 14:10-12.

18. Unfa u sa lei taa u kai di libi di Gadu da u gaan soni?

¹⁸ Jehovah hën ta da sëmbë libi. U ta lei ën taa u ta tei soni u bigi, te u ta köni ku di libi di a da u, söseei te u ta dini ën a di möön bunu fasi fa u sa dini ën (Ako. 4:11). A di ten aki, u ta suwaki, söseei hogi ta miti u. Ma na sö di Sëmbë di mbei u bi kë taa di libi bi musu dë da u. Abiti möön a o mbei u libi u teego, söseei a o puu pen ku dëdë da u (Ako. 21:4). Ma u ta wai nöunöu kaa taa u dë a libi, söseei taa u sa dini di Tata fuu di dë a liba ala!