1. O warti a libi fu wi de gi Yehovah?

 KOW taki dati wan mati gi yu wan oso. Na wan tu presi a ferfi e komoto na a oso èn a dak e leki. Toku na oso warti milyunmilyun dala. A no de fu taki dati yu ben o warderi na oso disi èn taki yu ben o seti en kon bun baka. Yehovah gi wi wan sani tu di warti srefisrefi. A gi wi libi. Fu taki en leti, Yehovah gi en Manpikin leki lusu-paiman gi wi fu di a libi fu wi warti srefisrefi gi en.​—Yoh. 3:16.

2. Soleki fa 2 Korentesma 7:1 e sori, dan san Yehovah e fruwakti fu wi?

² Yehovah na a sma di e gi libi (Ps. 36:9). Na apostel Paulus ben e bribi a sani disi. Dati meki a taki: „Na en meki taki wi de na libi, taki wi e buweigi èn taki wi de” (Tori 17:25, 28). Sobun, wi kan taki dati a libi fu wi na wan kado di Gado gi wi. Fu di a lobi wi, meki a e gi wi ala san wi abi fanowdu fu man tan na libi (Tori 14:15-17). Ma Yehovah no o du wondru nownowde fu hori wi na libi. Na presi fu dati, a wani taki wi du ala san wi man fu tan gosontu èn fu tan dini en. (Leisi 2 Korentesma 7:1.) Fu san ede wi musu du ala san wi man fu tan gosontu èn fu tan na libi? Fa wi kan du dati?

3. San na wan reide fu san ede wi musu pruberi fu tan gosontu?

³ Wan reide fu san ede wi musu pruberi fu tan gosontu, na taki wi wani du ala san wi man fu dini Yehovah (Mark. 12:30). Wi e angri ’fu gi wi skin na Gado leki wan srakti-ofrandi di e libi, di de santa èn di Gado feni bun’. Dati meki te wi sabi taki wan sani kan meki wi kon siki, dan wi no o du a sani dati (Rom. 12:1). Ma awinsi o furu  muiti wi e meki, toku wi kan kon siki. Ma wi e du ala san wi man fu tan gosontu fu di wi wani sori wi hemel Papa taki wi e warderi a libi di a gi wi.

4. San Kownu David ben wani du?

⁴ Kownu David ben fruteri fu san ede a ben warderi a libi di Gado gi en. A ben skrifi: „Sortu wini a o abi efu mi saka go na ini grebi-olo? A doti fu a gron o man prèise yu? A o man fruteri sma taki yu e taki soso tru tori?” (Ps. 30:9) A kan taki David ben skrifi den sani disi na a kaba fu en libi. Ma a ben wani tan na libi èn a ben wani tan gosontu so langa leki a man so taki a ben kan prèise Yehovah. A no de fu taki dati wi alamala wani du a srefi.

5. San wi kan du awinsi fa wi owru noso siki?

⁵ Efu wi siki noso owru, dan a kan taki wi no man du furu fu den sani moro di wi ben gwenti du. Disi kan meki taki wi mandi èn wi kan firi sari. Ma toku wi musu tan du ala san wi man fu tan gosontu. Fu san ede? Fu di awinsi fa wi owru noso siki, toku wi kan tan prèise Yehovah neleki Kownu David. A e gi wi furu deki-ati fu sabi taki wi warti gi Gado, awinsi wi siki noso owru (Mat. 10:29-31). Awinsi wi ben o dede, Yehovah ben o angri fu gi wi wan opobaka (Yob 14:14, 15). Dati meki now di wi de na libi, wi wani du ala san wi man fu tan gosontu èn fu tan na libi.

6. San Yehovah e fruwakti fu wi te a abi fu du nanga san wi o nyan èn san wi o dringi?

⁶ Aladi Bijbel a no wan buku di e sori wi fa wi kan tan gosontu èn a no e sori san wi musu nyan, toku a e leri wi furu fu a fasi fa Yehovah e denki fu den sani disi. Fu eksempre Yehovah e gi wi a rai fu „wai pasi gi ogri di kan miti” wi (Preik. 11:10). Bijbel e taigi wi taki wi no musu nyan noso dringi sopi pasa marki. Den sani disi kan pori a gosontu fu wi èn den kan kiri wi srefi (Odo 23:20). Yehovah e fruwakti fu wi taki wi e dwengi wisrefi te wi o bosroiti san wi o nyan noso dringi èn o furu wi o nyan noso dringi.​—1 Kor. 6:12; 9:25.

7. Fa a rai di skrifi na Odo 2:11 e yepi wi fu teki koni bosroiti te a abi fu du nanga wi gosontu?

⁷ Te wi e gebroiki wi frustan, dan wi o teki bosroiti di e sori taki wi e warderi a libi di Gado gi wi (Ps. 119:99, 100; leisi Odo 2:11). Fu eksempre wi o teki koni bosroiti te a abi fu du nanga san wi o nyan. Efu wi lobi nyan wan spesrutu sani èn wi sabi taki a e meki wi kon siki, dan wi musu gebroiki wi frustan èn no nyan a sani dati. Wi e sori tu taki wi e gebroiki wi frustan te wi e sorgu taki wi sribi bun, te wi abi a gwenti fu oefen wi skin èn te wi e sorgu taki wi skin nanga wi oso tan krin.

8. Fa Bijbel e sori taki Yehovah wani taki wi wai pasi gi sani di kan meki wi kisi mankeri?

⁸ Yehovah ben gi den Israelsma wet di ben e sori den fa den ben kan kibri densrefi fu no kisi hebi mankeri te den ben de na oso noso te den ben e wroko (Eks. 21:28, 29; Deut. 22:8). Efu wan sma ben kiri wan trawan aladi a no ben du dati fu espresi, toku a ben o kisi hebi strafu (Deut. 19:4, 5). A wet ben e taki dati efu wan sma ben gi wan pikin di no gebore  ete mankeri, dan a sma dati ben musu kisi strafu awinsi a no ben du dati fu espresi (Eks. 21:22, 23). Bijbel e sori krin taki Yehovah wani wi du ala san wi man fu sorgu taki wi noso trawan no kisi mankeri.

9. San wi kan du fu sorgu taki wi no kisi mankeri? (Luku den fowtow.)

⁹ Wi e sori taki wi e warderi a libi di Gado gi wi te wi e du ala san wi man fu no kisi mankeri na oso èn na wi wrokope. Fu eksempre te wi e trowe srapu sani, sani di abi gas nanga tra sani na ini di kan kiri sma, noso dresi, dan wi musu luku bun fa wi e du dati. Wi musu sorgu tu taki pikin-nengre no man feni den sani disi. Boiti dati, wi e luku bun te wi leti faya, te wi e bori watra èn te wi e gebroiki wrokosani di e wroko nanga stroom. Wi e sorgu tu taki wi no e libi den sani disi somarso. Wi no o rèi wan wagi efu wi sabi taki wi ede e drai noso wi no man si so bun fu di wi teki dresi, wi dringi sopi, noso fu di sribi e kiri wi. Èn wi no o hori wi telefon na ini wi anu te wi e rèi.

10. San wi kan du fosi wan rampu pasa èn te wan rampu pasa?

¹⁰ Son leisi muilek situwâsi kan opo kon èn wi no man tapu pasi gi a sani dati. A sani disi tru spesrutu te gronseki pasa, te bigi winti e wai, te wan takru siki panya na ala sei èn te sma e feti nanga makandra. Ma te den sani disi pasa, wi musu du ala san wi man fu kibri wisrefi. Dati meki wi musu gi yesi te lanti e taigi wi fu komoto na wan kontren pe wan rampu pasa noso te den taigi wi fu du tra sani (Rom. 13:1, 5-7). Son leisi wi kan sreka wisrefi na fesi gi wan rampu. Fu man du dati wi musu gi yesi na iniwan rai di wi e kisi fu lanti. Fu eksempre, kande a bun fu poti wan tu batra watra na wan sei, nyanyan sani di no e pori esi, èn sani soleki dresi nanga plèister.

11. Efu wan siki di sma kan kisi makriki panya na ini a kontren fu wi, dan san wi musu du?

¹¹ San wi musu du efu wan siki di sma kan kisi makriki panya na ini a kontren pe wi e libi? Wi musu gi yesi na den rai di lanti e gi wi fu wasi wi anu, fu no kon tumusi krosibei fu trawan, fu weri wan mondkap èn fu hori wisrefi aparti fu sma efu wi abi a siki. Te wi e du den sani disi, dan wi e sori taki wi e warderi a libi di Gado gi wi.

12. Fa a gronprakseri na ini Odo 14:15 kan yepi wi fu sabi suma wi musu arki te wan rampu pasa?

¹² Te wan rampu pasa, dan son leisi mati, birtisma nanga nyunsuman kan fruteri sani di no tru. Na presi fu „bribi ala san sma e taki”, wi musu arki den bun rai di lanti nanga datra e gi. (Leisi Odo 14:15.) A Tiri Skin nanga den bijkantoro e du ala san den man fu kon sabi sani krin, fosi den gi wi rai fa fu hori gemeente konmakandra èn fa fu du a preikiwroko (Hebr. 13:17). Te wi e gi yesi na den rai disi, dan wi o kibri wisrefi nanga trawan fu no kisi mankeri. Boiti dati, trawan o denki bun fu Yehovah Kotoigi.​—1 Petr. 2:12.

13. Fa wi e sori taki wi e warderi a libi di Gado gi wi te a abi fu du nanga brudu?

¹³ Furu sma sabi taki Yehovah Kotoigi e bribi taki brudu santa. Fu di wi e gi yesi na a wet fu Yehovah di abi fu du nanga brudu, meki wi e weigri fu teki brudu, awinsi o seryusu a situwâsi fu wi de (Tori 15:28, 29). Toku dati no wani taki dati wi wani dede. Wi e warderi a libi di Gado gi wi. Dati meki wi e suku yepi na datra di sabi du den wroko bun èn di de klariklari fu yepi wi sondro fu gebroiki brudu.

14. San wi kan du fu sorgu taki wi no abi fu du wan seryusu oparâsi?

¹⁴ Te wi e fiti den rai di wi kisi na ini na artikel disi, dan kande wi no o abi fu du wan seryusu oparâsi noso kande wi no o abi fu suku tra datrayepi. Èn efu wi tan gosontu, dan wi o man kisi wisrefi baka moro esi te wi du wan oparâsi. Wi no o abi fu du wan oparâsi tu, te wi e sorgu taki sani no de na wi oso noso na wi wrokope di kan meki wi kisi mankeri. Boiti dati, wi musu gi yesi na den wet na ini a verkeer.

15. (a) Fu san ede a prenspari taki wi vul a Wilsverklaring in a yari disi? (Luku a fowtow.) (b) Soleki fa a felem e sori, dan fa wi kan teki koni bosroiti te a abi fu du nanga brudu?

¹⁵ Fu di wi e warderi a libi di Gado gi  wi, meki wi e vul Geneeskundige wilsverklaring en machtiging in èn wi abi en na wi awinsi pe wi e go. b Nanga yepi fu a dokumenti disi, wi e sori san wi wani te a abi fu du nanga brudu èn nanga a datrayepi di wi wani. Yu vul a dokumenti disi in a yari disi? Efu yu abi wan nyunwan fu a dokumenti disi fanowdu, noso efu yu musu vul en in a yari disi ete, dan no draidrai. Te wi e skrifi krin sortu datrayepi wi wani, dan wi no o abi fu lasi ten fu taki nanga wi datra san wi wani. Disi o yepi wi fu kisi yepi moro esi. Disi o sorgu tu taki wi no e kisi datrayepi noso dresi di kan siki wi. c

16. San wi kan du efu wi no sabi fa fu vul a Wilsverklaring in?

¹⁶ Awinsi wi yongu noso gosontu, wi alamala kan kisi mankeri noso wi kan kon siki (Preik. 9:11). Fu dati ede a o de wan koni sani fu vul a Wilsverklaring in. Efu yu no sabi fa yu musu vul a dokumenti disi in, dan aksi den owruman fu yu gemeente fu yepi yu. Den o sori yu fa yu musu vul a dokumenti disi in, ma den  no o teki bosroiti gi yu. Dati na yu frantwortu (Gal. 6:4, 5). Den kan yepi yu frustan san skrifi na ini a dokumenti disi èn den kan yepi yu te yu e vul en in.

17. Fa wi kan sori taki wi de klariklari fu fiti wisrefi na ala fasi te a abi fu nanga gosontu afersi?

¹⁷ Nofo tron te wi e teki bosroiti di abi fu du nanga wi gosontu èn nanga a datrayepi di wi o teki, dan wi e hori wisrefi na san Bijbel e leri (Tori 24:16; 1 Tim. 3:9). Te wi e teki bosroiti èn te wi e taki nanga trawan fu den bosroiti disi, dan wi musu hori wisrefi na a gronprakseri di skrifi na Filipisma 4:5 di e taki: „Meki ala sma kon sabi taki unu de klariklari fu fiti unsrefi na ala fasi.” Te wi de klariklari fu fiti wisrefi na ala fasi, dan wi no o broko wi ede tumusi nanga a gosontu fu wi èn wi no o pruberi fu meki trawan denki soleki fa wi denki te a abi fu du nanga gosontu afersi. Wi lobi wi brada nanga sisa èn wi e lespeki den, awinsi den e teki tra bosroiti leki wi.​—Rom. 14:10-12.

18. Fa wi kan sori taki wi de nanga tangi gi a libi di wi kisi?

¹⁸ Te wi e sorgu taki wi no e kisi mankeri èn te wi e du ala san wi man fu dini Yehovah, dan wi e sori en taki wi de nanga tangi fu di en na a sma di gi wi libi (Openb. 4:11). Na ini a ten disi wi e kon siki ete èn wi e kisi fu du nanga rampu. Ma disi a no a libi di wi Mekiman ben wani gi wi. Heri esi a o gi wi têgo libi èn pen nanga dede no o de moro (Openb. 21:4). Aladi wi e wakti a ten dati, wi breiti srefisrefi taki wi de na libi èn taki wi kan anbegi wi lobi-ati hemel Papa Yehovah!