1. Bukose bwetu bukindeeme siani pa menso akue Yehova?

 TONTONKANIA kibuza obe wakupeela nsesi. Ezio nsesi ili ni rangi yalamukile, ili ni mataka kabili ili ni milale. Anzia kine ili ni azo maavia, ezio nsesi ni ya mamilioni a ma dolare. Kakiine uli kutasia, ni kufikiila kusuunga nsesi ezio. Evio vyenka ni Yehova, waatupeele bupe bwa mana, i kulanda bupe bwa bukose. Kakiine, Yehova alangiliile nangue bukose bwetu ni bwa mana saana kupitila kumufumia Muana wakue eevi aaluke kilubula mulandu juu yeetu.​—Yoan. 3:16.

2. Nga vilangiliile 2 Bakorinto 7:1, Yehova atonene fwefue tukite ki?

² Yehova i Nsulo ya bukose. (Malum. 36:9) Mutumua Paulo waainikile keekio kisinka musita lwaafikiile kulanda eevi: “Leeza i ali watupeela bukose, i ali watwenzia, kabili i kitubeleelepo.” (Miil Bat. 17:25, 28) Pakaako, kunti twalanda nangue bukose bwetu, bupe kufuma kuli Leeza. Ali watupeela kwa ntono beelia bitukabiile eevi tutwalilile kuya twakosele. (Miil Bat. 14:15-17) Anzia evio, Yehova teezi kusuunga bukose bwetu mu kimpezia maano. Inzi, atonene tuye twaemena saana bukose bwetu bwa kimubili ni bwa kimupasi kukoonkana ni buviinde bwetu. (Soma 2 Bakorinto 7:1.) Juu ya ki tupalile kusuunga bukose bwetu, kabili kunti twabusuunga siani?

3. Ni nsaambu ki imo ipalile kutulengia kwikwinda kuya twali ni bukose buweeme?

³ Nsaambu imo ipalile kutulengia kwikwinda eevi kusiala twali ni bukose buweeme ni eezi, kunti twamubombela saana Yehova kukoonkana ni buviinde bwetu kine tuli ni bukose bwaweeme. (Mark. 12:30) Tutonene kumupeela Leeza ‘mibili yeetu eevi iye yali ngeleelo ikosele ni izuuke [ao, itakatiifu] yakuti iye yamuwaamiine.’ Pakaako, tuli twatiina kukita bintu bitumanine  nangue kunti byalengia tuluale. (Bar. 12:1) Kakiine, tetuviinda kukita byonse biloombelue eevi kusuunga bukose bwetu. Anzia evio, tuli twakita kukoonkana ni buviinde bwetu eevi bukose bwetu busiale bwaweeme paantu tutonene kumulangilila Baba weetu wa ku muulu nangue tuli mukutasia palua bupe bwa bukose.

4. Likolo Daudi waali watonene kukita ki?

⁴ Likolo Daudi waalondoluele kintu kyaalengele asekelele bupe bwa bukose bwaapeelue na Leeza musita lwaaleembele eevi: “Lufu lwane kunti lwanoonkeluamo ki, kine nakookela mu kiina? Eba, lufunko lwakaba kukutasia weewe? Lwakaba kulanda palua bukisinka bobe?” (Malum. 30:9) Paange Daudi waleembele ezio milandu ku mpela ya buikazi bwakue. Inzi, waali wapinguile kusiala wakosele kabili wali buino, kine kyakitika, eevi atwalilile kumubombela Yehova. Kakiine fwe bonse tupinguile enka evio.

5. Anzia kine tuye twakotele ao twaluele siani kunti twakita ki?

⁵ Kuluala ni bukote, kunti byatwanzia kukita bintu bingi bitwaali twakita lwa ntaanzi. Keekio kunti kyalengia twiunvue kuya twali ba bule-bule, kabili twali mu bulanda. Inzi tupalile kutwalilila kwikwinda saana eevi kwemena bukose bwetu. Juu ya ki? Paantu, anzia kine tuye twakotele ao twaluele siani, kunti twatwalilila kumubombela Yehova nga evelia vyaakitile Likolo Daudi. Kakiine kili kyateekia saana mutima kumana nangue tuli twasaangua twali ba mana pa menso akue Leeza atasie musita utuli twaluala ni kukota! (Mat. 10:29-31) Atasie kine twafua, weene wakaba kutona saana kututuntumuna. (Yob. 14:14, 15) Musita utukikosele, tutonene kwikwinda kukoonkana ni buviinde bwetu eevi kusuunga bukose bwetu.

6. Yehova atonene tukite ki palua kulia ni kumina?

⁶ Anzia kine Bibilia te kitabu kilandiile vya kutunza bukose bobe ao kilandiile bintu bitupalile kulia, ili yatubuila mpunda ingi ilangiliile Yehova vyali watontonkania palua bebio bintu. Kwa mufuano, ali watusoka tuye ‘twaitiinia ku bintu bili byakisia’ beelia bili kuviinda kwinoona mubili weetu. (Kas. 11:10) Bibilia ili yalanda nangue te tupalile kulia byakulia bingi saana, ao kumina bwalua buingi saana. Bebio bintu kunti byainoona bukose bwetu, atasie kufikiila kutwipaya. (Tus Maf. 23:20) Yehova atonene tubombie mibeele ya kwitiinia musita utuli twapingula beelia bitupalile kulia, ni beelia bitupalile kumina. Kabili atonene tubombie mibeele ezio musita utuli twapingula buingi bwa beelia bitupalile kulia ni kumina.​—1 Bakor. 6:12; 9:25.

7. Musoko uli mu lileembo lya Tuswalo ni Mafunde 2:11 watukwasia siani kukwata bupinguzi buweeme palua bukose bwetu?

⁷ Kunti twakwata bupinguzi bulangiliile nangue tuli mukutasia saana palua bupe butwapeelue na Leeza kupitila kubombia buviinde bwetu bwa kutontonkania. (Malum. 119:99, 100; soma Tuswalo ni Mafunde 2:11.) Kwa mufuano, tupalile kusaakula buino beelia bituli twalia. Kine kuli kyakulia kimo kituli twatona saana, inzi twamanine nangue kili kyatulengia tuluale, tuli twakita maka eevi kutiina kulia keekio kyakulia. Kabili tuli twalangilila nangue tuli ni maano aweeme musita utuli twalaala nsaansa itosiizie, musita utuli twabeelezia mubili weetu lingi, ni musita utuli twaikwinda kuya twali ni busaka palua mubili weetu ni nsesi yeetu.

8. Bibilia ilangiliile nangue Leeza ali watontonkania siani palua muntu kwisuunga ye muine?

⁸ Muzilo wakue Yehova ku ntundu ya Israeli, waali wabiikile mukati malaizio a kukwasia eevi ma aksida te kunti aye akitika ku nsesi ao ku miilo. (Kuf. 21:28, 29; Mal Miz. 22:8) Muntu lwaali wamwipaya muntu mwinakue bila wapaangile, keekio kyaali kyalengia kwaluke  maavia akata. (Mal Miz. 19:4, 5) Muzilo waali walandile nangue atasie muntu olia wamukisianga bila wapaangile muana asinavyalue, waali wapalile kulapiziiwa. (Kuf. 21:22, 23) Maleembo alangiliile paswetele nangue Yehova atonene twikwinde saana eevi kutiina ma aksida.

9. Ni biki bitupalile kukita eevi kutiina aksida? (Mona ni ma foto.)

⁹ Tuli twalangilila nangue tuli twatasia palua bupe bwa bukose butwapeelue na Leeza, kupitila kukwata mipaango ya kusuunga bukose ku nsesi ni ku miilo. Kwa mufuano, kine tukebele kupooza biombo bituile, miti ili ni sumu ao miti inge, tupalile kukita evio mu nzila isiviinda kuleeta buavia ku bange. Kabili tupalile kusininkizia nangue baana tebaviinda kumona bebio bintu. Kukila pakaako, tupalile kuya twakengeele musita utuli twaleemia mulilo, musita utuli twaswezia menda, ni musita utuli twabombia biombo. Tupalile kuya twakengeele eevi te kunti tufumepo musita utuli mukukita bebio bintu. Te tupalile kwenzia motoka kine twaaminanga miti, ao bwalua bolia buli kuleeta buavia pa kwenzia, ao kine tutopele saana bila twali na buviinde bwa kwenzia buino. Kabili te tupalile kubombia telefone ku minue musita utuli mukwenzia.

10. Kunti twakita siani ntaanzi ni mu nsita ya masaanzo akolele?

¹⁰ Nsita inge, tetwizi kusaangua twali ni buviinde bwa kwanzia aali ikolele eevi te kunti ikitike. I vikili kyasaangua aasa palua masaanzo ali aleetua na maka a kyalo ali ainoona bintu, palua bimina bya maluele ni palua kinvulunghania kili kyaleetua na kusyunvuana kwa bikundi bya bantu. Anzia evio, musita masaanzo a evio luali akitika, kunti twaikwinda kwisuunga kukoonkana ni buviinde bwetu ni kupusuka kupitila kukoonka malaizio alandile kufuma mu fuasi ya buavia, ni kukoonka malaizio ange ali aleetua na bakulu ba buteeko. (Bar. 13:1, 5-7) Ange maavia kunti aanziiwa ntaanzi teanakitike. Pakaako, kili buino kukoonka malaizio onse a kutukwasia kwiteania palua masaanzo, malaizio ali afumiiwa na bakulu ba buteeko ba koolia kutwikeele. Kwa mufuano, kunti kyawaama kusuunga menda, byakulia bisiizi kwinooneka lubilo, pamo ni kafunda kalimo tuntu twa kutukwasia mu matunzo a kuanza.

11. Kine buluele bolia buli bwaambukiziana buli mukusalanghana koolia kutuli twaikala tupalile kuya twaleengele kukita ki?

¹¹ Tupalile kukita ki, kine kuli buluele buli bwaambukiziana buli mukusalanghana ku fuasi kutwikeele? Tupalile kukindika malaizio ali mukufumiiwa na buteeko, nga alia alandiile palua kusamba minue yeetu, kutiina kupalamana, kuvuala maske ni kwitenga ao kwikala mu fuasi ya bunke. Kine twakita evio tuli kulangilila nangue tuli mukutasia saana palua bupe bwa bukose butwapeelue na Leeza.

12. Lileembo lya Tuswalo ni Mafunde 14:15 kunti lyatukwasia siani kusaakula mpunda itupalile kukoonka mu nsita ya masaanzo?

¹² Mu aali iloombele kukita lubilo, mpunda isili ya kisinka kunti yasalanghana mu babibuza betu, mu bekazi neetu, ni mu mpunda ili yapundua. Kuliko kuzumina “kila mulandu” utuli kunvua, tupalile kukoonka mpunda elia ya kisinka saana kufuma ku buteeko ni ku ba doktere. (Soma Tuswalo ni Mafunde 14:15.) Balupua bali babombela mu Kabungue Kali Katungulula, pamo ni mu ma biro a misambo, bali baikwinda saana kukeba mpunda ya kisinka ntaanzi ya kufumia malaizio palua kulonghaana ni kusimikila. (Baeb. 13:17) Kupitila kukoonka azo malaizio, tuli twaisuunga fwe beene ni kusuunga bange kufuma ku buavia. Kabili kunti twabakwasia bange baye bali ni malanga aweeme palua Bakasininkizia Bakue Yehova.​—1 Pet. 2:12.

13. Tuli twalangilila siani nangue bukose ni bwa mana musita utuli twakindika muzilo wakue Yehova palua milopa?

¹³ Bantu bengi bamanine nangue Bakasininkizia Bakue Yehova bazumiine nangue milopa ni kintu kitakatiifu. Tuli twakindika muzilo wakue Yehova palua milopa kupitila kukaana kubiikua milopa mu mubili, atasie mu nsita ya matunzo aloombele kukita lubilo. (Miil Bat. 15:28, 29) Anzia evio, keekio te kilangiliile nangue tutonene kufua. Inzi, tuli twasekelela bupe bwa bukose butwapeelue na Leeza. Tuli twakeba kukwasiiwa na bamunganga bali ni bufundi, baalia batonene kufumia matunzo a pa muulu asiloombele kubombia milopa.

14. Kunti twakita siani eevi kupunguzia aali ili yalengia kwaluke matunzo akolele?

¹⁴ Kine twaikwinda kusuunga bukose bwetu, kupitila kukita bintu bitwafuma kulondoluela mu leeli lyasi, paange tetuviinda kupatua na maluele aloombele kukitua operasio, ao kupatua na maluele aloombele matunzo a pa muulu saana. Kabili kine tuli twaikwinda kusuunga bukose bwetu, kunti twakosasie lubilo atasie kisia kukitua operasio Kabili, kunti twakwasia kupunguzia buavia buli bwalengia kwaluke aali iloombele kukitua operasio lubilo, kine twapaanga  buino biombo ao bintu bili kuviinda kuleeta buavia ku nsesi ao ku miilo, pamo ni kukindika saana mizilo ya mu misebo.

15. (a) Juu ya ki ni kintu kya mana kuya twakwete karte yeetu iizuziiziwe leenu ilandiile palua kukaana kubiikua milopa? (Mona ni foto.) (b) Nga vilangiliile viideo, kunti twakwata siani bupinguzi buweeme palua kubombia milopa mu matunzo?

¹⁵ Paantu tuli twatasia palua bupe bwa bukose, tuli twaizuzia karte ilandiile palua kukaana kubiikua milopa (ao, karte iliko malaizio palua matunzo), kabili ni kuya twaitwama nsita yonse. b Kupitila ezio karte tuli twalangilila beelia bitutonene palua kubiikua milopa ni palua matunzo ange. Eba, mpunda ili ku karte yobe ilandiile palua kukaana kubiikua milopa teinapitue na musita? Kine ukebele kwizuzia ao kwizuzia kupia ezio karte, kita evio bila kukokola. Kulangilila paswetele beelia bitutonene palua matunzo kupitila kuleemba, kuli kutukwasia kutunzua lubilo paantu tetuviinda kuzeezia musita twali mukulondolola pamo ni ba doktere betu palua ozo mulandu. Kabili keekio kili kutukwasia kusininkizia nangue twapeelua matunzo ao miti elia isiviinda kutuleetela buavia. c

16. Kunti twakita siani kine te tumanine buino vya kwizuzia karte ilandiile palua kukaana kubiikua milopa?

¹⁶ Anzia tuye twali balumendo ao tuye twali ni  bukose bwaweeme, fwe bonse kunti twapatua na aksida ao kuluala. (Kas. 9:11) Pakaako, kine twaizuzia karte ilandiile palua kukaana kubiikua milopa, keekio kili kulangilila nangue tuli ni mulangue. Kine te umanine buino vya kwizuzia ezio karte, beepuzie bakote ba mu kilonghaano kyobe eevi bakukwasie. Bali baikwinda kumana buino vya kwizuzia ezio karte. Inzi tebaviinda kukukwatila bupinguzi palua matunzo. Ezio ni miilo yobe. (Bag. 6:4, 5) Anzia evio kunti bakukwasia kunvua mana ya beelia byukebele kusaakula, ni kukukwasia musita luuli mukwizuzia ezio karte.

17. Kunti twalangilila siani nangue tuli ni malanga ateekameene palua matunzo?

¹⁷ Bupinguzi buingi butuli twakwata palua bukose bwetu, ao palua matunzo, buli bwakoonkana ni kampingu ao zamiri yeetu ibeeleziiziwe na Bibilia. (Miil Bat. 24:16; 1 Tim. 3:9) Musita utuli twakwata bupinguzi ni kulondolola pamo ni bange palua bobo bupinguzi, kili buino kubombia lifunde lili mu Bafilipi 4:5, (NWT). Leelio lifunde lilandile eevi: “Lekele malanga enu ateekameene aye amanikile ku bantu bonse.” Kine tuli ni malanga ateekameene tetuviinda kwema mu nzila ipitiliile, palua bukose bwetu bwa kimubili, kabili tetuviinda kubatiinta bange baaluke ni malanga nga etu. Tubatonene balupua ni bankazi betu, kabili tuli twabakindika atasie kine bupinguzi bwabo bwapusana ni bwetu.​—Bar. 14:10-12.

18. Kunti twalangilila siani kutasia palua bupe bwa bukose?

¹⁸ Tuli twalangilila nangue tuli twamutasia Yehova, Nsulo ya bukose, kupitila kusuunga buino bukose bwetu, ni kupitila kumupeela bintu byetu biweeme saana. (Nfy. 4:11) Loonu tupalile kusaakaana ni maluele pamo ni masaanzo. Inzi Kabumba weetu taapaangile buikazi bwetu buye bwali evio. Leenusie, wakaba kutupeela bukose bwa loonse busili bwa misa kabili busili bwa kufua. (Nfy. 21:4) Mu onu musita, kili buino saana kuya twakosele, kabili twamubombela Baba weetu wantono wa ku muulu, Yehova!