1. ¿Chúriká néwariwélitili Jeobá japi we natéami niraa iné japi ta piré?

 NATÁ japi bilé amigo mi chiliwé bilé kalí japi we aʼlá niwárami ju. Tákoré echi pintura ma pe biʼwili alí jaré focos ma ke rajina, echi kalí ko a bijí wiká winomí natijí. ¿Kechi ko mi we natéami niraa inema echi kalí alí mi we aʼlá tibuma? Ayénachó Jeobá tamó iyali bilé namuti we natéami: echi ko tamó iwítili jiti ta pirélipo. Jiti we natéami niraa iné japi ta piré, echi ko nijili binoy nolá jiti mukumea tamujé jitra (Juan 3:16, TNM).

2. Japi riká aní 2 Corintios 7:1, ¿piri nakí Jeobá japi ta nokiboa?

² Jeobá isili iwitia japi piré (Sal. 36:9). Ayénachó echi ruyá anili echi apóstol Pablo japalí osali: “Riosi jítita piré jenaʼí wichimóbachi, ayénachó Binói jítita ʼyena” (Hech. 17:25, 28). Jeobá ju japi tamó niwali alí tamó iyá suwaba japi ta newalé jiti ta pirélipo (Hech. 14:15-17). Nalí Jeobá ko ke isima bilé milagro jiti ta ke suwiboa. Echi ko nakí japi ta iʼwérili nokiboa aboi tibúa jiti ke me nayupo alí japi nokiboa japi echi galé (leeri 2 Corintios 7:1). ¿Chúsiá ti aʼlá aboi tibúsaré jiti ke me nayupo alí jiti ke karú ikiboa, alí chúriká ti omero nokayá?

3. ¿Chúsiá ti aʼlá tibuka nokinali?

³ Bilé namuti japi jitra aʼlá tibuka nokinali ko ju, jiti ta we aʼlá nóchinali Jeobá (Mar. 12:30). Jiti ta kanílitinali Onorúami, ati we aʼlá tibú aboi ripokala jiti ta ke nayúnali (Rom. 12:1). Tákoré ti aʼlá tibuka nokayé, ati nayúporé siné kaachi. Nalí ati iʼwérili noká aboi tibuka nokayá, jiti ta néwariwélitinali Jeobá japi ta we natéami niraa iné japi tamó iwítili.

4. ¿Piri nakili echi silíami David?

⁴ Echi silíami David we natéami niraa ineli japi Onorúami echi iwítili. Jiti la, echi ko osali: “¿Ani mukusáaká, piri aʼláala namuti ikimea? ¿Achi echi saté walubéala mi anema? ¿Achi ruyema jarecho japi mi aʼláala isíami ju?” (Sal. 30:9). Echi ko osáliré jepuná kecho bijí mukuyá. Nalí echi ko a bijí wilí bitélinali jiti echi riká a omérima aminabi walubéala anea Jeobá. Alí tamujé echi riká cho nili.

5. ¿Piri ta a omero nokayá tákoré ti ma we ochérami o nayúami ju?

⁵ Ati ma ochérami nísaká o nayúami, a keʼré japi ta ma ke me omeri nokayá japi riká ti nokayé chabé alí echi isímiré japi ta omona nílipo. Nalí echi ko ke aniwáami ju japi ta ma ke iʼwérili nokiboa aboi tibúa jiti ke nayupo. ¿Chúsiá? Jiti tákoré ti ma we ochérami ke o nayúami ma, ati bijí omeri walubéala anea Jeobá japi riká echi silíami David. ¡We ti kanili machiyá japi Jeobá we tamujé galé alí natéami niraa iné, tákoré tamujé ke sébali aʼlá nokáami ju! (Mat. 10:29-31). Jiti ta we natéami ju echi jitra, echi ko aní japi tamó ku wilásima japalí ti suwisaa (Job 14:14, 15). Jiti bela, iʼwérili nokisáré aboi tibúa jiti ke karú ikiboa alí ke me nayupo.

6. ¿Piri nakí Jeobá japi ta aʼlá nátika nokiboa?

⁶ Echi Biblia ke ju bilé libro japoná raʼicha echi ówila jitra, piri a okésaré alí piri ke jiti ke nayupo, nalí a tamó ruyé chúriká iné Jeobá echi namuti. Japi riká, echi ko tamó ané japi ta ke nokiboa echi namuti japi tamó nayunti (Ecl. 11:10). Echi Biblia ko aní japi jaré namuti japi tamó nayúntima ko ju, waʼlú koʼyá alí we bajía (Prov. 23:20). Jeobá ko nakí japi ti we aʼlá natabo chu chulú ti kopoa alí bajibo (1 Cor. 6:12; 9:25).

7. Japi riká aní Proverbios 2:11, ¿chúriká ti néwariwélitipo japi ta we aʼlá nátami ju?

⁷ Ati néwariwélitinalaká Jeobá japi ta we natéami niraa iné japi echi tamó iwítili, ati we aʼlá nátika nokisáré (Sal. 119:99, 100; leeri Proverbios 2:11). Japi riká, ati we raʼíliaká bilé koʼwáami nalí ti machisáakó japi tamó nayunti, ¿achi ta okésaré? Japi aʼlá nátami ju, ke okema. Ayénachó, ati aʼlá nátika nokiboa japalí ti aʼlá kochí, sinibí niwá ejercicio, alí japalí ti biʼwá tamó ripokala alí tamó bitélachi.

8. Japi riká aní echi Biblia, ¿chúsiá ti machí japi Jeobá ko we natéami niraa iné japi ta aʼlá tibuka nokiboa?

⁸ Jeobá ko iyali jaré nulalíwami echi israelitas jiti ke risoa ikimea japoná piré o japoná nocha (Éx. 21:28, 29;  Deut. 22:8). Bilé pagótami miʼlisáaká bilecho tákoré ke miʼlináliami nili, Jeobá ko anili japi ikimea riweili echi (Deut. 19:4, 5). Ayénachó japalí bilé cha olasa bilé taa muchi kecho bijí ochériachi, tákoré ke echi riká nakili, echi ko castigo iyárami nísaré (Éx. 21:22, 23). Echi Biblia ko aʼlá ruyé japi Jeobá ko nakí japi ta aʼlá tibuka nokiboa jiti ke karú ikiboa.

9. Jiti ke karú ikiboa, ¿piri ta nokisáré? (Ayénachó iné echi fotos).

⁹ Ati néwariwélitipo Onorúami japi ta we natéami niraa iné japi tamó iwítili, ati aʼlá tibuka nokisáaká japoná ti piré alí japoná ti nocha. Japi riká, ati jariwé echi namuti japi oláami ju alí echi namuti japi ta jitra biʼwá echoná bitichí, ówila japi riká pastillas o jarecho si namuti, jiti echi kuuchi ke chapimea alí ke bajima. Alí ti ma ke néesaká, ati aʼlárika miná waní echi namuti alí japoná jarecho ke namú ikimea. Ati we aʼlá tibuka noká echi naʼí jitra, namuti ratáami o namuti japi ta jitra nocha. Ayénachó ke ti bají echi alcohol o pastillas japi ke  tamó riwé japi ta aʼlá ulinabo echi troca, alí ke ti teléfono inesia simí japalí ti ulinasia iná echi troca alí ke cho japalí ke aʼlá kochisá.

10. ¿Piri ta nokisáré kecho ikíachi alí ma ikíachi echi karú ikiwáami?

¹⁰ Tákoré ati aʼlá tibuka nokayé, isini kaachi ata karú ikiboa. Japi riká, japalí nirúlisa nawilí, nakówami, nokesa kawí alí jarecho si namuti. Jiti ke suwiboa echi riká ikisaa, ati nijéwisaré echi weli jáwami japalí tamó nulesa japi machínipo o japi ke machínipo, alí nokiboa jarecho si namuti japi nulá (Rom. 13:1, 5-7). Ke ti machí chu kabú karú ikiboa, jiti la we aʼlá nima japi ta nijéwipo japi nulá echi weli jáwami jiti ta sayeka mochibo. Japi riká, ati jariweka manaba baʼwí, ayénachó koʼwáami japi ke sapú chokólima alí namuti japi ta newalebo japi riká ówila.

11. Nirúlisaká bilé nayulí, ¿piri ta nokisáré?

¹¹ Alí a nirúlisaká bilé nayulí japoná ti piré, ¿piri ta nokisáré? Nijéwisaré japi aní echi weli jáwami japi riká paniwia sikala, ke me napawía jarecho yúa, néea cubrebocas alí cuarentena ripía. Ati nokisáaká suwaba echi namuti, ata néwariwélitipo Onorúami japi ta we natéami niraa iné japi tamó iwítili.

12. ¿Chúriká tamó iʼwiri Proverbios 14:15 japalí karú ikisaa?

¹² Japalí karú ikisaa, ata kipúboré namuti japi ke bichíwali ju echi amigos jitra o pagótami japi ta machí o echoná noticias. Ke ti ne suwaba bichíwisaré japi ta kipú, nalí ata kipúsaré echi oʼwéala jáwami o echi doctores japi ta machí japi ne sinibí bichíwika raʼicha (leeri Proverbios 14:15). Alí ayénachó ati we aʼlá nijéwisaré echi japi Aʼlá Niseri alí echi sucursales japalí tamó anesa bilé namuti echi napawíliwami jitra o japi chúriká ti nokiboa nawesia, jiti echi ko iʼwérili noká aa namuti japi bichíwali ju alí echi riká aʼlá nátika nokimea (Heb. 13:17). Ati we aʼlá nijéwisaká, ke ti me nayupo alí ke nayúntipo jarecho, alí a keʼré japi we aʼlá raʼichárami nima echi testigos Jeobá jitra (1 Ped. 2:12).

13. Japalí ti newalesa echi la, ¿chúriká ti néwariwélitipo Onorúami japi ta we natéami niraa iné japi tamó iwítili?

¹³ Wiká ko machí japi echi testigo Jeobá nijewi japi Onorúami nulá echi la jitra. Japi riká, ke ti soka roʼé echi la tákoré ti we nayusa o karú ikisaa (Hech. 15:28, 29). Nalí echi ko ke aniwáami ju japi ta suwinali. Tamujé ko we natéami niraa iné japi ta piré jiti Onorúami tamó iwítili. Jiti la ti amí echi doctores japi we machíami ju alí japi tamó ówinali, ayénachó echi tratamientos japi we aʼlá ju, nalí japi ke nee echi la.

14. ¿Piri ta nokisáré jiti ta ke torúami nipo echoná hospital?

¹⁴ Ata nokisáakó suwaba echi namuti japi ta bineli echoná jaréala párrafos, ati ke newaléboré japi ta torúami nipo echoná hospital. Alí ata newalésaká bilé operación, ati sapú saʼwiboa ati ne bachá aʼlá tibúlaká tamujé ripokala jiti ke me nayupo. Ayénachó, ati  iʼwérili nokisáaká tibúa japoná ti piré alí japoná ti nocha, alí nijewia echi policías japi aní chúriká ti ulinabo echi carros, ati ke me risoa ikibóaré alí ke ti torúami níporé echoná hospital.

15. a) ¿Chúsiá we natéami ju japi aʼlá oseka riwepo echi tarjeta DPA alí japi sinibí toboa? b) Japi riká machina echoná video, ¿piri ta nokisáré jiti aʼlá nátika nokiboa echi la jitra?

¹⁵ Bilecho namuti japi riká ti néwariwélitipo japi ta natéami niraa iné japi ta piré, echi ko ju ma aʼlá oseka riwea echi oselí japoná ti ruyé echi doctores japi nokisáré alí japi ta ke naré echi la (tarjeta DPA) alí sinibí toyá japoná ti jari. Echoná oselichi animea piri mi nátili isimia echi la jitra alí jarecho si tratamientos. Mujé, ¿achi mi ma aʼlá oseka riweli echi oselí? Ami kecho osayáaká o ma we chabéwami nísaká, checho ku aʼlá niwá. Ati ma aʼlá oseka riwésaká echoná oselichi, ati ke wilí nokibóoré ruyea echi doctores alí echi riká echi ko sapú tamó ówima. Ayénachó, echi oselí jitra ati ke riwéporé japi tamó iyama bilé pastilla o jarecho si namuti japi tamó nayunti. b

16. ¿Piri mi isísaré ke mi machiyáaká chúriká osimea echi tarjeta DPA?

 ¹⁶ Tákoré ti remalí ju o ke nayúami, sinéami ti karú ikiboa o nayúporé siné kaachi (Ecl. 9:11). Jiti la we natéami ju japi ti aʼlá oseka riwepo echi tarjeta DPA. Nalí ke mi machiyáaká chúriká osimea, echi ancianos echoná congregación aʼlá machí echi jitra alí echi ko a omérima mi iʼwiria. Echi ko ke mi anema japi mi isísaré, mujé binoy mi machisáré japi mi osimea (Gál. 6:4, 5). Echi ko omeri bi mi iʼwiria inamia japi aní echoná alí osayá japi mujé aninali.

17. ¿Chúriká ti newa nokiboa japi ta aʼlá nátami ju?

¹⁷ Sinéami ibili tamujé ati aʼlá nátika noká japi riká aní echi Biblia ku owia japalí ti nayusa (Hech. 24:16; 1 Tim. 3:9). Jiti la, kulí natia isimia bilé namuti o raʼicha jarecho yúa echi namuti jitra, ati newalásaré japi aní Filipenses 4:5, (TNM): “Japi sinéami machimea japi emi ko we aʼlá nátami ju”. Ata newa nokiboa japi ta aʼlá nátami ju, japalí ti ke natia bi jari chúriká ti tibuka nokiboa jiti ke me nayupo alí japalí ti ke iʼwérili ané jarecho japi natama japi riká tamujé. Ata riwiwi alí ti we galé echi hermanos, tákoré ke nokayé japi riká tamujé (Rom. 14:10-12).

18. ¿Chúriká ti newa nokiboa japi ta we natéami niraa iné japi ta piré?

¹⁸ Japi riká ti ma bineli, Jeobá ju japi tamó iwítili. Ati néwariwélitipo Jeobá japi ta we natéami niraa iné japi tamó iwítili, ati aʼlá tibuka nokisáaká alí ti iʼwérili nokisáaká echi nóchilia (Apoc. 4:11). Jipi ko sinéami tamujé ati nayú alí olá karú ikiwáami, nalí Jeobá ko ke nakili japi ta echi riká pirélipo. Echi ko aní japi ma mulipi ma ke che risoa nílipo alí ma ke che suwiboa (Apoc. 21:4). Jiti bela, jipi ko ti aʼlá tibuka nokiboa alí ti iʼwérili nokiboa nóchilia Jeobá jiti echi tamó iwítili.