1. Nguáthá mba̱a̱ gíʼdoo numuu vida ndrígúlú eʼyoo Jeobá rá.

 ATATSAʼWÁMINAʼ dí mbáa bi̱ nambájxa̱a̱ʼ ga̱jma̱a̱ naxnáaʼ mbá guʼwá, mú nigajtaa pintura ga̱jma̱a̱ rígá tikhu náa ndayóoʼ maguma májáanʼ. Maski ajndu xúʼko̱, guʼwá rúʼko̱ minumuu wéñuuʼ. Mbáa ikháán mangajuaaʼ ga̱jma̱a̱ matiewa̱a̱n. Xúʼko̱ má kayuuʼ, Jeobá nixnúlú mbá dí gíʼdoo wéñuuʼ numuu, ikhaa nindxu̱u̱ vida. Nda̱a̱ i̱mba̱ dí itháan gíʼdoo numuu eʼyoo ikhaa dí asndu nixnájxi̱i̱ A̱ʼdióo makhañúu ga̱jma̱á numulú (Juan 3:16).

2. Xó má eʼthí 2 Corintios 7:1, ndiéjuunʼ gíʼthún Jeobá dí muʼnilú rá.

² Náa Jeobá ‹na̱ʼkha̱ rí nandoo nduʼyalú› (Sal. 36:9). Ikhaa má rúʼko̱ nindoo gáʼthí apóstol Pablo índo̱ niʼthí: “Ga̱jma̱a̱ numuu ikhaa, ikháanʼ nduʼyalú nandoo numbayimíjna̱lu ga̱jma̱a̱ kuwáanʼ” (Hech. 17:25, 28). Ikhaa jngóo nuʼthálú dí vida nindxu̱u̱ mbá regalo ndrígóo Dios. Ikhaa naxnúlú ga̱jma̱a̱ ngajua xúgííʼ dí ndayúlú mu makuwáánʼ (Hech. 14:15-17). Mú Jeobá xáʼni milagro mu ikháanʼ ma̱ndoo makuwáánʼ má xúʼko̱. Ikhaa nagi̱ʼthu̱u̱n dí ikháánʼlú muʼni xó má eʼngo̱o̱ mu muñeʼwa̱a̱n dí xándoo káñulú ga̱jma̱a̱ rí mambajxúlú má xúʼko̱ gajmiúlú ikhaa (atraxnuu 2 Corintios 7:1). Ndíjkha dí gíʼmaa muñeʼwa̱a̱n dí xándoo káñulú ga̱jma̱a̱ muñeʼwa̱a̱n vida ndrígulú rá. Xú káʼnii gándoo gúʼnilú rá.

3. Ndiéjuunʼ nindxu̱u̱ mbá numuu dí nuñewumíjna̱lú rá.

³ Mbá numuu dí gíʼma muñewumíjna̱lú nindxu̱u̱ dí muʼni itháán májánʼ ñájunʼ ndrígóo Jeobá (Mar. 12:30). Numuu dí nandulú ‹muxnajxí xuyulú xóo mbá tsigijñaʼ rí kaʼwu, mbá rí ndaʼya rí manigu̱u̱ʼ Dios; mu xúʼko̱ mundxa̱ʼwa̱a̱ májánʼ edxu̱lúʼ índo̱ gúʼni ñajuunʼ Dios› (Rom. 12:1). Gajkhun má, tséʼñuu á mu nuñewumíjna̱lú wéñuuʼ, rúʼko̱ na̱nguá eyoo gáʼthúu̱n dí xáʼñulú nandii. Mú, nuñewamíjna̱ numuu dí nandulú musngajmáá Anu̱lú bi̱ xtáa mekhuíí dí nuxnáa númaaʼ dí niʼni dí makuwáánʼlú.

4. Ndiéjuunʼ nindoo maʼni rey David rá.

⁴ Rey David ndiʼyamajkuu vida ndrígóo dí nixnúu Jeobá. Ikhaa jngóo niʼnirámáʼ: “Dí lá májánʼ garigá á mu ikhúún gákháñún rá. Lá mbaʼyamajkuaaʼ yujndaʼ rá. Lá maʼthí dí gajkuwín xáʼ.” (Sal. 30:9.) Mbáa niʼnirámáʼ ajngáa rígi̱ índo̱ inu makhañúu. Maski má xúʼko̱, ikhaa nindoo maxtáa xóó mbayuuʼ mu maʼni mba̱a̱ Jeobá. Xúʼko̱ má mangáán, nandulú muʼni ikháá má kayuuʼ.

5. Ndiéjuunʼ gándoo guʼni maski ajndu guaniáanʼlú o nandoo káñulú rá.

⁵ Á mu guaniáanʼlú o nandoo káñulú mbáa nánguá eʼngo̱o̱ guʼni xóo eʼnilú nákhá ginii, mbáa rúʼko̱ naʼni dí maxmiéjunlú ga̱jma̱a̱ makuwáanʼlu gíná, mú rúʼko̱ na̱nguá eyoo gáʼthúu̱n dí xáʼyóoʼ muʼni mbáa tsiaki̱i̱ mu muñewamíjna̱ mu xándoo káñulú. Náá numuu rá. Maski asndu guaniáanʼlú o nandoo káñulú ma̱ndoo muʼni mba̱a̱ Jeobá xó má niʼni rey David. Naʼni̱i̱ a̱jkiu̱lú dí Dios nandoo kaʼyulú ga̱jma̱a̱ ndaʼyoo dí gíʼdoo numulú maski ajndu nindxu̱lú xa̱bu̱ aʼkhá (Mat. 10:29-31). ¡Ra̱ʼkhá tháán nandoo kaʼyulú! Ikhaa jngóo naʼthúlú dí ikhaa maʼni matujxi̱i̱ʼlú á mu nakháñulú (Job 14:14, 15). Xúgi̱ dí kuwáanʼlu nduʼya xóó, ndaʼyóoʼ muʼni mbá tsiaki̱i̱ mu muñeʼwa̱a̱n vida ndrígulú ga̱jma̱a̱ dí xáʼniulú nandii.

6. Ndiéjuunʼ gíʼthu̱u̱n Jeobá índo̱ gúraʼwíí dí mu̱ʼphu̱ ga̱jma̱a̱ dí muʼwanlú rá.

⁶ Biblia na̱nguá nindxu̱u̱ mbóoʼ libro dí na̱ʼkha̱ raʼthí ga̱jma̱a̱ numuu thana o dí gúʼphu̱lú, mu ikhí Jeobá naʼthúlú xú káʼnii eʼyoo xúgííʼ rígi̱. Náa Eclesiastés 11:10 naʼthúlú: ‹Atanigaʼdunʼ xúgííʼ dí maʼni gachíín›. Mu muñewumíjnalú, náa Biblia naʼthúlú dí xáʼyóoʼ muphiʼtsu egulú ga̱jma̱a̱ dí majngáanʼlú (Prov. 23:20). Jeobá nagi̱ʼthu̱u̱n dí awa̱án guphiʼtsulú ga̱jma̱a̱ dí gúʼwaanlú (1 Cor. 6:12; 9:25).

7. Xú káʼnii gámbáyulú Proverbios 2:11 mu muñewumíjnalú rá.

⁷ Á mu nandulú muxnáa núma̱aʼ Jeobá numuu dí niʼni dí makuwáanʼlu, ndayóoʼ dí majmáánʼ mundxaʼwamíjnalú májánʼ (Sal. 119:99, 100; atraxnuu Proverbios 2:11). b Ma̱ndoo nuʼnilú rígi̱ índo̱ gúraʼwíí ndiéjuunʼ gúʼphu̱, maski ajndu nanigulúʼ mbóoʼ ganitsu xáʼyóoʼ mu̱ʼphu̱ á mu nduʼyáá dí xámbáyulú. Ma̱ngaa ikháanʼlu má guʼyáá á mu ndayóoʼ muʼnuʼlú xóó itháán májánʼ, muʼnilú ejercicio, muʼni kaʼwumijnáalú ma̱ngaa dí muʼni kaʼwii má xúʼko̱ guʼwúlú.

8. Nguáthá gíʼdoo numuu dí muñeumíjna̱ eʼyoo Jeobá eʼthí náa Biblia rá.

⁸ Jeobá nixnúún xtángoo israelita mu mbuyáá ndiéjuunʼ gúni mu xúʼko̱ xakámbiñuun’ náa guʼwún ga̱jma̱a̱ náa nuñajunʼ (Éx. 21:28, 29; Deut. 22:8). Á mu mbáa nixiyáa imba̱a̱ xa̱bu̱ mú táʼni kiejuunʼ o naʼni kabiyuuʼ mbáa  ada̱ bi̱ kuaʼwaan awúu̱n ru̱dúu̱, náa Xtángoo naʼthí dí majuiʼthán ndiéjuunʼ gagumaa o makánúu castigo ga̱jma̱a̱ numuu dí niʼni (Deut. 19:4, 5; Éx. 21:22, 23). Náa Biblia naʼthúlú kaʼwu dí Jeobá nandoo muraʼwíí wapháá dí gúʼni mu xúʼko̱ xákabiyulú.

9. Xkáʼnii gándoo gúñeumíjnalú rá. (Atayáá xtiʼkhuu.)

⁹ Nusngajmá dí nuxnáalú núma̱aʼ Dios dí niʼni makuwáanʼlu á mu nuñewamíjna̱ náa guʼwúlú ga̱jma̱a̱ náa nuñajunʼ. Mbá xkri̱da, nurajxilu májánʼ ajua̱nʼ xíníʼ, thana dí mbiiʼ ga̱jma̱a̱ i̱ʼwáʼ thana mu e̱ji̱n xurugua, tsumáá eʼni índo̱ na̱jkua̱lu guxíʼdíí mu nimbáa xákabiyúuʼ. Na̱nguá ejkhua̱lú imbríʼkhá índo̱ nuʼgíʼlú agú o nutsiʼgáá iyáʼ ga̱jma̱a̱ najmulú ajua̱nʼ dí naʼkhu̱u̱ aguʼ. Tsejkhualú kuʼyú karru á mú naʼniulú mbóoʼ thana dí naʼphúlú, najngáanʼ o tuʼnúlú májánʼ ní má tseruʼgualú celular.

10. Ndiéjuunʼ gúraʼwíí muʼni wapháá ga̱jma̱a̱ índo̱ gárígá mbá gamiéjunʼ rá.

¹⁰ Xáʼngulú gurikháá xúgííʼ gamiéjunʼ dí  gakága̱a̱ náa inulú, xóo nandii ga̱jma̱a̱ dí nuxmijná xa̱bu̱. Mú ma̱ndoo mbuʼyáá ndiéjuunʼ guʼni ga̱jma̱a̱ makáwáánʼlú á mu nuʼnimbulú dí maguanulú o magajnulú náa kuwáanʼ ga̱jma̱a̱ i̱ʼwáʼ ikha dí gúxnulú xa̱bu̱ ñajunʼ (Rom. 13:1, 5-7). Rígá gamiéjunʼ dí ma̱ndoo mbuʼyáá ndiéjuunʼ guʼni, ikhaa jngóo májánʼ dí munimbulú rí guthulú xa̱bu̱ ñajunʼ mu xúʼko̱ makuwáanʼlu xawii mbuʼyáá ndiéjuunʼ guʼni. Mbáa májánʼ gáʼni dí maguaʼdáá mba̱ji̱nʼ iyaʼ ga̱jma̱a̱ ganitsu dí xáʼchúu nacha̱ ma̱ngaa maguaʼdáá náa kajti thana.

11. Ndiéjunʼ guʼni á mu rígá nandii náa kuwáanʼlu rá.

¹¹ Ndiéjuunʼ gáʼyóoʼ muʼni á mu rígá nandii náa xuajen dí kuwáanʼlu rá. Mbaʼyóoʼ munimbulú ikha dí gúxnulú xa̱bu̱ ñajunʼ xóo mujñáa ñawúnlú, xaguajún mijngii gajmiúlú eʼwíinʼ, muʼgíʼlú cubreboca ga̱jma̱a̱ xágajnulú á mu naʼniulú nandii. Á mu nuʼnimbáníí xúgííʼ rígi̱ musngajmá dí nduʼyamajkuíí dí Dios nixnúlú makuwáanʼlu.

12. Xú káʼnii embáyulú Proverbios 14:15 mu muraʼwíí májánʼ dí guʼnimbulú índo̱ narígá mbóoʼ gamiéjunʼ rá.

¹² Xáʼyóoʼ munimbulú xúgííʼ dí guthulú bi̱ nambájxu gajmiúlú, bi̱ nuniʼniúunʼ o dí na̱ʼkha̱ náa noticia. Itháán májánʼ dí mudxaʼwíín dí gúthi xa̱bu̱ ñajunʼ ga̱jma̱a̱ dí gúthi xa̱bu̱ bi̱ najmañún ga̱jma̱a̱ numuu nandii (atraxnuu Proverbios 14:15). c Itháán májánʼ dí munimbulú ikha dí naxnulu Cuerpo Gobernante ma̱ngaa sucursal xóo dí muʼgualú reunión ga̱jma̱a̱ dí muʼguá gutaráʼa, numuu dí ikhiin nuni̱ xóo eʼngo̱o̱ mu mbuyáá dí gajkhun (Heb. 13:17). Índo̱ nuʼnimbulú dí nuthulú nuñewamíjna̱lú má ikháánʼ ga̱jma̱a̱ nuñeʼwu̱u̱n eʼwíinʼ ma̱ngaa rígi̱ naʼni dí eʼwíinʼ xa̱bu̱ muthi dí májánʼ ga̱jma̱a̱ numún testigo de Jeobá (1 Ped. 2:12).

13. Xú káʼnii esngajmálú dí nduʼyáá dí gíʼdoo numuu makuwáanʼ índo̱ nuʼrawíí xí mataʼááʼ eʼdi rá.

¹³ Ikháanʼ bi̱ nindxu̱lú xa̱bi̱i̱ Jeobá najmaʼniáanʼlu dí nduʼyáá dí nindxu̱u̱ mitsaʼkhúun eʼdi. Numuu dí nuʼnimbulú Xtángoo ndrígóo Jeobá, ikhaa jngóo nuʼni gáʼdu̱u̱n mataʼalú eʼdi, maski ajndu ndayúlú mataʼaalú mbá nacha̱ (Hech. 15:28, 29). Lá rígi̱ eyoo gáʼthúu̱n dí nandulú makañúlú rá. Na̱nguá, ¡ikháanʼ tsíyúlu makhañúlú! Nduʼyáá dí gíʼdoo wéñuuʼ numuu makuwáanʼ numuu dí Dios nindxu̱u̱ bi̱ nixnúlú vida. Ikhaa jngóo nduʼñíinlú xa̱bu̱ bi̱ majmañún muni thanulú dí asndu xájmúún eʼdi.

14. Ndiéjuunʼ gáʼyóoʼ muʼni xúgi̱ mu xágún kudáanʼ asndu muniulúʼ operar xá.

¹⁴ Á mu nugíʼ nuʼnimbáníí consejo dí ndiʼyáá náa artículo rígi̱ mambáyúlú mu xúʼko̱ xáʼyóoʼ magún kudáanʼ muniulú operar. Mú, á mu nuniúlú operar xá. Á mu niñewumíjnálú má nákha wapháá, rígi̱ gámbáyulú mu maʼni̱i̱ a̱jkiu̱lú nacha̱. Xáʼyóoʼ ma magún kudáanʼ mu muniulú operar o maguaʼníílu mbá gamiéjunʼ á mú asndu nákha xúgi̱ nuʼnimíjna muñewamíjna̱ náa nuñajunʼ, náa guʼwúlú ga̱jma̱a̱ nuʼnimbulú ikha dí nuxnúlú xóo muʼguá kuʼyúlú karru.

15. a) Ndíjkha dí gíʼdoo numuu muyeʼgualú asndu náá ga̱jma̱a̱ muʼni májáanʼ iyulú dí naʼthí xóo maguma thanulú rá. (Atayáá xtiʼkhuu.) b) Xó má eʼthí náa video, ndiéjuunʼ gámbáyulú muraʼwíí májánʼ dí muʼni ga̱jma̱a̱ numuu eʼdi rá.

¹⁵ Imbo̱o̱ʼ xóo ma̱ndoo musngajmá dí nduʼyamajkuíí dí makuwáanʼlu, ikhaa nindxu̱u̱ dí muʼni majthíí iyulú náa na̱ʼkha̱  raʼthí xóo nandulú maguma thanulú (tarjeta DPA), ga̱jma̱a̱ muyéʼgua̱lú asndu náá má ejkhua. Náa i̱yi̱ʼ rígi̱ nuʼniraʼmá á mu nandulú mata̱ʼa̱a̱ʼ eʼdi ga̱jma̱a̱ i̱ʼwáʼ thana dí mundrígúlú. Atani̱ majthíí ga̱jma̱a̱ atani̱ májáanʼ i̱ya̱a̱ʼ á mu ndayóoʼ. Á mu nuʼniraʼmáʼ xkáʼnii phú nandulú maguma thanulú, rígi̱ gámbáyulú mu xáʼniulú miʼskhaa muʼthán médico xkáʼnii eyulú maguma thanulú ga̱jma̱a̱ mbá nacha̱ gúni̱ thanúlú, ma̱ngaa mámbáyulú mu xuxnúlú thana dí xámbáyulú. d

16. Ndiéjuunʼ gátani̱ á mu tséjmañaaʼ xóo gátani̱ majthíí i̱yi̱ʼ náa naʼthí xóo maguma thanaaʼ rá.

¹⁶ Maski ajndu xúgi̱ na̱nguá endoo káñulú o kaʼníí nindxu̱lú jiámá o wa̱ʼxa̱ʼ, xúgiáanʼ ma̱ndoo muguaʼníí mbóoʼ gamiéjunʼ o ma̱ndoo káñulú (Ecl. 9:11). Ikhaa jngóo gíʼmaa muguaʼdáá iyúlú náa niʼnirámáʼ xóo nandulú maguma thanulú. Xáxmiéjuaanʼ á mu tséjmañaaʼ gátani̱ majthíí. A̱ngiu̱lú bi̱ kuya̱ edxu̱u̱ bi̱ kúwi̱i̱n náa congregación ndrígáaʼ ma̱ndoo mumbayáaʼ. Mú ikhiin xándoo muthaanʼ ndiéjuunʼ gátraʼwíí matani̱ (Gál. 6:4, 5). I̱ndó ma̱ndoo mumbayáaʼ makrua̱ʼa̱a̱ʼ dí e̱ʼkha̱ raʼthí ga̱jma̱a̱ muniraʼmáʼ dí ikháán nitraʼwíí.

17. Xú káʼnii gándoo gusngajmá dí nindxu̱lú mbáa bi̱ nakro̱ʼo̱o̱ rá.

¹⁷ Biblia nambáyulú muraʼwíí xóo muñewamíjna̱ mu xáʼniulú nandii ga̱jma̱a̱ xóo maguma thanulú (Hech. 24:16; 1 Tim. 3:9). Ikhaa jngóo májánʼ marmáʼáan a̱jkiu̱lú dí naʼthí náa Filipenses 4:5: “Mu xúgíinʼ gúyáá rí nindxa̱la xa̱bu̱ bi̱ nakru̱ʼu̱u̱n dí marathu̱u̱n”, índo̱ guʼthúún eʼwíinʼ dí niraʼwíí muʼni. Ma̱ndoo manindxu̱lú mbáa xa̱bu̱ bi̱ nakro̱ʼo̱o̱ á mu na̱nguá nojngo̱ó eñaʼwamijná ga̱jma̱a̱ tséʼni tsu̱di̱i̱n eʼwíinʼ mu maku̱mu̱ún xó má kumulú ikháanʼ. Maski ajndu a̱ngiu̱lú tséraʼwii muni̱ xó má niraʼwíí muʼni ikháanʼ nandulú kuʼñúún ga̱jma̱a̱ nduʼyamajkhún (Rom. 14:10-12).

18. Xkáʼnii gusngajmá dí nuxnáa numaaʼ dí nikhánulú makuwáanʼ rá.

¹⁸ Xó má niʼthálu nákha wapháá, Jeobá nindxu̱u̱ bi̱ niʼni dí makuwáanʼlu. Á mu nuñewamíjna̱ ga̱jma̱a̱ nuʼni xó má eʼngo̱o̱ mu muʼni ñajuunʼ, musngajmáá dí nuxnáa núma̱aʼ dí niʼni makuwáanʼlu (Apoc. 4:11). Jeobá na̱nguá nindoo dí maʼniulú nandii ga̱jma̱a̱ maguáʼdáá xkujndu. Mú núma̱aʼ má ikhaa, gítháán ma tígo̱o̱ rí ma̱ndoo makuwáanʼlu náa mbá numbaaʼ nuxi̱ʼ náa dí ní xumíniiʼ itháán ga̱jma̱a̱ ní xákhañulú (Apoc. 21:4). Ikhaa jngóo guñewumíjna̱lú ga̱jma̱a̱ guʼni ñajuunʼ bi̱ nixnúlú dí makuwáanʼ: Jeobá Anu̱lú bi̱ nandoo kaʼyulú bi̱ xtáa mekhuíí.