1. No te aha mea faufaa to tatou ora no Iehova?

 A FERURI na e ua horoa te hoê hoa ia outou i te hoê taoˈa faufaa mau no ˈna. E hohoˈa penihia tahito, tera râ, mea moni roa. Ua marau te mau û, ua tafetafeta e ua afâfâ atoa. Noa ˈtu râ, ua hau e mirioni tara Marite te faito moni o tera peni hohoˈa. Mea papu, e rave outou i te mau mea atoa no te haapao maitai i te reira. Hoê â huru no Iehova. Ua horoa mai o ˈna i te hoê ô faufaa mau, te ô o te ora. Ua tae roa o ˈna i te horoa mai i ta ˈna Tamaiti ei hoo no te faaora ia tatou ei faaiteraa ïa e mea faufaa roa to tatou ora no ˈna.—Ioa. 3:16.

2. Mai tei faahitihia i roto i te Korinetia 2, 7:1, eaha ta Iehova e titau ra ia tatou ia rave?

² O Iehova te tumu o te ora. (Sal. 36:9) Ua tiaturi atoa te aposetolo Paulo i te reira a parau ai oia: “Maoti o ˈna e ora ˈi, e hahaere ai e e vai mai ai tatou.” (Ohi. 17:25, 28) E nehenehe ïa tatou e parau e e ô to tatou ora no ǒ mai i te Atua ra. Hau atu, no to ˈna here te horoa mai ra Iehova i ta tatou e hinaaro mau ra no te ora. (Ohi. 14:15-17) Aita râ Iehova e faaora semeio ia tatou. Inaha hoi, te titau ra o ˈna ia rave tatou i te mau mea atoa no te haapao maitai i to tatou ea a nehenehe atu ai e tavini noa ia ˈna. (A taio i te Korinetia 2, 7:1.) No te aha mea tia ia paruru ia tatou e to tatou ea e e nafea tatou e na reira ˈi?

3. Eaha hoê tumu e titauhia ˈi ia haapao maitai tatou i to tatou ea?

³ Ia haapao maitai tatou i to tatou ea, e nehenehe ïa tatou e tavini ia Iehova ma to tatou puai atoa. (Mar. 12:30) Te hinaaro ra tatou e “pûpû atu i to [tatou] tino ei tusia  ora e te moˈa e te au i te Atua.” No reira tatou e ore ai e rave i te tahi ohipa o te haafifi i to tatou ea. (Roma 12:1) Tera râ, noa ˈtu e haapao maitai tatou i to tatou ea, e nehenehe iho â tatou e maˈihia. E rave râ tatou i te mau mea atoa no te paruru ia tatou no te faaite ia Iehova i to tatou mauruuru no te ô o te ora.

4. Eaha ta te arii Davida i hinaaro e rave?

⁴ Ua faataa te arii Davida no te aha oia i haafaufaa ˈi i te ô o te ora ta te Atua i horoa mai a papai ai oia: “Eaha te noaa mai ia ˈu ia pohe au, ia reva vau i roto i te apoo? E arue anei te repo ia oe? E faaite anei te reira i to haapao maitai?” (Sal. 30:9) Ua papai paha Davida i te reira a fatata ˈi oia i te pohe. Ua faaoti papu râ oia i te paruru noa i to ˈna ora e i te haapao maitai i to ˈna ea, ia nehenehe oia e tamau noa i te tavini ia Iehova. Papu maitai e tera atoa ta tatou e faaoti papu i te rave.

5. Noa ˈtu te maˈi e te matahiti rahi, eaha ta tatou e nehenehe e rave?

⁵ No te maˈi e te matahiti rahi, eita paha tatou e nehenehe faahou e rave mai na mua ˈˈe. E nehenehe te reira e faatoaruaru ia tatou. Eiaha râ tatou e faaea i te haapao maitai i to tatou ea. No te aha? No te mea, noa ˈtu to tatou faito matahiti aore ra te maˈi, e nehenehe tatou mai te arii Davida e tamau noa i te tavini ia Iehova. Mea mahanahana mau ia ite e noa ˈtu te maˈi e te matahiti rahi, mea faufaa roa tatou no Iehova. (Mat. 10:29-31) Noa ˈtu e pohe tatou, e nehenehe Iehova e faatia mai ia tatou. (Ioba 14:14, 15) A ora noa ˈi tatou, e rave anaˈe i te mau mea atoa no te haapao maitai i to tatou ea e no te paruru ia tatou.

6. Eaha ta Iehova e titau ra ia tatou ia rave no nia i te maa e te inu?

⁶ Noa ˈtu e ere te Bibilia i te hoê buka o te faataa ra e nafea ia paruru i to ea e eaha te maa e tano ia amu, e faaite mai râ eaha te manaˈo o Iehova no nia i te reira. Ei hiˈoraa, te faaitoito ra te Bibilia ia “faaatea i te mau mea ino” i to tatou tino. (Koh. 11:10) Te opani etaeta ra te Bibilia i te amu-rahi-raa i te maa e te inu-hua-raa i te ava. E nehenehe hoi te reira e tuino i to tatou ea e e haapohe ia tatou. (Mas. 23:20) Te hinaaro ra Iehova ia faatanotano noa tatou i te mea ta tatou e amu e e inu.—Kor. 1, 6:12; 9:25.

7. E nafea te aˈoraa itehia i roto i te Maseli 2:11 e tauturu ai ia tatou ia rave i te faaotiraa maitai no to tatou ea?

⁷ E rave tatou i te mau faaotiraa o te faaite i to tatou mauruuru no te ô o te ora ma te feruri maite hou a faaoti ai i te tahi noa ˈˈe ohipa. (Sal. 119:99, 100; a taio i te Maseli 2:11.) Ei hiˈoraa, e feruri maite tatou eaha ta tatou e amu. Mai te peu mea au na tatou te hoê maa, tera râ, e nehenehe te reira e tuino i to tatou ea. Eaha te rave? Eita ïa tatou e amu i te reira. Hau atu, e haerea paari ia taoto maitai tatou, ia hautiuti i te tino e ia vai mâ noa tatou e to tatou fare.

8. Mea nafea te Bibilia i te faaiteraa e mea faufaa no Iehova ia paruru tatou ia tatou?

⁸ Ua horoa Iehova i te mau Iseraela i te tahi mau ture o te nehenehe e paruru ia ratou ia tupu te hoê fifi rahi i te fare e i te vahi raveraa ohipa. (Exo. 21:28, 29; Deut. 22:8) Ia haapohe noa ˈtu te hoê  taata i te tahi atu ma te opua ore, e roohia o ˈna i te tahi faahopearaa ino mau. (Deut. 19:4, 5) Te haapapu ra te Ture e e faautuahia te taata o te haapepe i te hoê vahine hapû, noa ˈtu aita hoê aˈe tei pohe. (Exo. 21:22, 23) Te faataa maitai ra te Bibilia e te hinaaro ra Iehova ia rave tatou i te mau mea atoa no te paruru ia tatou e ia vetahi ê.

9. Eaha ta tatou e nehenehe e rave no te paruru ia tatou ia ore tatou e fifihia? (A hiˈo atoa i te mau hohoˈa.)

⁹ E faaite tatou i te mauruuru no te ô o te ora ma te rave i te mau mea atoa no te paruru ia tatou i te fare e i te vahi raveraa ohipa. Ei hiˈoraa, e faanaho tatou i te hoê vahi papu no te mau taihaa atâta, te mau raau taero e te mau raau rapaauraa. Ma te na reira, eita atoa ïa te mau tamarii e fifihia. Ia faaama tatou i te auahi, ia tahu i te pape e ia faaohipa tatou i te mau matini uira, e ara tatou i te ore e vaiiho noa i te reira ma te haapao ore. Eita atoa tatou e faahoro i te pereoo mai te peu ua amu tatou i te tahi raau, ua inu tatou i te ava aore ra ua rohirohi roa tatou. Hau atu â, eita tatou e taniuniu a faahoro noa ˈi i te pereoo.

10. Eaha ta tatou e nehenehe e rave hou a tupu ai te hoê ati e i te roaraa o te reira?

¹⁰ I te tahi taime, eita tatou e ite afea te hoê ati e tupu ai, mai te ati natura, te maˈi pee e te faahuehueraa. Ia tupu noa ˈtu te reira, e nehenehe tatou e ora ˈtu e e paruru ia tatou ma te faarue i te vahi tei roohia i te ati e ma te pee i te mau aratairaa a te faatereraa. (Roma 13:1, 5-7) E nehenehe tatou e faaineine ia tatou hou a tupu ai te hoê ati. Mea tano ïa ia faaroo tatou i te mau aratairaa a te faatereraa. Ei hiˈoraa, e haaputu paha tatou i te pape e te maa o te ore e pê oioi e tae noa ˈtu i te tahi mau raau.

11. Ia tupu te maˈi pee, eaha te tia ia tatou ia rave?

¹¹ Eaha te tia ia tatou ia rave, ia parare noa ˈtu te maˈi pee i ǒ tatou? Mea faufaa ia haapao tatou i te mau faaueraa a te faatereraa, mai te horoiraa i te rima, te faaatearaa te tahi i te tahi, te tamauraa i te paruru vaha e te opanipaniraa e haere i rapae i te fare. E faaite tatou i te mauruuru no te ô o te ora ma te auraro i taua mau aratairaa ra.

12. I te roaraa o te hoê ati natura, e nafea te Maseli 14:15 e tauturu ai ia tatou ia ite eaha te parau e tia ia faaroo?

¹² Ia tupu te hoê ati, e faaroo tatou i te tahi mau parau a te mau hoa, taata tapiri e no roto mai i te parau apî. E ere râ tera mau parau i te mea mau. Eiaha ïa tatou e tiaturi “i te mau parau atoa” ta tatou e faaroo ra. Mea maitai aˈe no tatou ia faaroo i te mau parau no ǒ mai i te mau tia faatere e te mau taote. (A taio i te Maseli 14:15.) Te tutava ra te Tino aratai e te mau amaa ia noaa ia ratou te mau haamaramaramaraa tano hou a horoa ˈi i te aratairaa no nia i te mau putuputuraa a te amuiraa e te ohipa pororaa. (Heb. 13:17) Ia pee tatou i ta ratou aratairaa, aita tatou e fifihia e e paruru atoa tatou ia vetahi ê. Ma te na reira, te tauturu ra tatou ia vetahi ê ia faatupu ratou i te manaˈo maitai no nia i te mau Ite no Iehova.—Pet. 1, 2:12.

13. E nafea tatou e faaite ai e te haafaufaa ra tatou i te ora i te taime e titauhia ˈi ia faatura i te ture a Iehova no nia i te toto?

¹³ E rave rahi taata o te ite eaha te manaˈo o te mau Ite no Iehova no nia i te toto. E pee tatou i te faaueraa a Iehova no nia i te toto ma te ore e farii i te pâmuraa toto, noa ˈtu te faaruru ra tatou i te hoê tupuraa ru. (Ohi. 15:28, 29) E ere râ te auraa e te hinaaro ra tatou e pohe. Aita roa ˈtu! Te haafaufaa nei tatou i te ora ta te Atua i horoa mai ei ô na tatou. E imi tatou i te tauturu a te mau taote aravihi o te farii i te rapaau ia tatou ma te ore e faaohipa i te toto.

14. Eaha te tia ia rave ia ore tatou e fifihia i te pae rapaauraa?

¹⁴ Ia haapao maitai tatou i to tatou ea mai tei faahitihia na mua ˈtu, eita ïa e titauhia ia tapuhia tatou aore ra ia rave tatou i te hoê ravea rapaauraa teimaha. Rahi noa ˈtu tatou i te haapao maitai i to tatou ea, oioi noa ïa tatou i te maitai mai i muri aˈe i te hoê tapuraa. Eita atoa tatou e fifihia, ia haapao maitai tatou i te mea e vai ra i te fare e i te vahi raveraa ohipa e ia faatura tatou i te ture purumu.

15. (1) No te aha mea faufaa ia faaapî i ta tatou tareta toto DPA? (A hiˈo atoa i te hohoˈa.) (2) Mai ta te video e faaite ra, e nafea tatou e rave ai i te mau faaotiraa papu maitai no nia i te faaohiparaa i te toto?

¹⁵ I te mea te haafaufaa ra tatou i te  ô o te ora, e faaî tatou i te hoê tareta toto parauhia Instructions médicales/Désignation d’une personne de confiance a afai atu ai i te reira na muri ia tatou i te mau taime atoa. b E faaite teie api parau i ta tatou mau faaotiraa no nia i te pâmuraa toto e te tahi atu mau ravea rapaauraa. Ua faaapîhia anei ta outou tareta toto? A faaapî oioi atu i te reira mai te peu e titauhia aore ra a faaî atu i te tahi. Ma te na reira, oioi ïa te mau taote i te taa eaha ta tatou i faaoti e oioi atoa tatou i te fanaˈo i te hoê ravea rapaauraa papu. E tauturu atoa teie api parau ia ratou ia ore e horoa mai i te tahi raau o te nehenehe e haafifi i to tatou ea. c

16. Eaha te rave mai te peu aita tatou e ite e nafea ia faaî i te hoê tareta toto?

¹⁶ O tatou pauroa te nehenehe e roohia i te hoê fifi aore ra maˈi, mea apî anei tatou aore ra mea itoito maitai. (Koh. 9:11) No reira, mea faufaa roa ia faaî i te hoê tareta toto. Mai te peu aita outou e ite ra e nafea ia faaî i te reira, a ani i te tauturu a te mau matahiapo. E nehenehe ratou e  tauturu ia outou, eita râ ratou e faaoti no outou. Na outou iho â tera faaotiraa e rave. (Gal. 6:4, 5) E nehenehe râ ratou e faataa ia outou i te auraa o te mea e faahitihia ra i roto i te tareta e e nafea ia papai i ta outou i maiti.

17. E nafea tatou e faaite ai i te hoê huru feruriraa tano no nia i te ea?

¹⁷ E rave tatou i te mau faaotiraa no nia i to tatou ea e e maiti tatou i te ravea rapaauraa maoti i ta tatou i haapii i roto i te Bibilia. (Ohi. 24:16; Tim. 1, 3:9) Ia rave tatou i te hoê faaotiraa a aparau atu ai ia vetahi ê no nia i ta tatou i faaoti, e haamanaˈo tatou i ta te Philipi 4:5 e parau ra: “Ia itehia to outou huru au noa e te taata atoa.” Ia faaite tatou i te hoê huru feruriraa tano, eita tatou e haapeapea rahi roa no to tatou ea. Eita atoa tatou e faahepo ia vetahi ê ia manaˈo mai ia tatou. E here e e faatura noa tatou i to tatou mau taeae e tuahine, noa ˈtu mea taa ê te mau faaotiraa ta ratou e rave.—Roma 14:10-12.

18. E nafea tatou e faaite ai i to tatou mauruuru no te ô o te ora?

¹⁸ E faaite tatou i to tatou mauruuru ia Iehova, te tumu o to tatou ora, ma te haapao maitai i to tatou ea e ma te horoa i te mea maitai roa ˈˈe na ˈna. (Apo. 4:11) I teie mahana, te faaruru nei tatou i te maˈi e te ati e rave rau. E ere râ tera te oraraa ta te Atua Poiete i hinaaro no tatou. Maoti o ˈna e nehenehe ai tatou e fanaˈo i te ora mure ore. I taua taime ra, e ore roa te mauiui e te pohe. (Apo. 21:4) A tiai noa ˈi, te oaoa ra tatou i teie ô o te ora e i te tavini i to tatou Metua i te raˈi î i te here ra o Iehova.