1. Иеговага бистиң амы-тынывыс кайы хире үнелиг?

 ЭЖИҢЕР силерге дыка алдарлыг чурукчунуң ховар дээн чуруун белекке берген дижик. Ол чурук эрги болгаш, чамдык черлеринде тигленип, хирленип, өңү дүжүп калган. Ол чеже-даа четпестерлиг болза, ооң өртээ каш миллион доллар чедип турар. Чугаажок, силер ол белекти аажок үнелеп, кадагалаар силер. Ооң-биле дөмей, дээрде өңнүүвүс Иегова биске кайгамчык белекти — амы-тынны — сөңнээн. Оон ыңай Иегова Оглун өргүл кылдыр бергеш, амы-тынывысты кайы хире бедик үнелеп турарын көргүскен (Ин. 3:16).

2. Иегова бистен чүнү манап турар? (2 Коринфичилерге 7:1).

² Иегова — амыдырал Хайырлакчызы (Ыд. ыр. 35:10). Павел элчин: «Ооң ачызында чурттап, шимчеп база амыдырап чоруур болгай бис» — деп чугаалаан (Аж.-ч. 17:25, 28). Ынчангаш чуртталгавысты Бургандан белек деп чугаалап болур. Ол чурттаарынга херек бүгү чүүлдү, биске ынак болгаш, берип турар (Аж.-ч. 14:15—17). Ынчалза-даа Иегова бөгүн хуулгаазынныг арга-биле амы-тынывысты камгалавайн турар. Кадыкшылывыстың болгаш Ооң-биле найыралывыстың дугайында шыдаар шаавыс-биле боттарывыс сагыш човаар ужурлуг бис. (Номчуптуңар: 2 Коринфичилерге 7:1.) Кадыывысты болгаш амы-тынывысты чүге камнаар ужурлуг бис база ону канчаар кылып болур?

3. Биске кадык болуру чүге чугула?

³ Кадыывысты чүге камнаар ужурлуг бис? Чүге дээрге Иеговага долузу-биле бараалгаксап турар бис (Мк. 12:30). Оон Библияда «дириг, ыдыктыг база Аңаа таарымчалыг өргүл кылдыр, мага-боттарыңарны Бурганга бүрүнү-биле бериптиңер» дээн сүмени эдериксеп чоруур бис (Рим. 12:1). Ынчангаш кадыывыска хора чедирип болур бүгү чүүлден дезип турар бис. Ийе, канчаар-даа кызар болзувусса, аарыглардан долузу-биле камгаланып шыдавас бис. Ынчалза-даа кадыывысты камнаар дээш, бодувустуң талавыстан бүгү чүүлдү кылып турар бис. Чүге дизе дээрде Адавыстың берген белээн, амы-тынны, үнелеп турарывысты көргүзүксээр бис.

4. Давид хаан чүнү күзеп турган?

⁴ Давид хаан Бурганның берген амы-тынын чүге үнелеп турганын мынчаар тайылбырлаан: «Өлү бээримге, ажыы чүл? Хөөрже кире бээримге, эки чүү боор? Өлген сөөк Сени канчап алдаржыдарыл? Алыс шыныңны канчап херечилээрил?» (Ыд. ыр. 29:10). Давид ол сөстерни чок апаарының мурнунда бижээн чадавас. Ынчалза-даа ол Иегованы алдаржыдар дээш, үр чурттаарын база кадык болурун кызып турган. Чугаажок, бис шуптувус база ындыг хөөннүг бис.

5. Назы-харывыс болгаш кадыывыс кандыг-даа бол, чүнү канчап болур бис?

⁵ Аарыгның азы улгаткан назынның ужундан, ооң мурнунда ышкаш, хөйнү кылып шыдавас апарган чадавас бис. Ол дээш аажок муңгарап болур бис. Ынчалза-даа холувусту сула салып, кадыывыска тоомча чок хамаарылгалыг болбаалыңар. Чүге? Чүге дизе каш-даа харлыг, чеже-даа аарыглыг болзувусса, Давид хаан дег, Иегованы дөмей-ле алдаржыдып болур бис. Иегова бисти, бачыттыг улусту, үнелеп турар боорга, дыка өөрүнчүг-дүр! (Мф. 10:29—31). Бир эвес чок апаар болзувусса, бисти диргизер үени Иегова четтикпейн манаар (Иов 14:14, 15). Ынчангаш дириг чорааш, кадыывысты камнаар дээш, шупту чүүлдү кылыылыңар.

6. Ижип-чип тургаш, Иегованың үзел-бодалын чүге херекке алыр ужурлуг бис?

⁶ Библия дээрге кадык чурттаарының болгаш шын чемненириниң ному эвес-тир. Ынчалза-даа ында аңаа хамаарыштыр Иегованың үзел-бодалын бижээн. Чижээ, Бурганның Сөзү мага-бодувуска хилинчекти азы хораны чедирип болур чүүлдерден ойталаңар деп кыйгырып турар (Эккл. 11:10). Чижээ, Библияда идээледир сыыртынар база арагалаар чорукту багай кылдыр көргүскен, чүге дээрге ол чүүл өлүмге чедирип болур (У. ч. 23:20). Чүнү база кайы хирени ижер-чиирин шиитпирлеп тургаш, туттунуп чоруурувусту Иегова күзеп турар (1 Кор. 6:12; 9:25).

7. Чугаалар 2:11-де сөстер кадыкшылывыска хамаарыштыр шын шиитпирлерни хүлээринге канчаар дузалаар?

⁷ Амы-тынывыс дээш Бурганга четтиргенивисти илереткен шиитпирлерни хүлээринге бодамчалыг чорук дузалаар (Ыд. ыр. 118:99, 100; номчуптуңар: Чугаалар 2:11). Чижээ, кандыг-ла бир чем кадыывыска хора чедирер деп билир болзувусса, ону чивес бис. Оон аңгыда, чедир удуп, сула шимчээшкиннер кылып, мага-бодувуска болгаш бажың-балгадывыска арыг-силигни тудар болзувусса, бодамчалыг чорукту көргүзер бис.

8. Бурган айыыл чок чорукту сагыырының дугайында чүнү бодап турар? Тайылбырлаптыңар.

⁸ Иегованың израильчилерге берген хоойлузунда ажылдаар черге база бажыңга айыылдыг байдалды болдурбазынга дузалаар айтыышкыннарны бижээн (Хост. 21:28, 29; Ы. х. к. 22:8). Кандыг-бир кижини сагыштыы-биле эвес, билбейн эндеп каан кижиниң чуртталгазы аар-берге уржуктарлыг боор турган (Ы. х. к. 19:4, 5). Төрүттүнмээн төлге билбейн хора чедирген кижини безин, хоойлу ёзугаар шиидер турган (Хост. 21:22, 23). Ыдыктыг Бижилгеден алырга, Иегова бисти айыыл чок чорукка шыңгыы хамаарылгалыг болзун деп күзеп турар.

9. Айыыл-халапка таварышпас дизе, чүнү канчаарыл? (Ол ышкаш чурукту көрүңер.)

⁹ Бурганга амы-тын дээш өөрүп четтиргенивисти бажыңга азы ажылга айыыл чок чоруктуң хемчеглерин сагып тургаш, көргүзер бис. Чижээ, чидиг, шиш херекселдерни, химикаттарны болгаш эмнерни шын октаар бис. База аңаа чаш уруглар дегбес  кылдыр сагыш човаар бис. Оон ыңай отту, изиг суук чүүлдерни азы электрохерекселдерни оваарымчалыг ажыглап, хайгаарал чокка арттырбас бис. Кичээнгейни кошкадыптар эмни, араганы ижип алгаш азы чедир удуп албаан болзувусса, машина мунмас бис. А мунуп турар үевисте, холувуска телефон тутпас бис.

10. Айыыл-халаптың мурнунда база үезинде чүнү кылып болур бис?

¹⁰ Амы-тынывыска айыыл тургузуп болур байдалдардан чамдыкта дезип шыдавас бис. Ылаңгыя бойдус халавы, хамчык аарыглар азы дайыннар болуп эгелээр болза. Ынчалза-даа ындыг айыылдыг үеде амы-тынывысты камгалаар аргалар бар. Кандыг? Эрге-чагыргаларның тургускан комендант шагын сагып, эвакуацияга хамаарыштыр азы оон-даа өске айтыышкыннарны дыңнаар болзувусса, амы-тынывысты камгалап ап болур бис (Рим. 13:1, 5—7). Чамдык айыылдарны баш удур билип каап болур. Ынчангаш тус черниң эрге-чагыргаларының айтыышкыннарын дыңнаар болзувусса, мерген угаанныг боор. Чижээ, бажыңывыска сугну, үрелбес чемнерни болгаш аптечканы курлавырлап ап болур бис.

11. Халдавырлыг аарыг өөскүй бээр болза канчаар?

¹¹ Бир эвес чурттап турар черивисте халдавырлыг аарыг өөскүй бээр болза канчаар? Холду чуурунга, дистанцияны сагыырынга, масканы кедеринге база карантинге хамаарыштыр эрге-чагыргаларның негелделерин дыңнаар бис. Бир эвес айыыл чок чоруктуң ол хемчеглерин сагыыр болзувусса, Бурганның үнелиг белээн, амы-тынны, үнелеп турарывысты көргүзер бис.

12. Чугаалар 14:15-те дүрүм айыыл-халап үезинде бүзүрелдиг информацияны тодарадып алырынга канчаар дузалап турар?

¹² Онза байдалдар үезинде шын эвес информацияны эш-өөрүвүстен, кожаларывыстан азы массалыг информация чепсектеринден дыңнап болур бис. «Дыңнаан чүвезинге-ле» бүзүрээриниң орнунга, бүзүрелге төлептиг, ажылын эки билир чазактың болгаш эмнелгелерниң албан черлерин дыңнаар бис. (Номчуптуңар: Чугаалар 14:15.) Удуртукчу чөвүлел болгаш салбырлар чыышка база суртаал ажылынга хамаарыштыр айтыышкыннарны бээриниң мурнунда информацияны чаза кара хынап турар (Евр. 13:17). Оларның удуртулгазын дыңнаар болзувусса, бодувусту болгаш өскелерни айыылдан камгалаар бис. Оон ыңай бистиң дыңнангыр чоруувус ачызында Бурганның чонунуң ат-сураа эки боор (1 Пет. 2:12).

13. Ханга хамаарыштыр айтырыг тургустунуп кээрге, амы-тынывысты бедик үнелеп турарывысты канчаар көргүзүп турар бис?

¹³ Иегованың Херечилери ханны ыдыктыг деп санаарын хөй улус билир. Бис Иегованың ханга хамаарыштыр хоойлуларынга чагыртып турар болгаш, дүрген дуза херек үеде безин, хан куттуруушкунундан ойталап турар бис (Аж.-ч. 15:28, 29). Ол дээрге өлүксеп турар бис дээни ол бе? Чок, Бурганның белээн, амы-тынны, бедик үнелеп турар бис. Ынчангаш хан ажыглавайн, эмнээринге белен мергежилдиг эмчилерден дузаны дилеп турар бис.

14. Шыңгыы эмчи дузазын эвээш хереглээр кылдыр, чүнү кылып болур бис?

¹⁴ Бо статьяда сүмелерни сагып, кадыывысты камнаар болзувусса, шыңгыы эмчи дузазын эвээш хереглээр бис. А кадыывыс  быжыг боор болза, кезиишкин соонда дораан чүгээртей бээр бис. Оон аңгыда, бажыңывыска, ажылывыска айыыл чедирип болур чүүлдерни чайладып, орук шимчээшкининиң дүрүмнерин сагыыр ужурлуг бис. Шак ынчаар кылыр болзувусса, дүрген кезиишкин херек байдалдарны эвээжедир бис.

15. а) Хан документизин чүге үргүлчү ап чоруур болза эки? (Ол ышкаш чурукту көрүңер.) б) Хан ажыглаарынга хамаарыштыр шиитпирни канчаар хүлээп алырыл? (Немелде тайылбырны көрүңер.)

¹⁵ Бис амы-тынывысты үнелээр болгаш, «Эмчи киржилгезинге хамаарыштыр айтыышкын болгаш бүзүредилге» деп долдуруп каан документини кезээде ап чоруур бис. Ында бистиң хан куттурарынга база өске-даа эмчи киржилгезинге хамаарыштыр үзел-бодалывысты бижип каан. Ол документиңер эргижиревээн бе? Херек болза, ону долдуруп азы чаартып алыңар. Ону саадатпаңар. Бир эвес эмнээшкинге хамаарыштыр күзеливисти документиге тода бижип каар болзувусса, херек эмчи дузазын биске дүрген чедирер. Шак ынчаар эмчилерниң болгаш бистиң аравыска билишпейн баар байдалдар тургустунмас b.

16. Хан документизин долдуруп билбес болзувусса, чүнү канчаарыл?

 ¹⁶ Кым-даа, аныяк шыырак кижи безин, аарыг-аржыкка азы айыыл-халапка таваржып болур (Эккл. 9:11). Ынчангаш хан документизин долдуруп алыр болза, мерген угаанныг боор. Ону долдурарын билбес болзуңарза, хуралда удуртукчулардан дузаны дилеңер. Ынчалза-даа олар силерниң орнуңарга шиитпир үндүрбес. Ол дээрге силерниң харыысалгаңар-дыр (Гал. 6:4, 5). Ындыг-даа бол, акылар кандыг эмнээшкиннер барын база ол документини канчаар долдурарын силерге айтып бээр.

17. Кадыывыска хамаарыштыр айтырыгларны шиитпирлеп турувуста, бодамчалыг чоруувус чүүден көскү боор?

¹⁷ Кадыывыска болгаш эмнээшкинге хамаарыштыр айтырыгларны шиитпирлеп турувуста, биске Библия ёзугаар өөреттинген арын-нүүрүвүс дузалаар (Аж.-ч. 24:16; 1 Тим. 3:9). Шиитпирлерни хүлээп, ооң дугайында өскелер-биле чугаалажып тургаш, «бодамчалыг чорууңар бүгүдеге көскү болзун» дээн сүмени эдерери чугула (Флп. 4:5, Чаа делегей). Бодамчалыг боор болзувусса, кадыывыс дээш эмин эрттир дүвүревес бис. Оон аңгыда, үзел-бодалывысты өске улуска сыгавас бис. Акы-угбаларның шиитпирлери бистиинден ылгалып-даа турар болза, оларны дөмей-ле хүндүлеп, ынакшылды көргүзер бис (Рим. 14:10—12).

18. Иеговага амы-тынывыс дээш четтиргенивисти канчаар көргүзүп болур бис?

¹⁸ Иеговага амы-тынывыс дээш четтиргенивисти канчаар көргүзүп болур бис? Амы-тынывысты камнап, Бурганга эң-не экини берип тургаш (Ажыд. 4:11). Амгы үеде хөй-ле аарыг-аржыкка болгаш айыыл-халаптарга таваржып чоруур бис. Ынчалза-даа Чаяакчывыстың биске бодап алган чуртталгазы ындыг эвес. Удавас Иегова биске мөңге чуртталганы бээр. Ынчан аарыг-даа, өлүм-даа турбас (Ажыд. 21:4). А ол үе келбээнде, амы-тынывысты болгаш дээрде ынакшылдыг Адавыска бараалгап чоруур аргавысты үнелээлиңер!