1. Yehova o tenda ndati omuenyo wetu?

 SOKOLOLA okuti, ekamba liove lia ku ĩha ekuadru lia pindaliwa, pole, liosimbu. Evala liekuadru liaco li kasi ale oku kunguka, lieyuka atota kuenda lia tomboyoka. Ndaño latime aco olio li kuete ondando yimue ya tĩla calua. Ocili okuti, nda wa yi sanjukila kuenda oku teyuila ekuadru liaco. Cimuamue haico okuti, Yehova wa tu ĩha ombanjaile yimue yi kuete esilivilo, okuti omuenyo. Yehova wa lekisa ndomo a kapako omuenyo wetu, poku tu ĩha Omõlaye ndocisembi.—Yoa. 3:16.

2. Ndomo ca lekisiwa 2 Va Korindo 7:1, nye Yehova a lavoka kokuetu?

² Yehova eye Ono yomuenyo. (Osa. 36:9) Upostolo Paulu wa kũlĩhĩle ocili caco eci a popia hati: “Mekonda liaye tu kuete omuenyo, tu li senga senga, tu kasi komuenyo.” (Ovil. 17:25, 28) Omo liaco, tu pondola oku popia okuti, omuenyo wetu ombanjaile yi tunda ku Suku. Eye locisola calua o tu ĩha ovina tu sukila oco tu amameko lomuenyo. (Ovil. 14:15-17) Pole, koloneke vilo, Yehova ka lingi vali ocikomo oco a popele omuenyo wetu. Eye o lavoka okuti vosi yetu tu likolisilako oku tata uhayele wetu ketimba kuenda oku amamako oku u vumba. (2 Va Korindo 7:1.) Momo lie tu sukilila oku teyuila uhayele wetu kuenda omuenyo kuenje tu ci linga ndati?

3. Esunga lipi tu kuete lioku likolisilako oku tata uhayele wetu?

³ Esunga lieci tu likolisililako oku tata uhayele wetu ceci okuti, tu pondola oku vumba ciwa Yehova. (Mar. 12:30) Omo okuti tu yongola oku eca ‘atimba etu ndocilumba ci kasi lomuenyo, ci kola, haico ci taviwa la Suku,’ tu sukila oku yuvula ovina vi kapa kohele uhayele wetu. (Va Rom. 12:1) Ocili okuti, ndaño tu likolisilako oku litata, ka ci lekisa okuti lalimue eteke tu vela. Pole, tu likolisilako oku ci linga, momo tu yongola oku lekisa ku Isietu wokilu okuti, tua sanjukila ombanjaile yomuenyo.

4. Nye Soma Daviti a yonguile oku linga?

⁴ Soma Daviti wa lombolola esunga lieci a ecela olopandu ku Suku omo liombanjaile yomuenyo eci a soneha hati: “Onganyu yipi yi tunda koku fa kuange, koku lokila kuange vocitunu? Anga hẽ oneketela yi ka ku sivaya? Yi ka sapula hẽ ekolelo liove?” (Osa. 30:9) Citava okuti Daviti wa soneha olondaka evi, koku panda kuolofa viaye. Pole, eye wa nõlelepo oku kala lomuenyo kuenda oku likolisilako oku amamako oku sivaya Yehova. Ocili okuti vosi tu kuetevo onjongole yaco.

5. Ndaño tua kuka, ale tu vela nye tu sukila oku linga?

⁵ Nda tu vela ale tua kuka, citava okuti ka tu pondola vali oku linga ovina tua lingaile kosimbu. Kuenje eci ci pondola oku tu kokela onyeño kuenda esumuo. Pole, ka citava okuti tu liwekapo oku tata uhayele wetu. Momo lie? Momo ndaño tua kuka ale tu vela, handi tu pondola oku sivaya Yehova ndeci ca linga Soma Daviti. Ci lembeleka calua oku kũlĩha okuti, tu kuete esilivilo ku Suku yetu ndaño tu vela, ale tua kuka. (Mat. 10:29-31) Ndaño tua fa eye o kuete onjongole yoku ka tu pindula. (Yovi 14:14, 15) Kuenje osimbu tu kasi lomuenyo tu linga cosi ci tava, oco tu teyuile uhayele wetu kuenda omuenyo.

6. Nye Yehova a yongola okuti oco tu linga catiamẽla kocituwa cetu cokulia kuenda cokunyua?

⁶ Ndaño okuti Embimbiliya helivuluko lieca olonumbi ndomo tu tata uhayele wetu, ale ovina tu lia, pole, olio lisitulula ovisimĩlo via Yehova viatiamẽla kovina evi. Ndeci, eye o tu lungula oku “yuvula ovina vĩvi” vi nyõla etimba lietu. (Uku. 11:10) Embimbiliya li pisa okulia calua kuenda okunyua calua, momo ovina viaco vi nyõla uhayele wetu loku tu kokela olofa. (Olosap. 23:20) Yehova o lavoka okuti tu likandangiya poku nõla eci tu yongola oku lia loku nyua kuenda ndomo tu ci linga.—1 Va Kor. 6:12; 9:25.

7. Elungulo li sangiwa Kolosapo 2:11, li tu kuatisa ndati poku nõla olonjila viwa viatiamẽla kuhayele wetu?

⁷ Tu pondola oku nõla olonjila vi lekisa olopandu kombanjaile Suku a tu ĩha yomuenyo, poku talavaya ciwa luloño wetu woku sokolola. (Osa. 119:99, 100; tanga Olosapo 2:11.) Ndeci, tu sukila oku nõla ciwa ovina tu lia. Nda tu sole okulia kumue, pole, tua kũlĩha okuti ku tu kokela oku vela, tu lekisa olondunge poku yuvula okulia kuaco. Tu lekisavo olondunge eci tu pekela ciwa, tu pindisa etimba, tu liyelisa ketimba kuenda oku yelisa onjo yetu.

8. Nye Embimbiliya li tu longisa catiamẽla kovisimĩlo via Yehova kovina vi kapa kohele?

⁸ Yehova wa ecele ku va Isareli ocihandeleko ndomo ovo va ponduile oku  liteyuila kovina vi kapa kohele ndeci, kolonjo viavo, ale kovopange avo. (Etu. 21:28, 29; Esin. 22:8) Nda omunu umue o ponda ukuavo, ndaño ka ci lingile ocipango wa laikele oku kuata ovitangi. (Esin. 19:4, 5) Ocihandeleko ca kisikile okuti, ndaño muẽle vana okuti halocipangoko va ponda oñaña ka ya citiwile handi, va sesamelele oku kangisiwa. (Etu. 21:22, 23) Ovisonehua vi tu sapuila okuti, Yehova o yongola okuti tu likolisilako oku yuvula ovina vi tu kapa kohele.

9. Nye tu sukila oku linga oco tu yuvule ovina vi kapa kohele omuenyo wetu? (Talavo oviluvialuvia.)

⁹ Tu lekisa okuti, tua sanjukila ombanjaile ya Suku okuti omuenyo poku liteyuila kovina vi kapa kohele konjo, ale kupange. Ndeci, tu sukila oku kapa ocipãla ovina vi lemeha, vi ngafula, oku seleka ovihemba, okuti ka vi kala ocipepi lomãla. Nda tua siakãla ondalu, ale poku teleka kuenda oku talavaya lovimalẽho via tokekiwa kolusu, tu sukila oku yuvula oku visia ño ndoto, oco tu yuvule ovitangi. Etu ka tu pondola oku endisa ekãlu osimbu  tu kasi oku nyua ovihemba vimue, pamue tua kolua, ale tu kasi lotulo kuenda oku tala votelefone.

10. Nye tu sukila oku linga osimbu ka kueyile ocilunga cimue ci kapa kohele omuenyo wetu?

¹⁰ Olonjanja vimue ka tu tẽla oku liteyuila kohele yimue yi pita letu. Ca piãla enene ovilunga, ovovei kuenda ungangala. Eci ovina viaco vi pita, tu seteka oku kala kovitumãlo vimue via koka, loku puluka kohele yaco poku pokola kovihandeleko vi eciwa lakulu vekongelo kuenda olonumbi vikuavo vi eciwa lolombiali. (Va Rom. 13:1, 5-7) Olohele vimue vi sapuiwa lonjanga, omo liaco, tu pondola oku kuatisiwa poku kuama olonumbi vi eciwa lolombiali vio pocitumãlo, oco vi tu kuatise oku li pongiyila ovilunga viaco. Ndeci, tu pondola oku kuatisiwa poku pongiya ovava, okulia kuenda ovina vikuavo tu ka sukila.

11. Nda uvei umue u sambuka wa li sanduila pocitumãlo tu kasi, nye tu sukila oku linga?

¹¹ Nye tu sukila oku linga nda uvei umue u sambuka u kasi oku lisanduila pocitumãlo tu kasi? Tu sukila oku pokola kolonumbi violombiali ndeci, oku sukula ovaka, oku kala ocinala la vakuetu, oku wala ombindi kuenda oku likalila. Eci tu linga ovina evi tu lekisa olopandu kombanjaile ya Suku okuti omuenyo.

12. Onumbi yi sangiwa Kolosapo 14:15, yi tu kuatisa ndati oku nõla ciwa asapulo tu yeva eci kupita ocilunga cimue?

¹² Vokuenda kuovitangi viya ocipikipiki, pamue tu yeva asapulo amue ka a suilepo pocakati cakamba, ca vana tu lisungue lavo kuenda pocakati covingungu viasapulo. Oco tu yuvule oku kolela “kolondaka viosi,” tu sukila oku yevelela ovolandu a suapo a tunda kolombiali kuenda kolondotolo. (Tanga Olosapo 14:15.) Osungu Yolombangi Via Yehova kuenda olofiliale, vi likolisilako oku sanda olonumbi via suapo osimbu handi ka va ecele olonumbi viatiamẽla kolohongele kuenda kupange woku kunda. (Va Hev. 13:17) Omo lioku kuama olonumbi viaco, tu pondola oku liteyuila kuenda oku teyuilavo vakuetu. Tu kuatisavo omanu vakuavo oku kuata ovisimĩlo viwa viatiamẽla Kolombangi Via Yehova.—1 Pet. 2:12.

13. Tu lekisa ndati okuti tua sanjukila ombanjaile yomuenyo Suku a tu ĩha eci kuiya ocitangi coku kapiwa osonde?

¹³ Omanu valua va kũlĩha okuti Olombangi Via Yehova vi tenda osonde okuti yi kola. Tu pokola kocihandeleko ca Yehova catiamẽla kosonde poku yuvula oku yi tambula, ndaño ceci kuiya uvei umue vocipikipiki. (Ovil. 15:28, 29) Eci ka ci lomboloka okuti tu yongola oku fa. Pole, etu tua sanjukila ombanjaile Suku a tu ĩha okuti omuenyo. Tu sanda ekuatiso liolondotolo vina vi pondola oku tu sakula lonjila yimue okuti ka mu kongela osonde.

14. Tu yuvula ndati oku tatiwa lonjila yimue ka tua lavokaile?

¹⁴ Nda tua tata uhayele wetu poku linga ovina via tukuiwa vocipama cilo, ci ka tu kuatisa oku yuvula oku tatiwa lonjila yimue ka tua lavokaile. Nda tua amamako oku tata uhayele wetu, ci ka leluka oku kaya lonjanga nda tu kasi luvei umue u sukila oku pelaliwa. Tu pondolavo oku yuvula ohele yoku lilemeha, poku ongotiya ciwa ovina konjo yetu, kocitumãlo tu talavayela kuenda oku pokola kocihandeleko coku li teyuila.

15. (a) Momo lie ci kuetele esilivilo oku ambata ocicapa coku yuvula oku sakuiwa losonde? (Talavo ociluvialuvia.) (b) Ndomo ci lekisiwa vovideo tu yuvula ndati olonjila via tukuiwa vioku sakuiwa losonde?

 ¹⁵ Omo okuti tua sanjukila ombanjaile yomuenyo, tu sukila oku soneha ocicapa losapi hati (Diretrizes Sobre Tratamento de Saúde) loku cambata olonjanja viosi. b Locicapa caco tu ka lekisa okuti ka tu yongola oku kapiwa osonde kuenda oku sakuiwa lolonjila vikuavo mua kongela o osonde. Ocicapa o kuete, cokaliye hẽ? Nda o sukila oku soneha ocicapa cokaliye ci linga lonjanga. Ocicapa caco ci ka kuatisa ndotolo oku kuama olonumbi via sonehiwamo. Ci ka kuatisavo olondotolo oku yuvula oku tu sakula lonjila yimue ka ya sungulukile. c

16. Nye tu sukila oku linga nda ka tua kũlĩhĩle ndomo tu soneha ocicapa coku yuvula oku kapiwa osonde?

¹⁶ Cikaile okuti tuamalẽhe, ale tu kuete uhayele uwa, vosi yetu tu pondola oku pita locilunga cimue kuenda oku vela. (Uku. 9:11) Eli olio esunga lieci tu sukilila oku soneha ocicapa. Nda okuti kua kũlĩhĩle ndomo o soneha ocicapa caco pinga ekuatiso kakulu  vekongelo. Ovo va ku kuatisa lika oku soneha ocicapa coco, pole, ka va ku nõlelako onjila o sukila oku kuama. Ocikele caco cove muẽle. (Va Gal. 6:4, 5) Ovo va ku kuatisa oku kuata elomboloko liovisimĩlo viove loku ku kuatisa oku soneha ocicapa caco.

17. Tu lekisa ndati esunguluko kovina viatiamẽla kuhayele?

¹⁷ Olonjila viosi tu nõla viatiamẽla kuhayele wetu kuenda vioku tatiwa via kunamela kovina tu lilongisa Vembimbiliya. (Ovil. 24:16; 1 Tim. 3:9) Eci tu nõla onjila yimue loku yi sapuila komanu vakuavo, tu sukila oku kapako onumbi yi sangiwa kukanda ku va Filipoi 4:5 kuna ku popia hati: “Esunguluko liene li kũlĩhĩwe lomanu vosi.” Eci tu lekisa esunguluko, ka tu sakalala calua luhayele wetu kuenda ka tu kisika vakuetu oku tava kocisimĩlo cetu catiamẽla kuhayele. Etu tu sole kuenda tua sumbila vamanjetu ndaño okuti olonjila va nõla via litepa levi vietu.—Va Rom. 14:10-12.

18. Tu lekisa ndati olopandu kombanjaile yomuenyo?

¹⁸ Etu tu lekisa olopandu ku Yehova Ono yomuenyo poku teyuila omuenyo wetu kuenda oku eca eci ca velapo kokuaye. (Esit. 4:11) Pole, cilo tu pondola oku liyaka lovitangi vioku vela kuenda ovilunga. Omuenyo tu kuete cilo, hawoko ululiki wetu a tu yonguila. Ndopo o ka tu ĩha omuenyo ka u pui una okuti, ka ku kala vali oku lila kuenda oku fa. (Esit. 21:4) Omo liaco, osimbu otembo yaco ka yeyile, ciwa oku kala lomuenyo oco tu vumbe Isietu wokilu ukuacisola Yehova!