1. Come che savemo che la vita la ze tanto importante par Dio?

 METEMO dir che un amigo el te dà de presente un quadro vècio, ma che l’è tanto valioso. Se pol veder che la pintura la ga màcie e i colori i ze restadi sbiavi. Ancora cossita, questo quadro el ga tanto valor. Alora, sicuro che ti te piaseria questo presente e che te ndarissi tenderlo tanto ben. Dela medèsima maniera, Geovà el ne ga dato un presente tanto valioso, che l’è la nostra vita. Par Geovà, la nostra vita la ze tanto importante che lu el ga dato la vita de Gesù par salvarne. — Gioani 3:16.

2. De acordo con 2 Corinti 7:1, cossa che Geovà el vol che femo?

² La vita la vien de Geovà. (Sal. 36:9) Par quela, podemo dir che la ze un presente de Dio par noantri. Anca el apòstolo Paolo lo savea e el ga scrito: ‘Par meso de Dio gavemo vita, semo boni de moverse e esistimo.’ (Ati 17:25, 28) Ancora che ancoi Geovà no’l fae miràcoli par farne restar vivi, lu el ne dà tuto quel che ne ocore par viver. (Ati 14:15-17) Alora, lu el vol che noantri femo el nostro meio par esser sani e seitar a servirlo. (Ledi 2 Corinti 7:1. b) Ma parché che ghemo de proteger la nostra vita e la nostra salute, e come che podemo farlo?

3. Parché che ghemo de sforsarse par esser sani?

³ Ghemo de sforsarse par esser sani parché volemo far el nostro meio a Geovà. (Mar. 12:30) Noantri volemo ‘presentar el nostro corpo come sacrifìssio vivo, santo e che  ghe piase a Dio’. (Rom. 12:1) Par quela, no femo gnente che pol rovinar la nostra salute. Magari, podemo restar maladi. Ma volemo seitar a far el nostro meio par tender dela nostra salute e mostrar che ghe demo valor ala vita che Geovà el ne ga dato.

4. Cossa che el rè Davi el volea far?

⁴ El rè Davi el ghe dea tanto valor ala vita parché dopo de morto, no’l podaria pi lodar a Dio. (Sal. 30:9) Pol esser che l’é stà un poco vanti de morir che Davi el ga dito queste parole. Ancora cossita, lu el volea tanto restar vivo e gaver salute par seitar a servir a Geovà. Sicuro che anca noantri volemo far compagno Davi.

5. Cossa che podemo far anca se vegnemo veci o restemo maladi?

⁵ Quando vegnemo veci o restemo maladi, fursi no podemo adorar a Geovà come feino prima e pol esser che restemo disgustadi. Ma l’è tanto bel saver che Geovà el ne ama, no importa se vegnemo veci o restemo maladi. (Mat. 10:29-31) E quando un dei so servi el more, Geovà l’è premoso de ressussitarlo. (Giò 14:14, 15) Alora, cossa che podemo far se vegnemo veci o restemo maladi? Ghemo de seitar tenderse parché no importa quel che suceda, podemo seitar a adorar a Geovà, compagno al rè Davi. Par quela, intanto che semo vivi, volemo sforsarse par esser sani e tender dela nostra vita.

6. Cossa che Geovà el vol che femo?

⁶ La Bìblia no la dise mia come che ghemo de tender dela salute o cossa ghemo de magnar. Ma la spiega cossa che Geovà el pensa. Lu el dise che ghemo de ‘butar via le robe che le rovina el nostro corpo’, o sia, star distante de quel che fà mal ala nostra salute. (Ecl. 11:10) La Bìblia la dise che no ghemo de magnar massa gnanca bever massa. Queste robe le fà mal e le pol fin coparne. (Pro. 23:20) Par quela, Geovà el vol che se controlemo quando ndemo scòlier cossa che ndaremo magnar e bever. — 1 Cor. 6:12; 9:25.

7. Come che Proverbi 2:11 ne giuta a tender ben dela nostra salute?

⁷ La sabedoria la ne giuta a far bone dessision e mostrar che ghe demo valor ala vita. (Sal. 119:99, 100; Ledi Proverbi 2:11. c) Alora, mostremo che semo sabi quando scoliemo ben quel che ndaremo magnar. Par esémpio, se te piase magnar qualcossa che la te fà mal, saria meio no magnarla. Se gavemo sabedoria, proaremo dormir ben e el tanto che ghe vol, sempre faremo esersissi e saremo persone nete, che se lava e tien la casa neta.

8. Cossa che Geovà el vol che femo?

⁸ Nel passà, Geovà el ga dato lege ai israeliti par protegerli de assidenti che podaria suceder casa o intanto che i era drio laorar. (Éso. 21:28, 29; Deu. 22:8) Par esémpio, se una persona la copesse qualchedun la gavaria la colpa anca se no la gavea fato aposta. (Deu. 19:4, 5) E se una persona la ghe fesse mal a un bambin che no l’era gnancora nassesto, questa persona la gavaria de esser castigada, ancora che no la gavesse fato aposta. (Éso. 21:22, 23) Alora, la Bìblia la mostra che Geovà el vol che se tendemo par no far vegner fora un assidente che podaria far mal a qualchedun.

9. Se volemo proteger noantri e anca ai altri, ghemo de star atenti a che? (Varda anca la ilustrassion.)

 ⁹ Mostremo che ghe demo valor ala vita quando semo atenti a robe che le podaria far mal a qualchedun casa o nel laoro. Par esémpio, ghemo de meter via robe che le taia, produti che se dopera par netar la casa, veleni e rimedi nte un posto che i toseti no i pol mia ciaparli. E quando butemo via queste robe, ghemo de farlo dela maniera giusta. Stemo atenti anca quando ndemo impissar el fogo, boier la àqua o doperar una feramenta che se taca nela luce. Mai ndaremo molar queste robe sensa nissuni par tenderle se ne toca ndar in volta far qualcossa. No ndaremo ciapar el auto se ghemo bevesto rimedi, àlcol o se semo massa cansi. Gnanca ndaremo farlo intanto che semo drio doperar el telèfono.

10. (a) Cossa che podemo far vanti che suceda una desgràssia? (b) Se una desgràssia la ze drio suceder, cossa ghemo de far?

¹⁰ Se stemo atenti, podemo protegerse  de tanti assidenti. Par quela, ghemo de ndar drio le orientassion del governo che pol giutarne a esser pareciadi vanti che suceda qualcossa. Nantra roba che pol giutarne l’è pareciarse casa con àqua, magnar e rimedi. Magari, anca se semo pareciadi, pol esser che suceda qualcossa, come una desgràssia dela naturesa, una bruta malatia o fin una guera. Alora, cossa ghemo de far? Se sucede una roba cossita, podemo protegerse se obedimo ale orientassion del governo de star casa, de ndar via o qualcossa che i ne dise de far. — Rom. 13:1, 5-7

11. Cossa ne ocore far se vien fora una bruta malatia ndove semo de star?

¹¹ Cossa ne ocore far se vien for a una bruta malatia ndove semo de star? Ghemo de obedir ale orientassion del governo, come lavarse le man, star distante de altre persone, doperar la màscara e, se ocore, restar in quarantina. Se femo queste robe, mostraremo che ghe demo tanto valor al presente dela vita che Geovà el ne ga dato.

12. Come che Proverbi 14:15 pol giutarne a saver in chi che podemo fidarse quando sucede una desgràssia?

¹² Quando sucede una desgràssia, pol esser che scoltemo dei nostri visigni e amighi arquante informassion che no le ze mia vera. Fin le notìssie che vien fora nela television o nela internet le pol esser busie. Alora, cossa che ghemo de far? Invesse de ‘creder in tuto quel che scoltemo’, l’è meio fidarse in quel che el governo e i dotori i dise. (Ledi Proverbi 14:15. d) Vanti de darne orientassion sora come far le riunion e la predicassion, el Corpo Governante e i Betei sempre i va in serca dele informassion pi giuste che ghen’è. (Ebr. 13:17) Alora, ghemo de meter in pràtica quel che lori i dise, parché podemo proteger la nostra vita e quela dei altri. Se femo cossita, podaremo anca giutar le persone ndove semo de star a pensar ben dele Testimònie de Geovà. — 1 Pie. 2:12.

13. Come che mostremo che ghe demo valor ala vita?

¹³ Le persone le sa che el sangue l’è santo par le Testimònie de Geovà. Noantri, obedimo ala lege de Geovà e no acetemo una trasfusion gnanca se sucede qualcossa de colpo e i dotori i dise che ghe toca meterne sangue. (Ati 15:28, 29) Ma questo no vol mia dir che volemo morir. Invesse, ghe demo tanto valor ala vita parché l’é stà Geovà che la ne ga dato. Par quela, ndemo in serca de dotori che i ze bravi e che i aceta far tratamenti sensa doperar el sangue.

14. Come che podemo tenderse par no gaver bisogno de una operassion?

¹⁴ Se noantri se tendemo, fursi no ne ocorerà far una operassion. Alora, cossa ghemo de far? Quando semo casa o nel laoro, ghemo de star atenti par no far vegner fora un assidente. Anca quando ciapemo el auto ghemo de obedir a tute le lege del governo. In questo stùdio ghemo visto arquante robe che podemo far par gaver una bona salute. Cossita, se ne ocore far una operassion sarà pi fàcile farla e suito restaremo meio.

15. (a) Parché che l’è importante sempre portar el carton Diretivas? (Varda anca la ilustrassion.) (b) De acordo col vìdeo, come che podemo dessider che tratamenti acetemo far?

¹⁵ Noantri ghemo pronto el carton  Diretivas e mai ndemo via de casa sensa portarlo parché ghe demo tanto valor ala vita. e In questo documento, metemo par scrito che no volemo mia doperar sangue e anca spieghemo che tratamenti volemo far. Par quela, l’è importante esser sicuri che tute le informassion de questo carton le ze giuste. Alora, se no ghemo el carton pronto o se ne ocore cambiar qualcossa, ghemo de farlo suito. Cossita, se de colpo ne ocore far una operassion, i dotori i sarà boni de giutarne presto e sensa meter la nostra vita in rìscio. f

16. Cossa che te ghè de far se no te sè mia cossa scriver nel to carton Diretivas?

¹⁶ No importa se semo gióveni o se ghemo una bona salute, a tuti noantri pol suceder un assidente de colpo o podemo restar maladi. (Ecl. 9:11) Par quela, mostremo sabedoria se ghemo pronto el nostro carton Diretivas. Ma, cossa che te ghè de far se no te sè mia cossa scriver in questo  carton? Domàndaghe aiuto ai ansiani dela to congregassion. Lori i pol giutarte a capir meio le informassion e a saver cossa che te pol far. Magari, lori no i ndarà mia dessider cossa che te ghè de far. Te toca a ti questa dessision. — Gàl. 6:4, 5

17. Come che mostremo sabedoria dopo che ghemo dessidio cossa far par tender dela nostra salute?

¹⁷ Quel che imparemo dela Bìblia ne giuta a far arquante dessision sora come tender dela nostra salute o sora qualche tratamento che ndaremo far. (Ati 24:16; 1 Tim. 3:9) Ma ghemo de star atenti quando parlemo coi altri sora quel che ghemo dessidio far. (Fil. 4:5) Come cossita? Noantri mai restaremo massa preocupadi cola nostra salute e gnanca volaremo che i altri i fae compagno a noantri. Invesse, rispetemo i nostri fradei e sorele e li amemo tanto, anca se quel che lori i desside far l’è difarente de noantri. — Rom. 14:10-12.

18. Come che podemo mostrar che ghe demo valor al presente dela vita?

¹⁸ Semo tanto contenti che Geovà el ne ga dato la vita. E mostremo che ghe demo valor a questo presente, quando tendemo ben dela nostra vita e femo el nostro meio par Dio. (Apo. 4:11) Ancoi, no semo boni de viver come Geovà el volea parché ne toca dàrghene fora cole malatie e desgràssie che sucede. Ma suito, el nostro Creador el ne darà la vita eterna “sensa dolor e gnanca la morte”. (Apo. 21:4) Par intanto, semo pròpio contenti de esser vivi e de servir al nostro caro Pare, Geovà!