1. Yehova onoonela sai okumi ahu?

 NKUUPUWELANI wiira mpatthani anyu ohoovahani empa mwaakhanle anyu oothuma musurukhu munceene. Masi empa eyo ennittonya ni etinta yaapintaraniwe aya yoopacerya wuukutthuwa. Masi hata vari siiso, empa eyo ti ya musurukhu munceene. Exeeni mwaarowa anyu wiiriha empa eyo? Moohaanyiherya nyuwo mwaamwiimananiha vanceene olokiherya ni okhapelela saana empa eyo. Moolikanasa, Yehova oonivaha etthu ya faita yinceene, eyo piiyo, okumi ahu. Yehova ohooniherya wiira onnivaha efaita okumi ahu, mwaha woonivaha Mwanawe ntoko mukuttho wowoopola. — Yoh. 3:16.

2. Moovarihana ni 2 aKorinto 7:1, Yehova oniphavela wiira nipakeke exeeni?

² Yehova tori mwaneene okumi. (Esal. 36:10) Murummwa Paulo aanisuwela eyo, nto ti etthu yaamwiirinhe ohimya so: “Mwaha wa yoowo, hiyo nookhalana okumi, ninneetta, ni nookhala”. (Mit. 17:25, 28) Ti maana aya, ni hiyo nave ninkupali ahu wiira okumi ahu yoovaha enikhuma wa Muluku. Nave Yehova onniniphenta ni onninivaha itthu sootheene nimpirisari ahu wiira nikhale akumi. (Mit. 14:15-17) Nto wiira nikhale akumi nihiikhuraaneke nilipelelaka wiira Yehova onoopaka mwiiriirya wiira onikhaliherye. Masi, owo oniphavela wiira khula mmosa a hiyo okhapeleleke saana okumi awe ni ompatthani orina awe ni yena. (Mmusome 2 aKorinto 7:1.) Xeeni ninreerela ahu okhapelelaka saana okumi ahu, ni ninrowa owerya sai opaka eyo?

3. Nthowa xeeni nimosa ninniiriha okhapelelaka saana okumi ahu?

³ Nookhalana mathowa manceene anniiriha okhapelelaka saana okumi ahu. Nthowa noopacerya, okhala wiira nnooweryaka onvarela muteko Yehova. (Mar. 12:30) ARoma 12:1, onihimya wiira nihaana ovahererya ʻirutthu sahu ntoko mukuttho mukumi, woowaarya ni onimusivela Mulukuʼ. Ti maana aya, khanimphavela  opaka etthu ekhanle ookumiherya muxankiho okumi ahu. Ekeekhai wiira, hata niimananihaka vanceene okhapelela okumi ahu ikwaha sikina hiyo pooti oniphwanyaka oretta. Hata vari siiso, nihaana opaka khula etthu eniwerya ahu wiira nikhapeleleke saana okumi ahu. Tthiri napaka eyo nnoomooniherya Yehova wiira ninnivaha efaita okumi ahu.

4. Mwene Davidi aalakenle opaka exeeni?

⁴ Mwene Davidi aanithokorerya okumi ntoko yoovaha enikhuma wa Muluku. Otthokiheryaka etthu aakupali awe owo aalempe so: “Kakhwá vale, mumphwanya-ni? Kahokolowelá muntthupini, enorerelani xeni? Ntthupi nnowerya wovuwihani? Walá nnowerya olaleya orera wanyu murima?” (Esal. 30:10) Woonasa wene, Davidi aalempe masu ala ohalaka vakhaani okhwa. Masi hata vari siiso, owo aahilakela okhapelela saana okumi awe wiira oweryeke omurumeela Yehova. Tthiri hiyo nihaana okhapelelaka saana okumi ahu ntoko Davidi.

5. Moohicikha iyaakha sahu aahiiso makhalelo a okumi ahu nihaana opaka exeeni?

⁵ Okathi ninwereiwa ahu, aahiiso nnuuluvala ahu, hiyo pooti ohiweryaka onvarela muteko Yehova ntoko khalai. Nto eyo pooti oniiriha oxanka ni oriipiwa murima. Masi hata vari siiso, hiyo nihihiye okhapelela okumi ahu. Mwaha wa xeeni? Mwaha woowi, hata nuuluvanle ene aahiiso niri ene amiravo, hiyo nnoowerya onvuwiha Yehova ntoko siisaale Davidi aalakenle awe onvuwiha. Ninnihakalala osuwela wiira Yehova onninivaha efaita hata niri ene atthu oottheka! (Math. 10:29-31) Nto hata nikhwaaka Yehova onoorowa onihihimuxa. (Yobi 14:14, 15) Tthiri nookhalana mathowa manceene anniiriha okhapelelaka saana okumi ahu.

6. Yehova oniphavela wiira nipakeke exeeni okathi ninwurya ahu aahiiso olya?

⁶ Biibiliya khonihimya itthu ninreerela ahu opaka wiira nikhalane okumi wooloka aahiiso itthu ninreerela ahu olyaaka. Masi hata vari siiso, owo onnooniherya moonelo wa Yehova voohimya sa itthu iyo. Mwa ntakiheryo, Yehova onninlopola ohimyaka so: “Muheteteyaxeké n’itthu [soonanara]” seiyo sikhanle oohonona okumi ahu. (Mus. 11:10) Biibiliya onihimya wiira nihaana osyaka opaka itthu sikhanle oohonona okumi ahu, itthu ntoko olya vanceene ni ohapaliwa. (Mir. 23:20) Nto Yehova omphavela wiira nikhaleke atthu oowiihiiha okathi ninwurya ahu aahiiso olya. — 1 aKor. 6:12; 9:25.

7. Miruku 2:11, onnikhaliherya sai opaka soothanla sinrowa okhaliherya okumi ahu?

⁷ Ninrowa opaka sai soothanla sinooniherya wiira ninnivaha efaita okumi? Nnoowerya opaka eyo akhala wiira nnimwaarumeela ankhili. (Esal. 119:99, 100; musome Miruku 2:11.) Mwa ntakiheryo, hiyo nihaana waarumeela ankhili okathi ninthanla ahu etthu nimphavela ahu olya. Nto akhala wiira yookhala eyoolya ennisivela vanceene masi nnoona wiira naalya vale enniniwereya, vaamureerela ottharuwa yoolya eyo. Nave nnimooniherya wiira nookhalana ankhili vakhala wiira ninnirupa okathi wooreerela, ninnipaka esersiisiyo khula nihiku, ninniirattela ni orattela mapuro ninkhala ahu.

8. Muluku onoonela sai ovareleleya wahu ni wa atthu akina?

⁸ Yehova aahaavaha aisarayeli malamulo yaakhaliherya osyaka ihasara saakhanle ookhumelela owaani aahiiso mapuro yaavara aya muteko. (Okhum. 21:28, 29; Otum. 22:8) Mwa ntakiheryo, vakhala wiira mutthu aanimwiiva mutthu mukina moohilakela, mutthu owo iivale aahaana ohukhummwa. (Otum. 19:4, 5) Nlamulo naahimya wiira akhala wiira atthu yaamunyakulihana aahiiso owana, khummana muthiyana orupanle nto khumwiiva mwanawe, mutthu owo ommanne aahaana ohukhummwa. (Okhum. 21:22, 23) Nto Biibiliya onnooniherya  wiira Yehova oniphavela wiira nivaheke efaita ovareleleya wahu ni wa atthu akina.

9. Exeeni ninreerela ahu opaka wiira nihiikumiherye aahiiso waakumiherya atthu akina ihasara? (Nwehe ifootu.)

⁹ Nnimooniherya wiira ninnivaha efaita okumi Yehova onivanha awe, akhala wiira ninnikhala oovareleleya okhale owaani aahiiso mapuro ninvara ahu muteko. Mwa ntakiheryo, hiyo nnoowerya opaka eyo nisukaka oratteene ikaruma sinithikila wala mirette opuro anamwane ahiniwerya aya ophwanya. Masi vakhala wiira nimphavela oriha itthu ntoko iyo hiyo nihaana orihela mapuro ahinivira-viriwa. Nave nihaana okhalanaka ephoole okathi nnaapeya ahu ni okathi ninrumeela ahu ikaruma sa energia wiira itthu iyo sihinikumiherye mixankiho aahiiso waakumiherya atthu akina. Nave-tho nihaana osyaka weettiha mikukutta nihapaliwe ene aahiiso nilyaalene itthu sinihapala, niri ene ni ikhove aahiiso nimurumeelaka telefoni.

10. Exeeni ninreerela ahu opaka vakhala wiira enookhumelela ehasara mootutuxerya?

¹⁰ Ikwaha sikina, hiyo khaninwerya osyaka wiira itthu sootakhala sihikhumelele. Mwa ntakiheryo,  ikwaha sikina hiyo khaninsuwela okathi sinrowa aya okhumelela ihasara sa ephattu, iretta sowaakuva wuulaana aahiiso ikhotto. Masi hata vari siiso, okathi itthu iyo siniiraneya aya sookhala itthu sikina nikhanle ahu oopaka wiira noopole okumi ahu. Hiyo nihaana othaama mapuro awo vakhala wiira makhulupale a mulaponi aanivekela aahiiso otthara malakiheryo anrowa aya onivaha. (aRom. 13:1, 5-7) Masi ikwaha sikina vanniweryaneya osuwela okathi enrowa aya okhumelela ehasara. Nto wiira niilokiherye okathi eyo eniiraneya aya, nihaana otthara malakiheryo ninvahiwa ahu ni makhulupale a muttetthe ninkhala ahu. Mwa ntakiheryo, vanooloka okhalana murupa ninrowa ahu ohela itthu sihinaakuva ohononeya, ntoko maasi, mirette ni eyoolya.

11. Exeeni ninreerela ahu opaka yaakhumelela eretta yoowaakuva wuulaana?

¹¹ Ankhi akhala wiira enookhumelela eretta yoowaakuva wuulaana mapuro ninkhala ahu, ninrowa opaka exeeni? Nto eyo yiiraneya nihaana wiiwelela malakiheryo ninvahiwa ahu ni makhulupale ntoko, onyawa, orakamelana, onwara maskara ni ohikhuma mapuro ninkhala ahu. Nave akhala wiira nnootthara malakiheryo awo, nnimooniherya wiira ninnivaha efaita yoovaha ya Muluku, eyo piiyo, okumi.

12. Malakiheryo ari Miruku 14:15, anrowa onikhaliherya sai othanlela myaha okathi enikhumelela aya ehasara?

¹² Okathi enikhumelela aya ehasara mootutuxerya, woonasa wene axipatthani ahu, mavisiinyu ahu wala ihapari sa mulaponi, pooti ohimyaka itthu sihikhanle sa ekeekhai. Masi, ohiya okupaliki ‘sothene sinihimeriwa ahu’ onrowa okhala va miruku otthara malakiheryo oororomeleya. (Musome Miruku 14:15.) Nto anna a Nikhuuru Noolamulela ni a ibetheli sa olumwenku wootheene anniimananiha ophwanya malakiheryo oororomeleya ninreerela ahu otthara. Awo annipaka eyo ehinatthi othanla vaareerelaka otthikela mithukumano sa mmulokoni aahiiso muteko woolaleerya. (aHeeb. 13:17) Nto okathi nniiwelela ahu malakiheryo awo, ninniikhapelela hiyo mmansihu ni waakhapelela atthu akina. Ohiya-vo, ninnaakhaliherya atthu akina okhalana moonelo wooloka voohimya sa Anamoona a Yehova. — 1 Ped. 2:12.

13. Moota xeeni wiiwelela nlamulo na Yehova voohimya sa ephome oonooniherya aya wiira ninnivaha efaita okumi?

¹³ Anamunceene annisuwela wiira Anamoona a Yehova khaniheleliwa ephome, hata ekhumelenle ene eretta mootutuxerya. Maana anittittimiha nlamulo na Muluku, noowi ephome ti yoowaarya. (Mit. 15:28, 29) Masi eyo khentaphulela wiira awo khanivaha efaita okumi. Moovirikana ni vo, awo annittittimiha vanceene okumi avahiwa aya ni Yehova. Nto okathi enaakhumelela aya eretta mootutuxerya, awo annimwaavya meetiku wiira aaloole masi ohirumeelaka ephome.

14. Ninrowa osyaka sai iretta saarowa oniiriha wooperariwa aahiiso ophwanya eretta yuulupale?

¹⁴ Akhala wiira nnookhapelela saana okumi ahu, nnoowerya osyaka iretta saarowa oniirihaka ophavela wooperariwa aahiiso osyaka iretta suulupale. Nave akhala wiira nnookhapelelaka saana okumi ahu hata nooperariwaka nnimwaakuva okhala saana. Nave-tho nnoosyaka iretta saarowa oniirihaka wooperariwa akhala wiira nnookhapelelaka mapuro ninkhala ahu, ninvara ahu muteko aahiiso akhala wiira nnimwiiwelela aka malamulo a mustaraatani.

15. (a) Xeeni ninreerela ahu okhalana edukumento ahu ya DPA ya niinaano? (Nwehe efootu.) (b) Moovarihana ni eviidiyu ninrowa opaka sai soothanla sooloka wiira nilooliwe ehirumeeliwaka ephome?

¹⁵ Hiyo ninnivaha efaita okumi. Ti nthowa naya ninlepa ahu ni nneettana ahu edukumento eniitthaniwa DPA, eyo piiyo, (Diretivas Antecipadas). Nto mudokumentoni mmo, hiyo ninnilepa moonelo ahu, ni soothanla sahu voohimya sa enamuna nimphavela ahu  olooliwa ehirumeeliwaka ephome. Akhala wiira mookhalana edukumento eyo niireke ti ya niinaano? Masi akhala wiira ti yakhalai muhaana ovekela ekina moowaakuveya. Omaleliha olepa edokumentu eyo, enimookhaliheryani vanceene. Maana okathi onikhumelela aya oretta mootutuxerya, khamunrowa ohonona okathi anyu mmutthokiheryaka meediku enamuna muneemya anyu aahiiso muhineemya anyu wiira mulooliwe. Opaka eyo enimookhaliheryani osyaka olooliwa mwa enamuna yaarowa okumiherya mixankiho okumi anyu. b

16. Exeeni mukhanle anyu oopaka akhala wiira khamwunsuwela moota woomaleliha olepa edukumento DPA?

¹⁶ Ootheene ahu, nikhale amiravo aahiiso nikhalane okumi wooloka, pooti onikhumelela ehasara aahiiso oretta mootutuxerya. (Mus. 9:11) Nto ti maana aya ootheene ahu ninreerela ahu okhalana ni omaleliha olepa edukumento ahu ya DPA. Masi akhala wiira nyuwo khamunsuwela moota woomaleliha olepa edukumento eyo, xontte mwavekele nikhaliheryo axitokweene a muloko anyu. Awo animookhaliheryani osuwela inamuna sikhanle sa olooliwa sa muttetthe anyu ni moota mukhanle anyu oomaleliha edukumento eyo. Masi muhiliyale wiira  axitokweene khanrowa wooleelani ele mukhanle anyu oopaka. aGal. 6:4, 5.

17. Ninrowa wooniherya sai wiira ninnivaha efaita moonelo wa atthu akina?

¹⁷ Soothanla sinceene nimpaka ahu voohimya sa okumi ahu, ni moota woolooliwa sinivarihana ni ele nniixutta ahu mbiibiliyani. (Mit. 24:16; 1 Tim. 3:9) Nto okathi nimpaka ahu soothanla ni nnaatthokiherya ahu atthu akina, nuupuweleleke malakiheryo ari aFilipi 4:5. Yaawo anihimya wiira: “Waathokorerya wanyu akina, osuweliweke ni atthu otheene”. Mutthu onivaha efaita moonelo wa atthu akina, khonitepa oxankiheya ni okumi awe, nnakhala khonaakhanyererya atthu akina wiira apakeke soothanla amutakihaka yena. Tthiri hiyo ninnaaphenta ni waattittimiha anna ni arokora hata apakaka soothanla soovirikana ni sawihu. — aRom. 14:10-12.

18. Ninrowa wooniherya sai wiira ninnixukhurela okumi Yehova onivanhe awe?

¹⁸ Tthiri Yehova tonivanhe okumi. Nto nnimooniherya wiira ninnimuxukhurela Yehova mwaha woonivaha okumi, akhala wiira nnimwiimananihaka omurumeela ni murima ahu wootheene ni okhapelela saana okumi owo onivanhe awe. (Wiis. 4:11) Okhala wiira ninkhala olumwenku ola wootakhala, ninniwereiwa ni sinniniphwanya ihasara. Masi eyo khahiyo yaari yoolakela ya Muluku onipattuxaka. Nto Muluku ooleiherya wiira onoonivaha okumi woohimala, ninrowa ahu okhalaka nihiwereiwaka nnakhala okhwa. (Wiis. 21:4) Nto nilipelelaka ophiya nihiku nno, nihihiye ovaha efaita okumi ni omurumeela Tiithi ahu oophenta, Yehova!