1. Nu deˈoy Yihoowawu ay keena alˈˈobee?

 ISSI laggee neessi keettaa immidabadan qoppa. He keettay darin loˈˈenna, qassi aattees. Gidikkonne, he keettay daro miiloone biraa ekkana danddayees. Neeni he keettaa nashshanaageenne loytta oyqqanaagee qoncce. Hegaadankka, alˈˈo gidida deˈuwaa imotaa Yihooway nuussi immiis. Yihooway ba Naˈaa nuussi wozo oottidi immiyoogan nu deˈuwaa keehi xoqqu oottidi xeelliyoogaa bessiis.—Yoh. 3:16.

2. Naaˈˈantto Qoronttoosa 7:1 yootiyoogaadan, Yihooway nuuppe koyiyoobay aybee?

² Deˈuwaa Pulttoy Yihoowa. (Maz. 36:9) Kiitettida PHawuloosikka hegaa ammaniyo gishshawu hagaadan giis: “Nuuni aani paxa de7oosinne de7idi qaaxettoos.” (Oos. 17:25, 28) Yaatiyo gishshawu, deˈoy Xoossay nuussi immido imota gaana danddayoos. Nuuni paxa deˈanaadan koshshiyaabaa I siiquwan nuussi immees. (Oos. 14:15-17) SHin Yihooway maalaaliyaabaa oottidi nu deˈoy takkanaadan oottenna. Nuuni payya gididi deˈanawunne ubbatoo awu haggaazanawu, nuussi danddayettida ubbabaa oottanaadan I koyees. (2 Qoronttoosa 7:1 nabbaba.) Nuuni nu payyatettaanne nu deˈuwaa naagana koshshiyoy aybissee, qassi waatidi?

3. Nuuni payya gididi deˈanawu baaxetana koshshiyo issi gaasoy aybee?

³ Nu payyatettaa naagidi deˈanawu nuuni baaxetana koshshiyo issi gaasoy, nuussi danddayettida keenan Yihoowawu  haggaazanawu koyiyo gishshataassa. (Mar. 12:30) Nu “asatettaa Xoossaa ufaissiya de7onne geeshsha yarshsho oottidi, Xoossau [shiishshanawu]” koyiyo gishshawu, nuuni eriyo nu payyatettaa qohana danddayiyaabata oottokko. (Roo. 12:1) Nuuni ay oottikkonne sahettennan attana danddayennaagee qoncce. Deˈuwaa imotaa nashshiyoogaa saluwan deˈiya nu Aawaa nuuni bessanawu koyiyo gishshawu, payya gididi deˈanawu nuussi danddayettida ubbabaa oottoos.

4. Kawuwaa Daawiti ay oottanawu koyidee?

⁴ Kawuwaa Daawiti hagaadan giidi xaafido wode, Xoossay immido deˈuwaa imotaa I nashshiyoy aybissakko yootiis: “Taani haiqqiyoogaappe woikko duufuwan geliyoogaappe ai demmuutee? Baanau laamettida asi nena galatii? Neeni ammanettiyoogaa yootii?” (Maz. 30:9) Daawiti ha qofaa xaafidoy hayqqanawu matido wode gidennan aggenna. SHin Yihoowawu haggaazanawu Daawiti danddayettida keenan paxa deˈanawu murttiis. Nuuni ubbaykka hegaadan murttanawu koyiyoogee qoncce.

5. Nuuni keehi cimidaba woy sahettiyaaba gidikkonne waatana danddayiyoo?

⁵ Sahoy woy cimatettay nuuni kase oottiyo darobata oottennaadan diggana danddayees. Hegaappe denddidaagan, nuuni unˈˈettananne azzanana danddayoos. SHin nu payyatettaa naaganawu nuussi danddayettidabaa oottanawu baaxetana koshshees. Aybissi? Nuuni keehi cimidaba woy sahettiyaaba gidikkokka, Kawuwaa Daawitaagaadan Yihoowa sabbana danddayiyo gishshataassa. Nuuni sahettiyaaba woy cimidaba gidikkokka, nu Xoossawu alˈˈo gidiyoogaa eriyoogee keehi minttettiyaaba! (Maa. 10:29-31) Nuuni hayqqikkokka, I nuna hayquwaappe denttanawu laamotees. (Iyy. 14:14, 15) Nuuni paxa deˈiyo wode, nu payyatettaa naaganawu nuussi danddayettida ubbabaa oottanawu koyoos.

6. Miyoobaanne uyiyoobaa xeelliyaagan nuuni ay oottanaadan Yihooway koyii?

⁶ Geeshsha Maxaafay neeni ne payyatettaa waata naaganaakko woy ay maanaakko odiya maxaafa gidana xayikkonne, hegeeta xeelliyaagan Yihoowa qofay aybakko darobaa yootees. Leemisuwawu, nuuni ‘nu bollaa qohana danddayiyaabata’ digganaadan Geeshsha Maxaafay zorees. (Era. 11:10) Nuuni likkiyaappe aattidi qumaa maana woy ushshaa uyana koshshennaagaa Geeshsha Maxaafay yootees. Hageeti nu payyatettaa qohana, ubba qassi nuuni hayqqanaadan oottana danddayoosona. (Lee. 23:20) Nuuni aybaa qassi ay keenaa maanaakko woy uyanaakko kuuyiyo wode, nu huuphiyaa naagiyaageeta gidanaadan Yihooway koyees.—1 Qor. 6:12; 9:25.

7. Leemiso 2:11n deˈiya zoree nu payyatettaa xeelliyaagan loˈˈobaa kuuyanaadan waati maaddii?

⁷ Nuuni yuushshi qoppidi, Xoossay immido deˈuwaa imotaa nashshiyoogaa bessiyaabaa kuuyana danddayoos. (Maz. 119:99, 100; Leemiso 2:11 nabbaba.) Leemisuwawu, nuuni miyoobaa xeelliyaagan akeekan doorana danddayoos. Nuuni issi qumaa dosiyaaba gidikkonne, hegaa miyoogee nuuni sahettanaadan oottiyoogaa erikko he qumaa mookko. Nuuni loytti xiskkanawu, ubba wode ispporttiyaa oottanawu, qassi nu bollaanne nu keettaa geeshshatettaa naaganawu baaxetiyaaba gidikko, akeekanchcha gidiyoogaa bessoos.

8. Nuuni qohiyaabaappe naagettiyoogaa xeelliyaagan Xoossaa qofaa Geeshsha Maxaafay woygii?

⁸ Sooninne ooso sohuwan qohiyaabaappe naagettanaadan maaddiya Higgiyaa Yihooway  Israaˈeelatussi immiis. (Kes. 21:28, 29; Zaa. 22:8) Issi uri qoppennan asa worikko hegee daro iitabaa kaalettana danddayees. (Zaa. 19:4, 5) Yelettibeenna naˈaa qoppennan qohiyaageetikka qaxxayettana bessiyoogaa Higgee yootees. (Kes. 21:22, 23) Yihooway nuuni qohiyaabaappe naagettanaadan koyiyoogaa Geeshsha Maxaafay qoncciyan yootees.

9. Nuuni qohiyaabaappe naagettanawu waatana danddayiyoo? (Misiliyaakka xeella.)

⁹ Sooninne ooso sohuwan qohiyaabaappe naagettiyoogan Xoossay immido deˈuwaa imotaa nashshiyoogaa bessoos. Leemisuwawu, nuuni qarabaa, marzziyaa, woy xale malabaa olanawu koyikko, harata qohenna ogiyan, qassi guutta naati demmennasan olana koshshees. Nuuni tamaa eettiyo, haattaa penttissiyo woy issi issi miishshata goˈettiyo wode naagettana koshshees. Qassi hegeeta oottiyo wode naagiya woy xeelliya asi baynnan aggidi baana koshshenna. Nuuni kaamiyaa laaggiyoogee metanaadan oottiya xaliyaa mittidaba, ushshaa uyidaba, woy laagganawu daafuridaba gidikko, kaamiyaa laaggana koshshenna. Qassi nuuni laaggiyo wode moobayliyaa goˈettana bessenna.

10. Qohiyaabati gakkanaappe kasenne gakkiyo wode waatana danddayiyoo?

¹⁰ Issi issitoo iitabay gakkennaadan nuuni teqqana danddayokko. Meretay gattiyo daafabay, ubbasaa gakkiya harggeenne olay nuna qohana danddayees. Gidikkonne, hegaa malabati nuna gakkiyo wode, nuussi danddayettida keenan nuna qohoy gakkennaadan baaxetana, qassi heeraappe kiyidi baanaadan nuussi odettiyaabatanne kawotettati nuussi yootiyo hara kaaletota azazettiyoogan qohuwaappe attana danddayoos. (Roo. 13:1, 5-7) Qohiyaabati qoppennan nuna gakkana danddayiyo gishshawu, daafabawu kasetidi giigettanaadan nuna maaddanawu kawotettati nuussi immiyo kaaletuwaa nuuni azazettana koshshees. Leemisuwawu, haattaa, moorettana danddayenna qumaa, qassi akkamuwan koyro maaduwawu koshshiyaabata giigissiyoogee maaddana danddayees.

11. Nuuni deˈiyo heeran asappe asaa oyqqiya harggee aakkikko nu ay oottana koshshii?

¹¹ Asappe asaa oyqqiya harggee nuuni deˈiyo heeran aakkikko waatana koshshii? Nu kushiyaa meecettiyoogaa, asaakko matattennaagaa, maskkiyaa wottiyoogaanne asaappe shaahettidi deˈiyoogaa mala, kawotettaa sunttati yootiyo kaaletota nuuni azazettana koshshees. Nuuni hegaadan oottiyo wode, Xoossay immido deˈuwaa imotaa keehi nashshiyoogaa bessoos.

12. Daafabay gakkiyo wode nuuni siyiyoobaa dooranaadan Leemiso 14:15n deˈiya maaray waati maaddana danddayii?

¹² Qoppibeennabay merettiyo wode nu laggetuppe woy nu shoorotuppe woy oduwaappe tuma gidennabaa issi issitoo siyana danddayoos. Nuuni siyido “ubbabaa” ammaniyoogaa aggidi, kawotettatinne dottoreti yootiyo tuma gididabaa siyana koshshees. (Leemiso 14:15 nabbaba.) Oosuwaa Kaalettiya Citaynne macara biiroti gubaaˈe shiiquwaanne sabbakiyo oosuwaara gayttidaagan kaaletuwaa yootanaappe kasetidi tuma gididabaa eranawu baaxetoosona. (Ibr. 13:17) Ha kaaletota kaalliyoogan nunakka haratakka qohuwaappe naagoos. Qassi harati Yihoowa Markkatubaa loˈˈobaa qoppanaadan maaddana danddayoos.—1 PHe. 2:12.

13. Suuttaa xeelliyaagan Yihooway kessido higgiyawu azazettiyo wode Xoossay immido deˈuwaa imotaa nashshiyoogaa waatidi bessana danddayiyoo?

¹³ Suuttay geeshsha gidiyoogaa Yihoowa Markkati ammaniyoogaa daro asay erees. Eesuwan akkamettanaadan oottiyaabay merettiyo wodekka, suuttaa goˈettennan aggiyoogan Yihooway suuttaa xeelliyaagan kessido higgiyawu azazettoos. (Oos. 15:28, 29) SHin hegaa giyoogee nuuni hayqqanawu koyoos giyoogaa gidenna. Nuuni Xoossay immido deˈuwaa imotaa nashshoos. Suuttaa goˈettennan loytti akkamanawu koyiya haakimeti nuna maaddanaadan koyoos.

14. Wolqqaama akkamuwaa akkamettanaadan oottiyaabaappe waanidi naagettana danddayiyoo?

¹⁴ Nuuni ha huuphe yohuwan tamaaridobata oottiyoogan nu payyatettaa naagikko, shuhettiyoogee woy hara wolqqaama akkamoy koshshennan aggana danddayees. Nuuni nu payyatettaa naagikko, shuhettiyo wodekka eesuwan paxana danddayoos. Sooninne ooso sohuwan qohoy gakkennaadan naagettiyoogan, qassi tiraafike higgiyawu minttidi azazettiyoogan qoppennan shuhettanaadan oottiyaabaappe naagettana danddayoos.

15. (a) Mata wode kunttido, akkamettiyo wodiyawu kaaletuwaa oyqqida karddiyaa oyqqiyoogee keehi koshshiyoy aybissee? (Misiliyaakka xeella.) (b) Biiduwan qonccidaagaadan, akkamuwawu suuttaa goˈettiyoogaara gayttidaagan eratettan waati kuuyana danddayiyoo?

¹⁵ Nuuni Xoossay immido deˈuwaa imotaa  nashshiyo gishshawu, akkamettiyo wodiyawu kaaletuwaa oyqqida karddiyaa kunttoosinne hegaa ubbatoo oyqqoos. b Suuttaaranne issi issi akkamuwaara gayttidaagan nu koyiyoobaa he karddee qonccissees. Akkamettiyo wodiyawu kaaletuwaa oyqqida ne karddee mata wodeegee? Neeni kunttanawu woy ooraxissanawu koshshikko, sohuwaara hegaa ootta. Nuuni akkamettanawu koyiyoobaa qonccissidi xaafiyooge, akkamuwaabaa dottoriyaara haasayiiddi daro wodiyaa wurssennan sohuwaara akkamettanaadan maaddees. Qassi hegee nuna qohiya akkamuwaa akkamettennaadan woy xaliyaa mittennaadankka maaddees. c

16. Akkamettiyo wodiyawu maaddiya kaaletuwaa oyqqida karddiyaa waati kunttanaakko erana xayikko ay oottana danddayiyoo?

¹⁶ Nuuni yelaga woy payya gidin aggin, nuna ubbaa daafabay gakkana danddayees woy sahettana danddayoos. (Era. 9:11) Hegaa gishshawu akkamettiyo wodiyawu kaaletuwaa oyqqida karddiyaa kunttiyoogee eratetta. Neeni he karddiyaa waata kunttanaakko erennaba gidikko, ne gubaaˈiyaa cimati maaddanaadan  oychcha. Ayssi giikko, he karddiyaa waati kunttiyaakko eti darotoo loytti eroosona. SHin akkamuwaara gayttidaagan nebaa eti kuuyokkona. Hegee ne aawatetta. (Gal. 6:4, 5) SHin neeni ne doorota akeekanaadaaninne akkamettanawu koyiyoobata xaafanaadan eti maaddana danddayoosona.

17. Nuuni nu payyatettaara gayttidaagan bessiyaagaadan qoppiyaageeta gidiyoogaa waatidi bessana danddayiyoo?

¹⁷ Payyatettaaranne akkamuwaara gayttidaagan nuuppe daroti Geeshsha Maxaafaappe tamaaridoogaa maaran kuuyoos. (Oos. 24:16; 1 Xim. 3:9) Nuuni akkamuwaara gayttidabaa kuuyiyo wodenne nuuni kuuyidobaa haratuyyo yootiyo wode, Piliphphisiyuusa 4:5y yootiyoobaa hassayana koshshees. “Asai ubbai intte ashkketettaa ero.” Nuuni bessiyaagaadan qoppikko ubbatoo nu payyatettaabawu hirggokko; qassi payyatettaara gayttidaagan harati nuugaadan kuuyanaadan oottanawu baaxetokko. Nu ishanttinne michchontti kuuyiyoobay nuugaappe dummatiyaaba gidikkokka, eta siiqoosinne bonchchoos.—Roo. 14:10-12.

18. Xoossay immido deˈuwaa imotaa nashshiyoogaa waatidi bessana danddayiyoo?

¹⁸ Nuuni nu deˈuwaa naagiyoogaaninne Yihoowawu haggaazanawu nuussi danddayettidabaa oottiyoogan, deˈuwawu Pultto gidida Yihoowa galatiyoogaa bessoos. (Ajj. 4:11) Nuuni ha wodiyan sahuwaanne hara metota genccana koshshees. SHin nuna Medhdhidaagee nuuni hagaadan deˈanaadan koyibeenna. Mata wode I sahuwaanne hayquwaa xayssidi merinaa deˈuwaa nuussi immana. (Ajj. 21:4) He wodee gakkanawu, paxa deˈidi, saluwan deˈiya nu siiqo Aawaa Yihoowawu haggaaziyoogee keehi ufayssiyaaba!