1. Ano kapresyoso kan Jehova an aton kinabuhi?

 IMADYINA nga may-ada ka sangkay nga naghatag ha imo hin daan na hinduro kondi marahalon gud nga painting—usa nga obramaestra. Medyo linubad na ito ngan may mga mantsa ngan gutak. Pero bisan pa han mga depekto, minilyon ka dolyar an kantidad hito nga painting. Sigurado nga aapresyaron ngan puprotektaran mo ito. Ha pariho nga paagi, hi Jehova naghatag ha aton hin presyoso nga regalo, an regalo nga kinabuhi. Ngani, iginpakita ni Jehova nga presyoso gud ha iya an aton kinabuhi pinaagi ha paghatag han iya Anak sugad nga lukat para ha aton.—Juan 3:16.

2. Sugad han iginpapakita ha 2 Corinto 7:1, ano an ginlalaoman ni Jehova ha aton?

² Hi Jehova an gintitikangan han kinabuhi. (Sal. 36:9) Ginkilala ni apostol Pablo ini nga kamatuoran han nagsiring hiya: “Pinaagi ha iya may kinabuhi kita ngan nagkikiwa ngan naeksister.” (Buh. 17:25, 28) Salit makakasiring kita nga an aton kinabuhi usa nga regalo tikang ha Dios. Tungod han gugma, igintatagana niya ha aton an aton ginkikinahanglan basi makapabilin nga buhi. (Buh. 14:15-17) Pero diri hi Jehova naghihimo hin mga milagro para tipigan an aton kinabuhi. Lugod, naglalaom hiya nga bubuhaton ta an aton pinakamaopay basi magpabilin nga mahimsog ngan padayon nga makag-alagad ha iya. (Basaha an 2 Corinto 7:1.) Kay ano nga dapat ta protektaran an aton kahimsog ngan kinabuhi, ngan paonan-o naton ito mahihimo?

3. Ano an usa nga rason kon kay ano nga angay kita mangalimbasog nga magpabilin nga mahimsog?

³ Usa nga rason kon kay ano nga angay kita mangalimbasog nga magpabilin nga mahimsog, basi makag-alagad kita kan Jehova  ha bug-os naton nga makakaya. (Mar. 12:30) Karuyag ta ipresentar an aton “lawas sugad nga halad nga buhi, baraan ngan kinakarawat han Dios,” salit ginlilikayan ta an pagbuhat hin mga butang nga maaram kita nga makakahatag ha aton hin sakit. (Roma 12:1) Syempre, limitado la an aton mahihimo basi makapabilin nga mahimsog. Pero ginbubuhat ta an aton mahihimo kay karuyag naton ipakita ha aton langitnon nga Amay nga gin-aapresyar ta an regalo nga kinabuhi.

4. Ano an karuyag buhaton ni Hadi David?

⁴ Iginsaysay ni Hadi David kon kay ano nga gin-aapresyar niya an regalo han Dios nga kinabuhi han nagsurat hiya: “Ano an kapulsanan han akon kamatayon, han akon pagkadto ha buho? Dadayawon ka ba han tapotapo? Magsusumat ba ito han imo pagkamatinumanon?” (Sal. 30:9) Posible nga iginsurat ito ni David han hirani na hiya mamatay. Pero determinado hiya nga magpabilin nga buhi ngan mahimsog tubtob nga posible basi madayaw niya hi Jehova. Sigurado nga ito liwat an determinasyon naton ngatanan.

5. Bisan kon lagas na gud kita o grabe an aton sakit, ano an aton mahihimo?

⁵ Tungod han sakit ngan kalagas, bangin diri ta na mahihimo an damu nga butang nga ginhihimo ta hadto. Salit bangin kita maaringit ngan masubo. Pero diri gud kita dapat mawad-an hin paglaom ngan pabay-an na la an aton kahimsog. Kay ano? Kay bisan kon lagas na gud kita o grabe an aton sakit, makakagdayaw la gihap kita kan Jehova, sugad han ginhimo ni Hadi David. Nakakaliaw gud hibaroan nga presyoso kita ha aton Dios bisan kon diri kita perpekto! (Mat. 10:29-31) Bisan kon mamatay kita, maghihingyap hiya nga banhawon kita. (Job 14:14, 15) Samtang buhi kita, karuyag ta buhaton an aton mahihimo basi protektaran an aton kahimsog ngan kinabuhi.

6. Ano an ginlalaoman ni Jehova ha aton may kalabotan ha pagkaon ngan pag-inom?

⁶ Bisan kon an Biblia diri usa nga libro mahitungod ha pag-ataman ha kahimsog o kon ano an kakaunon, iginsusumat hito an panhunahuna ni Jehova may kalabotan hini. Pananglitan, ginsasagdonan kita niya nga likayan an mga butang nga makakadaot ha aton lawas. (Ecles. 11:10) An pagin malamon ngan paghubog, nga pariho peligroso ha aton kinabuhi, ginkukondenar ha Biblia. (Prob. 23:20) Naglalaom hi Jehova nga magpapakita kita hin pagpugong ha kalugaringon kon nagdidesisyon kon ano an aton kakaunon ngan iinumon ngan kon ano kadamu.—1 Cor. 6:12; 9:25.

7. Paonan-o an sagdon nga mababasa ha Proberbios 2:11 nabulig ha aton nga makahimo hin mag-opay nga desisyon parte ha aton kahimsog?

⁷ Makakahimo kita hin mga desisyon nga nagpapakita nga gin-aapresyar ta gud an regalo han Dios nga kinabuhi pinaagi ha paggamit han aton abilidad ha paghunahuna. (Sal. 119:99, 100; basaha an Proberbios 2:11.) Pananglitan, ginpipili naton hin maopay an aton kakaunon. Kon naruruyagan ta an usa nga pagkaon pero maaram kita nga makakahatag ito ha aton hin sakit, ginsisiguro ta nga likayan ito. Ginpapakita ta liwat nga may maopay kita nga panhunahuna kon igo an aton katurog, regular kita nga nag-iehersisyo, ngan gintitipigan ta nga limpyo an aton lawas ngan balay.

8. Ano an igintututdo han Biblia mahitungod ha pagkaimportante kan Jehova han aton pagin talwas?

⁸ An Balaud ni Jehova ha nasud han Israel may mga instruksyon nga mabulig ha ira nga malikayan an grabe nga mga aksidente ha balay ngan ha trabaho. (Ex. 21:28, 29; Deut.  22:8) Kon an usa diri tinuyo nga nakamatay hin tawo, magkakaada maraot nga resulta. (Deut. 19:4, 5) Igin-obligar han Balaud nga sirotan bisan adton diri tinuyo nga nakahimo hin kadaot ha bata nga iginbuburod. (Ex. 21:22, 23) Ginkaklaro han Kasuratan nga karuyag ni Jehova nga magin mahunahunaon kita ha pagin talwas.

9. Ano an puydi ta buhaton basi malikayan an mga aksidente? (Kitaa liwat an mga piktyur.)

⁹ Iginpapakita ta an aton apresasyon ha regalo han Dios nga kinabuhi pinaagi ha pangalimbasog nga magin talwas ha balay ngan ha trabaho. Pananglitan, kon naglalabog kita hin matarom o matais nga mga butang, nakakahilo nga mga kemikal, o medisina, ginbubuhat ta ito ha paagi nga diri makakadaot ha iba, ngan ginsisiguro ta nga diri ito maaabot han kabataan. Naghihirot kita kon naghaharing, naglalaso, ngan nagamit hin de-koryente nga tools, ngan diri ta ito ginpapabay-an nga waray nagbabantay. Diri kita nagdadrayb kon an aton hunahuna apektado han medisina, makahurubog nga irimnon, o kakulang hin katurog, ngan diri kita nagamit hin gadyet kon nagdadrayb.

10. Ano an aton mahihimo antes ngan ha panahon han usa nga makamaratay nga kalamidad?

¹⁰ May mga panahon nga diri naton mapupugngan an delikado nga mga panhitabo. Tinuod gud ini ha mga kalamidad, epidemya, ngan kasamok. Pero kon nagkakaada sugad nga mga panhitabo, puydi naton maibanan an mga peligro ngan madugangan an posibilidad nga makatalwas kita pinaagi ha pagsunod ha curfew, mga sugo ha pag-ebakwit, ngan iba pa nga instruksyon han gobyerno. (Roma 13:1, 5-7) May mga emergency nga mapapangandaman hin abanse, salit maopay nga mamati kita ha mga instruksyon han mga awtoridad ha aton lugar basi mabuligan kita nga magin andam hito. Pananglitan, bangin praktikal an pag-istak hin tubig ngan pagkaon nga diri nagpapan-os ngan pagkaada first-aid kit.

11. Ano an dapat ta buhaton kon may nakakatapon nga sakit nga nagsasarang ha aton lugar?

¹¹ Ano an dapat ta buhaton kon may nakakatapon nga sakit nga nagsasarang ha aton lugar? Dapat ta sundon an mga regulasyon han gobyerno, sugad hadton may kalabotan ha paghunaw, social distancing, pag-mask, ngan pag-quarantine. Kon ginbubuhat ta ini, iginpapakita naton nga gin-aapresyar ta gud an regalo han Dios nga kinabuhi.

12. Paonan-o an prinsipyo nga mababasa ha Proberbios 14:15 nabulig ha aton ha pagpili han impormasyon nga aton tutuuron kon may kalamidad?

¹² Kon may mga emergency, bangin makabati kita hin sayop nga mga impormasyon tikang ha aton kasangkayan, ha mga amyaw, ngan ha mga balita. Imbes nga tumoo ha “tagsa nga pulong” nga aton nababatian, maopay nga mamati kita ha pinakamasasarigan nga mga impormasyon tikang ha gobyerno ngan mga doktor. (Basaha an Proberbios 14:15.) Ginbubuhat han Nagmamando nga Lawas ngan han mga sanga nga opisina an tanan nga ira mahihimo basi makakuha hin tama nga impormasyon antes maghatag hin instruksyon may kalabotan ha mga katirok ngan ha pagsangyaw nga buruhaton. (Heb. 13:17) Pinaagi ha pagin masinugtanon, napuprotektaran ta an aton kalugaringon ngan an iba tikang ha kadaot. Makakabulig liwat kita nga magkaada maopay nga reputasyon an kongregasyon ha komunidad.—1 Ped. 2:12.

13. Kon may isyu may kalabotan ha dugo, paonan-o ta iginpapakita nga gin-aapresyar naton an regalo han Dios nga kinabuhi?

¹³ An mga Saksi ni Jehova kilala gud nga narespeto ha pagin sagrado han dugo. Ginsusugot naton an balaud ni Jehova may kalabotan ha dugo pinaagi ha pagdumiri nga magpaabuno hin dugo, bisan ha panahon nga may medical emergency. (Buh. 15:28, 29) Pero diri ito nagpapasabot nga karuyag naton mamatay. Lugod, gin-aapresyar naton an regalo han Dios nga kinabuhi. Nagpapabulig kita ha mga doktor nga andam maghatag hin de-kalidad nga pagtambal nga diri nag-uupod hin pag-abuno hin dugo.

14. Paonan-o ta maiibanan an posibilidad nga magkinahanglan hin pag-opera o iba nga sensitibo nga paagi han pagtambal?

¹⁴ Maiibanan ta an posibilidad nga magkinahanglan hin pag-opera o iba nga sensitibo nga paagi han pagtambal kon susundon ta an mga suhestyon nga gin-unabi na dinhi hini nga artikulo. Kon mas mahimsog kita, mas madali kita makarekober kon maoperahan kita. Maiibanan ta liwat an posibilidad nga magkinahanglan hin emergency nga pag-opera kon titipigan ta nga talwas an aton balay ngan lugar han trabaho ngan kon susundon ta gud an mga balaud ha trapiko.

15. (a) Kay ano nga importante nga may dara-dara kita nga updated nga durable power of attorney? (Kitaa liwat an piktyur.) (b) Sugad han makikita ha video, paonan-o kita makakadesisyon base ha kahibaro parte ha paggamit han dugo ha pagtambal?

 ¹⁵ Tungod kay gin-aapresyar ta an regalo nga kinabuhi, nagpipil-ap kita hin durable power of attorney (advance health-care directive) ngan gindadara-dara ito pirme. b Pinaagi hini nga dokumento, iginsusumat ta an aton karuyag parte ha pag-abuno hin dugo ngan ha pipira nga paagi han pagtambal. Updated ba an imo durable power of attorney? Kon kinahanglan mo ito pil-apan o i-update, ayaw paglangan. An pagsurat ha usa nga dokumento kon ano an aton mga karuyag mabulig basi malikayan an diri kinahanglanon nga mga paglangan ha pagtambal ha aton. Masisiguro liwat naton nga diri kita makakakarawat hin pagtambal o medisina nga makakadaot ha aton. c

16. Ano an puydi ta buhaton kon diri kita sigurado kon paonan-o pipil-apan an durable power of attorney?

¹⁶ Batan-on man kita o mahimsog, kita ngatanan may posibilidad nga maaksidente o magkasakit. (Ecles. 9:11) Salit maaramon gud nga magpil-ap hin durable power of attorney.  Kon diri ka sigurado kon paonan-o pipil-apan ini nga dokumento, pagpabulig ha mga tigurang ha iyo kongregasyon. Nangangalimbasog hira nga mahibaro kon paonan-o ito pipil-apan, pero diri hira magdidesisyon para ha imo may kalabotan ha pagpatambal. Imo ito responsabilidad. (Gal. 6:4, 5) Pero mabubuligan ka nira nga masabtan an imo mga opsyon ngan maisurat ha dokumento an imo karuyag.

17. Paonan-o ta maipapakita nga makatadunganon kita may kalabotan ha kahimsog ngan pagpatambal?

¹⁷ Damu han aton mga desisyon may kalabotan ha aton kahimsog ngan ha pagpatambal an nakabase ha aton konsensya nga binansay ha Biblia. (Buh. 24:16; 1 Tim. 3:9) Kon nagdidesisyon kita ngan iginpapakiistorya ito ha iba, maopay nga sundon ta an prinsipyo nga nakarekord ha Filipos 4:5: “Ipakita ha ngatanan nga tawo an iyo pagkamakatadunganon.” Kon makatadunganon kita, diri kita sobra nga nababaraka ha aton pisikal nga kahimsog; diri liwat naton ginpipresyur an iba nga subaron an aton panhunahuna. Hinigugma ngan ginrirespeto ta an aton kabugtoan, bisan kon an ira mga desisyon iba kay han aton.—Roma 14:10-12.

18. Paonan-o ta maipapakita an aton pagin mapasalamaton ha regalo nga kinabuhi?

¹⁸ Iginpapakita ta an aton pagin mapasalamaton kan Jehova, an gintitikangan han kinabuhi, pinaagi ha pagprotektar han aton kinabuhi ngan paghatag ha iya han aton pinakamaopay. (Pah. 4:11) Ha pagkayana, nagkakasakit kita ngan nakakaeksperyensya hin mga kalamidad. Pero diri ini an kinabuhi nga katuyoan han aton Maglalarang para ha aton. Diri na maiha, tatagan kita niya hin kinabuhi nga waray kataposan nga waray kasakit ngan kamatayon. (Pah. 21:4) Mentras diri pa ito naabot, makalilipay an pagin buhi ngan an pag-alagad ha aton mahigugmaon nga Amay ha langit, hi Jehova!