1. Kenem kol meimen, Johova dungola wal kerma nalmal paim?

 YU EKIN ende enamen, senon ye ende kombe piksa ende peint—tonjip, tu nim ngonom. Peint tom ye bunuman ka konganem ere, ambil kawei er erim. Ba pi pende kala wukrom, nomnim pende kes meim. Nim kanen pende kes meim, ba, topum kerma wei paim, kuboram millien sinam, embe pile kantawol kawei endel. Embe ding mal, Johova kolmem ngom e, wal kawei ende, kenem kantawol ka enamen. Kenem yu weieri ninamen, kolmem Johova dungola wal kerma wei pa, mal wal porpor ngonom.—Jon 3:16.

2. 2 Korin 7:1 dom, Johova kenem nal enamen nepisem?

² Kenem kol meimen Johova olom Mem. (Sng. 36:9) Aposol Pol pilkane ere, embe nim: “Olom wusngam a kenem kolmem sinjin, ala kolwane nomolpa esmen.” (Apo 17:25, 28) Kenem kol meimen mem wal kawei ende, Johova ngom. Ala kunum kunum kanka mem tane, nomolpa esmen bar wal sino kol moramen ngonom eri. (Apo 14:15-17) Ba, Johova kenem kolmem jep wusngam a kantawol nanem. Kenem kenem enamen panda wal ere, pilgi wal na nganj wal kantawol ka enamen ne pisem. (2 Korin 7:1 gere.) Nalende kenem kolmem kantawol enamen, ala nalmal embe enamen?

3. Nalmem ende pande, kenem keswos sinamen ne, kanpol tonamen?

³ Mem ende pande kenem keswos si ninamen, kanpol tonamen nalenem, dongal molo Johova kongnem kawei enamen ne pismen. (Mak 12:30) “Kenem kuru molo, kol meimen mem opa mal, ngopo Got kapisa,” embe pile, kenem nganj to kes moklo, kes ngonda wal tuironamen. (Rom 12:1) Kenem kes nasinamen paninamen kaple nanem. Ba, enamen panda wal ere, kolmem wal kawei ngom kantawol ka erpe, Danjen min epen meim kapisa.

4. King Devit nal enal pim?

⁴ King Devit kenem kolmem Got wal ka ende ngom bar, kapil embe nim: “Na gond dal nawal ka min wonda? Na se kipkua pundal, namal pakeronal? Mal kulman nim kangem ambel, min kera kaple enem mo? Ala nim olom bol mambnem ka erin pane, yu bol tonda mo?” (Sng. 30:9) Devit goram mand erim kunum yu e, bora bom. Ba olom kolnga kanan molo, Johova konganem  ere, kangem ambil min keral nepisa pim. Kenem porpor embe ding mal pismen.   

5. Kenem tuwa wei moramen mo, keswos tonda, ba nawal enamen kaple enem?

⁵ Tuwa sinamen mo kes tonda kunum, kongan puli komna ere ere enjin mal, enamen kaple nanda. Wal embe min wonda kunum, kenem bunuman puli kele kes pisamen. Ba enamen panda wal ere, kenem kenem kantawol ka enamen. Nalende embe enamen? King Devit erim mal, kenem kes tonda, tuwa senamen, ba, Johova kangem anjngo ambil min keramen. Ombun embe kenem bol min wonda, ba, Johova dungola wal kawei wei ende meimen! (Mat. 10:29-31) Embe pile, gonjip dal, olom kenem si aksa. (Jop 14:14, 15) Kenem kol meimen mem kapaim pile, enamen panda wal ere, kenem kenem kantawol ka enamen.

6. Kenem mokun na nol nomon bar, Johova nawal kanpol ronamen nepisem?

⁶ Baibel e ausik buk ma, ala mokun aka ka gal nodol mal, nadom ba, buk e Johova wal e, bol nal nepisem mal neori kerem. Ba, kenem pakeronda yu ka ende dom e, kenem “nganj tokes moksa wal,” kanpolro tuiroya dom. (Ekl. 11:10) Baibel dom kenem mokun puli no, nol puli no sipak enjin dal, kenem er kes enda, mo to gora eri pandom. (Prov. 23:20) Kenem mokun na nol nonamen bar, omuk karonamen ne Johova pisem.—1 Kor. 6:12; 9:25.   

7. Pilsinamen yu Provep 2:11 a paim, kenem nalmal pakerondo, kes sinamen bar, kanpolto tuironamen?

⁷ Kenem bunuman kongnem ka enjin dal, Got kolmem wal ka, kenem ngom kapismen bar, sangiyo nimen mem taninamen. (Sng. 119:99, 100; Provep 2:11 gere.) Ende embe mal, mokun aka nonamen bar omuk karonamen. Mokun ende kapisamen, ba kes ngonda pam dal, tuiro sikeramen. Ala wal pende enamen, wur kapanamen, nganj dongal panda wal enamen, mokun aka, ka sinamen ala garjen mande erkelpe ka senda eri.

8. Baibel duwom erngondo kanmen, Johova, ombun tuiro buning moramen kapisem, nalende e, wal kerma paim?

⁸ Johova komna Israel ga Lo ngom bar, enjep kongan dumam mo gara moram, ombun kerma min wonda bar, wal pende ere, tuironam mal nengom. (Kis. 21:28, 29; Lo 22:8) Ala wal ende, alamb ende to goral ne napisa ba, je mo kongan wal ende wokro pu to gom dal, ombun kerma min wonda panim. (Lo 19:4, 5) Ala Lo ende ngom, amb ngal kumbol a mora to gonjip dal, kot sinam eri panim. (Kis. 21:22, 23) Baibel yu embe dom bar, kenem pilkane esmen Johova kenem kolmem kantawol ka enamen nepisem.   

9. Kenem nawal pende erpe, pakerondo ombun min nawonda?

⁹ Kenem kongan dumam a mo gara, kolmem Johova wal kawei ende ngom ne, kapismen taninamen, ombun min wonda bar wal pende ere tuironamen.  Pende embe mal, je, kapor mo mulmora wal sip wasem a keramen, ala ngal mo alamb no goram marasin ende mora, nakan sino ninam sip okul enamen. Ala kenem dop garamen, nol garamen mo pawa konganem enjin dal, wal nero mokol pu nasepnamen, ende ombun sinam. Ala wal ende kenem kes tondo, marasin sinamen, nolbia ende sinamen, wur kanapamen, mo mobal pon a yu ninjin dal, kar naambramen. Nalenem wal embe mal, kenem ombun ngonda kanpol tonamen.   

10. Ombun kerma ende nawonda kunum yero, na wonda kunum, kenem nal enamen?

¹⁰ Kunum pende ne nolmal bo, kes kerma ende, mo opnganmal ende min wonda, kenem kol tungnamen-kaple nanem. Ba gapman wal pende yero erkun eya ninam, mo meimen bar, alamb ninam yu pile karkar enamen bar, ombun wonda tuironamen. (Rom 13:1, 5-7) Pende embe mal, marasin, nol, mo kanan senda mokun yero erkun ere se, monjip dal, ombun wonda kunum kenem pakeronda.

11. Alamb ende bol tapronamen bar, onom mal sinamen kes kerma, ende min wonda kunum, kenem nal enamen?

¹¹ Onom mal sinamen kes ende, kenem meimen bar, min wom dal, nal enamen? Pilsamen yu ninam karkar ka enamen, e, embe mal, ende bol murlmarel ne moramen, ngumb boki ronamen, angel was kunum kunum enamen, ala kes tonda alamb bol kolbar moramen. Embe enamen bar, Johova kenem kolmen wal kawei ende ngom, sangiyo ne kawei pismen taninamen.

12. Provep 14:15 kolta yu paim, kenem pakerondo ombun min wonda kunum, namal yu pile karkar enamen?

¹² Ombun kerma ende min wonom kunum, senomon alamb meimen bar mand meim alamb, mo redio na TV a yu gend puli nim. Embe pile, kenem ausik kongan alamb na gapman yu ninam pilgi ne,“yu porpor” naninamen. (Provep 14:15 gere.) Ombun kerma ende min wonom kunum, Gapening Bodi na brens opis porpor ombol ere, yu weieri ninambe, kenem kongrikesen make pumon bar, na Baibel yu neori kesmen bar karkar enamen ne esim. (Hib. 13:17) Yu nim pilsi karkar esmen kunum, kenem kenem pakeromon, alamb ende pakeromon, ala kongrikeisen kangem ka sinem eri.—1 Pita 2:12.

13. Johova maiyam nasinya ne lo, ngom karkar esmen bar, kolmem wal ka ende ngom kapismen, nalmal tanimen?

¹³ Johova Witnis maiyam ga, wal kerma wei kuru paim ne pilgi nim, alamb puli pilkane esim. Kenem Johova lo karkar ere, jipkar tonom mo, kes kerma ende tonom kunum, ausik gar pu maiyam nasinamen mapanimen. (Apo 15:28, 29) E, kenem goramen ne pile nanimen, kolmem Got wal ka ende ngom, nepil ninmen. Dokta ende sape kerma pande, maiyam konganem nanem alamb, pakeronda nepisem.

14. Kenem nalmal ere, kes na ombun kerma tuiro, ausik gar pupo, nakopusnam?

¹⁴ Kenem wal enamen mal paragrap yero pende yu boltojin, karkar enjin dal, ombun kerma ende si ausik gar pupo, nakopusnam. Ala wal pende ere,  ombun tuironamen e, garjen kol, kongan dumam mo kar ambramen lo paim mal karkar enjin dal, ombun tuironamen.   

15. Nalende kenem maiyam kat kunum kunum, siwanamen wal kerma paim?

¹⁵ Nalenem kenem kolmem wal kerma paim, (advance health-care directive) mo maiyam kat kangem bolo kunum kunum siwanmen. b Kenem maiyam nasinamen pane kat a bol moksamen yu, maiyam nasinamen panimen yu tane penema kera. Embe pile, nim pi kat ende siwanen mo, mapam dal, ende bol pakle kunum kunum siwanjel. Embe erin dal, pakerondo nim kes kerma ende tondo dokta kin yu puli naninam pake kamkam ronam. Ala kin dokta walem ne ngopo, nim erkes enda marasin nangonam. c

16. Kenem maiyam kat a yu boramen mal, kanpol narojin dal, nal enamen?

¹⁶ Nim alamb gal morol keswos nganj a napanda, ba pilkane endel ombun kenem porpor bol min wonda eri. (Ekl. 9:11) Embe pile, maiyam kat bol pakle siwanjin  dal, bunuman ka karkar esmen. Nim yu borol mal kanpolnaron dal, pu elda wal ni pakeronam, ba nimnem bunuman panda mal karkar endel, enjep nim yu embe embe bol a naninam. (Gal. 6:4, 5) Nim pakeronambe nimnem bunuman paim mal, maiyam kat a bol mene kerel.

17. Kenem keswos tonda kunum, bunuman ka, karkar esmen nalmal taninamen?

¹⁷ Kenem puli ombun wondo ausik gar pumon kunum, Baibel yu wei duwom erkenjin kumbol a na, bunuman meim pile, kumbol yu dom mal karkar esmen. (Apo 24:16; 1 Tim. 3:9) Kenem wal enamen mal ende bol, yu nimen kunum, kolta yu Filipai 4:5 a paim karkar esmen, yu ele paim embe dom: “Alamb poro pilkane enam, enem bunuman ka karkar esim, embe paim ba, kenem bunuman paim mal, alamb porpor kes tonda kunum, karkar enam pananinamen.” Kunum pende ne, pilgi ding angjen ambajen kenem wal omukromon mal naro, jel mal ronam, ba enjep kanka kanmen mem waknaromen.—Rom 14:10-12.

18. Kenem kolmem Johova wal ende ngom bar, sangiyo ne kapismen nalmal taninamen?

¹⁸ Kenem kolmem kantawol ka ere, Johova konganem kumbol ngo esmen bar, kolmem ngom bar, kapil sangiyo nimen tanimen. (Rev. 4:11) Yipe keswos na ombun duwom kanem kanem wondo kaumon, ba kenem Ersem ye kol meimen bar, embe moramen ne narim. Embe pile, mand wei enem, nganj ngimbil si gosmon mem porninde Johova  kolmem ngondo kunum kunum kapil molo punamen. (Rev. 21:4) Yipe kunum ipal eri, kol meimen, Danjen Johova kanka mem sem ye min epen meim, konganem  kumbol na bunuman pal ngo enamen!