1. მუსხით ძვირფას რე იეჰოვაშო ჩქინ სიცოცხლე?

 ᲬᲔᲠᲛᲘᲓᲒᲘᲜᲘᲗ, ნამდა მეგობარქ მანგარ ძვირფას, ჯვეშ ნახანტა გაჩუქეს. თინა თაშ ქოფთქუათინ, შედევრ რე. მართალ რე, ექი-აქო მუდგარენეფ გიოხე, დაზიანებეფ უღჷ, გონკწირილ დო ჭიჭე ფერმორთელ ხოლო რე, მარა თე ირფელიშ უმკუჯინუო, თიშ ფას მილიონობით დოლარ რე. მუშო ოკო რაგად, ირნერო მუთხილუანდითკონ იჸიდ თე ნახანტას. თეშნერო, იეჰოვაქ მაჩუქეს ძვირფას საჩუქარ — სიცოცხლე. არგამა რე, თიშო სიცოცხლე მანგარ ძვირფას რე, მუთ თით ოძირუ, ნამდა მუშ საჸოროფო სქუა გაწირ ჩქინო (იოან. 3:16).

2. მუჭოთ 2 კორინთელეფიშ 7:1-შე იძირე, მუს ელჷ იეჰოვა ჩქინდე?

² იეჰოვა რე სიცოცხლეშ მუმაჩამალ (ფსალმ. 36:9). მოციქულ პავლეს ხოლო ჯგირო არჩქილედ თენა დო თეცალ სიტყვეფ თქუ: „თიშით ვარსებენთ, ფცოცხლენთ დო გილურთ“ (საქ. 17:25, 28). ათეშენ, თამამას შემლებნა თიშ რაგად, ნამდა ჩქინ სიცოცხლე ძვირფას ძღვინ რე ღორონთშე. იეჰოვა ჸოროფათ მარზენა თი ირფელს, მუთ სიცოცხლეშო მოსაჭირნა (საქ. 14:15—17). მარა სიცოცხლე ვა ვოდინუათინ თიშენ სასწაულეფს ვართ. თეშ გინაწონს, ჩქინდე ელჷ, მუთ შემლებნა ირფელ გუაკეთათ, ნამდა ქიმკვოჯინათ ჩქინ ფიზიკურ დო სულიერ ჯამრთელობას (წეკითხით 2 კორინთელეფიშ 7:1). მუშენ ოკო მიკვოჯინათ ჩქინ ჯამრთელობა დო სიცოცხლეს, დო მუჭო შემლებნა თეშ კეთება?

3. ნამ მიზეზიშ გურშენ ვოცადუთ, მუთხილუათ ჯამრთელობას?

³ ართ-ართ მიზეზ, მუდგაშ გურშენ ვოცადუთ, მუთხილუათ ჩქინ ჯამრთელობასინ თინა რე, ნამდა შემალებუან უმოს ვაკეთათ  იეჰოვაშო (მარ. 12:30). ჩქი დუდის ეუჩილითუანთ თი ირფელს, მუთ მიჩქნა, ნამდა ეცილებ ჩქინ ჯამრთელობას, მუშენდა ღორონთის მეუძღვინათ „სხეულეფ ცოცხალ, წმინდა, თიშო მოსაწონ მსხვერპლო“ (რომ. 12:1). მუშო ოკო რაგად, მუდგა ვა ვაკეთათინ, ვა მიღნა თიშ გარანტია, ნამდა ვედებლახებუთ, მარა მოკონა ირფელ გუვაკეთათ, ნამდა მუთხილუათ ჩქინ ჯამრთელობას დო თეშნერო ქუვოძირათ ჩქინ ზეციერ მუმას, ნამდა ვაფასენთ თიშე მოჩამილ სიცოცხლეშ ძღვინს.

4. მუ ოკოდ მეფე დავითის?

⁴ მეფე დავითიქ ჯგირო ენწყჷ, მუშენ აფასენდჷ ღორონთიშ მოჩამილ სიცოცხლეს. თიქ ჭარჷ: „მუ ჯგირობუას მიღანს, დობღურუქ დო სასაფლაშა გენურქ-და?! შეიალებენო ტვერს სქან განდიდება?! ქარაგადენო თის სქან ართგურობაშენ?!“ (ფსალმ. 30:9). შილებე დავითიქ თე სიტყვეფ თიმწკუმა ჭარჷ, მუჟამსით ღურაშ კარს გერდჷ. მარა თინა ირნერო ოცადუდ, მუთხილუკო მუშ დუდის დო ბრელ ხანს იცოცხლუკო, ნამდა შეიალებუკო იეჰოვაშ განდიდებაქ. მუშო ოკო რაგად, დავითცალო არძას მოკონა, იფცოცხლათ დო იეჰოვა განვადიდათ.

5. მუშ კეთება შემლებნა სირჩინუეშ დო ლახალაშ უმკუჯინუო?

⁵ ლახალა დო სირჩინუეშ გურშენ შილებე ბრელ თიცალ მუდგარენ ვა მაკეთებედან, მუდგას ულირს ვორთუდით. თეშ გურშენ შილებე გურგოტახილ დო მოწყინაფილ ვორდათ. მარა თეს დღას ოკო ვემუდვათ დუდ დო ირფელ გუვაკეთათ, ნამდა მუთხილუათ ჩქინ ჯამრთელობას. მუშენ ოკო მიფქცუათ თაშ? მუშენდა ვა უღჷ მნიშვნელობა, მუსხი წანერ ვორეთ ვარდა მუ ლახალას ვობრძოლუთ, ჩქი შემლებნა იშენით განვადიდათ იეჰოვა, მუჭოთ თენა მეფე დავითიქ აკეთ. გურშა ელამკინანა თიშ რჩქინა, ნამდა ჩქინ ღორონთშო ძვირფასეფ ვორეთ თიმწკუმა ხოლო, მუჟამსით ასაკშა მიშურთ ვარდა ლახალას ვობრძოლუთ (მათ. 10:29—31). ვართ ღურას აცილებე ჩქინდა, მუშენდა იეჰოვას შეულებ ჩქინ გათელება (იობ. 14:14, 15). ათეშენ, ონდო ცოცხალ ვორეთ, მუთხილუათ ჩქინ ჯამრთელობას დო სიცოცხლეს.

6. მუს ელჷ იეჰოვა ჩქინდე ოჭკუმალ დო ოშუმალწკუმა დაკავშირებით?

⁶ მუშო ოკო რაგად, ბიბლია ვართ სამედიცინო დო ვართ თიცალ წიგნ რე, სოდეთ მოჩამილ რე, მუ ოკო ბჭკუმათ დო მუ ვარ, მარა თევრეშე ბგებულენთ იეჰოვაშ დამოკიდებულებას თე საკითხწკუმა დაკავშირებით. მაგალთო, თინა ელამჩანა, ნამდა ჩეფთხინუათ თი ირფელ, „მუთ სხეულს აზიანენს“ (ეკლ. 11:10). ბიბლიაშე ბგებულენთ, ნამდა უზომე ჭკუმუას დო გინოჸუნელ შუმას შეულებ დუმოლახუან დო ღურაშახ ხოლო ქიმემჸონან (იგავ. 23:20). იეჰოვა ჩქინდე ელჷ, ნამდა გუვაკონტროლენთ დუდის, მუჟამსით გინობჭყვიდუნთ, მუ დო მუსხი ბჭკუმათ დო ფშვათ (1 კორ. 6:12; 9:25).

7. მუჭო მოხვარნა იგავეფიშ 2:11-ის მოჩამილ რჩევა, მიბღათ სწორ გადაწყვეტილებეფ ჯამრთელობაწკუმა დაკავშირებით?

⁷ სწორას აზროვნებაშ ჭყოლოფათ შემლებნა მიბღათ თიცალ გადაწყვეტილებეფ, მუთ ოძირანს, ნამდა ვაფასენთ ღოროთნიშ ძღვინს — სიცოცხლეს (ფსალმ. 119:99, 100; წეკითხით იგავეფიშ 2:11). თე უნარ თიმწკუმა ხოლო მოსაჭირნა, მუჟამსით გინობჭყვიდუნთ, მუ ბჭკუმათ. მაგალთო, შილებე მიჸორა თიცალ ოჭკუმალ, მუთ ჩქინ ჯამრთელობას ოცილ. თე დროს სწორას აზროვნებაშ უნარ მიმეხვარებნა, ვარია ქოფთქუათ თე ოჭკუმალშე. სწორ აზროვნება მიღნან თის თიმწკუმა ხოლო ვოძირანთ, მუჟამსით ჯგირო გიმიბრულუანთ, რეგულარულო ვაბრჯიშენთ, იფცვენთ პირად ჰიგიენას დო ჸუდეს ხოლო სისუფთავე მიღნა.

8. მუჭოთ ბიბლიაშე იძირე, მუსხით მნიშვნელოვან რე იეჰოვაშო ჩქინ უსაფრთხოება?

⁸ ისრაელეფშა მეჩამილ იეჰოვაშ კანონს მიშეშ თიცალ მითითებეფ, მუთ ოხვარუდ ისრაელეფს, ეიჩილითუესკო უბედურ შემთხვევეფ, იჸუაფუდ თენა ჸუდეს დოვარ მუშობაშ დროს (გამ. 21:28, 29; კან. 22:8). მაგალთო,  მიდგაინს შემთხვევით კოჩ ქაღურუდ-და, თენა დუმაშებელს გლახა შედეგის ქუმუღანდჷ (კან. 19:4, 5). კანონს თინა ხოლო ჭარუდ, ნამდა მიდგაინ დიო დაბადებულ ვა რდუნ ფერ ბაღანას ზიანს ქიმიორინუანდ-და, ოკო დესაჯკო (გამ. 21:22, 23). ბიბლიაშე არგამათ იძირე, იეჰოვას ოკო, ირფელ გუვაკეთათ, ნამდა ეიფჩილითუათ უბედურ შემთხვევეფ.

9. მუ ოკო ვაკეთათ, ნამდა დუდ ეუჩილითუათ უბედურ შემთხვევეფს? (ქოძირით სურათეფ).

⁹ მუჟამსით ჸუდეს დოვარ სამუშას უსაფრთხოებას იფცვენთ, თეთ ვოძირანთ, ნამდა ვაფასენთ ღორონთშე მოჩამილ სიცოცხლეს. მაგალთო, ჭკირუნსინ ფერ ნივთეფ, წამალეფ ვარდა ქიმიკატეფ გინარღვაფალ ქუმაფნან-და, თენა თეშ ოკო ვაკეთათ, ნამდა მითინ ვა დუვაზიანათ. თეს გეძინელ, ოკო დებრწმუნათ, ნამდა თეცალ ნივთეფ, ბაღანეფ ვემიოგორუანან ფერ ადგილს მიძნა. ფრთხილას ვორეთ თიმწკუმა ხოლო, მუჟამსით დაჩხირს ეკვორზანთ, წყარს ვოფუნუანთ დო ომუშებელ ხელსაწყოეფს იბრინუანთ. ჩქი უყურადღებოთ ვებტენთ თინეფს. ხვალე თენა ვარინ, მანქანა ვეგლაპუნა, მუჟამსით თიცალ წამალ მაფნა შუმილ, მუდგაშ გურშენ დუდის სუსტას ბგინაფლენთ დო ვართ ხოლო თიმწკუმა, მუჟამსით ლურ მორკუნა ვარდა ელნაშუმა ვორეთ. თეს გეძინელ, ვართ ტელეფონ მიკებნა ხეს, მუჟამსით მანქანა მეპჸუნა.

10. მუშ კეთება შემლებნა საგანგებო სიტუაციეფიშ დროს დო მუჭო შემლებნა წინასწარ მივემზადათ?

¹⁰ მინშა დუდ ვემაჩილითენა თიცალ სიტუაციეფშა, მუდგაქ შილებე ჩქინ სიცოცხლე საფრთხეშ თუდო ქიგიორინუას. მაგალთო, თექ შილებე მოხვადას სტიქიურ უბედრობეფიშ, ეპიდემიეფიშ დო შეიარაღებულ თავდასხმეფიშ დროს. მუჟამსით თეცალ მუდგარენეფ ქუმოხვადუ, მუთ შემლებნან ირფელ ოკო გუვაკეთათ, ნამდა დიფთხილუათ დუდ დო ვორდათ უსაფრთხოთ. თეშ კეთება შემლებნა თი რეგულაციეფიშ მეჸუნათ, მუდგას ადგილობრივ ხელისუფლება გინოჭყვიდუნს. მაგალთო: კომენდანტიშ საათ, სავალდებულო ევაკუაცია დო საგანგებო შეზღუდვეფ (რომ. 13:1, 5—7). ნამთინე თეცალ სიტუაციაშო შემლებნა წინასწარ ხოლო მივემზადათ. ათეშენ ჯგირ იჸუაფ, მივაჸუნათ ადგილობრივ ხელისუფლებაშ მითითებეფს. მაგალთო, ჯგირ იჸუაფ, მიღდან წყარიშ დო მალას ვეგლელებუნ ფერ ოჭკუმალიშ მარაგ, თეს გეძინელ პირველად დახმარებაშ ნივთეფ.

11. მუ ოკო ვაკეთათ, მუჟამსით ჩქინ ტერიტორიას გინმადვალუნ ფერ ლახალა გევრცელებ?

¹¹ მუ ოკო ვაკეთათ, მუჟამსით თი ტერიტორიას სოდეთ ფცხოვრენთ, გევრცელებ გინმადვალუნ ფერ ლახალა. თე დროს, ოკო დევემორჩილათ ადგილობრივ ხელისუფლებაშ მითითებეფს, მუნერით რე: ხეშ მალა-მალას ბონუა, სოციალურ დისტანცია, პირბადეშ კეთება დო კარანტინ. თე მითითებეფიშ მეჸუნათ ვოძირანთ, ნამდა ვაფასენთ ღორონთიშ ძღვინ სიცოცხლეს.

12. მუჭო მოხვარნა იგავეფიშ 14:15-ის ინოჭარილ პრინციპ თიშ გინოჭყვიდუას, ნამ ინფორმაციას ვენდათ საგანგებო სიტუაციეფიშ დროს?

¹² საგანგებო სიტუაციეფიშ დროს, შილებე ხშირას მიფრჩქილუათ არასწორ ინფორმაცია მეგობრეფშე, ხოლოშიანეფშე დო სოციალურ მედიაშე. თიშ მანგიორო, ნამდა „არძა სიტყვაშ“ დებჯერათ, უჯგჷ თინეფს მურჩქილუათ, მით თე საკითხის უმოს სანდო ინფორმაციას ქომჩანა. მაგალთო, ადგილობრივ ხელისუფლება დო ექიმეფ (წეკითხით იგავეფიშ 14:15). ხემძღვანელ საბჭო დო ადგილობრივ ფილიალეფ ხოლო ონდო კრებაშ შეხვალამა დო მსახურებაწკუმა დაკავშირებით კონკრეტულ მითითებეფს მუჩანდან, ირნერო ოცადნა უღდან ზუსტ ინფორმაცია (ებრ. 13:17). მუჟამსით ორგანიზაციაშე მეღებულ ხემძღვანელობას მეპჸუნთ, თეშნერო ფთხილანთ, მუჭოთ ჩქინ დუდის, თეშ შხვეფს ხოლო. ხვალე თენა ვარინ, ხეს ვუნწყუნთ თის, ნამდა იეჰოვაშ მოწმეეფს ხალხიშ თოლს ჯგირ სახელ უღდან (1 პეტ. 2:12).

13. მუჭო ვოძირანთ, ნამდა ვაფასენთ სიცოცხლეს, მუჟამსით ზისხირიშ გინობუნაშა ქიმურს საქმე?

¹³ ჩქინო, იეჰოვაშ მოწმეეფშო ზისხირ წმინდა რე. ზუსტას თაშ მიჩინენა შხვეფ ხოლო. ჩქი ვომორჩილუთ იეჰოვაშ კანონს დო ვარიას იფჩიებუთ ზისხირიშ გინობუნაშე თიმწკუმა ხოლო, მუჟამსით სამედიცინო მოხვარა სასწრაფოთ მოსაჭირნა (საქ. 15:28, 29). მარა მუშო ოკო რაგად, თენა ვა ნიშნენს, ნამდა ღურა მოკონა. თეშ გინაწონს, ჩქინო ძვირფას რე ღორონთშე მოჩამილ ძღვინ — სიცოცხლე. მუჟამსით მკურნალობა მოსაჭირნა თიცალ ექიმეფშა მეურთ, მიდგას შეულებ ზისხირიშ გინობუნაშ უმშო არძაშ უჯგუშ მეთოდეფით მიმკურნალან.

14. მუჭო შემლებნა მაქსიმალურო ეიფჩილითუათ დუდ სერიოზულ სამედიცინო პროცედურაშე?

¹⁴ ჯამრთელობაშ მოთხილაფაწკუმა დაკავშირებით თე სტატიას გარჩიებულ რჩევეფს გეგმიბრინუანთ-და, ნაკლებ იჸუაფ თიშ რისკ, თეშ დებლახათ, ნამდა ოპერაციაქ ვარდა სერიოზულ მკურნალობაქ დემესაჭირან. მუჟამსით ვეცადებუთ, ჯამრთელობას ირნერო ქუმუთხილუათ, ოპერაციაქ დემესაჭირანინ ხოლო, ჩქინო ადვილ იჸუაფ თიშ გინოღალა დო უმოს მალას ხოლო გეგშებჯგირებუთ. მუჟამსით ჸუდეს დო სამუშას უსაფრთხოებაშ ნორმეფს დეფცვენთ დო შარას მოძრაობაშ წესეფს დევემორჩილებუთ, თეშნერო შემალებენა დუდ ეუჩილითუათ უბედურ შემთხვევეფს დო სასწრაფო ოპერაციას.

15. ა) მუშენ რე მნიშვნელოვან, ირდიხაშა გილამიღდან განახლებურ სამედიცინო მინდობილობა? (ქოძირით სურათ). ბ) მუჭოთ ვიდეოშე იძირე, მუჭო შემლებნა მიბღათ გააზრებულ გადაწყვეტილება, მკურნალობაშ დროს ზისხირიშ გიმორნაფაწკუმა დაკავშირებით?

 ¹⁵ ჩქინო სიცოცხლე მანგარ ძვირფას რე, ათეშენ, ვავსენთ სამედიცინო ბლანკის დო ირდიხას გილამიღნა თინა. თე ბლანკის გიმოფხანტუნთ ჩქინ სურვილს, ზისხირიშ გინობუნა დო ნამთინე სამედიცინო პროცედურაწკუმა დაკავშირებით. ქუგაფნანო თე ბლანკ განახლებურ? თინა შეიოვსებელ ქუგაფნა ვარდა განახლება ქასაჭირუნ-და, ვეგნოდვათ თეშ კეთება. თქვან გადაწყვეტილება წერილობით დაფიქსირებულ ქუგაფნან-და, თენა მიგეხვარებნა, დეგესაჭირებნან თიმწკუმა, მკურნალობა ხეთეშე ქიდიჭყათ დო დრო ვადინუათ ექიმეფწკუმა საკითხეფიშ გარჩიებას. თე ბლანკ ექიმეფს ხოლო მეხვარებ, გაურკვევლობას ვა რდან დო ჩქინ ომკურნალებერო თიცალ პროცედურა ვეგშაგორან, მუდგაქ შილებე ჩქინ სიცოცხლე საფრთხეშ თუდო ქიგიორინუას. b

16. მუშ კეთება შემლებნა, მუჟამსით ვა მიჩქნა, მუჭო შევავსათ სამედიცინო მინდობილობაშ ბლანკ?

¹⁶ ვა უღჷ მნიშვნელობა, მუ ასაკის ვორეთ ვარდა მუნერ ჯამრთელობა მიღნა, უბედურ შემთხვევაშე დო ლახალაშე ნამთინ ვა ვორეთ  დაზღვეულ (ეკლ. 9:11). ათეშენ, გონივრულ იჸუაფ, შევსებულ მაფდან სამედიცინო მინდობილობაშ ბლანკ. თე ბლანკ მუჭო შეავსათინ ვაიჩქნან-და, მოხვარა ქოთხით თქვან კრებაშ უხუცესეფს. თინეფ ირნერო მიგეხვარებნა თეშ კეთებას, მარა თქვან მანგიორო ვემიღენა გადაწყვეტილებას. თენა თქვან პირად პასუხიშმგებლობა რე! (გალ. 6:4, 5). უხუცესეფ მიგეხვარებნა ირფელიშ გაგებას დო თქვან სურვილიშ წერილობით გიმოხანტუას.

17. მუჭო შემლებნა გონიერებაშ გიმორჩქინა, მუჟამსით საქმე ოხუ ჯამრთელობაწკუმა დაკავშირებულ საკითხეფს?

¹⁷ ბრელ ჩქინ გადაწყვეტილება, ნამუთ ჯამრთელობას დო მკურნალობაშ მეთოდეფს ოხუ, ბიბლიათ გოწაფილ სინდისშა რე გერსხილ (საქ. 24:16; 1 ტიმ. 3:9). გადაწყვეტილებეფიშ მეღებაშ დო თინეფიშ გურშენ შხვეფწკუმა ჩიებაშ დროს ჯგირ იჸუაფ, გეფთვალისწინათ ფილიპელეფიშ 4:5-ის ინოჭარილ პრინციპ: „არძაქ ქოძირას თქვან გონიერება“. გონიერება მიმეხვარებნა, ირიათო ჯამრთელობაშე ვეფიფქრათ დო ვართ თის ვეცადებუთ, შხვეფს ხოლო ჩქინცალო ვოფიქრებაფუათ. ჩქი მიჸორა დო პატის ფცენთ და-დო ჯიმალეფს, თიმწკუმა ხოლო, მუჟამსით ჩქინდე განსხვავებულ გადაწყვეტილებეფს ღებულენა (რომ. 14:10—12).

18. მუჭო შემლებნა მარდულობა გიმიფრჩქინათ სიცოცხლეშ ძღვინიშ მიმართ?

¹⁸ სიცოცხლეშ მუმაჩამალ, იეჰოვაშ, მიმართ, მარდულობას გიმიფრჩქინანთ, მუჟამსით მუთხილუანთ ჩქინ სიცოცხლეს დო ღორონთშო მუთ შემლებნან ირფელს გუვაკეთენთ (გამოცხ. 4:11). მართალ რე, ამდღა ლახალაშა დო უბედურ შემთხვევეფშა დუდ ვემაჩილითენა, მარა მიჩქნა, ნამდა იეჰოვას თეცალ ცხოვრებაშო ვა გუჭყაფუთ. მალას თინა მოსპუნს ლახალა დო ღურას დო ულიებ სიცოცხლეს მუჩანა (გამოცხ. 21:4). ონდო თე დრო დოდირთუდას, ჯგირ იჸუაფ, მუთხილუათ ჩქინ სიცოცხლეს დო ვემსახურათ ჩქინ ზეციერ მუმას, იეჰოვას.