1. Karakory valerany fahin̈anantsika amy Jehovah?

 AKORY tsapanao izikoa misy kamaradinao man̈amia anao tran̈o araiky maventy? Mety efa ratsy paintiranizio, na misy raha sasany koa efa robaka. Fa ndray zen̈y, valeranizio mandeha antapitrisany. Azo antoko fa ho ravoravo mare anao nahazo tran̈o io. Ataonao koa fomba jiaby ikobabian̈a izio. Karaha zen̈y koa, misy kadô araiky valera mare namezany Jehovah atsika. Tsy ino izio fa fahin̈ana. Ten̈a valera amy Jehovah fahin̈anantsika matoa izy nan̈amia Zanany han̈avotro atsika.​—Jaona 3:16.

2. Izikoa zahan̈a 2 Korintianina 7:1, ino raha tiany Jehovah ataontsika?

² Jehovah Loharanony fahin̈ana. (Sal. 36:9) Ninoany apostoly Paoly raha zen̈y ke hoizy: “Baka aminany mahavy atsika velon̈o, mihetsiketsiky ndreky misy.” (Asa. 17:25, 28) Baka amy zen̈y ivolan̈antsika fa fahin̈ana io kadô baka amy Zan̈ahary. Ten̈a be fitiavan̈a izy, ke efa namezany atsika aby raha jiaby ilaintsika baka atsika ho velon̈o. (Asa. 14:15-17) Kanefa Jehovah tsy man̈ano fahagagan̈a hiarovan̈a atsika tsy hofoaty. Tiany atsika hifen̈y hikarakara fahasalaman̈antsika, na arabatan̈a zen̈y na arapan̈ahy. (Vakia 2 Korintianina 7:1.) Nan̈ino atsika tokony hiaro fahasalaman̈antsika ndreky ain̈intsika? Akory han̈anaovantsika zen̈y?

3. Ino antony araiky mahavy atsika miaro fahasalaman̈antsika?

³ Ino antony araiky mahavy atsika miaro fahasalaman̈antsika? Baka atsika ho afaka hanompo Jehovah tsarabe. (Mar. 12:30) Tsy ataontsika raha efa haintsika mety hamparary atsika fotony tiantsika han̈amia vatan̈antsika “hatao soron̈o velon̈o ndreky masin̈y.” (Rom. 12:1) Marin̈y ndraiky fa na ino na ino raha ataontsika, zen̈y tsy hisakana atsika tsy harary foeky. Fa ndray zen̈y, atsika man̈ano erakany vitantsika baka ho salama  fo. Tiantsika haboaka Babantsika andan̈itry an̈y fa atsika mankasitraka mare fahin̈ana, kadô tsarabe namezany atsika io.

4. Von̈ono han̈ino ma Panjaka Davida?

⁴ Nambarany Panjaka Davida antony nahavy izy nankasitraka fahin̈ana namezany Zan̈ahary io. Karaha ty raha nisoratiny: ‘Ino ma hatsaran̈a azoko izikoa zaho maty, ke mijotso an̈aty lavaka an̈y? Fotaka ma hidera anao, na han̈ambara tsy fivadihan̈anao?’ (Sal. 30:9) Mety taminizy efa marikitry hofoaty, Davida nanoratra volan̈a aby io. Fa izy mbala von̈ono hiady mare baka ho velon̈o elaela, misy hahavitany manompo Jehovah. Hay be fa atsika jiaby samby von̈ono han̈ano karaha zen̈y koa.

5. Ino raha mbala afaka ataontsika ndray atsika matoe na marary mare?

⁵ Mety efa tsy hahavita han̈ano raha maro fataontsika taloha atsika, izikoa marary na mahaimatoe. Ke vokany, atsika mety hahinihiny ndreky halahelo. Ndray zen̈y, atsika mila mifen̈y fo mikarakara ain̈intsika. Nan̈ino? Fotony na marary ndreky matoe karakory atsika, mbala afaka midera Jehovah fo, karaha Panjaka Davida in̈y. Ten̈a mankahery mahay fa mbala valera amy Zan̈ahary fo atsika, na marary na matoe! (Mat. 10:29-31) Sady izikoa atsika maty, efa tsy din̈iny hamelon̈o atsika ndraiky. (Joba 14:14, 15) Ke atsika koa mbala velon̈o, atsika mifen̈y mikarakara fahasalaman̈antsika ndreky miaro ain̈intsika.

6. Tiany Jehovah han̈ano karakory atsika amy raha hoanintsika ndreky higiantsika?

⁶ Baiboly tsy bokiny fahasalaman̈a na boky mikoran̈a momba hanin̈y. Ndray zen̈y, izio mikoran̈a hevitriny Jehovah mikasiky raha aby zen̈y. Ohatra, Jehovah mandrisiky atsika ‘tsy han̈ambela raha mampijaly hikasiky vatan̈antsika’ fotony raha zen̈y mety handratra izio. (Mpito. 11:10) Baiboly mivolan̈a fa atsika tsy tokony ho tendankanin̈y na higiaka toaka be loatra. Raha aby zen̈y mety hamparary na koa mety hamono atsika foeky. (Ohab. 23:20) Atsika tiany Jehovah hifehy ten̈a amy raha hoanintsika ndreky higiantsika.​—1 Kor. 6:12; 9:25.

7. Nan̈ino torohevitry aminy Ohabolana 2:11 man̈ampy atsika hahay hanapakevitry amy raha momba fahasalaman̈antsika?

⁷ Akory an̈aboahantsika fa atsika mankasitraka mare fahin̈ana namiany Zan̈ahary atsika io koa fa hanapakevitry? Atsika mila mahay misain̈y. (Sal. 119:99, 100; vakia Ohabolana 2:11.) Ohatra, fidintsika tsarabe raha hoanintsika. Hanin̈y koa fa haintsika fa mety hamparary atsika, mitandrin̈y atsika tsy hihina izio, ndray izio tiantsika. Mahay mandiniky koa atsika izikoa man̈ano ampy toromaso, man̈ano spaoro matetiky, baka io ataontsika madio fo vatan̈antsika ndreky tran̈ontsika.

8. Akory ahitan̈a fa raha maventy amy Jehovah fiarovantsika ain̈intsika?

⁸ Iro Israelita aby io namezany Jehovah lalàn̈a mikasiky fomba iarovan̈a ain̈y amy raha mety hampisy aksidan antran̈o na lera miasa. (Eks. 21:28, 29; Deot. 22:8) Ho azondraha mare, ohatra, olo araiky tafamono olo, ndray izio tsy kiniany. (Deot. 19:4, 5) Nivolan̈a koa Lalàn̈a fa tsy maintsy sazian̈a olo araiky nan̈ano raha mety hamono tsaiky an̈aty kibo, ndray tsy kiniany. (Eks. 21:22, 23) Aboakany Soratra Masin̈y fa tiany Jehovah atsika hitandrin̈y tsarabe, ke tsy han̈ano raha mety hampisy aksidan.

9. Ino raha mety ataontsika hiarivan̈a aminy aksidan? (Zahava koa sary.)

⁹ Ankasitrahintsika fahin̈ana namiany Zan̈ahary atsika io izikoa atsika mitandrin̈y fo  amy raha mety aviany aksidan, na antran̈o na ampiasan̈a. Tsy atsipitsipintsika amy tany jiaby, ohatra, raha marangitry, raha simiky mahafaty, na aody izikoa fa tsy miasa amintsika. Tsy ataontsika amy tany azony tsaiky koa raha aby io. Mitandrin̈y koa atsika lera mandrehitry motro, mampandevy rano, na mampiasa raha mandeha amy courant, ke arehantsika maso tsara izio. Tsy mitondra tomabily koa atsika izikoa nihina aody mahery, na nigiaka toaka, na koa tsy ampy toromaso. Atsika koa tsy tokony hampiasa telefony lera mitondra tomabily.

10. Ino raha mety ataontsika aloha ndreky amy fotoan̈a andalovany antambo?

¹⁰ Ndraikindraiky, tsy vitantsika hisakana raha mety hamono atsika. An̈isanizen̈y antambo, valan̈aretin̈y, avio korontan̈a. Kanefa, izikoa fa miboaka raha karaha zen̈y, atsika mifen̈y man̈ano raha hiarovan̈a ain̈intsika. Zen̈y mahavy atsika man̈araka toromariky baka amy manampahifan̈a lera iro man̈iraka atsika mifindra na man̈ano raha hafa. (Rom. 13:1, 5-7) Fa misy raha ndraiky mety atao hioman̈ana  tsialohaloha, aminy antambo sasany. Ino izio? Man̈araka zay toromariky amezany manampahifan̈a han̈ampian̈a atsika hioman̈a amy zen̈y. Mety hilaintsika, ohatra, mikajy rano ndreky hanin̈y tsy mora robaka, avio aody ten̈a ilain̈a.

11. Tokony ho von̈ono han̈ino atsika izikoa fa misy aretin̈y mifindra amy tany misy atsika?

¹¹ Ino raha tokony hataontsika izikoa sendra misy valan̈aretin̈y miparitaka amy tany misy atsika? Atsika tokony han̈araka toromariky amezany fanjakan̈a, karaha ataony manasa tan̈ana, man̈aja elan̈elan̈a, man̈ano cache bouche, avio midoko antran̈o (mihiboko). Man̈aja fahin̈ana namiany Zan̈ahary atsika, izikoa man̈ano raha aby zen̈y.

12. Nan̈ino Ohabolana 14:15 man̈ampy atsika hahay hifidy koran̈a tandrin̈esan̈a?

¹² Lera misy antambo na valan̈aretin̈y, matetiky atsika maharen̈y koran̈a tsy marin̈y baka amy naman̈a, jirany, na amy vaovao. Ke izikoa fa misy raha karaha zen̈y, tokony vaovao azo antoko tsara baka amy fanjakan̈a ndreky dokotera fo tandrin̈esantsika fa tsy ‘zay raha volan̈inolo.’ (Vakia Ohabolana 14:15.) Filankevipitantan̈ana ndreky birony sampan̈a man̈ano erakany vitandro mitady fan̈azavan̈a marin̈y tsarabe alohany iro man̈amia toromariky momba fivorian̈a ndreky fitorian̈a. (Heb. 13:17) Ke izikoa arehantsika toromariky azontsika, ho voaro atsika ndreky olo hafa. Tsy zen̈y fo fa, hanjary hieritreritry raha tsara momba Vavolombelon̈o Jehovah koa olo man̈odidin̈y atsika.​—1 Pet. 2:12.

13. Akory an̈aboahantsika fa atsika man̈aja fahin̈ana?

¹³ Maro olo mahay fa amy Vavolombelon̈o Jehovah, lio io masin̈y. Atsika man̈araka lalàn̈any Jehovah momba lio ke atsika tsy man̈eky hampidiran̈a lio, ndray atsika mila fitahan̈a meky. (Asa. 15:28, 29) Kanefa, zen̈y tsy mivolan̈a fa atsika tihofoaty. Atsika ten̈a man̈aja fahin̈ana baka amy Zan̈ahary. Ke atsika mitady fan̈ampian̈a amy dokotera mahay sady von̈ono hitaha atsika amy fomba ten̈a tsara kanefa tsisy fampidiran̈a lio.

14. Ino raha mety ataontsika baka atsika tsy ho voatery hiatriky fitahan̈a sarotro?

¹⁴ Izikoa atsika miaro fahasalaman̈antsika ke man̈araka raha aby nikoran̈intsika tamy lahatsoratra ty, atsika mety tsy hila fandidian̈a na fitahan̈a sarotro. Arakarakany mampasalama atsika, hampalaky janga atsika izikoa sendra tsy maintsy didian̈a. Izikoa atsika mitandrin̈y amy raha mety hampisy aksidan, na antran̈o na ampiasan̈a, avio man̈araka tsara lalàn̈a mifehy fandihanan̈a amy lalabe, atsika mety tsy ho voa raha hahavy atsika hididian̈a meky.

15. a) Nan̈ino atsika mila mitondra karty Fanomezan-dalana Momba ny Fitsaboana tsy lany daty? (Zahava koa sary.) b) Eraka raha azavain̈y amy video io, ino han̈ampy atsika han̈ano fanapahankevitry mety tsara amy raha momba fampiasan̈a lio?

¹⁵ Man̈aja fahin̈ana atsika, ke zen̈y mahavy atsika mameno karty Fanomezan-dalana Momba ny Fitsaboana (FMF). Izio indesintsika miaraka amintsika fo. Misoratra amy karty io ao fan̈irian̈antsika tsy hampidiran̈a lio ndreky fitahan̈a hafa tiantsika atao amintsika. Ke asa ninao efa navaozinao? Izikoa anao tsendriky nameno izio na mbala tsy nan̈avao ninao, aza mangataka andra eky. Nan̈ino? Izikoa voasoratra mazava tsara raha tiantsika hatao amintsika, tsy ho lany fotoan̈a han̈azava amy dokotera eky atsika ke hahazo fitahan̈a malaky. Mahatsara zen̈y koa, ho azo antoko fa atsika tsy hahazo aody tsy zakantsika ndreky fitahan̈a tsy tiantsika. b

16. Ino raha mety ataonao izikoa tsy hainao tsara mameno karty Fanomezan-dalana Momba ny Fitsaboana?

 ¹⁶ Mety ho azony aksidan ndreky aretin̈y atsika jiaby, na matoe na tanora, na salama na tsy salama. (Mpito. 9:11) Ke misy jery atsika izikoa mameno Fanomezan-dalana Momba ny Fitsaboana. Izikoa tsy hainao tsara akory atao mameno karty io, mikoran̈esa aminy antipan̈ahy amy fiangonan̈anaro. Marin̈y ndraiky fa efa tsy vaovao amindro fomba faminoan̈a karty io, kanefa iro tsy afaka hanapakevitry amy pilasinao, amy raha mikasiky fitahan̈a anao. Andraikitrinao zaraiky raha zen̈y. (Gal. 6:4, 5) Iro ndraiky afaka man̈ampy anao hahay ino aby fitahan̈a azonao isafidianan̈a, avio man̈ampy anao hameno karty io.

17. Akory ahitan̈a fa atsika mahay mandanjalanja amy raha mikasiky fahasalaman̈a?

¹⁷ Mifototro amy raha nianarantsika amy Baiboly ankamarozany fanapahankevitry ataontsika momba fahasalaman̈a ndreky fitahan̈a. (Asa. 24:16; 1 Tim. 3:9) Ke izikoa atsika mikoran̈a aminolo momba fanapahankevitrintsika manokan̈a, tsara alaintsika onon̈o toro lalan̈a amy Filipianina 4:5 ty: ‘Ataova  hainolo jiaby fa anaro mahay mandanjalanja.’ Atsika koa mahay mandanjalanja, atsika tsy handany fotoan̈a hiasaloha be momba fahasalaman̈antsika, avio tsy hanery olo hitovy hevitry amintsika amy raha mikasiky fikarakaran̈a fahasalaman̈a. Tiantsika sady hajaintsika fo iro rahalahy ndreky ranabavintsika aby io, ndray tsy miran̈a amy nintsika fanapahankevitrindro.​—Rom. 14:10-12.

18. Akory an̈aboahantsika fa atsika mankasitraka Jehovah nan̈amia atsika fahin̈ana?

¹⁸ Mankasitraka Jehovah Loharanony fahin̈ana atsika, ke miaro ain̈intsika ndreky man̈amia izy ny farany tsara baka amintsika. (Apok. 4:11) Tsy maintsy miatriky aretin̈y ndreky antambo isankarazany atsika amiziô. Kanefa tsy zen̈y fiain̈ana tiany Pamoron̈o hamian̈a atsika. Tsy ho ela atsika hamezany fiain̈ana mandrakizay, tsisy tehotehoko ndreky fahafatesan̈a. (Apok. 21:4) Fa parapavianizen̈y, ravoravo atsika velon̈o ndreky afaka manompo Jehovah, Babantsika be fitiavan̈a andan̈itry an̈y!