1. Ana umi wetu uli wakusosekwa chamtuli kwa Yehofa?

 TUWANICHISYE kuti mjawo jwine ŵapele nyumba. Nambo nyumbajo jikwete yakusawusya yine ni yine. Atamose kuti nyumbajo jikwete yakusawusya, nambope mpaka jisumidwe ni mbiya syejinji. Ngatukukayichila kuti mpaka ayamichile mnope soni kujisamalila nyumbajo. Mwakulandana ni yeleyi, Yehofa atupele mtuka wa umi wawuli wakusosekwa mnope. Mwamtitu Yehofa paŵapeleche mwanache jwakwe jwalosisye kuti akusawuwona umi wetu kuŵa ŵakusosekwa mnope.—Yoh. 3:16.

2. Mwakamulana ni 2 Akolinto 7:1, ana Yehofa akusajembecheya kuti chitutendeje chichi?

² Yehofa ali msyene umi. (Sal. 36:9) Ndumetume Paulo jwamanyililaga yeleyi mwamti jwalembile kuti, “Ligongo lya jwalakwejo tukwete umi, tukusajenda soni tupali.” (Mase. 17:25, 28) Myoyo nganikuŵa kulemwa kusala kuti umi wetu uli mtuka wakutyochela kwa Mlungu. Jwalakwe jwatupele yindu yatukusosechela kuti tutameje ni umi. (Mase. 14:15-17) Nambo masiku agano Yehofa jwangatenda yakusimonjesya pakusaka kukulupusya umi wetu. Mmalomwakwe, jwalakwe akusajembecheya kuti chitulisamalileje kwineku tuli mkupitilisya kumtumichila. (Aŵalanje 2 Akolinto 7:1.) Ligongo chichi tukusasosekwa kusamalila chilu soni umi wetu, soni ana mpaka tutende chamtuli yeleyi?

3. Ana ni ligongo limo lyapi lyalikusatutendekasya kuchisamalila chilu chetu?

³ Ligongo limo lyalikusatutendekasya kuchisamalila chilu chetu  lili lyakuti patukwete chilu chambone mpaka tumtumichile Yehofa mwampaka tukombolele. (Maliko 12:30) Myoyo, tukusaŵa ŵakusachilila kupeleka ‘yilu yetu mpela mbopesi jaumi, jeswela, soni jakuŵajilwa pameso pa Mlungu.’ Mwamti tukusaŵambala kutenda yindu yatukumanyilila kuti mpaka yijonanje chilu chetu. (Alo. 12:1) Yisyene kuti nganituŵa tukombwele kulisamalila mwamti ni kwika pangalwala. Nambope tukusatenda yampaka tukombole ligongo tukusasaka kwalosya Atati ŵetu ŵakwinani kuti tukusayamichila mtuka wa umi.

4. Ana Mwenye Daudi jwasakaga kutenda chichi?

⁴ Mwenye Daudi jwasasile ligongo lyakwe jwayamichilaga mnope mtuka wa umi pajwalembile kuti, “Ana tachipata chichi pa chiwa changu naga ngwinjila mwilembe? Ana une pitinjisanduka luwundu, tinjipakombola kwalumba ŵalakwe? Ana tinjipakombola kulalichila ya kukulupichika kwawo?” (Sal. 30:9) Komboleka kuti Daudi jwalembile maloŵega ali asigele panandi kuwa. Atamose yaliji myoyo, jwalakwe jwasachililagape kutama ni umi kwa ndaŵi jelewu nichakulinga chakuti apitilisyepe kumtumichila Yehofa. Ngatukukayichila kuti wosopewe tukwete mtima mpela welewu.

5. Ana mpaka tutende chichi atamose yili mkuti tuchekulwipe kapena tukulwala?

⁵ Ulwele soni kuchekulupa mpaka yitulepelekasye kutenda yejinji yatwatendaga pandanda. Yeleyi mpaka yitutendekasyeje kuti tukasangalalaga. Nambope, atamose kuti yili myoyo ngatukusasosekwa kuleka kulisamalila. Tukuŵecheta yeleyi ligongo lyakuti chinga tuchekulwipe chamtuli kapena tulwaliche chamtuli, mpaka tukombolepe kumtumichila Yehofa mpela muŵatendele Mwenye Daudi. Kusala yisyene, yili yakulimbikasya kumanyilila kuti Mlungu jwetu akusatuwona kuti tuli ŵakusosekwa mnope atamose kuti tuli ŵangali umlama. (Mat. 10:29-31) Atamose tuli tuwile, jwalakwe chachisachilila mnope kutujimusya ku chiwa. (Yob. 14:14, 15) Myoyo, patuli chijumipa ni patukusosekwa kutenda yampaka tukombole pakusamalila chilu soni umi wetu.

6. Ana Yehofa akusasaka kuti tutendeje chichi pangani ja yakulya soni yakumwa?

⁶ Atamose kuti Baibulo nganijiŵa buku jakusala yampaka tutende kuti tuchisamalileje chilu chetu kapena mwampaka tusagulile yakulya, nambope jikusatusalila yejinji pakwamba mwakusayiwonela Yehofa yindu yeleyi. Mwachisyasyo, jwalakwe akusatulimbikasya ‘kuliŵambasya ku yakupweteka,’ yampaka yijonanje chilu chetu. (Jwak. 11:10) Kulya mnope soni kukolelwa mpaka yijonanje chilu chetu soni atamose kutuwulaga kwene. (Mis. 23:20) Yehofa akusasaka kuti tuliŵichileje malile pangani ja winji wa yindu yatukusaka kulya kapena kumwa.—1 Akoli. 6:12; 9:25.

7. Ana malangiso gagakusimanikwa pa Misyungu 2:11 gakutukamuchisya chamtuli kuchisamalila chenene chilu chetu?

⁷ Mpaka tusagule yindu yakulosya kuti tukusayamichila umi waŵatupele Mlungu mwakukamulichisya masengo lunda lwetu lwakuganisya. (Sal. 119:99, 100; aŵalanje Misyungu 2:11.) Mwachisyasyo, mpaka tutende yeleyi mwakusagula mwalunda yindu yatukusaka kulya. Tukusaŵambala kulya yakulya yampaka yitutendekasye kuti tulwale atamose yili mkuti tukusayinonyela mnope. Tukusalosyasoni kuti tuli ŵaganisya chenene mwakutenda yakomboleka kuti tugoneje mwakwanila, kutenda maseŵela gakulimbisya chilu ndaŵi syosope, nambosoni kulolechesya kuti ndaŵi syosope yilu soni pamlango petu yili yachasa.

8. Ana Baibulo jikusasala yamtuli pakwamba mwakusajiwonela Yehofa ngani ja kuŵambala ngosi?

⁸ Pa malamusi gele Yehofa ŵapele Ayisalayeli, ŵapwaticheposoni malangiso gakamuchisya pakuŵambala ngosi syekulungwakulungwa  syampaka sitendekwe kunyumba soni kumasengo. (Eks. 21:28, 29; Det. 22:8) Soni naga mundu jwine amwuleje mjakwe mwangosi jwasimanagape ni yakusawusya yekulungwa. (Det. 19:4, 5) Chilamusichi chasalaga kuti atamose mundu jwamwulesye mwanache jwanganapagwe jwasosekwaga kupochela chilango. (Eks. 21:22, 23) Malemba gakusasala mwakupikanika chenene kuti Yehofa akusasaka kuti tuŵambaleje ngosi.

9. Ana ni yindu yine yapi yatukusosekwa kutenda pakusaka kuŵambala ngosi? (Alole chiwulili.)

⁹ Tukusalosya kuti tukusayamichila mtuka wa umi waŵatupele Mlunguwu patukuŵambala kutenda yindu yampaka yitendekasye ngosi chinga kunyumba kapena kumasengo. Mwachisyasyo, tukusaŵa ŵakusamala patukwasa yindu yine yatukuyiwona kuti mpaka yawulasye ŵane, soni tukusalolechesya kuti tuyijasile kutali ni ŵanache. Tukusaŵasoni ŵakusamala mnope patukukolesya moto, soni patukuteleka mesi. Nambosoni patukukamulichisya masengo yipangiso yamagesi tukusalolechesya kuti ngatukutalichila. Patukwendesya galimoto tukusalolechesya kuti nganitumwa mtela wamachili mnope, nganitukolelwa, soni ngatukugwesela. Nambosoni tukusaŵambala kwendesya galimoto kwineku tuli tukamulile foni.

10. Ana mpaka tutende chichi ngosi mkanijitendekwe soni pajikutendekwa?

¹⁰ Ndaŵi sine nganituŵa tukombwele kuŵambala ngosi sine syakogoya syampaka sitendekwe. Yeleyi yili yakuwona patukuganichisya ya ngosi syachilengedwe, milili, soni ngondo. Nambope payitendekwe yindu yeleyi, mpaka tunandiye yakusawusya yampaka yipagwe soni kukulupuka mwakwapikanila ŵaboma pakupeleka malangiso gakuti tutile mudelajo, kapena gakuti tukatyoka panyumba soni malangiso gane. (Alo. 13:1, 5-7) Ngosi sine syachilengedwe sikusamanyika mkanipaŵe kuti chisitendekwe. Myoyo mpaka tutende chenene kukuya malangiso galigose gakupeleka ŵaboma gakutukamuchisya kukosechela ngosijo. Mwachisyasyo, mpaka yiŵe yakamuchisya kusunga yindu mpela mesi, yakulya yangajonasika chitema soni mtela m’chikwama chawo cha pangosi.

11. Naga mlili ubuchile kwatukutama ana tukusosekwa kuŵa ŵakusachilila kutenda chichi?

¹¹ Ana tukusosekwa kutenda chichi naga kwatukusatama kubuchile mlili? Tukusosekwa kupikanila malangiso gakupeleka ŵaboma mpela gakuti tunaŵeje mmyala kaŵilikaŵili, kutama mwakutalikangana, kuwala masiki, soni kutama kwajika pakuŵambala kwapela ŵane ulwelewo. Patukutenda yeleyi tukusalosya kuti tukuyamichila mnope mtuka wa umi watupele Mlungu.

12. Ana mfundo ja pa Misyungu 14:15 jikusatukamuchisya chamtuli kusagula ngani syampaka tusikulupilile pakutendekwe ngosi syachilengedwe?

¹² Ndaŵi sine pasikutendekwa ngosi, tukusapikana yindu yaunami kutyochela kwa achimjetu, ŵandu ŵakuŵandikana nawo majumba soni m’manyusipepala. Mmalo mwakwamba kukulupilila “chilichose” chatupikene, mpaka tutende chenene kupikanila yindu yakudalilichika yakusala ŵaboma soni madokotala. (Aŵalanje Misyungu 14:15.) Ŵa mu Likuga Lyakulongolela soni ŵa m’maofesi ga nyambi akusatenda yampaka akombole kuti amanyilile yisyesyene mkanaŵe kutupa malangiso gakwamba misongano ja mpingo soni masengo getu gakulalichila. (Aheb. 13:17) Patukukuya malangisoga tukusalichenjela achimsyewe soni ŵane ku yindu yakuwulasya. Tukusakamuchisyasoni ŵandu ŵane kukola nganisyo syambone pakwamba ya ŵa Mboni sya Yehofa.—1 Pet. 2:12.

13. Ana pangani ja myasi tukusalosya chamtuli kuti tukusayamichila mtuka wa umi waŵatupele Mlungu?

¹³ Ŵa Mboni sya Yehofa akusamanyika chenene pangani ja kuchimbichisya myasi. Tukusapikanila lilamusi lya Yehofa pangani ja myasi mwakukana kutajidwa myasi atamose patulwasile mnope. (Mase. 15:28, 29) Nambotu yeleyi yangagopolelaga kuti tukusaka kuwa. Mmalomwakwe yikusalosya kuti tukusayamichila mtuka wa umi waŵatupele Mlungu. Tukusalinga kusosasosa madokotala gampaka gatupe chikamuchisyo chambone cha mtela nambo changasaka kutajidwa myasi.

14. Ana mpaka tutende wuli kuti tunandiye kupochela chikamuchisyo chamtela chakusawusya?

¹⁴ Naga tukuchisamalila chilu chetu mwakukuya matala gagakolasile munganiji mpaka tuŵambale kutendedwa opaleshoni kapena kupochela chikamuchisyo cha mtela chakusawusya. Patukwete chilu chambone, ngatukusalaga mnope pakututenda opaleshoni jilijose nambosoni tukusapola mwachitema. Mpaka tunandiyesoni kutendedwa maopaleshoni mwakulolechesya kuti pamlango petu kapena malo gatukusakamulila masengo pangali yindu yampaka yitendekasye ngosi, nambosoni mwakupikanila malamusi ga pamsewu.

15. (a) Ligongo chichi tukusasosekwa kwendaga ni kadi jetu ja DPA? (Alole chiwulili.) (b) Mpela mwatwayiwonele mu fidiyojo, ana mpaka tutende wuli kuti tusagule yindu mwalunda pangani ja chikamuchisyo cha mtela chakamulichisya masengo myasi?

¹⁵ Ligongo lyakuti tukusayamichila mtuka wa umi, tukusalembaga kadi jakumpa mundu machili gangachenga gakutusagulila chikamuchisyo  cha mtela ni kwendaga najo ndaŵi jilijose. b Mu kadiji tukusalembagamo yatukusaka pangani ja kutajidwa myasi soni chikamuchisyo cha mtela. Ana akwete kadi ja DPA? Naga akusaka kulemba kapena kuchenga yindu yaŵalembile pa kadiji akachelewa. Kulemba mwakupikanika chenene yatukusaka pachikamuchisyo cha mtela kukusatendekasya kuti tupate chikamuchisyo mwachitema. Yikusakamuchisyasoni kuti pakaŵa chilichose chakwasokonasya madokotala champaka chiŵiche umi wetu pangosi. c

16. Ana mpaka tutende chichi naga ngatukumanyilila kalembe ka kadi ja DPA?

¹⁶ Chinga tuli ŵachikulile kapena ŵachinandipile, wosopewe mpaka tutende ngosi kapena kulwala. (Jwak. 9:11) Myoyo mpaka luŵe lunda kwa wosopewe kulemba kadi ja DPA. Naga akuyiwona kuti ngakombola kulemba kadiji, mpaka ŵaŵende achakulungwa ŵa mumpingo mwawo kuti ŵakamuchisye. Jemanjaji akusatenda yampaka akombole kuti amanyilileje chenene kalembe ka kadiji, nambo ngasiŵasagulila wawojo yakutenda pangani ja chikamuchisyo cha mtela. Kusagula chikamuchisyo cha mtela uli udindo wa jwalijose pajika. (Agal. 6:4, 5) Mmalomwakwe, achakulungwawo  mpaka ŵakamuchisye kupikanichisya yindu yakusagula soni mwampaka alembele yasagwileyo.

17. Ana mpaka tulosye chamtuli kuti tukusaganisya chenene pangani jakwamba chilu chetu?

¹⁷ Yindu yejinji yatukusasagula yakwamba chilu chetu soni chikamuchisyo chambone chamtela chatukusapochela yikusadalila chikumbumtima chetu chejiganyidwe Baibulo. (Mase. 24:16; 1 Tim. 3:9) Patukusagula yindu soni patukukambilana ni ŵane mpaka tutende chenene kukamulichisya masengo mfundo jajikusimanikwa pa Afilipi 4:5 jajikusati, “Ŵandu wosope amanyilileje kuti mkusapikana ya ŵane.” Naga tukusapikana ya ŵane, tukusaŵambala kwambaga kudandawula yakwamba chilu chetu kapena kwakanganichisya ŵane kuti aganisyeje mpela m’weji. Tukusitwanonyela soni kwachimbichisya abale ni alongo ŵetu atamose jemanjaji ali asagwile yindu mwakulekangana ni m’weji.—Alo. 14:10-12.

18. Ana mpaka tulosye chamtuli kuyamichila kwetu mtuka wa umi?

¹⁸ Tukusalosya kuyamichila kwetu kwa Yehofa, jwali msyene umi mwakuwuchenjela umi wetu soni kutenda yampaka tukombole pakumtumichila jwalakwe. (Chiw. 4:11) Pandaŵi ajino, tukusosekwa kulimbanaga ni yilwele soni yakusawusya yine. Nambo Mlungu nganasakaga kuti tutameje umi mpela welewu. Pachangakaŵapa jwalakwe chatupe umi wangamala soni kuchiŵa kwangali kupikana kupweteka kapena chiwa. (Chiw. 21:4) Kusala yisyene yichiŵatu yakusangalasya kola umi wambone kwineku tuli mkwatumichila Atati ŵetu ŵakwinani, Yehofa.