1. Waigu du nyakipa gaani unga fu Yekova?

 MO BERẼNGA gupai nga bakureamo fu bambu foro. Arangihe ima tona ka gbataka na rihe yo natoga atoga. Wa vura du agi kpakarapai re tipaha, gu marã i narengbe ka ngbe gu bambu re na ni nga amirioni adorari. Ni rengo, si naida aida mo du na tambuahe tipa gu bambu re na ki bandaha. Wakina gure a, Yekova ima fu nyanyakipa gamahe furani, si nga gu gamahe nga ga unga. Ni rengo, Yekova nayugo wai ko abi gaani unga na nyanyakipaha ni fuko Wiriko ni motumo tipa rani.—Yo. 3:16.

2. A wa i nayuguhe rogo 2 AKorindo 7:1, ginipai Yekova aida ani mangihe?

² Yekova nga Bafu unga. (Tam. 36:9) Gu mokedi nangia Pauro aima ida a kuti gipai re, na ko aya: “Ani ni ungarani, ki nita ata, ki du kina ho rogo ko yo.” (Amo. 17:25, 28) Sidu, ani ima rengba ka gumba gupai nga gaani unga nga gamahe be Mbori. Ko nafu agu ahe furani rogo nyemuse yo ani aidaha tipa kaa raka. (Amo. 14:15-17) Ono Yekova amanganga iiriwoapai awere ka banda unga rani te. Kuba gure, ko naida ani mangi agu apai dunduko rengbe omerani na ni tipa ka ngerafuo kpotorani na kini irisiko. (Oni gedi 2 AKorindo 7:1.) Tipagine si aida ani banda kpotorani ti ni, na waigu rengbe ani ka mangaha wo?

3. Ginipai nga ndupai sa si aida ani asadi ka banda kpotorani ti ni si du wenengai?

³ Ndupai sa si aida ani asadi ka banda kpotorani si du wenengai nga tipa wa ka ani du na rengba ka iriso Yekova wenengai wa rengbe omerani na ni. (Mk. 12:30) Ani nakpinyemu ka ‘fú tirani ni unga motumo, nga ziazia raka, si ngbaa ti Mbori,’ sidu, ani amanganga agu apai ani niima ino gupai nga si ima rengba ka sa rani ani woki te. (Rom. 12:1) Rengo ngaha nga, ka ani vura kaa manga kina ginipai, ani arengbanga kadu na gu kido nga ka ani tinga na kaza te te. Ono ani namanga gupai rengbe  omerani na ni tipa kpotorani du wenengai bambiko ani naida ka yugo gupai fu gu Barani du ngbangbaturũ yo nga ani ima du na tambuahe tipa gu gamahe nga ga unga.

4. Ginipai Bakindo Davide aaida ka mangaha?

⁴ Bakindo Davide asaki ndu gupai ko adu tini na tambuahe tipa gu ga Mbori gamahe nga ga unga ho ko akepai ni nga: “Gini u du rogo kpiore ka mi zorõ ku Due yo? Ka nvutu tambua ro? Ka si taki pande pa ga yososopai?” (Tam. 30:9) Davide ake agu apai re bara ti digido gako raka. Ono tie, Davide aima diaberã ka banda ungako wa omeko arengbe na ni tipa wa ka ko aandu kindi kumbatayo kaa iriso Yekova. Zanga kapa, ani dunduko du na kina ngbatunga gu diaberã re.

5. Ka ani vura gbinza kina wai vurũ watadu kini woki nikerehe, ginipai rengbe ani ka mangaha?

⁵ Ka si dunga ani nawoka watadu ani nigbinza rani, si rengbe ka dunga ani na rengba ka manga agu apai ani anaamangaha amanga mbata te. Ni sangbana gipai re, ani ima rengba kadu nifudifudi rani na rago kini gberẽ tirani. Ono si naida ani naamanga asadatise kindi wa rengbe omerani na ni tipa ka ngerafuo tirani. Tipagine? Ka ani vura gbinza kina wai vurũ watadu kini woki nikerehe, ani ima rengba kindi ka tambuahe Yekova, a wa Bakindo Davide amangihe. Si ni bakerepa wasa gbe ka ino gupai nga, ani na nyanyakipa rani fu gaani Mbori zavura ho ani awoka ni watadu ho ani nagbinza ni vurũ! (Mt. 10:29-31) Zavura ka ani vura kpi, ko ima du na nyemu ka zingisa rani. (Eyo. 14:14, 15) Ho du ani ni niunga rani, ani naida ka manga gupai rengbe omerani na ni tipa ka banda kpotorani si du wenengai

6. Ginipai Yekova aida ani mangihe nibipa riahe na mbirahe?

⁶ Wa vura duhe nga Baibiri nga gu buku du tipa wai ka ngerafuo tise watadu tipa agu ahe si aida boro rihe te, si nape badungu apai ape furani tipa wai Yekova aberã tipa agi apai re. Ni kpiapai, ko nazungodi rani nga ani ‘moi gbigbitapai ti bororani ku sa yo’ nga gu rengbe ka gbarasa kpotorani. (Batu. 11:10) Baibiri nape gupai nga si aidanga ani rihe ni bakerehe watadu ka mbira buda ni bakerehe te. Agi apai re ima rengba ka gbarasa kpotorani na zavura ki imi rani. (Snz. 23:20) Yekova naida gupai berani nga ani du na zatise ho ani amanga diaberã ni tipa guhe ani aida ka rihe na ka mbiraha na bakio wai si aidaha.—1 Kor. 6:12; 9:25.

7. Waigu gu rugute du rogo Asanza 2:11 aundo rani ani mangi wene adiaberã tipa kpotorani?

⁷ Ani ima rengba ka manga adiaberã nga gu rengbe ka yugo gupai nga ani na bakere tambuahe tipa gu ga Mbori gamahe nga unga nimanga ani sunge na gaani tandu nga ga berãpai. (Tam. 119:99, 100; oni gedi Asanza 2:11.) Ni kpiapai, ani ima rengba ka manga wene asiapai nibipa agu ahe ani arihe. Ka si dunga ani ima kpinyemu kura riahe ono nga gu aniima ino gupai nga si ima rengba ka sa rani ani woki, gaani tandu berãpai nika undo rani ka ani ringa ha ya. Ani a na tatamana ka si du nga ani naasada ka ra wenengai, kini mangi mangonvo dedede, na kini girisi kpotorani na kpurani wenengai.

8. Ginipai Baibiri ayugoho furani tipa wai nyakipa du ani ni bandabanda rani fu Yekova?

⁸ Yekova afu aNdiko fu aYisaraere tipa wai i arengbe ka banda tiyo ti manga kere abéno kpuyo yo watadu ho i anaamanga asunge ni. (Gate 21:28, 29; Pa Rug. 22:8) Ka si anidu nga boro aniimi boro ka ni ainongo aino ya, kere sangbanaha anirengbe kadu kina ti ni. (Pa Rug. 19:4, 5) Ndiko anaida gupai nga zavura agu aboro nanainongo aino ya kini ka imo gu gude i ata vunga nga ru ya, i fu  mbusa afu fuyo. (Gate 21:22, 23) Ziazia Kekeapai nayugo gupai ayugo ziazia nga Yekova naida ani mangi bakere asadatise tipa ka ne abéno.  

9. Gini apai rengbe ani ka mangaha tipa ka ne abéno? (Oni bi asura a.)

⁹ Ani nayugo gupai nga ani na tambuahe tipa gu ga Mbori gamahe nga ga unga ni asada ani kadu ni bandabanda rani rogo akpurani na ba gaani asunge yo. Ni kpiapai, ka si du nga ani naida ka ba agu ahe kusayo du ni tĩtĩhe, agu du na simi, watadu dawa, si naida ani mangihe ngba gu gene si nikaa imisanga kura aboro ngbaha ya. Ani a nabanda agude ka i bingo agu ahe re ya. Ani na rubangirise ho ani aziga we ni, ho ani afaasa ime ni, na ho ani amangasunge ni na kura aũsunge. Na ani na rubangirise ka zanga guari ho ani amangasunge ni na agi ahe re. Si aidanga ani kama tarambiri ka si dunga ani nadia gu dawa nga gu rengbe ka sa ha ni kerehe furani ka kama tarambiri te, na ka si du nga ani ima mbira buda ni bakerehe watadu ani na bakere mbugo si aidanga ani kama tarambiri te. Si aidanga a ani zadi gaani aterefuni berani ho ani akama tarambiri ni te.

10. Ginipai rengbe ani ka mangaha mbata fu gu gberãngo namaa gaani raka ngbapai na ti regboho?

¹⁰ Ti kura aregbo, ani arengbanga ka rugusa kereapai ti manga te. Gipai re nga rengo, gbe, ho agberãngo, ririakaza, na azu amanga ni. Ono tie, ho agberãngo wa gure amanga ni, ani naasada kadu ni bandabanda rani wa rengbe omerani na ni, na ka bata be kerepai ni manga ani pai kuti arugute ki guari rogo gu dagbarago re na ki pekefuo kura arugapai nga gu naye be irangbii. (Rom. 13:1, 5-7) Si rẽarẽ tipa ani mbakadi tirani tipa bete tunguotunguoapai, sidu, si naida ani degeturani kuti agu arugapai irangbii afuhe tipa si undo rani ani du regerege tipaha. Ni kpiapai, si ima rengba kadu ni wenepai ka igo bete ime na agu ariahe ka paha agberẽnga ya gbiati adawa.

11. Ka si dunga ririkaza nagbaraga rogo gu ba ani araka rogoho, ginipai si aida ani du na nyemu ka mangaha?

¹¹ Ginipai si aida ani mangihe ka si dunga kere kaza nagbaraga rogo gu ba ani araka rogoho? Si naida ani pekefuo agu arugapai irangbii afuhe nga gu nabipa zunda bee, ru na dagba, vo roko dada ngba, na kpara boro kusayo. Ho ani amanga agi apai re ni, ani nayugo gupai nga ani na bakere tambuahe tipa gu ga Mbori gamahe nga unga.

12. Waigu rengbe Asanza 14:15 ka undo rani ani diberã tipa gu pangbanga si aida ani degeturani kutini ti regbo gberãngo?

¹² Ti regbo tunguotunguoapai, ti kura aregbo, ani ninaagia agu apai ngba abakurearani, watadu ngba amurakporo, na rogo apangbanga nga gu angianga rengo ya. Ku ba gupai nga ani ‘idi’ kuti agu apai dunduko ani agiaha, si naida ani degeturani kuti agu apangbanga du ni ruruhe naye be irangbii na be amunganga. (Oni gedi Asanza 14:15.) Riigbu Bipasunge na abe-basunge namanga asadatise ni bakerehe tipa ka gbia agu apangbanga du ni ruruhe mbata fu i fu arugapai tipa agu adunguratise nga ga dungurati na sunge tungusapai. (Eb. 13:17) Ni peka ani fuo agu arugapai re ani nabanda tirani na kura aboro ti kerepai. Ani ima rengba a ka undo kura aboro tipa i berẽ wenengai tipa aDezire Yekova.—1 Pet. 2:12.

13. Waigu ani ayugo gupai nga ani nabi ga Mbori gamahe nga ga unga na nyanyakipaha ho si ada ni tipa agu apai nabipa kure?

¹³ Dungu aboro ini gupai nga aDezire Yekova idi kuti gupai nga kure ni ziaziaha. Ani nairisa ga Yekova andiko nibipa kure ni ká ani ka dia kure kutii kpotorani yo, zavura ti regbo tunguotunguo kaza. (Amo. 15:28, 29) Ono tie, gipai re ayugongo gupai nga ani naida ka kpi te. Kuba gure, ani nabi gu ga Mbori gamahe nga ga unga na nyanyakipaha. Ani nagbata gu undo nga ga agu amunganga du na bakere inohe nga aguyo du na nyemu ka fu gu husa akodanga dia kure kutii kpotose yo ya.

14. Waigu rengbe ani ka zogosa agu apai rengbe ka sarani ani gbia kpakarakpakara agene husa kaza?

¹⁴ Ka si dunga ani nika ngerafuo kpotorani wenengai nimanga ani pai kuti agu apai ani nasakipai tipaha rogo gi kekeapai re, isoke si idinga i gba rani watadu ani gbia gu husa du ni nyanyakihe te. Ka kpotorani du wenengai, ani ima rengba ka hu niipo ka si dunga si naida i gba rani. Ani ima rengba a ka ne gu kerepai ka ye na gu tunguotunguopai ka sa gupai nga i gba rani ni banda ani kpurani na gaani basunge si du wenengai na kini pekefuo agu arugute du tipa agu andiko nga ga gene.

15. (a) Tipagine duhe ti ni ni nyanyakipa pai tipa kaa ta na gu vovo karte bero nga durable power of attorney? (Oni bi sura a.) (b) A wa i nayuguhe rogo vidio, waigu rengbe ani ka manga nyanyakipa adiaberã nibipa gu husa kaza nabipa mangasunge na kure?

¹⁵ Mbiko gupai nga ani na tambuahe tipa gu  gamahe nga ga unga, ani na hiso gu karte du tipa fu rengo fu kura boro ni fura kuba rani nga, durable power of attorney (rugapai tipa ka ngerafuo kpotose mbu regbo ko yo) na kini ta na ni ti aregbo dunduko. b Vurube gi karte re, ani napeka pa agu apai ani aidaha nibipa dia kure kutii kpotose yo na gu kura agene husa akaza. Ya mo mo na gu vovo karte bero nga durable power of attorney? Ka mo aida ka hiso ho watadu ka rimiso kura vovo apai koyo, mo mangihe ni basa. Ka ani ima keka pa agu apai ziazia ani aidaha, si nika undo rani ani gbia husa niipo bambiko ani agbarasanga regbo kaa saka apai na gaani amunganga te. Si nika sa gupai nga ka ani gbianga gu gene husa watadu gu dawa nika imisa rani ya. c

16. Ginipai rengbe ani ka mangaha ka si dunga ani ainongo wai ka hiso gu karte nga durable power of attorney te?

¹⁶ Ka si vura dunga ani ni paranga rani watadu kpotorani wenengai, ai boro béno watadu kaza naima rengba ka manga ni. (Batu. 9:11) Sidu tie, si adu ni pa tatamana ka hiso gu karte nga durable power of attorney. Ka si dunga mo ainongo wai ka hiso ho te, mo sana agu  abaakumba du rogo gamo dungurati tipa i undo ro. I namanga asadatise tipa ka inido tiyo na wai ka hiso ho, ono i amanganga diaberã foro tipa agu agene husa mo aidaha te. Gamo sunge du nga ka manga diaberã. (Gara. 6:4, 5) Ono tie, i ima rengba ka undo ro mo rugu tiro na agu apai mo aidaha na mo ki ke agu apai mo aidaha re sande.

17. Waigu rengbe ani ka yugo gupai nga ani na ruru bipai tipa agu apai nabipa ngerafuo kpotose?

¹⁷ Mburu gu dungu adiaberã ani naamangaha tipa kpotorani na agu adawa ani adiaha naru riipa agu apai ani nawirikihe rogo Baibiri yo. (Amo. 24:16; 1 Tim. 3:9) Ho ani amanga adiaberã ni na kini fura na kura aboro tipa agu apai ani nadiberã tipaha, si naida ani mangipai kuti gu bangua arengo nga ga Baibiri du rogo AFiripoio 4:5 nga gu naya: “Aboro ini roni dunduko ni bayee aboro.” Ho du ani ni na ruru berã, ani abakanga bangirani ti aregbo dunduko tipa kpotorani, na kini asadi ka sa kura aboro i du na kina gu bangisa bipai du ani na ni ho da ha ni tipa agu apai nabipa kpotose te. Ani ima kpinyemu awirinarani na kini yugu irisa fuyo, ka si vura du vurũ nga agu adiaberã i amangaha kia ti gaani.—Rom. 14:10-12.

18. Waigu rengbe ani ka yugo gaani tambuahe tipa gu gamahe nga ga unga?

¹⁸ Ani nayugo gaani tambuahe fu Yekova nga Bafu unga, ni banda ani gaani unga na kini fu guhe fuko rengbe omerani na ni. (Yugo. 4:11) Ono awere tie, ani nikaa mbu ambu be akaza na agberãngo. Ono anga gure nga gu raka Bakusirani aaidaha tipa rani te. Barambeda, ko nika fu nyenye unga furani zanga igirã na kpio. (Yugo. 21:4) Nairiwo wai duhe ni wenepai wa du rago re, kaa raka na kini irisi gu Barani nga boro nyemuse du ngbangbaturũ yo nga Yekova!