1. ¿Balaati rasac par Jehová galnabany ni napno?

 BUNYSI pensary ximiglo rascad looy toib cuadro golien ni rasacgoluʼ. Ná nacni toib cuadro golien, napni manch, ma birésni né ma naténi, per nanlo que de clas cuadrocu rasacni xidal millón de dólares. ¿Nigolú nasacni par looy nja? Scúca Jehová ma biscadbu lóono toib cós ni nigolú rasac: láani ngú galnabany. Nigolú rasacni par láabu, por ngú bunycuentbu Xiimbu goity por lóono (Juan 3:16).

2. Xomod ná 2 Corintios 7:1, ¿xí ranab Jehová gonyno?

² Ronoʼ Jehová «ralainy vida» (Sal. 36:9). Ngúca bisetlaa apóstol Pablo órni goniʼ: «Por láabu nabanyno, rasaano né noʼno ló gudxlio» (Hech. 17:25, 28). Por ngú labúu guinino que galnabany nacni toib galrrascad xtuny Dios. Radudybu guirá ni caquiinno né galrronladx (Hech. 14:15-17). Per Jehová diti sony toib galrradziguiaʼ par diti tzoʼ xi gacno. Xalagary ngú, Dios raniiny gonyno alga par ganno lóono en sentido físico né espiritual (bíil 2 Corintios 7:1). ¿Xigony non ganno lóono par diti guixoʼno né diti gaityno, né ximod labúu gonyno láani?

3. ¿Xigony nainy gacno buñ nasac?

³ Nainy gacno buñ nasac portín raniiny gonyno xchiin  Jehová galán (Mar. 12:30). Racladxno gonycuentno «laidyno xomod sacrificio ni nabany, nayaa, ni guicacuent Dios», por ngú rabeʼno tiplad guirá cós ni labúu gony que guixoʼno (Rom. 12:1). Nanno que ná ganno lóono, sadxin dzú saxoʼno. Per ronyno rutirigaʼlni lóono par diti guixoʼno portín modreʼ radudyno guixquix Bixiosno ni noʼ guibá por galnabany.

4. ¿Xí láani goniiny rey David ñony?

⁴ Par rey David nigolú gosac galnabany ni biscad Dios láabu. Por ngú bicaʼbu: «¿Noʼ pu racné xcalgoti la? ¿Noʼ pu racné tzaʼya lainy baʼ la? ¿Labúu gonyxiroʼ yodée looy la? ¿Saniʼni que naclo fiel la?» (Sal. 30:9). Sigory bicaʼbu diitzreʼ dzú ma yaaca gaitybu. Ná scú, diti goniiny ñaitybu par ñonyxiroʼsabu Jehová. Ngúca raniiny guirácano gonyno.

5. Ná ma nacno buñgol o ma caxoʼno, ¿xí labúu gonyno?

⁵ Pal ma nacno buñgol o ma caxoʼno, pentzi diti labúu ronyno guirá ni bunyno antes, né ngú labúu coʼ nabann lóono né guisacno que ma diti raquiinno. Per ngú diti radudy diitz que ma diti sanno lóono. ¿Xigony? Portín ná ma nacno buñgol o caxoʼno, labúusa sonyxiroʼno Jehová, xomod rey David. ¡Né nigolú rialdó xcalnabanyno órni ranno que Jehová ronladx né racacuent lóono ná nacno buñ galkié! (Mat. 10:29-31). Nigolú rasacno par láabu, por ngú ma bidudybu xtiitzbu que pal gaityno salísbu lóono (Job 14:14, 15). Laʼga nabanyno, gonyno xtem por ganno lóono.

6. Órni ganno xi guáno né gueeno, ¿xí ranab Jehová gonyno?

⁶ La Biblia diti nacni toib libro de remeidy nili raibyni lóono xi labúu guáno o xi yaca, per raibyni lóono ximod rabiʼ Jehová guiráni. Por ejemplo, radudyni consej reʼ lóono: «Diti coʼlo laidylo cós ni labúu gony mal láani» (Ecl. 11:10). La Biblia ná diti guagoluʼno né diti sochno. Guirá ndeʼ labúu gony que guixoʼno né dada labúu guigaityni lóono (Prov. 23:20). Jehová ranab lóono guáno né gueeno né midid (1 Cor. 6:12; 9:25).

7. ¿Ximod guisobdiitzno Proverbios 2:11 órni ganno xí gonyno par diti guixoʼno?

⁷ Pal nainy lóono gonyno cós ni guislooy que rasac galnabany ni biscad Dios lóono, non gonyno pensary (Sal. 119:99, 100; bíil Proverbios 2:11). Por ejemplo, órni ganno xi guáno non coʼno xcalrrienno. Pal rioladxno toib galrro per nanno que labúu sonyni mal lóono, más galán diti guáno láani. Láaca nanno que non gaisyno sacró, gonyno ejersis guirá ór, gacno buñ nayaa né guisiáno lidxno.

8. Mod ná la Biblia, ¿balaati rasac par Jehová diti tzoʼ desgrasy ronoʼno?

⁸ Jehová bidudy leyes a israelitas par diti nasacloyibu desgrasy laniolidxyibu né ló dxiin (Éx. 21:28, 29; Deut. 22:8). Pal toib buñ nagaity stoib buñ por desgrasy, láaca góc castigar layibu (Deut. 19:4, 5). Ngúca nasaclóo ni nagaity toib badaʼ ni yása gál ná diti nompa ñonyibu láani (Éx. 21:22, 23). La Biblia nayadit ná que Jehová raniiny gapno cuidad par diti tzoʼ desgrasy ronoʼno.

9. ¿Xí raquiin gonyno par diti guisaclono desgrasy? (Bibiʼ retrat).

 ⁹ Pal rapno cuidad par diti tzoʼ desgrasy laniolidxno né lagary ro ronyno dxiin, raslooyno que radudyno guixquix Dios por galnabany ni biscadbu lóono. Por ejemplo, pal napno cós ni nadoxquii, productos químicos o remeidy, ragoʼtzayno guirá ndeʼ ro diti tzatan mbiox láani. Né pal ma tzeeni ló guix, diti rasapyno láani rotísi lagary. Láaca napno cuidad órni ragoʼno guii, ralabyno nís né raquiinno herramientas eléctricas né racaano cuidad láani. Diti raxonyno camión pal goono remeidy ni ragoʼ bacaʼal lóno, pal goono alcohol o diti gotiasyno sacró, nili raquiinno teléfono órni caxonyno camión.

10. ¿Xí labúu gonyno antes de toib desgrasy né órni ma noʼni par labúu guilaano?

¹⁰ Diti guirá ór labúu cueʼno tiplad guirá desgrasy ni labúu guisaclono, xomod órni rioʼ desgrasy, órni ralat galguitz né  órni rioʼ galrradíil. Per, órni rac guirá ndeʼ labúu guiyopyno mod par diti tzoʼno ló riesga né labúu guilaano. Guisobno pal buñchiin raiby lóono diti guireʼno lidxno o guireʼno nimaca né guisobno stipnés instrucción ni guicaʼno (Rom. 13:1, 5-7). Per láaca noʼ cós ni labúu gacné lóono ló desgrasy reʼ, por ngú non guisobno guirá ni raiby buñchiin lóono par tzoʼno puext. Por ejemplo, sigory raquiin coʼtzayno nís né galrro ni diti raxin nimaca né láaca gapno toib botiquín de primeros auxilios.

11. Pal calat toib galguitz, ¿xi non gonyno?

¹¹ ¿Né pal lagary ro rabésno calat toib galguitz ga? ¿Xí non gonyno? Guisobdiitzno instrucción ni radudy buñchiin lóono, xomod quipno ñano, sitca guisagaʼno de buñ, guiquiinno mascarilla o cubrebocas né tzoʼno cuarentena. Pal rasobdiitzno guirá ndeʼ, saslooyno que rasac par lóono galnabany ni ma bidudy Dios lóono.

12. ¿Ximod racné Proverbios 14:15 lóono par diti gonyno crer guirá información ni racadiagno órni rioʼ desgrasy?

¹² Órni rac toib desgrasy, pentzi ximigno, buñ ni rimbuno o ló notísy labúu guicadiagno cós ni diti nigolú. Xalagary gonyno crer guirá ni racadiagno, más galán gonyno crer ni raniʼ gobierno né doctor (bíil Proverbios 14:15). Láaca, non guisobno instrucción ni radudy Tidxó buñ ni nap xiroʼ Galnan né sucursal ni raiby lóono ximod gapno reunión né ximod guireʼno yoʼ por yoʼ, portín órni ragoʼyibu guicyibu gonyibu toib cós ronyibu rutirigaʼlni layibu por guiquiinyibu información ni nigolú né ni labúu gapno confianz (Heb. 13:17). Órni rasobno layibu, rapno lóono né stipnés, né modreʼ pentzi stipnés saniʼ galán de testigos xtuny Jehová (1 Ped. 2:12).

13. Órni ranabyibu lóono guicaʼno runy, ¿ximod raslooyno que rasac galnabany ni biscad Dios lóono?

¹³ Lóono ni nacno testigos xtuny Jehová rimbu buñ lóono xomod buñ ni rap respet runy. Rasobdiitzno ley ni radudy Jehová de runy, diti racaʼno runy ná noʼ riesga gaityno (Hech. 15:28, 29). Per ngú diti radudy diitz que nainy gaityno. ¡Diti nacni scú! Portín nigolú rasac galnabany ni biscad Dios lóono. Por ngú rayopyno doctor ni gony tender lóono galán né ni diti raquiin runy.

14. ¿Xí sacné lóono par diti tzagatno lainy hospital?

¹⁴ Pal rasobno guirá consej ni sieed ló artículo reʼ, pentzi diti sac fuers gatno lainy hospital. ¿Né pal caquiinno toib operación ga? Pal desde nírcu gonno lóono par gacno buñ nasac, sialno naguel. Láaca pal ronyno xtem diti tzoʼ desgrasy laniolidxno né ló dxiin, né pal rayopyno mod raxonyno camión, sacnéni lóono par diti guisaclono toib desgrasy né diti tzagatno lainy hospital.

15. a) ¿Xigony nigolú rasac gony copyno tarjeta DPA xtunyno né tzanéno láani guirá lad? (Láaca bibiʼ retrat). b) Xomod sieed ló video, ¿ximod ganno xi gonyno órni doctor gaiby lóono guicaʼno runy?

¹⁵ Stoib mod ni raslooyno que rasac galnabany par lóono ngú guistzano tarjeta DPA ro sieed que diti racaʼno runy, né tzanéno láani guirá lad. Ló guiich reʼ  racaʼno xi láani ma goloʼno guicno gonyno par diti guicaʼno runy né xi tratamientos labúu guicaʼno. ¿Ma buny copylo tarjeta xtunylo la? Pal non guistzalo o gony copylo láani, diti guisianlo láani par stoib ór. Pal rabexatzayno xi láani ma goloʼno guicno gonyno né racaʼno láani ló guiich, diti sasnitno tiemp cuéxano láani ló doctor né sony tenderyibu lóono más naguel. Láaca, tarjeta reʼ racnéni lóono diti guicaʼno remeidy ni labúu gony mal lóono. b

16. ¿Xí labúu gonylo pal diti nanlo ximod guistzalo tarjeta DPA xtunylo?

¹⁶ Ná pal nacno mbioxhlas o nacno buñ nasac, guirácano labúu guisaclono toib desgrasy o labúu guixoʼno (Ecl. 9:11). Por ngú nigolú rasac gapno tarjeta DPA xtunyno. ¿Né pal diti nanlo ximod guistzalo láani ga? Diti tzoʼlo ló galrrasaʼ. Ancianos de congregación xtunylo ma nan ximod racni né labúu gacnéyibu looy. Layibu diti saibyibu looy xi gonylo, looy ngú non coʼlo guiclo xi gonylo (Gál. 6:4, 5). Ni gonyibu ngú, sacnéyibu looy guienlo láani né guicaʼlo láani ló guiich.

17. ¿Ximod raslooyno que rioʼno ló razón órni ranino ximod ganno lóono?

¹⁷ Pal ma bidudyno lagary conés la Biblia xcalrrienno saibyni lóono xi gonyno né xcalnabanyno (Hech. 24:16; 1 Tim. 3:9). Por ngú, órni coʼno guicno xi gonyno né órni gaibyno láani stipnés, non guisetnaladxno ni ná Filipenses 4:5: «Guirá buñ gan que nacto buñ ni rioʼ ló razón». Saslooyno que rioʼno ló razón, pal diti nigolú rioʼno galrrasaʼ gacno buñ nasac nili rony lafuersno stipnés gony pensary xomod lóono. Ronladxno né rapno respet xhermanno ná diti ronyibu pensary xomodca lóono (Rom. 14:10-12).

18. ¿Ximod labúu guislooyno que radudyno guixquix por galnabany?

¹⁸ Xomod bisetlano órni gosaló artículo reʼ, ronoʼ Jehová ralainy vida. Saslooyno que radudyno guixquix láabu pal rapno xcalnabanyno né ronyno xchiimbu né gan (Apoc. 4:11). Nigoreʼ noʼ galguitz né stipnés galnagan, per diti modreʼ goniiny Jehová nabanyno. Jehová mápa mer guidudy lóono toib Gudxlio ro diti sioʼ galrrioʼob nili galgoity (Apoc. 21:4). Laʼga guidxin dzúcu, ganno lóono né guiquiinno xcalnabanyno par gonyno xchiin Bixiosno Jehová.