YOMARA koɖo nɔviɛ ŋsu amɛve ciwo yí tɔ mɔ, Marcelo koɖo Hiver le kɔxwi hwɛhwɛ ɖeka mɛ le Guatemala. Yomara tɔ Bibla kplakpla koɖo Yehowa Kunuɖetɔwo yí le yi goduɔ, nɔviɛ ŋsu lɔwo can va bɔdo nu. Vɔ cukaɖa ɖeka li. Nɔjinɔ amɛtɔn cɛwo dekpɔnɔ nu o yí wodasɛnŋ ahlɛn ŋkuvitɔnnɔwo nuŋwlɛŋwlɛ ci woyɔnɔ mɔ brayi hɛnnɛ o. Eyi taɖo mɛ ci yí kplanɔ Bibla koɖo wo hlɛnnɔ enu ci woakpla lɔ koɖo Bibla kpukpui ciwo yí le mɛ nɔ wo.

Hamɛ lɔ bɔbɔwo yiyi can gbenyi cukaɖa bu nɔ wo. Wowoŋtɔwo ɖekɛ datɛnŋ azɔn mɔ minici 40 yi Fyɔɖuxuxɔ ci yí sɔ wo gbɔ mɛ o. Vɔ nɔviwo wa toto yí sɔnɔ wo yí woyinɔ bɔbɔ lɔwo pleŋ. Eyi ci nɔjinɔ amɛtɔn cɛwo vatɔ edɔ wawa le kwɛshila dodomɛ bɔbɔwo mɛɔ, nɔvi lɔwo kpenɔdo wo nu yí wolénɔ wowo dɔ lɔwo do susu mɛ.

Le mai 2019 mɛɔ, wovatɔ bɔbɔwo wawa le wowo kɔxwi lɔ mɛ. Eyi asu koɖo ashi ɖeka ciwo yí nyi gbeshiagbe mɔɖetɔwo, vayi ci kɔxwi lɔ mɛ. Ci asu koɖo ashi cɛ denya lé wohlɛnnɔ brayi alo ŋwlini do can ɔ, woɖo tajinu mɔ yewoakpedo nɔjinɔ lɔwo nu nɔ woajeshi brayi lɔ. Eyi taɖo wovayi xwle wema ciwo yí akpedo wo nu woakpla brayi hlɛnhlɛn amɛwo.

Wleci kleŋ ɖewo goduɔ, nɔjinɔ amɛtɔn cɛwo tɔ brayi hlɛnhlɛn fafɛɖe. Ecɛ kpedo wo nu wotɛnŋ wa gbɔngbɔn mɛ ŋkɔyiyi buwo. Ecɛyɛɔ, Yomara, Marcelo koɖo Hiver nyi gbeshiagbe mɔɖetɔwo. Marcelo nyi sumɔsumɔdɔwatɔ. Wo amɛtɔn lɔwo wanɔ gbɔngbɔnmɛdɔ sugbɔ le kwɛshila lɔ pleŋ mɛ. Lé wosɛnnɔ Yehowa koɖo ezolelanmɛ do, dɔ yí mɛbuwo jinɔ mɔ yewoawa wowotɔ han.

Kpekpedonu ci hamɛ lɔ na nɔjinɔ amɛtɔn cɛwo jeŋ nɔ wo taŋ. Nɔvinyɔnu Yomara nu mɔ: “So hwenu yí mìdo go Yehowa Kunuɖetɔwo ŋkɔtɔɔ, wodasɛ lɔnlɔn ŋtɔŋtɔ ci yí ɖo anɔ Kristotɔwo mɛ nɔ mì.” Nɔviŋsu Marcelo nu kpi mɔ: “Mìɖo exlɔ nywiwo le mìwo hamɛ lɔ mɛ yí mìgbele xexeɛ pleŋ mɛ nɔviwo habɔbɔ lɔ mɛ yí lɔnlɔn le mì mɛ.” Yomara koɖo nɔviɛwo kpɔkɔ emɔ veviɖe nɔ hwenu yí nyigban lɔ avatrɔ paradiso.—Eha. 37:10, 11; Ezai 35:5.