YOMARA ni tindiyakwe Marcelo ni Hiver va zumba ka txidhoropana txa txidotho khe Guatemala. Yomara a khatile kugonda Bhiblia ni mmweyo wa Tifakazi ta Jehovha, ngu msana tindiyakwe ni tona ti khatile kugonda. Kambe ku ti ni txikarato, ngu wuraru wawe i ti mabhofu ni ku va si ti koti kulera braile. M’gondisi wawe ati va gondela maparagrafu ni mavhersikulo ya ma kombiswako ka gondo yimwani ni yimwani.

Txikarato tximwani i ti kuxalela mitshangano ya dibanza nguku va si na ku tikota kutsula vokha ka dibanza da hafuhi adi va nga txi heta 40 wa timeneti kuya kona. Kambe vanathu va txi maha malulamiselo o va teka ve tsula navo mitshanganoni. Mbimo yi va nga khata kumana siavelo ka mitshangano ya hagari ka divhiki, vanathu va ti va vhuna ti to ve khumbula siavelo sawe.

Ngu Maio wa 2019, va khatile ku ñola mitshangano ka txidhoropana txawe. Mpatwa wa vanyamphandule wa mbimo yotshe wu ti rurete ka txidhoropana txile, wona wu ti ti vekete makungo o vhuna Yomara ni tindiyakwe kasi ku ve lera ni kubhala braile hambi ku vona va nga si tikoti. Vona va tsute txikolwani mu va gondisako braile kasi ku ve ya gonda ti yi thumisiswako tona.

Ku di pindile mitximanyana, Yomara ni tindiyakwe se ti txi va hehukela kulera braile, eto ti va mahile ve kula ngu didhawa da moya. a Konkuwa Yomara, Marcelo, ni Hiver va thuma kota vanyamphandule va mbimo yotshe. Marcelo a thuma kota dilanda da wuthumeli. Vona va pateka ngu kuhiseka ka mithumo ya moya otshe mavhiki. Nzila yi va hisekako ngu yona ya gwesa vamwani.

Vanathu vava va vararu va bonga ngutu lirando li va nga kombiswa ngu vanathu. Yomara a womba tiya: “Kukhukhela makhatoni Tifakazi ta Jehovha ti kombisile lirando la ditshuri da Wukristu.” Marcelo a engetile a txi, “hi ni vangana vo xamatisa ka dibanza dathu ni ku athu hi maha txienge txa vanathu va ha mafuni kotshe ava va nga wumbana ngu lirando.” Yomara ni tindiyakwe va di emete ngutu ditshiku di va no ta wona mafu ma txi hundulwa me va paradhesi.—Mas. 37:10, 11; Isaya 35:5.