YOMARA un sayn priiter — Marcelo un Hiver — leepe in een kleen pikaat in Kwatemaala. Yomara hot aan kefang ti Piipel mit Yeehoowa sayn Tsayer xtutiire, un mit te tsayt, hon sayn priiter aach aan kefang tas mache. Awer es waar een propleem kewees. Ti tray sin pliint, un khonte net braile leese. Tes weeche hot sayn Piipel leerer ti apsetse un ti Piipel tekste fon te lisyoon fer tëne kelees.

Es waar aach xweyer fer tëne tsu te fersamlunge keen. Es hot 40 minute kenom fer pis te tichste Raych Saal keen un tii khonte tas net aleen mache. Awer ti priiter in te kemaynt hon se keholef tsu te fersamlunge keen. Un wën Yomara un sayn priiter aan kefang hon teele in te mitewoch fersamlunge hon, hon ti priiter se keholef sayn teele ausm khop lërne.

In maay fon 2019, hot een kemaynt aan kefang fersamlunge in tëne sayn pikaat hale. In tiise tsayt, hon een pruuter un sayn fraa — woo rekulaar pyoneere waare — sich tsu tiise pikaat kewanert. Tii wuste net braile leese orer xraype, awer tii wolte tiise Piipel xtutënte helfe lërne wii tas mache. Tes weeche sin se pis een piplyoteek kang; tat hon se piicher kelees woo tsayche wii braile fer ti anere in lërne.

In phaar moonate, waar es xon laycht fer ti 3 kexwistere braile leese un soo khonte se wayter kaystlich foran keen. Yets, sin Yomara, Marcelo un Hiver rekulaar pyoneere. Marcelo is een ministeryaale tiiner. Ti kans woch, hon se fiil se tuun in Yeehoowa sayn aarwayt. Tii sin soo flaysich in Yeehoowa sayn tiinst, tas al um tëne rom sin aan kextoch.

Ti 3 kexwistere sin petanklich weeche ti liiplich unerxtitsung fon te kemaynt. Yomara saat: “Xon tas eyerste mool woo mer Yeehoowa sayn Tsayer ketrof hon, hon se uns woere kristlich liip ketsaycht.” Marcelo saat noch: “Meyer hon wunerliche fraaynte in unser kemaynt. Un meyer sin teel fon een weltwayt familye woo eenich is weeche ti liip.” Yomara un sayn priiter tuun hërtslich waarte te taach wën Yeehoowa fon te eyert een paratiis mache tuut. (Psal. 37:10, 11; Isa. 35:5)