YOMARA ni addibila abiili — Marselu ni Iver — enakala murudda dhaala ogwatemala. Yomara ambele omuhudhera Bibiliya ni anamoona a Yehova, vano addibileya omutajhiha. Mbwenye, vahikala makathamiho mwaha ararwene kiyona ni kiyanda wileri ebrayili. Bumwahaya, ddibila owahudhiha owileri ddima ni versu dha mBibiliyani dha kadda ohudhera.

Odhowa omutugumanoni yaali makathamiho mamodha, mwaha yekiwa kiyanda odhowa onyumbani yomwene yaddamanne murudda wewa. Mbwenye addibila yowakavihera aliwa odhowa woona mutugumano dhatedhene. Yambeliwa okanna dhipaddi omutugumanoni, addibila yowakavihera aliwa ohuddiwala dhipaddidhiwa.

Mweri wa Maio a yaka ya 2019, wambela weriwana mutugumano murudda wewa. Mudhidhi yole apiyonero dhaala yahitamela murudda yole, aliwa werana yoluba wihina yakavihere addibila ala ararwene, ohudhera wileri ni oleba ni ebrayili. Mbwenye anamatelana ala, kiyanonne ewogelo ya ebrayili. Vano aliwa othoma odhowa obibiliyoteka wihina yahudhere makalelo owoga ebrayili. Vano aliwa ohudhera makalelo owahudhiha addibila ale.

Nuuvira mudhidhi vang’ono, addibila ararwene ohudhera oleba ni wileri ni ebrayili. a Eyo yahakavihera olibiha wandana wewa ni Yehova. Vano Yomara, Marselu ni Iver enalaba ninga apiyonero. Marselu mudhaari okavihera. Oliye onowapara mabasa omuzimuni sumana dhatedhene. Ohagalala wewa winotikiniha.

Ararwene enotamalela mwaha nikavihero addibila enavahiwa. Yomara onowoga egi: “Okuma nlabo ganonimi anamoona a Yehova, aliwa enonooniha odhivela webaribari.” Marselu onowenjhedhedha egi: “Nihikanna akwihu apama mmulogoni ni nnowoga ni madhu mamodha wi nihikanna emudhi waapela elabo yaatene enna odhivela.” Yomara ni addibile enojheha nuuthaba nlabo elabo ela enasaduliwiwa wihina ekale parayizu. — Sal. 37:10, 11; Isa. 35:5.