Cilemo mu Vilinga
YOMARA na vantsongo veni vavali va vamala Marcelo na Hiver va kala mu imo mbonge ya indende ku Guatemala. Yomara ua putukile ku lilongesa Mbimbiliya na Vakaleho va Yehova kaha vantsongo veni navo va lipandakanene neni. Vunoni kua kele cimo citanga, vose vatatu va pua tupuputa kaha ka va tantekeyele ku tanda lilimi lia tupuputa ni nguetu Braile. Ngeci mukemuo, mulongisi uavo ua Mbimbiliya ikeye ua kele na ku tanda cilongesa na ku tanda vinimbu via mu Mbimbiliya viliho kaha vakevo va kumbulula lika.
Ku Kunguluka naco ca va puilile citanga. Likaliavo ka va hasele ku lingamo, muomu ku tunda ha ndzivo yavo na ku Ndzivo ya Vuangana ha tondekele ku endaho 40 minutu. Vunoni vamuanetu mu cikungulukilo va lingile vutumbe vua ku vakuasa va kunguluke ku viuano viose. Kaha mu va putukile ku hana mitamba yavo ku viuano via mu kati ka simano, vamuanetu va kele na ku va kuasa ku va patekele mitamba yavo mu mutue.
Mu Maio ya 2019 viuano via putukile honi ku hitila muimbo liavo, kaha ntsimbu yaco muimbo liavo te kua nungulukila vamo vampuevo na yala va puile vapioneiro va ntsimbu yose. Kaha ovo vapioneiro va lihakelele kapandi ka ku longesa Yomara na vantsongo veni ku tanda na ku soneka Braile, vutuhu navo ka va tantekeyele lilimi liaco. Va lihakele kapandi ka ku ya ku cimo cisete ca mikanda (Livraria) linga va ka lilongese vati ye ku panga Braile na ku lilongesa vati va hasa ku i longesa ku vakuavo.
Marcelo ali na ku hana cikumbululo mu ciuano
Mu nima ya vingonde via vindende, Yomara na vantsongo veni va hasele ku tanda vuasi Braile kaha eci ca va kuasele ku kola vuasi mu lutsilielo. a Lelo lino vose vatatu va pua honi vapioneiro va ntsimbu yose kaha Marcelo ua pua mukua ku kuasa vipanga, ve ku linga vipanga via mu lutsilielo simano yose kaha ndzolela na ntuima yavo vie ku ya vakuavo ku mutima.
Vose vatatu ve ku santsela mua kama ku vukuasi na cilemo ci va va muesa mu cikungulukilo. Yomara ngueni: “Tunde ha litangua lia katete li tua liuanene na Vakaleho, ve ku tu muesa cilemo ca vusunga.” Kaha Marcelo ua vuezeleko ngueni: “Tua kala na vavusamba va cili mu cikungulukilo cetu kaha naua tua pua mutamba ua civunga cose ca vamuanetu va likuata kumo lika na cilemo mu mavu ose.” Yomara na vantsongo veni va lavelela na cizango ca kama litangua li va ka mona mavu va na alulula ku pua citungu.—Visa. 37:10, 11; Isa. 35:5.
a A brochure entitled Learn to Read Braille is designed to help someone who is blind or visually impaired to learn how to read and write braille.
Halumo mu Hasa ku Lema Naua Evi
MU VE KU PANGESELAMO MILAMBU YENU
Tu Vitoma Tue ku a Lulula Miono ya Vantu
Ka tue ku langulula lika mikanda ya braile, vunoni na ku longesa vantu mua ku tanda braile.
