Mizwale ni likaizeli baluna babañata baitusisanga litaba zebeiwanga fa likepe lapili la jw.org mwa bukombwa. Kubunolo kulumela babañwi litaba zeo ka kuitusisa lipangaliko, mi hañata litalusanga mo lika zeezahala cwale litaleleleza bupolofita bwa mwa Bibele. Muzwale yomuñwi naañozi kuli litaba zefumanehanga fa likepe lapili “zatusa luli sihulu mwa mukutalezo oluitusisa ka nako ya cwale.”

Kono litaba zebeiwanga fa likepe lapili zaazwisiwanga fateñi hamulaho wa nako; kacwalo, mukona kufumana cwañi litaba zeo?

• Fa likepe lapili la jw.org, musine linki yeli, “Mubale Litaba Zeñwi” mwatasaa taba yebonisizwe fahalimunyana a likepe, kamba mwatasaa taba yeli, “Ku Zeliteñi” haiba muitusisa kapangaliko. Linki ye ikakwalula likepe lelinani toho ya taba yeli, “Litaba Zesazo Beiwa fa Likepe Lapili,” fomukona kufumana litaba zenebeilwe fa likepe lapili cwanoñu fa.

• Fa jw.org, musine fokuñozwi kuli “Sifalana,” mi musine fokuñozwi kuli “Litaba Zeñwi,” kihona mukasina fokuñozwi kuli “Litaba Zeñwi Zetusa.” Hape mwa JW Library^®, musine fokuñozwi kuli “Library,” mi musine fokuñozwi kuli “Article Series,” kihona mukasina fokuñozwi kuli “Litaba Zeñwi Zetusa.” Kalulo ye inani litaba zeñata zenebeilwe fa likepe lapili.