1. Tit kong yo acel ma Yubu ongeyo kwede Jehovah maber?

 YUBU obedo ka nywako lok ki dano mapatpat i kare me kwone ducu, ento lok ma pud dong ogudo cwinye loyo obedo i kin en ki Lubanga Jehovah. I lokgi meno, Jehovah owaco ki Yubu ni kong onen jami mogo ma En ocweyo. Man onongo bikonyo Yubu me ngeyo kit ma Jehovah ryek kwede dok onongo bijingo gen pa Yubu ni Jehovah twero miyo ki Luticce jami ma gimito. Me labolle, kipoyo wi Yubu ni Lubanga gwoko lee ducu, pi meno en bene twero gwoko Yubu. (Yubu 38:39-41; 39:1, 5, 13-16) Yubu onongo pwony mapol adada madok i kom kit pa Lubanga ki i ngiyo cwecce mogo.

2. Pingo i kare mukene wanongo ni tek me ngiyo cwec pa Jehovah?

² Wan bene watwero nongo pwony mapol i kom Lubanga ka wangiyo cwecce. Ento i kare mukene wanongo ni timo meno tek. Ka wabedo i boma madit, ci twero bedo tek me neno jami mapol ma Jehovah ocweyo i kwowa me nino ducu. Ento kadi bed wabedo i caro, waromo nongo ni pe watye ki cawa muromo me ngiyo cwec pa Jehovah. Pi meno, kong dong wanyamu pingo pire tek ni omyero wakwany kare dok watute matek me ngiyo cwec. Wabinyamo kit ma Jehovah ki Yecu gutiyo ki cwec me miyo pwony ki gin ma watwero timo me nongo pwony mapol ki i kom ginacweya.

3. Ngo ma nyuto ni Jehovah onongo mito ni Adam onong mit pa cwecce?

³ Jehovah onongo mito ni dano mukwongo onong mit  pa Cwecce. I kare ma Lubanga ocweyo Adam, En okete me kwo i paradic mamwonya adada dok omine tic me gwoko ki nyayo wang cone. (Acak. 2:8, 9, 15) Go kong yomcwiny ma Adam obedo kwede me neno ka kodi twi dok ginapita turu. Adam pud dong obedo ki mot madit adada me gwoko poto me Eden! Jehovah bene omiyo ki Adam tic me cako nying leyi mapatpat. (Acak. 2:19, 20) Jehovah onongo twero cako nying leyi magi en kikome; ento en omiyo tic meno bot Adam. Labongo akalakala mo, ma peya Adam ocako nying lee mo, en onongo kong ngiyo lee meno maber wek enen kit ma nen kwede ki kit ma timme kwede. Labongo akalakala mo, Adam onongo mit pa tic meno adada. Man nen calo okonye me niang kit ma Jehovah ryek kwede ki kit ma cwecce leng kwede dok gitye me aura adada.

4. (a) Tit kong tyen lok acel mumiyo omyero wangi cwec? (b) Cwec mene ma in itye ki pwoc adada pire?

⁴ Tyen lok acel ma omiyo omyero wangi cwec aye pien Jehovah mito ni watim meno. En owacciwa ni, “Kong wuting wangwu malo wunen polo.” Dok openyo ni: “Anga ma oketo jami magi?” Lagamme nen ka maleng. (Ic. 40:26) Jehovah ocweyo jami ducu ma tye i polo kacel ki ma tye i lobo ki ma i nam dok jami magi ducu pwonyowa gin mo i kome. (Jab. 104:24, 25) Dok itam i kom kit ma Lubanga ocweyowa kwede. En ocweyowa ki kero me neno kacel ki bedo ki pwoc pi jami maleng ma kicweyogi. En bene ocweyowa ki kero me neno, winyo, mako, bilo, ki ngweyo jami dok meno weko twere piwa me nongo mit pa jami ducu ma en ocweyo.

5. Ma lubbe ki Jo Roma 1:20, adwogi maber ango ma wanongo ki i ngiyo cwec pa Jehovah?

⁵ Baibul tittiwa tyen lok mukene ma pire tek ma omiyo omyero waket cwinywa ka ngiyo cwec. Ginacweya pwonyowa kit pa Jehovah. (Kwan Jo Roma 1:20.) Me labolle nen kong jami ma Jehovah ocweyo, ci inen kit ma kiyubogi kwede ki diro adada. Tika pe ginyuto ryeko pa Lubanga? Dok itam i kom kwai cam mapatpat ma watwero camone. Meno nyuto ka maleng ni en maro dano. Ka waneno kit pa Jehovah i jami ma en ocweyo, wabedo ki kare me ngeyo en maber dok man weko wanyikke cok kwede. Kong dong wanenu yo mogo ma Jehovah otiyo kwede ki cwec me miyo pwony ma pigi tego bot dano.

6. Pwony ango ma watwero nongo ki i neno winyi ma gituk wa i bor piny?

⁶ Jehovah obedo ngat ma gwoko cawa. Mwaka ki mwaka, nicakke i agikki me Febuari me o i dyere me Mai, Luicrael onongo gineno winyo acebe ka tuk kun cito tung kumalo. Lubanga owaco ki Luicrael ni, “winyo acebe ma bedo malo i polo bene ngeyo karene me dwogo cen.” (Jer. 8:7) Kit macalo Jehovah oyubo cawa pi winyi magi wek gulub, en bene otyeko keto kare ma bingolo iye kop i kom lobo man. I kare-ni, ka waneno winyi ma gituk wa i bor piny, meno poyo wiwa ni watwero bedo ki gen i kom “kare ma Rwot [Jehovah] ociko” me giko lobo man marac-ci woko.—Ibru 2:3.

7. Pwony ango ma watwero nongo ki i neno kit ma winyo tuk kwede? (Icaya 40:31)

⁷ Jehovah miyo teko bot luticce. Jehovah otiyo ki lanebi Icaya me waco bot Jone ni ebimiyo botgi teko dok “gibituk gicito malo calo ocur” ka giwinyo ni gigoro nyo cwinygi otur. (Kwan Icaya 40:31.) Luicrael onongo gungi ki neno winyo ocur ka gituk malo i wi yamo labongo tengo bwomgi. Gitimo man ka gilwore i wi yamo malyet ma tingogi malo kun gin kikomgi gitiyo ki kero manok adada. Man poyo wiwa ni Jehovah twero miniwa teko kit ma en miyo kwede teko bot winyi magi! Ka ineno winyo mo madit tye ka tuk malo adada labongo tengo bwome, wi opo ni Jehovah twero mini teko me ciro pekoni.

8. Gin ango ma Yubu opwonyo ki i ngiyo cwec pa Jehovah, dok gin ango ma watwero pwonyone?

⁸ Jehovah opore me nongo genwa. Jehovah okonyo Yubu me dongo genne i Kome. (Yubu 32:2; 40:6-8) I lokke ki Yubu, Lubanga oloko i kom Cwec mapatpat, calo lakalatwe, pol, kacel ki lutkot. Jehovah bene oloko i kom leyi mapatpat, calo jubi ki aguragura. (Yubu 38:32-35; 39:9, 19, 20) Jami magi ducu omoko ka maleng ni Lubanga tye ki teko adada kacel ki mar madwong ki ryeko ma lapore pe. Lok meno okonyo Yubu me dongo gen matek adada i kom Jehovah. (Yubu 42:1-6) I yo acel-lu, ka wakwanyo kare me ngiyo cwec, meno poyo wiwa ni Jehovah tek dok ryek makatowa tyen mapol adada. En bene twero dok bigiko pekkiwa ducu. Lok ada meno twero konyowa me jingo genwa i kome.

9-10. Gin ango ma ceng ki kot pwonyowa i kom Jehovah?

⁹ Yecu onongo ngeyo lok mapol madok i kom cwec. Macalo “ladiro tic,” en obedo ki mot me nywako kacel ki Wonne i cweyo polo ki lobo. (Car. 8:30) Lacen, i kare ma Yecu tye i lobo, en otiyo ki cwec me pwonyo lupwonnyene lok i kom Wonne. Kong wanenu pwony mogo ma en omiyo.

¹⁰ Jehovah nyuto mar bot dano ducu. I Pwonnye me Wi Got, Yecu oloko bot lulub kore i kom ceng ki kot, ma obedo jami ma pol pa dano pe giketo cwinygi iye tutwal. Jami aryo magi ducu pigi tek adada wek wabed kwo. Jehovah tye ki twero me twono jo ma pe giwore jami aryo ma pigi tego magi. Me ka meno, ki mar madit en miyo kot ki ceng bot dano ducu. (Mat. 5:43-45) Yecu otiyo ki lok ada meno me pwonyo lulub kore ni Jehovah mito ni wanyut mar bot dano ducu. Kare ducu ka waneno ceng ma tye ka poto ma kalane leng adada nyo kot ma tye ka cwer mot kun kweyo piny, watwero tam i kom mar pa Jehovah pi dano ducu. Lanenne twero  tugo cwinywa me nyuto mar ma kit meno ki tito kwena bot dano ducu.

11. Cuko cwiny ango ma watwero nongo ki i ngiyo winyi?

¹¹ Jehovah miniwa jami me kom ma mitte. I Pwonnye me Wi Got meno, Yecu owaco ni: “Kong wunen winyo me polo; pe gicoyo kodi dok bene pe gikayo, pe bene gidilo cam i dero, ento Wonwu ma tye i polo pud pitogi.” Twero bedo ni jo ma gubedo ka winyo lok pa Yecu onongo gitwero neno ka winyi tuk malo ka wigi i kare ma Yecu openyogi ni: “Wun pe piwu tek kato pigi woko?” (Mat. 6:26) Meno pud dong obedo yo maber adada me cuko cwinywa ni Jehovah biminiwa jami me kom ma mitte! (Mat. 6:31, 32) Pwony man ma wanongo ki i cwec pud medde ki cuko cwiny lutic pa Lubanga ma lugen wa i kare-ni. Laminwa mo matidi ma tye painia ma a ki i lobo Spain onongo cwinye otur pien pe twero nongo ot maber me apanga. Ento i nge neno winyi ma gitye ka camo kodi ki ocuga, wiye ocako pye mot. En owaco ni, “Winyi magi gupoyo wiya ni Jehovah gwokogi dok ni en bene bigwoka.” Ma pe orii i nge meno, laminwa-ni onongo kabedo mo maber.

12. Ma lubbe ki Matayo 10:29-31, gin ango ma ojwinyojwiny gipwonyowa i kom Jehovah?

¹² Jehovah maro wan ducu ki acel acel. Ma peya Yecu ocwalo lukwenane ka tito kwena, en okonyogi me loyo lworo ma onongo gitye kwede i kom aunauna. (Kwan Matayo 10:29-31.) En otimo meno ki lok i kom winyo mo ma onongo ngene adada i lobo Icrael: ojwinyojwiny. I kare pa Yecu winyo magi onongo pe kiterogi calo gin ma pire tek. Ento en owaco ki lupwonnyene ni: ‘Mo acel pe poto piny i ngom ma Wonwu pe ngeyo.’ Ci omedo ni: “Piwu tek twatwal makato pi ojwinyojwiny mapol.” I yo meno, Yecu ocuko cwiny lupwonnyene ni Jehovah marogi ki acel acel, dong onongo pe gitye ki tyen lok mo keken me lworo aunauna. Nen calo lupwonnyene wigi obedo ka po i kom lok pa Yecu man ka onongo gitye ka tito kwena i taun nyo i kin caro ci guneno ojwinyojwiny. Kare ducu ka ineno winyo mo matidi, wi opo ni Jehovah mari pien in bene piri “tek twatwal makato pi ojwinyojwiny mapol.” Ki kony ma mege, itwero cung matek i kom aunauna.—Jab. 118:6.

13. Ngo ma bikonyowa me nongo pwony ki i kom cwec?

¹³ Watwero nongo pwony mukene mapol i kom Jehovah ki i ginacweya. I yo ma nining? Mukwongo, omyero wakany kare me ngiyo ginacweya. I nge meno, omyero watam matut i kom gin ma cwec meno pwonyowa i kom Jehovah. Timo jami magi pe twero bedo yot kare ducu. Laminwa mo ma nyinge Géraldine, ma a ki i lobo Cameroon, owaco ni, “Adongo  i boma madit, pi meno mitte ni atute matek me ngiyo ginacweya.” Laelda mo ma nyinge Alfonso otito ni, “Apwonyo ni omyero akwany kare me bedo kena wek angi cwec pa Jehovah dok alwod gin ma gipwonya i kom Jehovah.”

14. Gin ango ma Daudi opwonyo i kare ma en obedo ka lwodo lok i kom cwec pa Jehovah?

¹⁴ Daudi okwanyo kare me tam matut i kom cwec pa Lubanga. En owaco ki Jehovah ni: “Ka aneno polo, ma in itiyo ki cingi, ki dwe ki lakalatwe ma iketogi i kabedogi liking; dano kono gin ango ma miyo itamo pire?” (Jab. 8:3, 4) Ada, i kare ma Daudi obedo ka neno polo i dyewor, en pe onongo mit pa ngiyo lakalatwe keken. En bene olwodo lok i kom gin ma lakalatwe twero pwonye i kom Lubanga. En opwonyo kit ma ryeko kacel ki teko pa Jehovah dit kwede. I kare mukene, Daudi obedo ka lwodo kit ma edongo kwede i i minne. I kare ma en obedo ka lwodo kit ma kiyubo kwede kome i yo mamwonya adada, en odongo pwoc pi ryeko pa Jehovah.—Jab. 139:14-17.

15. Mi kong labol mogo i kom kit pa Jehovah ma ineno i kom cwec. (Jabuli 148:7-10)

¹⁵ Calo Daudi, pe mitte ni iyeny ki ka mabor adada ginacweya mo ma itwero lwodo lok i kome. Ka ingiyo kabedo ma orumi, itwero neno jami mapol ma bikonyi me pwonyo lok mapol i kom kit pa Jehovah. Me labolle, itwero niang teko pa Jehovah ka iwinyo ceng tye ka lyeto del komi. (Jer. 31:35) Tam i kom ryeko pa Lubanga ka ineno winyo mo tye ka gero ode. Tam i kom kit ma Jehovah obedo kwede ngat ma cwinye yom dok mito ni wanyer, ka ineno latin gwok tye ka ryemo yibe. Dok ipwo Jehovah pi mare kare ducu ka ineno mego mo tye ka tuko ki latinne. Watye ki kare mapol adada me pwonyo lok i kom Jehovah pien jami ducu ma en ocweyo pake, kadi bed gubedo jami matino nyo jami madongo, jami ma tye cok nyo jami ma tye ka mabor.—Kwan Jabuli 148:7-10.

16. Gin ango ma omyero wamok tamwa me timone?

¹⁶ Lubangawa ryek, lamar, tek, dok jami ducu ma en oyubo gileng adada. Watwero neno kite magi ki mukene bene ka waketo cwinywa ka ngiyo cwec ma orumowa. Dong, wan ducu omyero wakwanyu kare me nongo mit pa cwec ki me lwodo gin ma cwec magi gipwonyowa i kom Jehovah. Ka watimo meno, wabinyikke cok ki Lacwecwa. (Yak. 4:8) I pwony ma lubo man, wabineno kit ma lunyodo gitwero tic kwede ki cwec me konyo lutinogi nyikke cok ki Jehovah.