1. Иов Иегова керегинде канайып кӧптӧдӧ билип алган?

 ИОВ кӧп улусла куучындашкан. Је бир куучын оныҥ санаазына бастыра јӱрӱмине артып калган — ол Иегова Кудайла куучындашкан. Иовко Иегованыҥ ойгорына ла ол бойыныҥ ишчилерин кичееп турган деп, бӱдӱмјизин тыҥыдар керек болгон. Оныҥ учун Иегова Иовты сӱреен кайкамчылу кезик јайаандарга ајару этсин деп айткан. Иегова тындуларды да кичееп турарда, айдарда Иовты да кичеер (Иов 38:39—41; 39:1, 5, 13—16). Иов Иегованыҥ јайаандары керегинде шӱӱп сананала Иегованыҥ кылык-јаҥдарын кӧптӧдӧ билип алган.

2. Бистерге Иегованыҥ јайаандарын ајыктап турарга не буудактаар болор?

² Бис те Иегованыҥ јайаандарын ајыктап, ол керегинде кӧпти билип алар аргалу. Је кезикте мыны эдерге јеҥил эмес болот. Нениҥ учун дезе јаан калада јадып турган улуста ар-бӱткенди ајыктаарга чек арга болбой јат, а деремнеде јадып турган улуста јайаандарды ајыктаарга ӧй табарга кӱч болот. Оныҥ учун бу јӧрмӧлдӧ нениҥ учун Иегованыҥ јайаандарын ајыктаарга албаданып ӧй таап турар керек деп кӧрӱп ийерис. Бисти ӱредерге, Иегова ла Иисус јайаандарды канайып тузаланып турганын кӧрӧрис, анайда ок ар-бӱткенди ајыктап бис база неге ӱренип алар аргалу деп кӧрӱп ийерис.

3. Иегова Адамды јайаандарга сӱӱнип јӱрзин деп кӱӱнзегени недеҥ кӧрӱнет? Јартап беригер.

³ Иегова баштапкы кижини, Адамды, јайаандарды кӧрӱп, сӱӱнип јӱрзин деп кӱӱнзеген. Иегова Адамды сӱреен јараш райга јатыргызып, оны кичееп јаандатсын деп јакару  берген (Баш. 2:8, 9, 15). Сананып ийзеер, канайып Адам јердеҥ ӱренниҥ ӧзӱп келеткенин, чечектердиҥ јайылып турганын кӧрӱп, сӱреен кайкаган болор. Бу баштапкы кижиге сӱреен јаан кӱндӱ болгон! Анайда ок Кудай Адамга тындуларды адап салзын деп јакылта берген (Баш. 2:19, 20). Бу јакылтаны Иегова бойы да эдер эди, је оны Адамга берген. Адам тындуларга ат берердеҥ озо, олорды лаптап шиҥдеген болор. Бу јакылта Адамга сӱреен јараган. Бу ӱзе неме Иегованыҥ ойгорын ла оныҥ јайаган јайаандары кандый јилбилӱ ле јараш деп оҥдоорго болушкан.

4. а) Иегованыҥ јайаандарын нениҥ учун ајыктап турар керек? б) Слерге Иегованыҥ кандый јайаандары эҥ ле тыҥ јарап турган?

⁴ Бистерге Иегованыҥ јайаандарын нениҥ учун ајыктаар керек? Баштапкы шылтак, анайып ол бойы кӱӱнзеп јат. Темдектезе, ол мынайып айткан: «Бажыгарды кӧдӱрип, теҥериге кӧрӱгер». Оноҥ ол мынайып сурайт: «Мыныҥ ончозын кем јайаган?» Каруузы дезе јарт эмей (Иса. 40:26). Иегова јаҥыс ла теҥерини кайкамчылу этире јайабаган, ол јерди де, талайды да сӱреен кайкамчылу этире јайаган. Бу ончо неме бисти Иегова керегинде кӧп немеге ӱредет (Сар. 104:24, 25). Анайда ок кижини канайып јайаганын сананып кӧрзӧӧр дӧ. Ол кижини ар-бӱткенди сӱӱзин деп јайаган. Оноҥ ол сӱреен кайкамчылу ар-бӱткенле јакшызынып јӱрзин деп беш сезим берген: кӧрӧтӧн лӧ угатан аргалар, колло тудуп сезетен, немениҥ јыдын ла амтанын билетен аргалар.

5. Римдегилерге 1:20-ле болзо, Иегованыҥ јайаандарын ајыктаганыстаҥ кандый туза аладыс?

⁵ Агару Бичикте Иегованыҥ јайаандарын нениҥ учун ајыктап кӧрӧр керек дегениниҥ база бир јаан шылтагы бар. Јайаандар биске Иегованыҥ кылык-јаҥын ачат. (Римдегилерге 1:20, ЈТ кычырыгар.) Айландыра турган ар-бӱткенди ајыктап кӧрзӧӧс, Кудайдыҥ ойгорын кӧрбӧйдис пе? Амтанду јӱзӱн-јӱӱр курсакты да сананзаас, Иегованыҥ улусты сӱӱп турганы иле кӧрӱнет. Бис јайаандардаҥ Иегованыҥ кылык-јаҥын кӧрӱп турзаас, оны оноҥ кӧп билип аладыс ла ого оноҥ јуук болорго кӱӱнзейдис. Эмди дезе Иегова улусты јаан учурлу чындыктарга ӱредерге канайып јайаандарга ајару эткенин кӧрӱп ийектер.

6. Кеткин куштардаҥ бис неге ӱренедис?

⁶ Иеговада бойыныҥ расписаниези бар. Кажы ла јыл кочкор айдыҥ учынаҥ ала кӱӱк айдыҥ ортозына јетире Израиль албаты олордыҥ орооны ажыра тӱндӱк јаар учуп бараткан аисттерди кӧрӧтӧн. Теҥеридеги  аист бойыныҥ ӧйин билер деп, Кудай израильтяндарга айткан (Иер. 8:7). Канайып Иегова ол куштардыҥ учатан ӧйин тургузып салган болордо, анайып ла ол бойыныҥ јаргызын бӱдӱретен кӱнди тургузып салган. Бӱгӱнги кӱнде теҥериде учуп бараткан кеткин куштар, Иегова бу телекейди јоголтор кӱнди тургузып салган деп, эске алындырат (Авв. 2:3).

7. Учуп бараткан куштарды кӧрзӧӧс, бу бисти неде бӱдӱмјилеер аргалу? (Исайя 40:31).

⁷ Иегова бойыныҥ ишчилерине ийде-кӱч берет. Бис ийде-кӱчисти јылыйтып эмезе санааркап турзаас, Иегова Исайя ажыра мындый сӧстӧр айдат: «Олор мӱркӱттер чылап канаттарын јайып, кӧдӱрилип чыгар». (Исайя 40:31 кычырыгар.) Бийик теҥериде учуп јӱрген мӱркӱттерди израильтяндар јаантайын кӧрӱп туратан. Бу куштар јердеҥ чыгып турган јылу кейдиҥ болужыла ӧрӧ кӧдӱрилзе, кӱчин кӧп јылыйтпай јат. Кандый јакшы эзедӱ дезеер! Иегова мӱркӱттерге ийде-кӱч берип турган болордо, ол бойыныҥ ишчилерине де ийде-кӱчти берер аргалу. Оныҥ учун бир де талбынбай там ла бийиктеп бараткан кушты кӧрзӧӧр, ундыбагар: Иегова слерге анайып ла кӱчтердиҥ ӱстине кӧдӱрилип чыгарга болужар.

8. Иов Иегованыҥ јайаандары керегинде шӱӱп сананып неге ӱренген? Биске нениҥ учун јайаандар керегинде шӱӱп сананып турар керек?

⁸ Иеговага бӱткӱлинче бӱдерге јараар. Иов Иеговала куучындашкан кийнинде ого оноҥ тыҥ бӱдӱп баштаган (Иов 32:2; 40:6—8). Иегова Иовтыҥ ајарузын јылдыстарга, булуттарга, талайга, анайда ок јерлик букага ла атка эткен (Иов 38:32—35; 39:9, 19, 20). Иегова бу јайаандары ажыра Иовко јӱк коркышту јаан ийде-кӱчин кӧргӱскен эмес, је анайда ок сӱреен тыҥ сӱӱжин ле ойгорын кӧргӱскен. А бу дезе, Иовко Иеговага оноҥ тыҥ бӱдерге болушкан (Иов 42:1—6). Мынайып ла јайаандарды шиҥдеп турзаас, бу биске Иегова бистеҥ канча катапка ойгор ло ийде-кӱчтӱ деп, эске алындырат. А бу дезе, Иегова бистиҥ уур кӱчтеристиҥ аайына чыгып салар аргалу деп кӧргӱзет. Ол мыны кыйалта јогынаҥ эдип салар. Анайып этсеес, бистиҥ Иеговага бӱдӱмјибис оноҥ тыҥ болуп калар.

9, 10. Бис кӱнди ле јаҥмырды кӧрӱп, Иегованаҥ неге ӱренедис?

⁹ Иисус ар-бӱткенди сӱреен јакшы билген. Нениҥ учун дезе ол јер-телекей јайалып турарында турушкан. Агару Бичик Иисусты «ус ишчи» деп адап јат (Укаа 8:30). Кийнинде Иисус јерде болордо, ӱренчиктерин Адазы керегинде ӱредип турарда, јайаандарды эптӱ этире тузаланган. Иисус неге ӱреткенин кӧрӱп ийектер.

¹⁰ Иегова бастыра улусты сӱӱп јат. Иисус Кырдагы куучынында ӱренчиктерине кӱн ле јаҥмыр керегинде куучындаган. Кӧп улус јаҥмырды ла кӱнди керекке де албай јат. Је олор јогынаҥ јердиҥ ӱстинде јӱрӱм болбос то эди. Иегова кӱнди ле јаҥмырды ого иштебей турган улустаҥ айрып алар да јаҥду болзо, ол оны бастыра улуска берет (Матф. 5:43—45). Иисустыҥ бойыныҥ ӱренчиктерине айтканыла болзо, Иегова бисти бастыра улусты сӱӱзин деп кӱӱнзейт. Бис кӱнниҥ кызарып ажып јатканын ла јаҥмырдыҥ тыбырап јаап турганын кӧрӱп турзаас, Иегованыҥ бастыра улусты сӱӱп турганын шӱӱп сананар аргалу. Иегованаҥ тем алып турзаас, бастыра улуска јакшы баштанып, јарлаар аргалу болорыс.

11. Куштарды ајыктап кӧргӧнис бӱткенисти канайып тыҥыдар?

¹¹ Иегова биске эҥ керектӱзин берет. Иисус Кырдагы куучынында мынайып айткан: «Теҥериниҥ куштарына кӧрзӧгӧр:  олор аш чачпайдылар, кеспейдилер, амбарына јууп урбайдылар, је олорды Теҥеридеги Адагар азырайт». Иисус бу куучынды айдып турарда, оны угуп турган улус теҥеридеги учуп бараткан куштарды кӧрӱп турган болор. Анайда ок Иисустыҥ: «Слер олордоҥ чик-јок артык эмес бедигер?» — деп айткан јылу сӧстӧринеҥ оныҥ бистерди тыҥ сӱӱп турганын сезедис (Матф. 6:26, ЈТ). Анайып ла Иегова бистерге эҥ керектӱзин берерим деп айдат (Матф. 6:31, 32). Бу шӱӱлте Кудайдыҥ чындык ишчилерине бӱгӱнги де кӱнге јетире јаан ийде-кӱч берет. Испаниядагы бир јиит пионер болуп турган сыйын мынайып айдат: «Јадар тура табып болбой турала, мен тыҥ санааркай бергем. Је качан јиилектер јип турган кушкаштарды кӧрӱп ийеле, кӱӱним кӧдӱрилген. Иегова бу кушкаштарды мынайып кичееп чеберлеп турарда, меге де болушпас па деп санангам». Анай ла болуп калды. Удабай ла јадаар тураны таап алды.

12. Боро кучыйактарды ајыктап, бис Иегова керегинде нени билип аладыс? (Матфей 10:29—31).

¹² Иегова бистиҥ кажыбысты ла баалап јат. Иисус апостолдорын јарлап ийердеҥ озо, олорго удурлажулардаҥ коркыбаска болушкан. (Матфей 10:29—31 кычырыгар.) Ол оны канайып эткен? Ол Израильде эҥ ле кӧп кучыйактарга, боро кушкаштарга, ајару эткен. Ол ӧйдӧ боро кушкаштар баа јок болгон. Иисустыҥ айтканыла болзо: «Адагардыҥ табы болбогончо, экӱниҥ бирӱзи де јерге келип тӱшпес». Оноҥ база айтты: «Слер кӧп кучыйактардаҥ артык». Мынайып Иисус Иегова олордыҥ кажызын ла баалап турганын кӧргӱскен. Качан ӱренчиктери калаларда эмезе деремнелерде јарлап јӱреле, боро кушкаштарды кӧрӱп ийзе, бу шӱӱлте олордыҥ санаазына кирип туратан болор. Оныҥ учун сен кучыйактарды кӧрӱп ийзеҥ, Иегова сени баалап турган деп эске алынып тур. Ол тушта кандый да удурлажулардаҥ коркыбазыҥ (Сар. 118:6).

13. Јайаандардаҥ Иегова керегинде билип аларга нени эдер керек?

¹³ Бис јайаандардаҥ Иегова керегинде кӧптӧдӧ билип алар аргалу. Је мыны канайып эдер? Баштапкызында, јайаандарды ајыктап турарга ӧй табар керек. Экинчизинде, јайаандардаҥ Иегова керегинде нени билип аларын шӱӱп сананар керек. Је мынайып эдерге кезикте јеҥил болбой јат. Камерунда јадып турган Жеральди́на эје мынайда куучындаган: «Мен калада чыдагам. Оныҥ учун ар-бӱткенди ајыктап кӧрӧргӧ меге албаданарга келижип јат». Аксагал болуп турган Альфо́нсо ака мынай куучындаган: «Мен билип алдым, јайаандардаҥ Иегова керегинде билип аларга, ӧйди ӧнӧтийин пландап турар керек».

14. Давид Иегованыҥ јайап салганы керегинде сананып турала, неге ӱренип алган?

¹⁴ Давид Иегованыҥ јайаандары керегинде тереҥ шӱӱп сананган. Ол Иеговага: «Мен теҥерини, колыҥныҥ јайаанын,  сениҥ јайаган айды ла јылдыстарды кӧргӧмдӧ, сениҥ ундыбай турган ӧлӱмдӱ кижи кем андый? Сениҥ кичееп турган кижи уулы кем андый?» — деп айткан (Сар. 8:3, 4). Давид тӱнде теҥеридеги јылдыстарды ајыктап турала ол јер-телекейдиҥ учы куйузы јок јаан болгонын јӱк ле кайкаган эмес, ол теҥеридеги јылдыстар оныҥ Кудайы Иегова керегинде нени ӱредип турганын оҥдоп аларга санаган. Анайып Давид Иегова эҥ ойгор ло ийде-кӱчтӱ деп оҥдоп алган. Анайда ок Давид энениҥ ичинде оныҥ эди-каны канайып ӧзӱп јаандаганы керегинде сананган. Ол бу керегинде сананып турарда, Иегованыҥ эди-канды канайып кайкамчылу јайаганын оҥдойло быйаны оноҥ тыҥ кӧптӧгӧн (Сар. 139:14—17).

15. Кудайдыҥ јайаандарын ајаруга алып, Иегованыҥ кандый кылык-јаҥдарын кӧрӱп ийер аргалу деп, темдер айдып береер? (Сарын 148:7—10).

¹⁵ Слерге Давидке ле чилеп ар-бӱткенде не-немени табып шӱӱп сананарга кӱч эмес болбой. Айландыра ончо немени ајаруга алып кӧрзӧӧс, Иегованыҥ сӱреен јараш кылык-јаҥдарын кӧрӱп јадыс. Темдектезе, изӱ айас кӱнде кӱн чек ле ӧртӧп турза, Иегованыҥ ийде-кӱчин эске алыныгар (Иер. 31:35). А кучыйактардыҥ уйа тартып турганын кӧрӱп ийзеес, Иегованыҥ ойгорын сананыгар. А кӱчӱктер бойыныҥ куйругын сӱрӱжип айланып турза, Иегова кокырчы деп сананыгар. А качан эне балазын колына алып, јайкап турза, Иеговага сӱӱжи учун быйаныгарды айдыгар. Бисте Иегованы билип аларга сӱреен кӧп аргалар бар. Нениҥ учун дезе оныҥ јайаандары кичинек те болзын, јаан да болзын эмезе ыраак та болзын, јуук та болзын олор ӱзези Иегованы мактап јат. (Сарын 148:7—10 кычырыгар.)

16. Биске кандый амаду тургузар керек?

¹⁶ Бистиҥ Кудайыстыҥ ойгорына, ийде-кӱчине, сӱӱжине ле чӱмдеп јайаарына једери јок. Оноҥ бу да, ӧскӧ дӧ кылык-јаҥдары бисти айландыра турган јайаандардаҥ кӧрӱнет. Оныҥ учун токтой тӱжӱп, јайаандарды ајыктап турар керек. Айдарда, Иегова јайаандары ажыра биске кандый ӱредӱ берерге турганын билип аларга, ӧй табып турактар. Анайып Јайаачыбыска оноҥ јуук болуп каларыс (Иак. 4:8). Келер јӧрмӧлдӧ ада-энелер балдарын јайаандар ажыра Иеговага канайып јууктадары керегинде сурак јарталар.