1. Samaanay matongal ko kafanaˈ ni Yopu ci Yihofaan?

 ITINI i hakelong no ˈorip ni Yopu maedeng ˈalomanay ko sakasasowal ningra a tamdaw, kawra o satangongolay a maharatengay ningra i, o kasasowal ningra to Kawas ci Yihofaan. Itini toniya kasasowal, mikiriwiˈay a somowal ci Yihofa to pinapina nisangaˈan a maamaan, padama ci Yopuan pakasoˈlin cowa ko kaira aca no taneng ni Yihofa, iraayho ko ˈicel midimokos to sikawdan no Niyah. Tinakoen patalipaˈelalan Ningra ci Yopu, madimokosay Ningra ko pinaˈorip, o ngangaˈay madimokos Ningra ci Yopu. (Yopu 38:39-41; 39:1, 5, 13-16) Misimsim toniya nisangaˈan a maamaan ikor, iraayto ko tangongolay a kacipinang ni Yopu to capeling ni Yihofa.

2. Misolap a minengneng to nisangaˈan no Kawas a maamaan, hano cowa ko madoloay wa saan kita hani?

² Ano songilaˈen ita misolap a minengneng ko nisangaˈan no Kawas a maamaan i, mamatongal ko kafanaˈ Cingranan, kawra mihaen to demak cowa ko madoloay alatek. Ano itiniay i maci ko aroˈ ita, pasangaray manengneng ko serayan. Soˈlinto ano itiniay i inaka ko aroˈ, awaay ko toki ita misolap a minengneng to serayan alatek. Onini lalakaw mamilengo, mipalak to toki ato misaˈicel a mihaen to demak misamaanay hano o ciepocay. Mamilengoho, samaanay ci Yihofa aci Yis kalasaka dademak to nisangaˈan a maamaan pasifanaˈ kitaanan, ato mamisamaan kita mikitini tonini adihay ko mamananam pakayni ci Yihofaan.

3. Hano mafanaˈ kita to halamhamay ci Yihofa ci Ataman misolap a minengneng to nisangaˈan a maamaan?

³ Nisangaˈ ci Yihofa to saka cecay tamdaw ci Ataman i, halamhamay cingranan misongilaˈ a minengneng to nisangaˈan a maamaan.  Paitinian ni Yihofa cingra i makapahay a palosayan misolap a minengneng, halo palimoˈot cingranan pamatang to palosayan, ikor misakakahad tonini a palosayan. (Satapangan 2:8, 9, 15) Maedeng maˈaraw ni Atam ko kamolecis no sapaloma, mafociyar ko hana i, tada lipahakay a mahemek cingra! Midimokos to makapahay a Itin a palosayan, tada o taˈangayay a sapalemed cingranan. Papipanganganan ni Yihofa ci Atam to masakenakenaay a pinaˈorip. (Satapangan 2:19, 20) Soˈlinay i, ngaˈayay ci Yihofa midemak tonini a tayal, ˈarawhan pafelian Ningra ci Atam a papidemak. ˈAyaw no papangangan to pinaˈorip i, mamisongilaˈ ci Atam minengneng to kahacecay a pinaˈorip, mafanaˈ to pinangan namira. Maedeng palipahakay ci Ataman konini, iraho ko toki ningra matongal ko kafanaˈ to kakarayan Wama, matongal ko kasemer to taneng no Wama misangaˈ to makapahay ato kafahkaˈan a kihcod.

4. (1) Oha mamisolap a minengneng kita to nisangaˈan a maamaan, o maanan ko cecay lalangian hani? (2) O maanan a nisangaˈan no Kawas tada mikiriwiˈay kiso mahemek a rihakeden hani?

⁴ Oha mamisolap a minengneng kita to nisangaˈan a maamaan, o cecay lalangian i, halamhamay ci Yihofa kitaanan mihaen to demak. Sanay ko sowal Ningra kitaanan: ‘Ka picaˈa kamo pasikakarayan! Cima ko misangaˈay tonini a kihcod hani?’ Ihkalay ko caˈof. (Isaya 40:26) Itini kakarayan iraay ko tadamaanay a nisangaˈan ni Yihofa, itini i hadhad ato riyar iraay ko kasapaan a nisangaˈan Ningra, onini a kihcod papadama kitaanan mafanaˈ ci Yihofaan. (ˈOlic 104:24, 25) Haratengen hena, o nisangaˈan no Kawas a tamdaw iraay ko maanan a mikiriwiˈay. Hofoc han kita pairaan Ningra ko inaneng ita masemeren to kakapah no serayan, pairaan Ningra ko mata ita minengneng, ko tangila mitengil, mafanaˈ ko kamay misapinang, mihanek ko ngosoˈ, mitinac ko sema, pakayni tonini a lima inaneng ngangaˈay rihaked to kihcod a nisangaˈan.

5. Mikitini i Loma 1:20, songilaˈen ita misolap a minengneng ko nisangaˈan ni Yihofa a kihcod sanay, iraay ko maanan a epoc?

⁵ Iraayho ko cecay masakalimlaan a lalangian no mita misolap a minengneng to nisangaˈan a maamaan. Sowal no Fangcalay Cudad, ano mihaen kita to demak ngaˈayto mafanaˈ to capeling ni Yihofa. (ˈOsien ko Loma 1:20.) Tinakoen, i serayan iraay ko kasemeran a misafacoan, paihkalay konini to iraay ko mikiriwiˈay a taneng no Kawas. Ngaˈayay kita rihaked a komaen to masakenakenaay ˈaredetay a kakaenen, paihkalay konini tada maolahay ko Kawas kitaanan. Mikitini i nisangaˈan ni Yihofa a kihcod mahapinang ko makapahay a capeling Ningra, mamatongalto ko kafanaˈ Cingranan, masemeren ko falocoˈ sapiingidaw Cingranan. Dotoc mamanengneng ita, samaanan ni Yihofa tano nisangaˈan a maamaan pasifanaˈ ko tamdaw mafanaˈ to masakalimlaan a kimad Ningra.

6. Ngangaˈay kita mikitini kalinah no ˈayam a maˈefer mamananam ko maanan a kalimlaan?

⁶ O milimasmasay to tatokian ci Yihofa a Kawas. Itini nolitengan a Israil, to mihecahecaan nai hererekan no saka 2 folad tangasa tatenokan no saka 5 folad, maˈaraway no Israil tamdaw ko kalinah no ˈayam i kakarayan pasayra i kaˈamis a maˈefer. Sowal sa ko Kawas to Israil tamdaw: ‘Ano o maˈeferayto i kakarayan a ˈayam mafanaˈay to kalinahan a tatokian.’ (Yirimiya 8:7) Misaˈosian ni Yihofa ko kalinahan a tatokian nonini ˈayam, malecaday misaˈosiayto Cingra to sapisawkit a tatokian. Anini, ano maˈaraw ita malinah a maˈefer ko ˈayam i, mamaharateng o aitini ‘patonekan a tatokian’ palaˈafo ci Yihofa tonini mariˈangay a hekal.—Hapakuk 2:3.

7. Ano maˈaraw ita ko lidep i kakarayan kahmaw a maˈefer i, haharatengen ko maanan? (Isaya 40:31)

⁷ Pafeliay to ˈicel ci Yihofa to sikawdan Ningra. Pakaynian ni Yihofa to pairasolay a Isayaan mikiˈok ko finawlan Ningra, ano malonay anca matoled ko falocoˈ nangra i, papafelien Ningra cangra to ˈicel, ngaˈay cangra ‘matira o lidep micelak to sapikpik a maˈefer.’ (ˈOsien ko Isaya 40:31.) Nolitengan a Israil tamdaw marariday pakaˈaraw to lidep maˈefer i kakarayan. Sinoway a maˈefer ko lidep, patoor to talafekangay faedetay a fali a maˈefer. Haratengen ita konini, pafelien ni Yihofa to ˈicel konini a ˈayam, o mamihaen pafeli to ˈicel i sikawdan Ningra. Ano ikor, maˈaraw iso ko lidep caay ka pisaˈicel a mipikpik to sapikpik sakahmaw sa ˈakawang ˈakawang ko kaˈefer i kakarayan, haratengen konini mamihaen ci Yihofa pafeli tisowanan to ˈicel, ngaˈay kiso pakaremo to kihcod a pasangaray.

8. Miharateng ci Yopu to nisangaˈan ni Yihofa a maamaan mananamay ko maanan? Mamananam ita ko maanan?

⁸ Ngaˈayay tatiˈeren ita ci Yihofa. Padamaan ni Yihofa ci Yopu matongal ko kapitiˈer Cingranan. (Yopu 32:2; 40:6-8) Itini kasasowal aci Yopuan, masowalay ni Yihofa ko adihayay a nisangaˈan a maamaan, tinakoen o foˈifoˈis, toˈem ato fitiliˈ, efa ato kolong. (Yopu 38:32-35; 39:9, 19, 20) Onini a kihcod misawacayay, cowa ka ciˈicel aca ci Yihofa, matomesayho ko olah, mikiriwiˈay ko taneng. Mikitini tonini kasasowal, o nika pakasoˈlin ni Yopu ci Yihofaan matongalayto. (Yopu 42:1-6) Malecaday, ano songilaˈen ita misolap a minengneng ko nisangaˈan a maamaan mamahapinang ita, ci Yihofa iraay ko mikiriwiˈay a taneng ato ˈicel, mikikakaay kitaanan. Mankora pakasoˈlinen ita, cowa ka ciˈicel aca Cingra mipalahdaw to kihcod a pades ita, hanaca oha mamihaen Cingra to demak. Mafanaˈ toninian i, matongalay ko kapitiˈer ita Cingranan.

9-10. Mikitini i cidal ato ˈorad maˈaraway ita ko maanan a mikiriwiˈay capeling ni Yihofa?

⁹ Tada cipinangay ci Yis to serayan, o ‘ngaˈayay a sayho’ cingra, iraay ko fadangalan malacafay to Wama misangaˈ to maamaan no dohaw. (Taneng 8:30) Taynito ci Yis i fafekang no sera i, tano nisangaˈan a maamaan pasifanaˈ to nisawawaan mafanaˈ to kakarayan a Wama. Dotoc mamaˈaraw ita ko pipasifanaˈ ningra to nisawawaan a pina tinakoan.

¹⁰ Maolahay ci Yihofa to polong a tamdaw. Itini Sapasifanaˈ i Lotok, somowalay ci Yis to misangaˈay ci Yihofa to cidal ato ˈorad. Soˈliˈlin awaay ko maanan sanay ko ˈalomanay to cidal ato ˈorad, kawra o sakaˈorip no tamdaw konini. Soˈlinay haw i, ngangaˈay ci Yihofa eca ka pafeli to cidal ato ˈorad i caay ka pidoko Cingranan a tamdaw, kawra cowa ka pihaen Cingra. Iraay ko olah Ningra, pafeli tonini tosa kalimlaan a sapakaolah to polong a tamdaw maemin. (Matay 5:43-45) Misadak ci Yis tonini tosa tinakoan, oha sapasowalaw to nisawawaan, halamhamay ci Yihofa kitaanan paihkal to olah i polong a tamdaw. Ano maˈaraw ita ko kasapaan a picerem no cidal anca maˈaraw ko picepaˈ no ˈorad to sera i, ngaˈayay haratengen ko caay pisateked a olah ni Yihofa. O taˈarawan  Ningra mamikowad kitaanan mitosil to polong a tamdaw, paihkal to mahaenay ni Yihofa a olah.

11. Misolap a minengneng to maˈeferay a ˈayam i kakarayan mamacada ita ko maanan a sapakalalok?

¹¹ Midimokosay ci Yihofa to kaˈorip ita. Itini i Sapasifanaˈ i Lotok, sanay ci Yis: ‘Songilaˈen namo misolap a minengneng ko kakarayan maˈeferay a ˈayam. Cowa pikosam ko ˈayam, cowa pilitod, cowa pihoped to kakaenen i ˈalili, paˈoripanho no kakarayan Wama camira, kamo i, coko mikikakaay to maˈeferay ˈayam ko nika masakalimlaan saw?’ (Matay 6:26) Tada kasemeran kora sowal ni Yis! O sowal ningra papipakasoˈlinay kitaanan, o dadimokosen ni Yihofa ko kaˈorip no mita. (Matay 6:31, 32) Onini masakalimlaan a kimad padadotocay mikowad to madimadiay midoko to Kawas a tamdaw. Itini Sipanya, o cecay kaemangay misakafahay fafahiyan salikaka, to cecay liyad awaay mahela ko matatodongay a lomaˈ, matoleday ko falocoˈ. Kawra maˈaraw ningra ko ˈayam mitortor to parok ato heci i, makowadayto ko falocoˈ ningra. Sanay cingra: “Onini a ˈayam maharatengay ako, madimokosay ni Yihofa camira, mamidimokos Cingra takowanan.” Caka halafin, mahelaayto ningra ko matatodongay a lomaˈ.

12. Mikitini to Matay 10:29-31, misolap a minengneng to ˈalic papadama kitaanan maˈaraw to masamaanay a Kawas ci Yihofa hani?

¹² Misakaretengay ci Yihofa to kahacecay a tamdaw. ˈAyaw no cacorcoren ni Yis ko tarokos mitosil i, isalakatay a padama cangranan timolo a misiˈayaw to sacoli no tao. (ˈOsien ko Matay 10:29-31.) Somowalay cingra to ˈalic a ˈayam, o matenakay a ˈayam i Israil konini, itiya tora lintad awaay ko maanan a epoc no mahaenay a ˈayam. Kawra pasowalay ci Yis to nisawawaan: ‘Ano matefad ko cecay i sera i, Wama namo caay ka aeca mafanaˈ Cingra.’ Sanayho cingra: ‘Kamo i, mikikakaay to adihayay ˈalic ko nika masakalimlaan!’ Ora sowal ni Yis papipasoˈlinay to nisawawaan, o sasakaretengen ni Yihofa ko kahacecay nangra, mansa cowa ko hamamatalaw cangra to saroero. Ano itini i maci anca i inaka mitosil ko nisawawaan i, maˈaraw ko ˈalic maedeng maharatengay ko nano sowal ni Yis. Anini, ano maˈaraw iso ko mimingay a ˈayam i, haratengen tada misakaretengay ci Yihofa tisowanan a minengneng, samanen ‘mikikakaay to adihayay ˈalic ko nika masakalimlaan’ iso. Ira ci Yihofa midama tisowanan, akato makokiˈ to maamaan a sapacoli no tao.—ˈOlic 118:6.

13. Ano sapakayniaw kita i nisangaˈan a maamaan mitongal to kafanaˈ ci Yihofaan i, mamisamaan midemak hani?

¹³ Ngaˈayho pakayni nisangaˈan a maamaan cipinang kita to adihayay milingatay ci Yihofaan a demak. Sasamaan midemak hani? Salakat, limasmasen ko toki misolap a minengneng to nisangaˈan ni Yihofa. Dotoc, sasongilaˈen ita a miharateng, onini a nisangaˈan paˈaraway kitaanan to maanan a capeling ni Yihofa. Nolatekay, sapihaenaw to demak cowa ko madoloay. Naitiniay i Komayrong fafahiyan salikaka ci Keratien sanay: “Itiniay kako i maci a lomahad, mansa kakiemel kako misolap a minengneng to serayan.” Cecay malohemay malitengay ci Afanso sanay: “Mamikiemel milimasmas ko niyah to tekedan a tatokian, ngaˈ misongilaˈ a misolap minengneng to nidemakan ni  Yihofa, halo micalep a misimsim to nisangaˈan a maamaan paihkalay to masamaanay a Kawas ci Yihofa.”

14. Micalep a misimsim ci Tafiti i, mikitini i nisangaˈan ni Yihofa maˈaraway ningra to o masamaanay a Kawas Cingra?

¹⁴ Ci Tafiti misongilaˈay misolap a minengneng to nisangaˈan no Kawas, micalep a miharateng. Sanay ko sowal ningra ci Yihofaan: ‘Maˈaraw ako ko nisangaˈan no kamay Iso a kakarayan, manengneng ko nitelian Iso a folad ato foˈis i, maharateng ako, o maan ko tamdaw, iro haratengen Iso cingra saw?’ (ˈOlic 8:3, 4) Mitapal ci Tafiti to kakarayan to dadaya i, cowa ko nika cedaˈah aca to tataˈang no dohaw, misongilaˈay a misimsim to adihayay a foˈifoˈis patalahkalay to o masamaanay a Kawas ci Yihofa. Mahapinangay ningra ko nika tadamaan ni Yihofa. O roma i, misimsimay ci Tafiti to tireng ningra samaanay a lomahad i tiyad no wina. Maharateng ningra konini kasapaan a demak i, matongalay ko kafanaˈ to soˈlinay o citanengay ci Yihofa.—ˈOlic 139:14-17.

15. Patinakoen a mitadtad, mikitini i nisangaˈan ni Yihofa mamahapinang to o masamaanay a Kawas Cingra? (ˈOlic 148:7-10)

¹⁵ Malecad ci Tafitian, cowa ko tatayra kita i maraayay a pala, ngaˈayayto mahela ko adihayay nisangaˈan ni Yihofa. Nengnengen iso ko taliyok, misongilaˈ a misolap tonini nisangaˈan a maamaan, halo misongilaˈ a misimsim, mamaˈaraw ko makapahay capeling ni Yihofa. Tinakoen, ano dihkoen kiso to cidal i, haratengen ko nika ciˈicel ni Yihofa. (Yirimiya 31:35) Maˈaraw iso misangaˈ to padipongan ko ˈayam i, haretengen iso hakowaay ko taneng no Kawas. Maˈaraw ko waco milepel to wikol no niyah i, haratengen iso to mafanaˈay pakatawa ci Yihofa a Kawas. Maˈaraw ko wina mikalona to wawa i, haratengen iso maolahay ci Yihofa tisowanan, aakoˈiden Cingra. Tada adihayay ko toki ita tangongol ko kafanaˈ ci Yihofaan, samanen nisangaˈan Ningra a kihcod, ano taˈangayayto mimingayto, mangataayto maraayayto, pakahemekay Cingranan konini maemin.—ˈOsien ko ˈOlic 148:7-10.

16. Mamisetek kita to falocoˈ sasamaan ko demak hani?

¹⁶ Mikiriwiˈay ko taneng ni Yihofa, tada ciˈicelay Cingra. O siniˈadaay a Wama Cingra, hanaca o tadamaanay a misafacoay Cingra. Ano tano falocoˈen ita misolap a minengneng ato misimsim to maamaan no serayan i, mamahapinang ko masakenakenaay makapahay a capeling ni Yihofa. Nanay kita polong a tamdaw micerid a milimasmas to toki, misongilaˈ a misolap minengneng to nisangaˈan a maamaan, halo miharateng to o masamaanay a Kawas ci Yihofa. Mihaen i, o ngangaˈayto kita miingid to Misangaˈay kitaanan a Yihofa Kawas. (Yakop 4:8) Ilaenoay lalakaw mamilengo, wama wina sasamaan pakayni nisangaˈan a maamaan padama to wawa miingid ci Yihofaan.