1. ¿Chumi Job tañi doi quimal Jehová mu?

 JOB rume fentrenque che nütramcafi tañi mongen mu, huelu doi falin-ngechi nütram femi Chau Jehová engu. Tüfachi nütramcan mu, Jehová feipieyu inaduamfinge com cümeque dungu tañi deumael. Job inaduamfiel mu Jehová ñi deumael, quimürpui Jehová ñi rume quimün-ngen ca doi maneluhui Jehová mu ñi duamtuchequen. Raquiduamnge tüfa, Jehová cuidaquefi com pu culliñ, ¿chumngelu am cuidanoafulu ta Job? (Job 38:39-41; 39:1, 5, 13-16). Feimu Job pefiel mu com ñi deumael Jehová, quimürpui ñi chumngechi Dios ngen ta Jehová.

2. Quiñeque mu, ¿chemu cüdaungi quintuabel (ütrintuabel) Jehová tañi deuman?

² Iñchiñ ca cüme quimafuiñ ta Jehová inaduamfiliyiñ tañi deumael. Quiñeque iñchiñ müleliyiñ huaria mu, cüdautuafuiñ taiñ inaduamafiel Jehová ñi deumael. Huelu, ¿müleliyiñ lelfün mu? Ca cüdautuafuiñ taiñ cüme inaduamafiel Jehová ñi deumael. Fentren cüdau ñi mülen mu, huitracünuulayafuiñ taiñ cüme inaduamafiel Jehová ñi deumael. Feimu feula inaduamafiyiñ chumngelu rume cümei taiñ elcünual tiempo taiñ inaduamal Jehová ñi deumael. Ca peaiñ Jehová ca Jesús taiñ quimeltuqueteu com tañi deumael mu ca chem mülei taiñ femal taiñ doi quimafiel Jehová tañi deumael.

3. Jehová ayülebüi Adán tañi ayüucüleal tañi deuman mu, ¿chumngechi quimniiñ tüba?

³ Jehová deumafilu ti hunen huentru Adán, ayülefui ñi ayüucüleal com ñi deumael mu, elufi quiñe ayüfalcülechi mapu tañi miyahuam ca feipifi ñi cuidanieafiel ti mapu ca ñi com cümelcacünuafiel ti mapu (Gén. 2:8, 9, 15). Raquiduamnge Adán ñi pefiel ñi tremcülen pichique anümca ca ñi rayülerpun, ¿ayüucülepelafui ta Adán? Ca quiñe falin-ngechi cüdau niefui ñi cuidayafiel Edén pingechi jardin. Jehová ca feipifi Adán ñi tuculelafiel üi com culliñ ñi deumael (Gén. 2:19, 20). Raquiduamnge, Jehová quisu tuculelafui üi pu culliñ ñi deumael, huelu elufi Adán tañi femal. Feimu Adán hune mülefui ñi cüme peafiel ti culliñ ñi chumquen ca ñi chumngen, fei hula mülefui ñi tuculelafiel üi. ¿Rume ayüucülepelafui Adán ñi femal tüfachi cüdau? Com tüfachi dungu tañi femün Adán, quimürpui Chau Jehová ñi rume quimün-ngen ca com ñi afmatufalngen Jehová ñi deumael.

4. 1) ¿Chemu cümeabüi taiñ ngüneduamal tati deuman mu? 2) ¿Chem dungu deuman mu doi ayübimi?

⁴ Jehová ayüniei iñchiñ taiñ cüme inaduamafiel com tañi deumael. Fei feipieiñmu: “Püraquintumün callfü huenu meu. ¿Inei am ta deumai com feichi dungu?” pi Jehová (Is. 40:26). Jehová deumalafi com mülelu huenu mu müten, ca deumafi com mülelu mapu mu ca ti lafquen. Com tüfa quimeltuqueiñmu cümeque dungu Chau Jehová mu (Sal. 104:24, 25). Ca raquiduamnge chumngechi taiñ deumaeteu iñchiñ ta Jehová. Deumaeiñmu taiñ ayühuelaeteu com tañi deumael ta Jehová. Ca elueiñmu nge taiñ adquintuam, pilun taiñ allcütuam, yu taiñ nümütuam, cuhu taiñ topayafiel chem rume, ca elueiñmu hun taiñ cümentual.

5. Romanos 1:20 tañi eipin, ¿chemu cümi taiñ ngüneduamal tati deuman mu?

⁵ ¿Ca chem dungu mu mülei taiñ cüme inaduamafiel Jehová ñi deumael? Cüme inaduamfiliyiñ, quimaiñ ñi chumngen ta Jehová (papeltunge Romanos 1:20). Raquiduamnge Jehová tañi deumael com cüme deumafi, tüfa pengeli Jehová tañi rume quimün-ngen. Ca Jehová elcünui caquerumechi iyael taiñ iyafiel, femngechi pengeli taiñ piuqueyenieteu. Feimu llemai, taiñ inaduamfiel mu Jehová ñi deumael, doi cüme quimfiyiñ ta Jehová ca doi fülconqueiñ quisu meu. Feula  peafiyiñ chem dungu quimeltuqueiñmu Jehová tañi deumael mu.

6. Pu üñüm amutun mu cañpüle, ¿chem quimeleleiñmu?

⁶ Jehová elcünuquei quiñe medin antü ñi femafiel ti dungu. Fill tripantu epe afchi febrero cüyen ca rangiñ conchi mayo, pu Israel che pequefuingün pu üñüm ñi amun norte püle. Fei Jehová raquiduamelfi pu Israel che feitachi üñüm quimnieingün chem cüyen mu ñi amual feiti püle (Jer. 8:7). Jehová elelfi feichi cüyen ñi amutual feitachi pu üñüm. Feimu fachantü pefiliyiñ pu üñüm ñi amutun cañpüle, raquiduamaiñ Jehová apümcayafi com huesaque dungu ti “medin antü mu” (Hab. 2:3).

7. Pu üñüm tañi müpüpüram, ¿chem quimeleleiñmu? (Isaías 40:31).

⁷ Jehová eluquefi nehuen tañi serfiqueteu. Jehová feipicünui pu Israel che hueñancülele ñi eluafiel ta nehuen engün, fei ñi ‘müpüpürayal quiñe ñamcu reque’ (papeltunge Isaías 40:31). Pu ñamcu müpüpüraquefuingün ñi yenieteu ti cürüf, fei cüdautuquelafuingün ñi femal. Feimu llemai, Jehová chumngechi eluquefi nehuen pu ñamcu ñi müpüpürayal, ca femngechi eluquefi nehuen tañi pu serfiqueteu. Ca eimi pefilmi quiñe üñüm ñi müpüpüran huenu ñi yenieteu ti cürüf, acordanienge Chau Jehová quelluafeimu eimi tami chaftuafiel huesaque dungu.

8. Job, ¿chem quimpoi tati deuman mu, ca chem quimeleleiñmu?

⁸ Jehová ta maneluhun-ngei. Job doi nierpui maneluhun Chau Jehová mu (Job 32:2; 40:6-8). Jehová nütramcafilu ta Job feipifi quiñeque dungu tañi deumael. Nütramcafi pu huangülen mu, pu tromü ca pu llüfque. Jehová ca nütramcafi ti aucan toro ca ti cahuellu (Job 38:32-35; 39:9, 19, 20). Com tüfa pengeli Chau Dios niei com nehuen, piuqueyequeiñmu ca niei fentren quimün. Ñi feipieteu mu ta Jehová, Job doi maneluhui Jehová mu (Job 42:1-6). Fachantü inaduamfiliyiñ Jehová ñi deumael, quimafiyiñ Chau Jehová doi nehuen-ngei ca doi quimün-ngei iñchiñ mu. Ca femngechi quimürpuaiñ Jehová ñi apümafiel com ti huesaque dungu, feimu doi maneluucüleiñ ta Jehová mu.

9, 10. Antü tañi pelon ca mahun, ¿chem quimeleleiñmu Jehová mu?

⁹ Jesús com quimniei com ñi deumael ta Jehová. Jehová deumafilu com ñi mülen, Jesús quelluntucueyu (Prov. 8:30). Fei Jesús mülepalu mapu mu, ñi quimeltuafiel pu che adentucünuquefui Jehová ñi deumael mu. Peafiyiñ quiñeque dungu ñi quimeltuel ta Jesús.

¹⁰ Jehová com che piuqueyequefi. Quiñe rupa, Jesús nütramcafi tañi pu discipulo epu dungu mu ñi deumael ta Jehová: ti antü ca ti mahun. Tüfachi epu dungu rume duamfali iñchiñ taiñ mongeleal. Jehová ellcalafui tüfachi epu dungu tañi pu serfiquenoeteu mu, huelu femlai. Com che elufi ti antü ca ti mahun (Mat. 5:43-45). Feimu Jesús quimeltufi tañi pu discipulo ñi piuqueyeafiel com pu che. Pefiliyiñ ñi epe conün ti antü cam ñi cüme mahuncülen, loncontucunieaiñ Jehová com che piuqueyeniefi. Femngechi inayentuniefiliyiñ ta Jehová, amuldungulelafiyiñ com pu che.

11. Taiñ quintubel pu üñüm, ¿chumngechi nehuentueiñmu?

 ¹¹ Jehová eluqueiñmu chem taiñ duamnien taiñ mongeleal. Quiñe rupa Jesús feipifi pu che: “Cüme ngüneduamfimün pu üñüm müpüyauquelu. Nganquelai, cosechaquelai ca elquetranhue mu ngülümquelai ñi iyael. Huelu tamün Huenu Chau eluqueyu iyael. Eimün doi falimün pu üñüm mu, ¿felelai?” (Mat. 6:26). Femngechi Jesús quimeltuqueiñmu Jehová com quiñeque cuidaqueiñmu (Mat. 6:31, 32). Quiñe lamngen precursorangelu, España mu tuulu, pelai quiñe cüme ruca tañi müleam, feimu huesa duamcülefui. Taiñ lamngen pefiel mu pu üñüm ñi imequen quiñeque fün, fei doi tüngnagtui. Fei feipi: “Jehová cuidaquefi tüfachi pu üñüm, fei ¿chumngelu cuidalayafeneu iñche?”. Rupachi antü mu, ti lamngen pei quiñe ruca tañi müleam.

12. Mateo 10:29-31 tañi eipin püchüque üñüm mu, ¿chem quimeleleiñmu?

¹² Jehová com quiñeque falintuqueiñmu. Jesús petu ñi huercünofiel ñi amuldungumeal tañi pu apostol, quellufi engün tañi llicanoafiel quiñeque che caiñetueliyu (papeltunge Mateo 10:29-31). Jesús adentucünufi tañi quimeltuel pu pichique üñüm mu. Feitachi pichique üñüm müte falilafui Jesús ñi antü mu, huelu Jesús feipifi tañi pu discipulo: “Quiñe pichi üñüm no rume ütrüfnagquelai mapu mu tamün Huenu Chau ñi quimnon. Eimün doi falimün ta com feiti pichique üñüm meu”. Fei Jesús quimeltufi tañi pu discipulo Jehová rume falintunieyu caque quiñeque engün, feimu ngelai ñi llicaleal engün quiñeque che inacaeliyu. Feimu petu ñi amuldungun mu engün, pefiel mu pu pichique üñüm, ¿raquiduamquepelafuingün Jesús tañi feipieteu? Eimi pefilmi ti pichique üñüm, acordanienge Jehová rume falintunieimu eimi, ca doi falimi pu pichique üñüm mu. Feimu llicalelayaimi inacaelmu quiñeque che (Sal. 118:6).

13. ¿Chumaiñ taiñ doi quimpoal deuman mu?

¹³ ¿Chem mülei taiñ femal taiñ quimürpual Jehová mu? Hune mülei taiñ elcünual tiempo taiñ cüme inaduamafiel Jehová ñi deumael. Deu taiñ inaduamfiel mu, raquiduamaiñ chem taiñ quimeltueteu Jehová mu. Cüdautuafuiñ chi taiñ femal tüfa. Quiñe lamngen Géraldine pingelu, tuulu Camerún mapu mu, feipi: “Tremün quiñe huaria mu, feimu cüdautuquefun tañi inaduamafiel Jehová ñi deumael” pi. Quiñe loncolelu, Alfonso pingelu, feipi: “Raquiduamün ñi elcünual tiempo tañi quisuleal, femngechi ñi inaduamafiel Jehová ñi deumael ca ñi doi quimürpual quisu mu”.

14. David tañi ngüneduamal deuman mu, ¿chem quimpoi?

¹⁴ David cüme raquiduam mu tucuquefi Jehová ñi deumael, fei feipifi ta Jehová: “Adquintufiel mu tami callfü huenu, ñi  deumael tami changüll cuhu mu, ti cüyen ca tati pu huangülen tami pepicael, ¿tunte fali quiñe che femngechi tami raquiduamtucunieafiel?” (Sal. 8:3, 4). Fei David püraquintufilu ta huenu, rume ayühuelquefeyu ñi peafiel pu huangülen. Ca femngechi eluuquefui ñi raquiduamal chem tañi quimeltueteu pu huangülen Jehová ñi deumael, femngechi David quimürpui Jehová ñi rume alüpüralen ca ñi fütra Dios ngen. Cafei David raquiduamquefui chumngechi ñi tremcülen tañi ñuque ñi pütra mu. Com femngechi ñi raquiduamün tüfa mu David, fei rume mañumquefui Jehová tañi quimün (Sal. 139:14-17).

15. Tami quintual deuman mu, ¿chem quimpoimi Jehová mu? Eipinge quiñeque inayentun (Salmo 148:7-10).

¹⁵ Quiñeque mu cüdaungelai ñi inaduamngeal Jehová ñi deumael. Com taiñ hualloñmanieteu mu, quimürpuafuiñ fentrenque dungu Jehová mu. Por ejemplo, ti antü eñumüñmaeliyiñmu taiñ cuerpo, raquiduamafuiñ Jehová ñi nien fentren nehuen (Jer. 31:35). Ca femngechi pefiliyiñ quiñe üñüm ñi deumamequefiel quiñe dañe curamam, raquiduamaiñ Jehová ñi nien fentren quimün. Pefiliyiñ quiñe trehua ñi tuhuaicaumequen ñi ünatuafiel tañi cülen, fei raquiduamaiñ Jehová ñi ayühun-ngechi Dios ngen. Ca femngechi pefiliyiñ quiñe ñuque ñi aucantumequen tañi pichiche engu, raquiduamaiñ Jehová ñi rume duamtuchequen. Feimu cüme inaduamfiliyiñ Jehová ñi deumael, rume quimürpuafuiñ fei mu. Com ñi deumael ta Jehová, pichile rume cam fütralele rume, püllelele cam camapulele, com fei engün püramyeniefi Jehová (papeltunge Salmo 148:7-10).

16. ¿Chem dungu dipoabüiñ?

¹⁶ Taiñ Chau Jehová niei fentren quimün, piuqueyechequei ca niei fentrenque nehuen, huelu ca com ñi deumael ayüfalngefui. Inaduamfiliyiñ Jehová ñi deumael, quimürpuafuiñ com feitachi dungu ca fentrenque dungu Jehová mu. Felei llemai, entuaiñ tiempo taiñ cüme inaduamafiel Jehová tañi deumael. Cafei raquiduamaiñ chem taiñ quimeltuqueteu Jehová mu. Femngechi femliyiñ, doi fülcontuafiyiñ ta Jehová (Sant. 4:8). Cüpalechi troquiñ mu, peaiñ pu chau chumngechi quimeltuafuingün tañi pu yall Jehová ñi deumael mu, femngechi ñi fülcontuafiel engün ta Jehová.