1. ?Like benin yɛ ɔ ukali Zɔbu naan w’a si Zoova kpa-ɔ?

 ZƆBU nin sran kpanngban be kokoli yalɛ. Sanngɛ yalɛ ng’ɔ nin Zoova be kokoli’n, ɔ yoli i liɛ ngunmin. Kɛ bé kókó yalɛ’n, Zoova fali Zɔbu i ɲin sieli i ninnge ng’ɔ yili be’n, be nun wie’m be su. I sɔ’n ukali Zɔbu naan w’a wun i wlɛ kɛ Zoova si ngwlɛlɛ dan yɛ ɔ fa ninnge nga i sufuɛ’m be sa mian be wun’n man be. Ɔ seli Zɔbu kɛ i yɛ ɔ nian nnɛn’m be lika-ɔ. Ɔ maan, ɔ kwla niɛn i bɔbɔ Zɔbu i lika wie. (Zɔb. 38:39-41; 39:1, 5, 13-16) Kɛ Zɔbu fɛli i ɲin sieli i ninnge nga Ɲanmiɛn yili be’n be su’n, ɔ sili Ɲanmiɛn i nzuɛn wie mun.

2. ?Ngue ti yɛ ɔ ju wie’n ɔ ti kekle man e kɛ e fa e ɲin e sie i ninnge nga Zoova yili be’n be su-ɔ?

² E kusu maan e fa e ɲin e sie i ninnge nga Ɲanmiɛn yili be’n be su. I liɛ’n é sí i su like kaka. Sanngɛ ɔ ju wie’n i sɔ yolɛ’n timan pɔpɔ. I wie yɛle kɛ sɛ e tran blɔfuɛ klɔ’n, e kwlá wunman ninnge nga Zoova yili be’n be nun sunman lika. Kannzɛ bɔbɔ e tran klɔ lɔ’n, sanngɛ e ti mɔ e ɲɛnmɛn i’n ti’n, e kwlá faman e ɲin e siemɛn i ninnge nga Zoova yili be’n be su. Ɔ maan like suanlɛ nga nun’n, é wá kán like nga ti yɛ ɔ ti cinnjin kɛ e fa e ɲin e sie i ninnge nga Ɲanmiɛn yili be’n be su’n i ndɛ. Kpɛkun é wá kán wafa nga Zoova nin Zezi be fali ninnge nga be o mɛn nun’n be kleli sran’m be like’n, ɔ nin like nga e bɔbɔ e kwla yo naan y’a wun like uflɛ mɔ ninnge sɔ’m be kle e’n, be ndɛ wie.

3. ?Ngue yɛ ɔ kle kɛ Zoova kunndɛli kɛ Adan fɛ i ɲin sie i ninnge ng’ɔ yili be’n be su-ɔ?

³ Zoova kunndɛli kɛ sran klikli’n fɛ i ɲin sie i ninnge ng’ɔ yili be’n be su. Ɔ maan kɛ ɔ yili Adan’n, ɔ fɛli i sieli i lika  klanman kpa kun nun yɛ ɔ seli i kɛ ɔ di nun junman yɛ ɔ niɛn i lika naan lika sɔ’n trɛ. (Bob. 2:8, 9, 15) E si kɛ, kɛ Adan wunnin ninnge nga be fifi’n nin waka nɲrɛ mun’n, i sɔ’n yoli i fɛ dan. Nanwlɛ, fie klanman sɔ’n i lika nianlɛ yoli Adan i cenjele like dan! Asa’n, Zoova seli Adan kɛ ɔ tɔn nnɛn’m be dunman. (Bob. 2:19, 20) Zoova bɔbɔ kwla tɔn nnɛn’m be dunman, sanngɛ ɔ fali junman sɔ’n mannin Adan. E si kɛ kwlaa naan Adan w’a tɔn nnɛn kun i dunman’n, ɔ fɛ i ɲin sie i nnɛn sɔ’n su kpa naan ɔ́ sí like ng’ɔ klo i’n nin wafa ng’ɔ yo ninnge mun’n. Ɔ fata kɛ junman sɔ’n i dilɛ’n yo Adan i fɛ. Afin i sɔ’n kwla ukɛ i naan w’a wun i wlɛ kɛ i Si Ɲanmiɛn si ngwlɛlɛ kpa naan ninnge ng’ɔ yili be’n, be ti abonuan yɛ be yo ɲɛnmɛn dan.

4. (1) ?Like nga ti yɛ ɔ fata kɛ e fa e ɲin e sie i ninnge nga Ɲanmiɛn yili be’n be su’n, i kun yɛle benin? (2) ?Ninnge nga Ɲanmiɛn yili be’n, be nun onin yɛ a klo i kpa-ɔ?

⁴ Like nga ti yɛ ɔ fata kɛ e fa e ɲin e sie i ninnge nga Zoova yili be’n be su’n, i kun yɛle kɛ Zoova bɔbɔ kunndɛ kɛ e yo sɔ. Ɔ se e kɛ: “Amun man amun ɲin su nglo be nian.” I sin’n, ɔ usa kɛ: “?Wan yɛ ɔ yili ninnge nga mun-ɔn?” E kwlakwla e si kosan sɔ’n i su tɛlɛ’n. (Eza. 40:26) Zoova yɛ ɔ yili ninnge kwlaa nga be o nglo lɔ’n nin asiɛ’n su wa nin jenvie’n nun’n niɔn. Yɛ ninnge sɔ’m be ti’n e kwla si i kpa. (Jue. 104:24, 25) Maan e bu wafa nga Ɲanmiɛn yili e’n i akunndan kan e nian. Wafa ng’ɔ yili e’n ti’n, e klo ninnge nglanman mun. Ɔ yoli maan e wun ase, e ti sa, e kwla kan ninnge mun, sɛ like kun yo fɛ annzɛ ɔ yoman fɛ’n e kwla si i yɛ e kwla ti nvan. I sɔ’n ti’n, e kwla fa ninnge fanunfanun ng’ɔ yili be’n, e yo e wun sa ye.

5. ?Kɛ nga Rɔmunfuɛ Mun 1:20 fa kan’n sa’n, kɛ e fa e ɲin e sie i ninnge nga Zoova yili be’n be su’n i su ye benin yɛ e ɲɛn i-ɔ?

⁵ Biblu’n kan like nga ti yɛ ɔ fata kɛ e fa e ɲin e sie i ninnge nga Ɲanmiɛn yili be’n be su’n, be nun kun ekun ndɛ. Yɛle kɛ ninnge sɔ’m be kwla uka e naan y’a si Zoova i nzuɛn mun. (An kanngan Rɔmunfuɛ Mun 1:20 nun.) I wie yɛle kɛ kɛ e fa e ɲin e sie i ninnge nga Zoova yili be’n be su’n, e wun kɛ ɔ yili be klanman. I sɔ’n kle kɛ ɔ si ngwlɛlɛ dan. Kɛ e bu aliɛ fanunfanun nga e le be’n be akunndan’n, e wun i wlɛ weiin kɛ ɔ klo e. Kɛ e fa e ɲin e sie i ninnge nga Zoova yili be’n be su mɔ e wun i nzuɛn’m be wlɛ kpa’n, i sɔ’n yo maan e si i kpa ekun. Asa’n, i sɔ’n yo maan e kunndɛ kɛ é fá e wun é mɛ́ntɛn i. Siɛn’n, maan e kan wafa nga Zoova fali ninnge ng’ɔ yili be’n kleli sran’m be like’n be nun wie’m be ndɛ.

6. ?Ngue yɛ anunman nga be tu kɔ lika uflɛ’n be kle e Zoova su-ɔ?

 ⁶ Zoova yo ninnge mun dɔ su. Afuɛ kwlakwla’n, kɛ ɔ fɛ i Fevrie m’ɔ́ fá jú Mɛ anglo’n i afiɛn lɔ’n, Izraɛlifuɛ’m be wun kɛ anunman ɔngɔ’m be tu kɔ be nvle’n i nglo lɔ lika’n nun. I sɔ’n ti’n, Ɲanmiɛn seli be kɛ: “Anunman ɔngɔ m’ɔ tu sin nglo lɔ’n, ɔ si i bo tulɛ blɛ.” (Zer. 8:7) Zoova sieli blɛ trele kun mɔ i nun yɛ anunman sɔ’m be tu kɔ-ɔ. I wafa kunngba’n, ɔ sieli blɛ trele kun mɔ i nun yɛ ɔ́ dí sran’m be jɔlɛ-ɔ. Andɛ kusu’n, e wun kɛ kɛ blɛ wie ko ju’n anunman wie’m be tu kɔ lika uflɛ. Kɛ e wun i sɔ’n maan e lafi su kɛ “blɛ” nga Zoova sieli i kɛ ɔ́ núnnún mɛn tɛ kain nga’n, ɔ su kaman siɛn.—Aba. 2:3.

7. ?Ngue yɛ wafa nga anunman’m be tu’n ɔ kle e Zoova su-ɔ? (Ezai 40:31)

⁷ Zoova mɛn i sufuɛ’m be wunmiɛn. Zoova sinnin Ezai i lika seli i sufuɛ’m be kɛ sɛ be sa sin bubu be’n, ɔ́ mán be wunmiɛn kɛ ‘anunman ɲin i liɛ’n sa’n.’ (An kanngan Ezai 40:31 nun.) Izraɛlifuɛ’m be sieli i nzɔliɛ kɛ, kɛ anunman ɲin’m bé tú’n, be boman be ndɛwa’m be dan. Afin aunmuan kun m’ɔ fin asiɛ’n su wa fu nglo lɔ’n i nun yɛ be sin-ɔn. Ɔ maan aunmuan sɔ’n yɛ ɔ fa be kɔ-ɔ. Sɛ Zoova man anunman ɲin’m be wunmiɛn’n, nn ɔ kwla man e wunmiɛn wie! Ɔ maan sɛ e wun anunman kun m’ɔ su tu sin nglo mmuammua kpa lɔ’n, kusu’n nn ɔ bomɛn i ndɛwa’m be dan’n, maan e wla kpɛn su kɛ Zoova kwla man e wunmiɛn naan sɛ é kwlá sé’n, y’a tu y’a wɔ e su sa’m be wun mmua.

8. (1) ?Kɛ Zɔbu fɛli i ɲin sieli i ninnge nga Ɲanmiɛn yili be’n be su’n, ngue yɛ ɔ wunnin i wlɛ-ɔ? (2) ?Ngue yɛ i sɔ’n kle e-ɔ?

⁸ E kwla fa e wla’n e guɛ i Zoova su. Zoova yoli maan Zɔbu lafili i su kpa. (Zɔb. 32:2; 40:6-8) Kɛ Zoova nin Zɔbu bé kókó yalɛ’n, ɔ kannin ninnge ng’ɔ yili be’n be nun sunman be ndɛ. I wie yɛle kɛ ɔ kannin nzraama mun nin ɲanmiɛn ble’n ɔ nin ɲanmiɛn m’ɔ kpa sin’n be ndɛ. Asa’n, ɔ kannin nnɛn’m be ndɛ wie. I wie yɛle blo nannin nin nnɛn kpanngɔ mun. (Zɔb. 38:32-35; 39:9, 19, 20) Ninnge sɔ’m be kle kɛ Ɲanmiɛn i tinmin’n cɛnnin, ɔ klo sran yɛ ɔ si ngwlɛlɛ dan. E si kɛ yalɛ sɔ mɔ Zoova nin Zɔbu be kokoli’n, ɔ yoli maan ɔ lafili Zoova su kpa trali laa’n. (Zɔb. 42:1-6) I wafa kunngba’n, kɛ e fa e ɲin e sie i ninnge nga Zoova yili be’n be su’n, e wun kɛ Zoova si ngwlɛlɛ dan yɛ i tinmin’n leman wunsu mlɔnmlɔn. Ɔ maan, ɔ kwla yo maan e su sa’m be kwlaa be wie. Yɛ e si kɛ ɔ́ wá yó sɔ kusu. I sɔ’n yo maan e lafi i su kpa tra laa’n.

9-10. ?Ngue yɛ wia’n nin nzue’n be kle e Zoova su-ɔ?

⁹ Zezi si ninnge nga Ɲanmiɛn yili be’n be kpa. I nun mɔ Ɲanmiɛn yí ninnge mun’n, Zezi ukɛli i. I sɔ’n ti’n, Zezi seli kɛ ɔ ti Ɲanmiɛn i ‘junman difuɛ m’ɔ si junman’n i di kpa-ɔ.’ (Ɲan. 8:30) I sin’n, kɛ ɔ bali asiɛ’n su wa’n, ɔ fali ninnge nga i Si yili be’n kleli i sɔnnzɔnfuɛ mun i Si sɔ’n i su like. Maan e kan like ng’ɔ kleli’n i ndɛ kan.

¹⁰ Zoova kle kɛ ɔ klo sran kwlakwla. I nun mɔ Zezi kán Ɲanmiɛn ndɛ’n oka’n su lɔ’n, ɔ fali sran’m be ɲin sieli i wia’n nin nzue’n be su. Sran kpanngban be buman ninnge sɔ’m be like cinnjin. Sanngɛ sɛ ninnge nɲɔn sɔ’m be nunman lɛ’n, nguan nun tranlɛ’n yó kekle. Zoova kwla se kɛ be nga be su i’n be ngunmin cɛ yɛ ɔ́ fá ninnge sɔ mun mán be-ɔ. Sanngɛ ɔ yoman sɔ. Ɔ bo wia’n yɛ ɔ tɔ nzue’n man sran’m be kwlakwla. (Mat. 5:43-45) Zezi fɛli i sɔ’n fa kleli i sɔnnzɔnfuɛ’m be kɛ Zoova kunndɛ kɛ e klo sran kwlakwla. Ɔ maan blɛ kwlaa nga e wun wia  mɔ su tɔ’n annzɛ nzue m’ɔ su tɔ’n, maan e bu wafa nga Zoova kle kɛ ɔ klo sran kwlakwla’n i akunndan. E kusu kɛ Zoova sa’n, nán maan e kpa sran nun. I wie yɛle kɛ maan e bo jasin fɛ’n e kle sran kwlakwla.

11. ?Sɛ e fa e ɲin e sie i anunman’m be su’n, i su ye benin yɛ é ɲɛ́n i-ɔ?

¹¹ Zoova fa ninnge nga e sa mian be wun’n man e. I nun mɔ Zezi kán Ɲanmiɛn ndɛ oka’n su lɔ’n, ɔ seli kɛ: “Amun nian anunman mɔ be tu sin nglo lɔ’n be kpa. Be luaman like, kusu be kpɛman like yɛ be tiantianman like nuan tanngannin nun, sanngɛ amun Si m’ɔ o ɲanmiɛn su lɔ’n ta be. ?Amun kpa traman be?” (Mat. 6:26) Zezi kannin sɔ naan e wun i wlɛ kɛ Zoova kwla nian e lika. (Mat. 6:31, 32) Andɛ nin andɛ’n, ninnge nga Ɲanmiɛn yili be’n be su ndɛ sɔ’n te wla Ɲanmiɛn i sufuɛ kpa’m be fanngan. Aniaan bla kun ti atin bofuɛ’n yɛ ɔ tran Ɛspaɲin. Blɛ wie nun’n, i sa sin bubuli i dan, afin ɔ ɲanman sua kpa tranman nun. Sanngɛ kɛ ɔ wunnin anunman mɔ be su di waka mma mun’n, i sɔ’n wlɛli fanngan. Aniaan bla’n seli kɛ: “Anunman sɔ’m be ti’n, min wla kpɛnnin su kɛ Zoova nian be lika naan ɔ́ nían min lika wie.” Kɛ ɔ yoli sɔ’n, w’a cɛman, aniaan bla’n wa ɲannin sua kpa kun.

12. ?Kɛ nga Matie 10:29-31 fa kan’n sa’n, ngue yɛ ndrofia’m be kle e Zoova su-ɔ?

¹² E tinuntinun e ndɛ lo Zoova. Ka naan Zezi w’a sunmɛn i akoto mun kɛ be ko bo jasin fɛ’n, ɔ ukali be naan sɛ sran’m be tanndan be ɲrun’n srɛ w’a kunman be. (An kanngan Matie 10:29-31 nun.) I sɔ yolɛ nun’n, ɔ kannin ndrofia’m be ndɛ. Izraɛlifuɛ’m be si be anunman sɔ’m be kpa. Zezi blɛ su’n, sran’m be buman anunman sɔ’m be like fi. Sanngɛ ɔ seli i sɔnnzɔnfuɛ’m be kɛ: “Sɛ be nun kun tɔ asiɛ wun’n, saan amun Si’n sí nun.” Ɔ seli be ekun kɛ: “Amun ti kpa tra ndrofia kpanngban.” Zezi yoli maan i sɔnnzɔnfuɛ’m be wunnin i wlɛ kɛ be tinuntinun be ndɛ lo Zoova naan ɔ fataman kɛ yalɛ klelɛ’n ti’n srɛ kun be. E si kɛ, kɛ Zezi i sɔnnzɔnfuɛ’m bé kɔ́ klɔ kanngan nin klɔ dandan’m be su bé kó bó jasin fɛ mɔ be wun ndrofia mun’n, be wla kpɛn ndɛ nga Zezi kan kleli be’n su. E kusu kɛ e wun anunman mun’n, maan e wla kpɛn su kɛ e tinuntinun e ndɛ lo Zoova naan e “ti kpa tra ndrofia kpanngban.” Ɔ maan sɛ be tanndan e ɲrun’n, Zoova yó maan é kwlá jrán kekle.—Jue. 118:6.

13. ?É yó sɛ naan y’a si Zoova i su like nga ninnge ng’ɔ yili be’n be kle e’n?

¹³ Ninnge nga Zoova yili be’n, be kwla kle e i su like kpanngban ekun. I sɔ’n ti’n, maan e fa e ɲin e sie i ninnge nga Zoova yili be’n be su kpa. Asa’n, maan e bu like nga be kle e Zoova su’n i akunndan. Ɔ ju wie’n, i sɔ yolɛ’n timan pɔpɔ. Be flɛ aniaan bla kun kɛ Zeradinin yɛ ɔ tran Kamerunun. Ɔ seli kɛ: “Be tali min blɔfuɛ klɔ. Ɔ maan kɛ ɔ ko yo naan m’an fa min ɲin m’an sie i ninnge nga Ɲanmiɛn yili be’n be su’n, ɔ ti kekle man  min.” Be flɛ aniaan bian kun kɛ Alfɔnso yɛ ɔ ti asɔnun kpɛnngbɛn. Ɔ seli kɛ: “N wunnin i wlɛ kɛ sɛ min waan ń fá min ɲin ń síe i ninnge nga Zoova yili be’n be su naan ń bú be su akunndan’n, ɔ fata kɛ n sie blɛ kun naan min ngunmin n wɔ lika diin kun nun.”

14. ?Kɛ Davidi buli ninnge nga Ɲanmiɛn yili be’n be su akunndan’n, ngue yɛ ɔ wunnin i wlɛ-ɔ?

¹⁴ Davidi buli ninnge nga Zoova yili be’n, be su akunndan kpa. I sɔ’n ti’n, ɔ seli Zoova kɛ: “Kɛ n wun ɲanmiɛn mɔ a yili’n, m’ɔ ti ɔ sa nuan like’n, anglo’n nin nzraama mɔ a siesieli be’n, n usa min wun kɛ: ?Wan yɛle klɔ sran mɔ i ti yɛ a bu i akunndan-ɔn?” (Jue. 8:3, 4) Ndɛ sɔ’n kle kɛ, nán nzraama’m be nianlɛ ngbɛn sa yɛ Davidi niannin-ɔn. Sanngɛ ɔ buli ninnge nga nzraama’m be kle i Ɲanmiɛn su’n, i akunndan. Ɔ maan ɔ wunnin kɛ Zoova ti dan. Asa ekun’n, Davidi buli wafa nga i nun m’ɔ o i nin ku sɛ’n nun’n, i likalika’m be yoli kpa’n i akunndan wie. I sɔ m’ɔ yoli’n ti’n, ɔ wunnin i wlɛ kɛ Zoova si ngwlɛlɛ dan.—Jue. 139:14-17.

15. Amun kan Zoova i su like nga ninnge ng’ɔ yili be’n be kle amun’n, be nun wie’m be ndɛ. (Jue Mun 148:7-10)

¹⁵ Ninnge nga Ɲanmiɛn yili be’n be bo sin yia e. Ɔ maan kɛ Davidi sa’n, e kwla bu be su akunndan. Sɛ e fa e ɲin e sie i ninnge nga be bo sin yia e’n be su’n, é sí sran wafa nga Zoova ti’n. I wie yɛle kɛ wia’n i bolɛ’n kle kɛ Zoova le tinmin. (Zer. 31:35) Kɛ e wun anunman kun m’ɔ su yo i sua’n, e wun i wlɛ kɛ Ɲanmiɛn si ngwlɛlɛ. Asa’n, kɛ e wun alua ba kun m’ɔ kunndɛ kɛ ɔ́ trɛ́ i lua’n m’ɔ bo sin yia nun’n, e wun i wlɛ kɛ Zoova di aklunjɔɛ yɛ ɔ kunndɛ kɛ ninnge ng’ɔ yili be’n be di aklunjɔɛ wie. Asa ekun’n, kɛ e wun niɛn kun m’ɔ nin i wa’n be su kan ngowa’n, e wun i wlɛ kɛ Zoova klo sran. Kɛ mɔ ninnge nga Zoova yili be’n, be mɛnmɛn i’n ti’n, kannzɛ be ti kaan-o, annzɛ be ti dan-o, annzɛ be o mmua-o, annzɛ be o e wun koko lɛ-o, be kwla kle e like kpanngban Zoova su.—An kanngan Jue Mun 148:7-10 nun.

16. ?Ngue yɛ a kunndɛ kpa kɛ á yó-ɔ?

¹⁶ E Ɲanmiɛn’n ɔ si ngwlɛlɛ dan, ɔ klo sran, ɔ le tinmin yɛ ninnge kwlaa ng’ɔ yili be’n be ti klanman. Sɛ e fa e ɲin e sie i ninnge nga Zoova yili be’n be su’n, é wún i wlɛ kɛ be yi i nzuɛn sɔ mun nin i nzuɛn uflɛ wie mun ekun be nglo. I sɔ’n ti’n, maan e kwlakwla e fa e ɲin e sie i ninnge nga Zoova yili be’n be su kpa, yɛ e bu i su like nga ninnge sɔ’m be kle e’n i su akunndan. Sɛ e yo sɔ’n, e nin e Yifuɛ’n e afiɛn mántan kpa titi. (Zak. 4:8) Like suanlɛ nga i sin liɛ’n nun’n, é wá wún kɛ siɛ nin niɛn’m be kwla fa ninnge nga Zoova yili be’n be kle be mma’m be like. I liɛ’n be nin Zoova be afiɛn mántan kpa.