1. How Joab mi geh fi noa Jehoava beta?

 OWTA aal di kanvasayshan dehn weh Joab mi gat eena ih laif, di wan weh stan owt di moas da di wan weh ih mi ga wid Jehoava Gaad. Eena da kanvasayshan, Jehoava mi tel Joab fi luk pahn som a di wandaful tingz weh Hihn mek. Dis mi help Joab fi noa how waiz Jehoava waiz. Ih mi aalso schrentn ih chros eena Jehoava fi noa dat Hihn wahn giv Ih servants evriting weh dehn need. Fi egzampl, Jehoava mi rimain Joab dat Hihn tek kayr a di animalz, soh Hihn mi wahn tek kayr a Joab tu. (Job 38:39-41; 39:1, 5, 13-16) Joab mi laan wahn lat bowt Jehoava kwalitiz wen ih mi luk pahn kriyayshan.

2. Wai ih ku bee haad fi mek wi luk pahn Jehoava kriyayshan?

² Jos laik Joab, wen wi tek di taim fi luk pahn weh Jehoava mek, wi geh kloasa tu ahn. Bot dis noh aalwayz eezi fi du. If wi liv eena wahn siti, wi mait noh geh fi si az moch a Jehoava kriyayshan. An eevn if wi liv da vilij, wi mait feel laik wi noh ga taim fi stap an injai Jehoava kriyayshan. Soh, mek wi diskos wai wi need fi tek taim fi luk pahn di tingz weh Jehoava mek. Wi wahn luk pahn how Jehoava ahn Jeezas yooz kriyayshan fi teech wi ahn weh wi ku du fi laan moa fahn kriyayshan.

3. How wi noa dat Jehoava mi waahn Adam injai di byootiful tingz weh Ih mek?

³ Jehoava mi waahn Adam injai evriting weh Hihn mek. Wen Gaad mek Adam, Hihn giv ahn wahn byootiful paradais fi liv eena. Adam mi ga di privilij fi tek kayr a da  paradais. (Jen. 2:8, 9, 15) Imajin di jai weh Adam mi feel wen ih si di seed dehn staat tu groa ahn di flowaz staat tu blaasam. Pahn tap a dat, Jehoava mi aks Adam fi naym di animal dehn. (Jen. 2:19, 20) Eevn doa Jehoava kuda mi gi di animalz dehn naym, hihn mi gi da privilij tu Adam. Bifoa hihn mi gi di animalz wahn naym, hihn mi tek ih taim fi wach how dehn mi ak ahn weh dehn mi luk laik. Dis mosi mi fon fi Adam. Ahn fi shoar dat mi mek hihn andastan how waiz Jehoava waiz, an ih help ahn fi apreeshiayt di byootiful tingz weh Jehoava mek.

4. (a) Wai wi shuda tek di taim fi luk pahn kriyayshan? (b) Owta evriting weh Jehoava mek, weh yoo laik di moas?

⁴ Wahn reezn wai wi shuda tek di taim fi luk pahn kriyayshan da bikaaz Jehoava waahn mek wi du dat. Jehoava tel wi: “Luk op ahn si di hevn.” Den hihn aks: “Da hoo mi mek dehn ting deh?” Wee noa di ansa, noh chroo? (Isa. 40:26) Evriting weh Jehoava mek eena di hevn, ert, er see teech wi wahn lat bowt hihn. (Ps. 104:24, 25) Tink bowt di way how Jehoava mek wi. Hihn gi wi di abiliti fi apreeshiayt ih byootiful kriyayshan. Ahn hihn mek it pasabl fi mek wi si, hyaa, toch, tays, ahn smel, soh dat wi ku injai evriting weh ih mek.

5. Akaadn tu Roamanz 1:20, how wi benifit wen wi luk pahn Jehoava kriyayshan?

⁵ Di Baibl tel wi dat wahn nada reezn wai ih impoatant fi luk pahn kriyayshan da bikaaz ih teech wi bowt aala Jehoava kwalitiz. (Reed Roamanz 1:20.) Fi egzampl, wen wi luk pahn di tingz weh Jehoava kriyayt, ahn wen wi si how byootiful ih mi kriyayt dehn, dehn teech wi dat Jehoava da wahn waiz Gaad, noh chroo? Jos tink bowt di difrent kaina food wi geh fi injai. Dis shoa di lov weh Jehoava ga fi aala wi. Wen wi si Jehoava kwalitiz ahn di tingz weh hihn mek, wi geh fi noa hihn beta, ahn dat moov wi fi jraa kloasa tu ahn. Now mek wi luk pahn sohn wayz how Jehoava yooz kriyayshan fi teech wi sohn impoatant lesn.

6. Weh lesn wi ku laan fahn di berd dehn?

⁶ Jehoava ga wahn set taim wen tingz fi hapm. Evri yaa bitween di en a Febiweri ahn di midl a May, di Izrelaits wuda si sohn stoark di flai eena di skai bikaaz dehn di goh naat. Gaad mi tel di Izrelaits, “Di stoark dehn noa weh taim a yaa dehn haftu flai tu wahn nada plays.” (Jer. 8:7) Jos laik how Jehoava don set wahn taim  fi wen dehnya berd flai, saym way soh, hihn ga wahn set taim fi wen hihn wahn joj peepl. Tudeh, wen wi luk pahn di berd dehn weh noa wen fi flai tu wahn neks plays, dat rimain wi dat wi ku chros Jehoava wen ih seh dat ih ga wahn ‘taim weh don setʼ fi bring dis wikid werl tu wahn en.—Hab. 2:3.

7. Weh wi ku laan wen wi si di berd dehn di flai eena di skai? (Isaiah 40:31)

⁷ Jehoava giv ih servants di schrent weh dehn need. Hihn pramis ih servants chroo ih prafit Aizaiya dat Ih wahn gi dehn di schrent weh dehn need fi “flai laik eegl” wen dehn feel week er diskorij. (Reed Isaiah 40:31.) b Di Izrelaits yoostu si how di eegl dehn mi flai haiya an haiya eena di skai widowt haftu flap dehn wing wahn lat. Dis rimain wi dat Jehoava ku gi ih peepl di schrent weh dehn need jos laik how ih gi di berd dehn di powa fi flai eena di skai. Wen yu si wahn berd di flai haiya ahn haiya eena di skai widowt di flap ih wing wahn lat, memba dat Jehoava ku help yu noh mata weh chalenjiz yu di fays.

8. Weh Joab mi laan fahn kriyayshan, ahn weh wi ku laan fan it tu?

⁸ Jehoava dizerv wi chros. Jehoava mi help Joab fi bil ih chros eena Ahn. (Job 32:2; 40:6-8) Wen Jehoava mi-di taak tu Joab, hihn mi taak bowt wahn lata tingz weh hihn kriyayt laik di staar dehn, di klowd dehn, ahn laitnin. Ih mi aalso taak bowt difrent animal, laik bul ahn haas. (Job 38:32-35; 39:9, 19, 20) Aala dehnya tingz proov dat Jehoava powaful, waiz, ahn lovin. Bikaaz Jehoava mi taak tu Joab, hihn kuda mi chros ahn eevn moa. (Job 42:1-6) Saym way soh, wen wi tek di taim fi luk pahn weh Jehoava kriyayt, ih rimain wi dat nobadi els ga wizdom ahn powa laik Jehoava. Hihn pramis fi geh rid a aala wi chraiyalz bikaaz hihn ga di powa fi du dat. Ahn wi chros dat hihn wahn kip ih pramis. Dis ku help wi fi chros eena ahn eevn moa.

9-10. Weh wi ku laan bowt Jehoava fahn di son ahn di rayn?

⁹ Jeezas mi noa wahn lat bowt kriyayshan bikaaz ih mi werk langsaid ih Pa az wahn “maasta werka.” Hihn mi ga di privilij fi help ih Pa kriyayt di yoonivers. (Prov. 8:30) Laytaraan, wen Jeezas mi deh pahn ert, hihn mi yooz kriyayshan fi teech ih disaiplz bowt ih Pa. Mek wi luk pahn som a di lesn weh hihn mi teech dehn.

¹⁰ Jehoava shoa lov tu evribadi. Eena di Sermon Pahn di Mongtin, Jeezas mi taak tu ih disaiplz bowt di son ahn di rayn. Dehnya da too tingz weh peepl noh naamali tink bowt. Bot di too a dehn impoatant fi mek wi liv. Jehoava kuda hoal bak dehnya tingz fahn peepl weh hihn tink noh dizerv it. Bot bikaaz hihn lov wi, ih gi rayn ahn son tu evribadi. (Mach. 5:43-45) Wen wi geh fi wach wahn byootiful sonset er si wahn haad rayn di poar dong, dis ku help wi fi tink bowt how Jehoava lov evribadi. Fi hihn egzampl ku moov wi fi shoa da saym kaina lov wen wi preech tu evribadi.

11. Weh lesn wi ku laan fahn di berd dehn?

¹¹ Jehoava provaid evriting weh wi need fi liv. Eena di saym sermon, Jeezas mi seh: “Unu stap ahn noatis di berd dehn  weh flai eena di skai; dehn noh plaant no seed ner reep ner stoar op no food, yet unu hevnli Faada feed aala dehn.” Ih pasabl dat di peepl weh mi-di lisn tu Jeezas kuda mi si di berd dehn di flai eena di skai wen hihn aks dehn: “Unu noh tink dat unu wert moa dan dehndeh berd?” (Mach. 6:26) Dis da wahn lovin way fi rimain wi dat Jehoava wahn gi wi evriting weh wi need fi liv! (Mach. 6:31, 32) Di lesn weh wi laan fahn kriyayshan kip di inkorij Jehoava faytful servants op tu tudeh. Wahn yong painyaa sista da Spain mi feel diskorij bikaaz shee kudn fain wahn gud plays fi liv. Bot afta shee mi admaiya sohn lee berd di eet seed ahn beriz, shee mi feel beta. Wai? Shee seh, “Dehndeh berd mi rimain mi dat if Jehoava tek kayr a dehn, hihn wahn tek kayr a mee tu.” Noh lang afta dat, di sista mi fain wahn gud plays fi liv.

12. Bays pahn Machyu 10:29-31, weh di lee berd dehn teech wi bowt Jehoava?

¹² Jehoava valyu eech wan a wi. Bifoa Jeezas mi sen owt ih apasl dehn fi goh preech, ih mi help dehn fi noh bee frayd fi persikyooshan. (Reed Machyu 10:29-31.) Hihn mi du dis wen ih taak tu dehn bowt sohn lee berd weh mi kaman eena Izrel. Dehndeh berd neva wert moch eena Jeezas dayz. Bot hihn mi tel ih disaipl dehn: “Non a dehn wahn jrap da grong widowt unu Faada noa bowt it.” Hihn mi aalso tel dehn: “Unu wert moa dan aala dehnya lee berd.” Soh Jeezas mi-di rimain ih disaiplz dat Jehoava valyu eech wan a dehn, soh dehn neva ga no reezn fi bee frayd fi persikyooshan. Fi shoar, Jeezas disaiplz mi memba weh Jeezas tel dehn wen dehn si di lee berd dehn wail dehn mi-di preech eena difrent vilij ahn tong. Enitaim yu si wahn lee berd, memba dat Jehoava kay bowt yoo tu, bikaaz yu “wert moa dan aala dehnya lee berd.” Wid fi hihn sopoat, yu noh haftu bee frayd wen yu fays persikyooshan.—Ps. 118:6.

13. Wat da sohn tingz wi ku du fi laan fahn kriyayshan?

¹³ Wi ku laan wahn lat moa bowt Jehoava fahn kriyayshan. How? Fers, wi need fi tek taim fi luk pahn di tingz weh Gaad kriyayt. Di neks step da fi tink bowt weh dehndeh tingz teech wi bowt Jehoava. Wi noh mait aalwayz fain it eezi fi du dehnya too tingz. Géraldine, wahn sista fahn Cameroon, seh, “Ai groa op eena di siti, soh Ah riyalaiz dat Ah haftu tek owt taim fi luk pahn di tingz weh Jehoava kriyayt.” Wahn elda weh naym Alfonso seh, “Ah laan dat ih impoatant fi mek Ah set taim fi bee bai miself ahn luk pahn di tingz weh Jehoava kriyayt, an fi meditayt pahn weh dehn teech mi bowt hihn.”

14. Weh Dayvid mi laan wen hihn tink bowt di tingz weh Gaad mek?

 ¹⁴ Dayvid mi tek taim fi tink bowt di tingz weh Gaad mi kriyayt. Hihn mi tel Jehoava: “Wen Ah luk pahn di hevnz weh yu mek wid yu han dehn, di moon ahn di staar dehn weh yoo kriyayt, da hoo wee soh dat yu pay soh moch atenshan tu wi?” (Ps. 8:3, 4) Fi shoar, wen Dayvid mi luk op eena di skai joorin di nait, ih neva jos admaiya di byootiful yoonivers, bot ih mi aalso meditayt pahn weh di staarz teech hihn bowt Gaad. Hihn laan how wandaful Jehoava wandaful. Dehn mi ga ada taimz wen Dayvid mi tink bowt how fi hihn badi mi groa eena ih ma beli. Wen hihn tink bowt di amayzin way how Jehoava mi mek ahn, ih geh fi apreeshiayt Jehoava wizdom eevn moa.—Ps. 139:14-17.

15. Gi sohn egzampl a how yu ku laan bowt Jehoava kwalitiz fahn kriyayshan. (Psalm 148:7-10)

¹⁵ Jos laik Dayvid, yu ku luk rait rong yu fi fain sohnting eena kriyayshan weh yu ku meditayt pan. If wi luk rong pahn di tingz weh Jehoava mek, wi ku laan wahn lata tingz bowt ahn. Fi egzampl, wen wi si di son di shain ahn wi feel it pahn wi skin, ih help wi fi tink bowt Jehoava powa. (Jer. 31:35) Tink bowt Jehoava wizdom wen yu si wahn berd di bil wahn nes. Wen yu si wahn popi di chays ih tayl, tink bowt di hapi Gaad weh wi serv. Ahn tank Gaad fi ih lov wen yu si wahn mami di play wid ih baybi. Wi ga lata apachooniti fi laan bowt Jehoava fahn di tingz weh hihn mek bikaaz aala dehn ting prayz ahn, weda dehn big er smaal, er if dehn faar er kloas.—Reed Psalm 148:7-10. c

16. Weh wi shuda mek op wi main fi du?

¹⁶ Fi wee Gaad waiz, lovin, ahn powaful. An evriting weh hihn mek byootiful. Wi ku laan bowt Jehoava kwalitiz ahn wahn lat moa bowt hihn if wi tek taim fi luk pahn di tingz weh ih mek. Wi need fi aalwayz tek taim fi injai kriyayshan ahn fi tink bowt weh ih teech wi bowt Jehoava. Wen wi du dis, wi wahn jraa kloasa tu Jehoava. (Jay. 4:8) Eena di neks aatikl, wi wahn si how payrents ku yooz kriyayshan fi help dehn pikni jraa kloasa tu Jehoava.