1. Ni buha buryo bumwe obu Yobu yamanyiremu Yehova ge?

 OMU biganiro byona ebi Yobu yagizire omu kubaho kweye, eki yagizire na Yehova Ruhanga ni ec’omutano. Kugira ngu Yehova akwase Yobu kwesiga ku ayine obwenge kandi ku nafa aha bahereza beye, akamwijusa ebintu bimwe ebi yahangire. Ecokureberaho: Ruhanga akijusa Yobu ku ari kufa aha nyamishwa; obwe rero na we akaba arije kumufaho. (Yob 38:39-41; 39:1, 5, 13-16) Yobu ku yatecerize ahari ebyo byahangirwe, akega byingi aha bikwatirine n’emicwe ya Ruhanga.

2. Ahabw’enki kiri kubasa kutugumira kwetegereza ebi Yehova yahangire?

² N’itwe nitukizaho kumanya Ruhanga twashwijuma ebyahangirwe. Konka, eco kukikora tiko burijo kiri kuba corobi. Twaba tutwire omu tawuni, nikibasa kutugumira kubona ebyahangirwe. Kandi n’obu twakuba tutwire ahu ebyo byahangirwe biri, nitubasa kubura omwanya g’okubyetegereza. Obwe rero, reka turebe enshonga kiri ec’omugasho kukwata obwire kandi tukataho amani tuketegereza ebyahangirwe. Twaza kushwijuma oku Yehova na Yesu bakoresize ebyahangirwe omu kwegesa n’eki turi kubasa kukora kugira ngu tukizeho kubyegereho.

3. Ni enki ekiri kwereka ku Yehova yabire nayenda ngu Adamu ashemerererwe ebi yahangire?

³ Yehova akaba ari kwenda ngu omuntu w’okubanza ashemerererwe ebi yahangire. Ruhanga ku yahangire Adamu, akamuha paradiso ndungi kugira ngu agituremu kandi yamuha omurimo g’okugihinga n’okugishanjura. (Kut 2:8, 9, 15) Tecereza oku Adamu yashemerirwe munonga ku yarebire ebihingwa biri  kumera n’ebimuri biri kurabya. Mazima Adamu akatunga omugisha g’okufa aha musiri gwa Edeni! Nambwenu Yehova akaha Adamu omurimo g’okweta enyamishwa amazina. (Kut 2:19, 20) Yehova akaba ari kubasa kweta enyamishwa amazina, konka ogo murimo akaguha Adamu. Kugira ngu Adamu ayete ezo nyamishwa amazina akaba nabanza yazega ayetonzire, ayetegereza oku zihangirwe n’emicwe yazo. Eco kikamushemeza munonga. Kimukaha oburyo bw’okukizaho kwereka ku nasima Ishe w’omu iguru ahabw’okuba ari omunyabwenge, omunyabukorikori, kandi Omuhangi.

4. (a) Ni eha nshonga emwe eshemerire kutuma twayetegereza ebyahangirwe? (b) Ni biha byahangirwe ebi ori kukunda munonga?

⁴ Enshonga emwe ahabw’enki tushemerire kwetegereza ebyahangirwe, ni oku Yehova ari kwenda ngu tukikore. Natugambira ngu: ‘Mwimusye amisho ganyu ah’iguru murebe.’ Bwanyima akabuza ngu: ‘Ni oha owahangire biriya?’ Ecokugarukamu nikirebeka ge. (Isa 40:26) Yehova akijuza omu iguru, omu nsi n’omu nyanja ebintu byingi birungi ebi yahangire ebi turi kubasa kwegeraho. (Zab 104:24, 25) Mbwenuho tecereza oku Ruhanga yatuhangire. Akatutamu ecetengo c’okwetegereza oburungi bw’ebyahangirwe. Nambwenu, nitubasa kushemerererwa ebyahangirwe byona, tukoresize enyehurira zitu itano, ari zo okureba, okuhurira, okukwata, okuroza n’okuhumeka.

5. Tukuratize ebiri omu Baroma 1:20, ni bata oku turi kugasirwa n’okwega ebi Yehova yahangire?

⁵ Bibuli netugambira endijo nshonga y’omugasho eshemerire kutuma twayetegereza ebyahangirwe. Ebyahangirwe nibitwegesa emicwe ya Yehova. (Shoma omu Baroma 1:20.) Ecokureberaho: Yetegereze oku ebyahangirwe biri kuba bikozirwe. Mbehi tibiri kwereka ku Ruhanga ayine obwenge? Nambwenu, tecereza aha byokurya ebitari bimwe ebi turi kurya. Eco conka ni ekihamya ekiri kwereka ku Ruhanga ari kukunda abantu. Twabona emicwe ya Yehova birabire omu bi yahangire, nikituma twakizaho kumumanya kandi kituma twakizaho kuba banywani beye. Reka tushwijume oburyo bumwe obu Yehova yakoresizemu ebyahangirwe omu kwegesa abantu amashomo g’omugasho.

6. Ni enki eki turi kwega twayetegereza enyonyi ziri kufuruka?

⁶ Yehova ayine entebekanisa y’obwire. Buri mwaka, kwiha omu mperu y’okwezi kwa Kabiri kuhisa omu Kwakatano rwagati, Abisirayeli  bakaba nibareba enkongoro ziri kuguruka ziri kuza omu matemba. Ruhanga akagambira Abisirayeli ati: ‘Enkongoro z’omu mwanya nizimanya obwire bwazo.’ (Yer 8:7) Nk’oku Yehova yaterireho ezo nyonyi entebekanisa y’obwire, ni ko yatireho obwire bw’okucweraho emanja zeye. Obwe rero erizoba ku turi kureba enyonyi ziri kufuruka, nikitwijusa ku turi kubasa kwesiga ku Yehova ‘yatireho obwire’ obu arimariraho egi nsi mbi.​—Hab 2:3.

7. Ku turi kureba enyonyi eri kuguruka nikituhamiza ki? (Isaya 40:31)

⁷ Yehova naha amani abahereza beye. Yehova abirabize ahari Isaya, akaraganisa ku yabire arije kugaruramu amani abahereza beye kugira ngu ‘baguruke ah’iguru n’amapapa nk’empungu’ baba bacwekire entege. (Shoma omuri Isaya 40:31.) Abisirayeli bakaba bamanyirire kureba empungu ziri kutwarwa n’omuyaga zitasibire ziri kutera amapapa. Eco nikitwijusa ku nk’oku Yehova ari kuha amani ezo nyonyi, ni ko ari kuha amani abahereza beye. Obwe rero waguma kureba empungu ziri kuguruka zitasibire nizitera amapapa, ogume oyijuke ku ari ko Yehova ari kubasa kukuha amani g’okwehanganira ebizibu byawe.

8. Ni enki eki Yobu yayegire aha bi Ruhanga yahangire, kandi shi itwe nibitwegesa ki?

⁸ Yehova ni we owu tushemerire kwesiga. Yehova akakwasa Yobu kukizaho kumwesiga. (Yob 32:2; 40:6-8) Ruhanga akaganira na Yobu, yamugambira bimwe omu byahangirwe byeye, harimu enyonyozi, ebicu, n’enkuba. Nambwenu, Yehova akamugambira aha nyamishwa, harimu embogo n’embarasi. (Yob 38:32-35; 39:9, 19, 20) Ebyo byona nibitwereka ekihamya ekiri kwereka ku Ruhanga ayine amani mingi, konka nambwenu bitwereka ku ayine rukundo n’obwenge bwingi. Ekiganiro eki Yobu yagizire na Yehova kikatuma yakizaho kumwesiga okukira kare hona. (Yob 42:1-6) Ni co kimwe, twayega aha byahangirwe nikitwijusa ku Yehova ayine obwenge n’amani ebitine bugarukiro okutukiza. Nambwenu ayine amani g’okutwihiraho ebigezo byitu byona kandi nayija kukikora. Eco nikibasa kutuma twakizaho kumwesiga.

9-10. Ni enki eki omushana n’enjura biri kutwegesa ahari Yehova?

⁹ Yesu akaba namanya ge ebyahangirwe. Ahakuba Yesu ari “omukozi mukuru,” akatunga omugisha g’okwekwatanisa n’Ishe omu kuhanga iguru n’ensi. (Emi 8:30) Bwanyima, obu Yesu yabire ari omu nsi, akakoresa ebyahangirwe omu kwegesa abegi beye ebiri kukwata ahari Ishe. Reka tushwijume gamwe omu mashogo agu yabegesize.

¹⁰ Yehova nakunda abantu bona. Omuri toku y’aha rushozi ya Yesu, akagambira abegi beye aha byahangirwe bibiri ebi abantu batari kukunda kufaho, ni okugamba omushana n’enjura. Ebyo bintu byombi nibituma amagara gagumizamu kubaho. Kuri Yehova yabyenzire akaba atarabihe abantu abatabishemerire. Omu mwanya gw’eco, akatwereka rukundo yatuha omushana n’izoba kandi tari kushobora. (Mat 5:43-45) Yesu akakoresa ebyo byokureberaho kugira ngu ayegese abegi beye ku Yehova ari kwenda ngu twereke abantu bona rukundo. Burijo ku turayote akashana tukahurira obutagasi bwako, ninga shi tukareba enjura yagwa, tugume tutecereze ahari rukundo ya Yehova etarimu okushorora. Ecokureberaho ceye nikibasa kutuma n’itwe twayereka abandi rukundo turi kubaburira tutari kubashobora.

11. Ni bata oku okwetegereza enyonyi z’omu mwanya kiri kutugaruramu amani?

¹¹ Yehova natuha ebi turi kwetenga by’omubiri. Nambwenu omuri eyo toku, Yesu akagamba  ati: ‘Mwetegereze enyonyi z’omu mwanya; tizibiba, tizigesha, n’obu kwakuba okuhunika omu bitara; konka Sho ow’omu iguru nazirisa.’ Nikibasika ku ababire bahurikize Yesu barebire enyonyi ziri kuguruka omu mwanya obu yababurize ngu: “Mbehi imwe timuri kuzikira?” (Mat 6:26) Obwo ku ni oburyo burungi obu Yesu yatuhamizemu ku Yehova arije kutuha ebi turi kwetenga by’omubiri! (Mat 6:31, 32) Eryo ishomo ry’ebyahangirwe na hati ricagumizamu kugaruramu amani abahereza ba Yehova b’abesigwa. Omunyanyazi w’omupayoniya ocari muto w’omuri Supeyini akaba nahurira acwekire entege ahakuba yabire atari kubasa kubona ah’okuba. Konka ku yarebire nyonyi ziri kurya encereri n’otundi tujuma, kikamugaruramu amani. Akagamba ati: “Ezo nyonyi zikanyijusa ku yaba Yehova ari kuzifaho, nanye arije kumfaho.” Omu bwire buce, ogo munyanyazi akahika aho yabona ahantu habonire ah’okuba.

12. Tukuratize ebiri omuri Matayo 10:29-31, ni enki eki ebiterankumba biri kutwegesa ahari Yehova?

¹² Yehova nafa ahari buri omwe omuri itwe. Mbere y’okutuma entumwa za Yesu omu murimo g’okuburira, akazikwasa kutatina ababire barije kuzihiganisa. (Shoma omuri Matayo 10:29-31.) Eco akakikora ari kugamba aha nyonyi ezabire zimanyirirwe omuri Isirayeli, ni okugamba ebiterankumba. Omu bwire bwa Yesu ezo nyonyi zikaba nizirebwa nk’ezitine mugasho muhango. Konka, akagambira abegi beye ati: ‘Konka tihine na kimwe ekigwa ahaasi Sho atakimanyire.’ Bwanyima akongeraho ati: ‘Imwe nimukira ebiterankumba byingi.’ Obwe rero Yesu akahamiza abegi beye ku Yehova ari kureba buri omwe omuri bo nk’ow’omuhendo, kandi ku batine nshonga yona y’okutina kuhiganisibwa. Hatariho okubanganisa abegi ba Yesu bakaba nibijuka ebyo bigambo bya Yesu ku babire nibareba ebiterankumba bari kuburira omu matawuni n’omu byaro. Ku oragume kureba akanyonyi kace, ogume oyijuke ku Yehova ari kukufaho iwe aha kiti cawe ahakuba ‘nokira ebiterankumba byingi.’ Nayija kukukwasa orabe omu kuhiganisibwa oyine obwesige.​—Zab 118:6.

13. Ni enki ekirije kutukwasa kwegera aha byahangirwe?

¹³ Nitubasa kwega ebindi bintu byingi ebiri kukwata ahari Yehova birabire omu byahangirwe. Bata shi? Ec’okubanza, tushemerire kukwata obwire tuketegereza ebyahangirwe. Bwanyima, tushemerire kutecereza aha ki biri kutwegesa ahari Yehova. Konka kukora ebyo ti ko burijo kiri kutworobera. Omunyanyazi w’omuri Kameruni ori kwetwa Géraldine, akagamba ati: “Nkakurira omu tawuni, obwe rero nikinshaba kutaho amani kugira ngu nyetegereze ebyahangirwe.” Omuzehe ori kwetwa Alfonso akagamba ati: “Nkareba ku nshemerire kutaho obwire bw’okuba nyenka kugira ngu nyetegereze ebi Yehova yahangire kandi ntecereze eki biri kunyegesa ahari we.”

14. Ni enki eki Dawudi yayegire bwanyima y’okutecereza aha bi Ruhanga yahangire?

 ¹⁴ Dawudi akaba natecereza munonga aha bi Ruhanga yahangire. Akagambira Yehova ati: ‘Ku ntekateka ah’iguru ryawe eri wahangire n’emikono yawe, okwezi n’enyonyozi ezi wahangire, omuntu ni kintu ki iwe okumwijuka?’ (Zab 8:3, 4) Mazima, Dawudi ku yabire nayetegereza omu iguru buri nyekiro, akaba atari kutangara kusha ahabw’oku iguru rihangirwe. Ahobwe nambwenu akaba natecereza eki enyonyozi ziri kumwegesa ahari Ruhanga. Akamanya ku Yehova ayine amani mingi. Obundi bwire, Dawudi akatecereza oku yakurire omu nda ya nyina. Oku yakirizeho kutecereza ahari ebyo bintu byona by’omugasho, ni ko yakirizeho kusima Yehova ahabw’obwenge bweye.​—Zab 139:14-17.

15. Gamba ebyokureberaho by’oku warebire emicwe ya Yehova birabire omu byahangirwe byeye. (Zaburi 148:7-10)

¹⁵ Nka Dawudi, tori kwetenga kubanza waza hare kugira ngu obone ebyahangirwe by’okutecerezaho. Wareba ebintu ebikwehinguririze, nobasa kubonamu ebintu byingi ebiri kukwegesa emicwe ya Yehova. Ecokureberaho: Ku oragume kuhurira obutagasi bw’omushana bwakubabura aha mubiri, ogume oyijuke ku Yehova ayine amani. (Yer 31:35) Waguma kureba enyonyi eri kombeka ecari, ogume oyijuke ku Ruhanga ayine obwenge. Waguma kureba ecana c’embwa kiri kuzanisa omukira gwaco, ogume oyijuke ku Yehova ari Ruhanga ori kushemererwa. Kandi waguma kureba omuzire ari kuzana n’omwana weye, ogume osime Yehova ahabwa rukundo yeye. Twine oburyo bwingi bw’okwega ebiri kukwata ahari Yehova ahakuba ebyahangirwe byeye, harimu ebihango n’ebice, ebya hihi n’ebya hare, byona nibimuhimbisa.​—Shoma omuri Zaburi ya 148:7-10.

16. Ni enki eki twamaririra kukora?

¹⁶ Ruhanga witu ni omunyabwenge, ori kufa aha bantu, omunyabukorikori, kandi oyine amani. Eyo micwe n’endijo myingi nitugirebera aha byahangirwe, konka ku turi kubyetegereza. Nimureke twena tugumizemu kukwata obwire bw’okushemerererwa ebyahangirwe kandi tutecereze aha ki biri kutwegesa ahari Yehova. Eco ku turakikore, nitwija kukizaho kuhika hihi y’Omuhangi witu. (Yak 4:8) Omu kicweka ekiri kukurataho, nitwija kureba oku abazire bari kubasa kukoresa ebyahangirwe omu kukwasa abana babo kuhika hihi ya Yehova.