1. Job nih Jehovah kong ṭha deuh in a hun hngalh khawhnak lamkhat cu zeidah a si?

 JOB cu a nun chungah midang he voi tampi bia an i ruah, asinain Jehovah Pathian he bia an i ruahmi nih a lung a suk bik. Jehovah nih a fimnak le a salle zohkhenh khawhnak a ngeihmi cungah Job zumhnak fehter chin awkah khuaruahhar a simi kokek thil cheukhat kha a langhter. Tahchunhnak ah, Pathian nih saram pawl a zohkhenh hna caah amah Job zong a zohkhenh khawh ti kha a hngalhter. (Job 38:39-41; 39:1, 5, 13-16) Sermi kong ruahnak thawngin Job nih Pathian i a sining kong kha tampi a cawn.

2. Jehovah sermi kong hlathlai awkah zeicah kan i harh khawh men?

² Pathian sermi thil kong ṭha tein kan hlathlai tikah Pathian kong kha tam deuh in kan hun hngalh khawh ve. Asinain cutin tuah cu a zungzal in cun a fawi men lai lo. Khuapi ah a ummi kan si ahcun nifa kan nunnak ah kokek thil hna kha tlawmpal lawng kan hmuh men lai. Kokek thil he naihniam tein a ummi kan si hmanhah mah kong hlathlainak ah a caan kan ngei lo tiah kan ruah men lai. Cucaah sermi thil hna hlathlainak caah a caan pek le i zuam cu zeicah a phut timi kong i ruah hna u sih. Jehovah le Jesuh nih cawnpiaknak ah sermi thil an hman ning le kokek thil hna in cawn awkah zeidah kan tuah khawh timi kong zong kan i ruah hna lai.

3. Jehovah nih Adam kha sermi thil ah i nuam seh ti a duh kha zeinihdah a langhter?

³ Jehovah nih hmasa bik minung kha a sermi thil ah i nuam seh ti a duh. Pathian nih Adam a ser tikah umnak hmun caah  aa dawh tukmi paradis kha a pek i mah paradis zohkhenh awk rian zong a pek. (Gen. 2:8, 9, 15) Adam nih pangpar pawl an keuh i an parmi a hmuh tikah zeitluk in dah a lung a cawlcangh lai ti khi ruathmanh. Eden dum zohkhenhnak rian cu Adam caah tinvo sung taktak a si. Jehovah nih Adam kha saram pawl min pek awk zongah a fial. (Gen. 2:19, 20) Jehovah nih saram pakhat cio kha min a pek khawh ko hna, asinain Adam tu kha rian a pek. Adam nih min a pek hna hlanah saram pawl i an umtu ning le an ziaza kha ṭha tein a zoh hmasa hna lai ti cu a fiang ko. Mah tikah Adam cu aa nuam tuk ko lai. Mah nih Adam kha a Pa i a fimnak, a zungthiamnak le a thilsernak hna sunsak chin awkah a bawmh ko lai.

4. (a) Sermi kong kan hlathlai awk a sinak a ruang pakhat cu zeidah a si? (b) Zei bantuk sermi thil hna dah a hleiin na sunsak?

⁴ Sermi kong kan hlathlai awk a sinak a ruang pakhat cu Jehovah nih cutin tuahter a kan duh caah a si. “Van khi zoh tuah u” tiah a kan ti. Cun hitin a kan hal: “Nan hmuhmi arfi khi aho nih dah a ser hna?” A phi cu a fiang ko. (Isa. 40:26) Jehovah nih vancung ah a ummi thil lawng si loin vawlei le rili ah a ummi thil vialte zong a ser. Mah thil vialte nih a kong kha a kan cawnpiak. (Salm 104:24, 25) Cun Jehovah nih kanmah a kan ser ning zong kha ruathmanh. Aa dawh tukmi kokek thil hna sunsak awkah a kan ser. Hmuhnak, theihnak, tawnghnak, a thawtnam theihnak le a haw theihnak timi hngalhnak panga thawngin a sermi thil a phunphun kha i nuamhpi khawh awk zongah a kan ser.

5. Rom 1:20 ningin Jehovah sermi kong hlathlainak in zeitindah ṭhathnemhnak kan hmuh khawh?

⁵ Sermi kong kan hlathlai awk a sinak a dang a biapimi a ruang pakhat kha Baibal nih a langhter. Mah nih Jehovah i a sining hna kha a kan cawnpiak. (Rom 1:20 rel.) Tahchunhnak ah, Jehovah sermi thil hna kha zoh law khuaruahhar in ser an sining kha hlathlai. Mah nih Pathian fimnak kha an langhter a si ko lo maw? Kan ei khawhmi rawl a phunphun kong kha ruathmanh. Mah nih minung a kan dawtnak kha fiang tein a langhter. A sermi thil in Jehovah sining hna kan hun hngalh tikah a kong hngalh chin awk le amah he i naih chin awkah a kan forh. Atu minung cawnpiak awkah Jehovah nih sermi thil a hman ning lam cheukhat kha zohhmanh hna u sih.

6. Hmun aa ṭhialmi vaca pawl kong hlathlainak in zeidah kan cawn khawh?

⁶ Jehovah nih caan suaimi a ngei. Kum fatin  February thla a donghnaklei in May thla lai karah vaca pawl cu chaklei ah i ṭhial dingin an zuanmi kha Israel mi nih an hmuh tawn. Pathian nih Israel mi kha “van i a zuangmi vaca nih khin amah a kai caan te kha a hngalh” tiah a ti hna. (Jer. 8:7) Jehovah nih mah va pawl caah a caan a khiah bantukin biaceihnak ni ca zongah a caan a khiah ve. Tuchan ah hmun aa ṭhialmi va pawl kong kan hlathlai tikah Jehovah nih hi chan ṭhalo donghter awkah “sawhmi caan” a ngei ti zumh khawh a sinak kha a kan hngalhter ṭhan.—Hab. 2:3.

7. Va an zuan ningin zeidah kan cawn khawh? (Isaiah 40:31)

⁷ Jehovah nih a salle kha thazaang a pek hna. Jehovah nih Isaiah hmangin a miphun kha an tha a der tik asiloah an lung a dongh tikah ‘mupi bangin zuan’ awkah thazaang ka pek hna lai tiah bia aa kam. (Isaiah 40:31 rel.) Mupi nih an thazaang tlawmpal lawng hmangin thli a kal ningin an zuan tawnmi kha Israel mi nih an hmuh. Jehovah nih mah va pawl ṭhawnnak a pek hna bantukin a salle zong ṭhawnnak a pek khawh hna timi hngalh cu zeitluk in dah a ṭhat. A ṭhawngmi va pakhat nih a thla kha fakpi in a zah i sang deuh chinchin in a zuanmi na hmuh tikah Jehovah nih na tonmi buaibainak hna tawnghtham awkah thazaang aan pek khawh ti kha philhhlah.

8. Pathian sermi thil kong ruahnak in Job nih zeidah a hngalh, kannih tah zeidah kan cawn khawh?

⁸ Jehovah cu bochan awk a tlakmi a si. Jehovah nih Job kha amah i bochan chin dingin a rak bawmh. (Job 32:2; 40:6-8) Job he an biaruahnak ah Pathian nih arfi, minmei le nimtlau i telin sermi thil tampi kong kha a rak langhter. Jehovah nih fungtum le rangtum ti bantuk saram pawl kong zong a rak chim. (Job 38:32-35; 39:9, 19, 20) Mah thil hna nih khuaruahhar a simi Pathian ṭhawnnak lawng si loin a dawtnak le a fimnak zong an langhter. Mah an biaruahnak thawngin Job nih Jehovah kha a hlan nakin a hun i bochan deuh. (Job 42:1-6) Cu bantukin sermi kong kan hlathlai tikah Jehovah cu kanmah nakin a let tampi in a fim deuhmi le a ṭhawng deuh tukmi a si ti kha a kan hngalhter. Cun kan harnak vialte kha a donghter khawh i a dongh zong a donghter lai. Mah nih amah kan i bochannak kha a fehter chinchin khawh.

9-10. Nika le ruah nih Jehovah kong he aa tlaiin zeidah a kan cawnpiak?

⁹ Jesuh nih kokek thil kong kha ṭha tein a hngalh. “Rian thiam ngaimi” pakhat in van le vawlei sernak ah a Pa he rianṭuanṭinak tinvo sung a rak hmu. (Ptb. 8:30) A hnu i vawleicung a um lioah a zultu pawl a Pa kong cawnpiak awkah sermi thil kha a rak hman. A cawnpiakmi hna lakin a kong tlawmpal kha i ruah hna hmanh u sih.

¹⁰ Jehovah nih mikip cungah dawtnak a langhter. Tlangcung Cawnpiaknak ah Jesuh nih mi tampi nih ṭha tein an hngalhmi, sermi thil pahnih nika le ruah kong kha a zultu pawl a rak chimh hna. Mah thil pahnih cu kan nunnak caah a biapi tukmi an si. Jehovah nih amah a bia lomi hna kha mah thil pawl pek loin a um kho ko. Asinain kan dihlak in nika le ruah kha dawtnak he a kan pek. (Matt. 5:43-45) Jehovah nih mikip cungah dawtnak langhter a duh ti kha a zultu pawl cawnpiak awkah Jesuh nih mah kong kha a rak hman. Aa dawh tukmi nitlak asiloah ruah a surmi hna kan hmuh tik paohah Jehovah nih mikip cungah dawtnak a langhtermi kha kan ruah khawh. A kong nih mi vialte sinah phungchimnak thawngin cu bantuk dawtnak kha langhter awkah a kan forh khawh.

11. Va pawl kong hlathlainak in zeitindah thazaang kan hmuh khawh?

 ¹¹ Jehovah nih pumsalei kan herhmi kha a kan pek. Tlangcung cawnpiaknak ah Jesuh nih hiti zongin a ti: “A zuang lengmangmi va khi zoh tuah hna u: thlaici an tuh bal lo, rawl an ṭuan bal lo, buk zongah an rawn bal lo; sihmanhsehlaw vancung khua i a ummi nan Pa nih a zohkhenh ko hna.” A bia a ngaimi hna kha Jesuh nih “Nannih cu va nakin nan biapi deuh lo maw?” tiah a hal hna lioah an lu cungah va a zuanmi kha an hmuh khawh men. (Matt. 6:26) Dawtnak aa telmi mah lam in Jehovah nih pumsalei kan herhmi a kan zohkhenh lai ti kha a kan zumhter. (Matt. 6:31, 32) Kokek thil in kan cawn khawhmi mah kong nih zumhfekmi salle kha thazaang a pek hna. Spain ram i mino hmaikal unaunu pakhat cu aa tlakmi umnak inn a hmuh khawh lo caah a lung a dong tuk. Asinain a ci le berry thei pawl a eimi va pawl a hmuh hna tikah a ṭhami ruahnak a hun ngei ṭhan. “Jehovah nih mah vatete a zohkhenhmi hna nih kei zong a ka zohkhenh ve lai ti kha a ka hngalhter ṭhan” tiah a ti. Mah hnu tlawmpal ah unaunu nih umnak inn a hmuh.

12. Matthai 10:29-31 ningin pithlung va nih Jehovah kong he aa tlaiin zeidah an langhter?

¹² Jehovah nih pumpak pakhat cio kha a kan sunsak. Phungchim dingin lamkaltu pawl a thlah hna hlanah Jesuh nih ralchanhnak ṭihnak an ngeihmi kha tei awkah a bawmh hna. (Matthai 10:29-31 rel.) Israel ram ah a tam bikmi va phunkhat a simi pithlung va kong a chimnak thawngin a rak bawmh hna. Mah va cu Jesuh chan lioah a man a tlawmte. Asinain Jesuh nih a zultu pawl kha hitin a ti hna: “Khi pithlung pakhat hmanh kha nan Pa hngalh loin vawlei ah a tlong lo.” Cun hitin a ti chap: “Nannih cu pithlung tampi nakin tampi in nan sung deuh.” Jesuh nih a zultu pawl kha Jehovah nih pumpak pakhat cio in a sunsak hna ti kha a hngalhter hna. Cucaah hremnak kong he aa tlaiin ṭih ding a ruang zeihmanh a um lo. Khuapi le khuate i phung an chim lioah pithlung an hmuh tikah Jesuh chimmi bia kha an lung ah a chuak ṭhan ko lai. Va fate pakhat nan hmuh fatin ‘pithlung tampi nakin tampi in nan sun deuh’ caah Jehovah nih pumpak pakhat cio in aan sunsak hna ti kha i cinken u. Jehovah bawmhnak thawngin ralchanhnak hna kha zumhnak he na tei khawh.—Salm 118:6.

13. Sermi thil in cawn awkah zeinihdah a kan bawmh khawh?

¹³ Sermi thil in Jehovah kong he aa tlaimi a dang thil tampi kan cawn khawh. Zeitindah? Pakhatnak, sermi thil hlathlai awkah a caan kan pek a hau. Pahnihnak, mah nih Jehovah kong he aa tlaiin zeidah a kan cawnpiak ti kha kan ruah a hau. Mah kehlan hna hlan cu kan caah a zungzal in cun a fawi men lai lo. Cameroon ah a ummi unaunu Géraldine nih “Khuapi i a ṭhangmi ka si caah kokek kong  hlathlai awkah fakpi in kaa zuam a hau” tiah a ti. Khrihfa upa a simi Alfonso nih “Jehovah sermi thil kong hlathlai awk le mah nih Jehovah kong he aa tlaiin a ka cawnpiakmi kha ṭha tein ruah awkah a caan suaimi ngeih a hau ti kha ka hun hngalh” tiah a ti.

14. Pathian sermi thil kong a ruah tikah David nih zeidah a hngalh?

¹⁴ David nih Pathian thil sermi kong hna kha thukpi in a ruah. Jehovah kha hitin a ti: “Nangmah na sermi van le an hmun ciote ah na chiahmi hna thlapa le arfi hna khi ka zoh tikah minung hi zeidah a si i na hnak karah na tenh?” (Salm 8:3, 4) David nih arfi hna a zoh tikah van le vawlei i an sunparnak kha a sunsak. Asinain mah lawng a si lo, arfi nih Pathian kong he aa tlaiin a cawnpiakmi zong ṭha tein a ruah. Mah tikah Jehovah cu zeitluk in dah a liannganmi a si ti kha a hun hngalh. Caan dang zongah David nih a nu paw chung i a pum a ṭhan ning kong kha a ruah. David nih khuaruahhar a simi mah a neknok kong hna ṭha tein a ruah tikah Jehovah fimnak kha a sunsak chinchin.—Salm 139:14-17.

15. Sermi thil in Jehovah sining hna na hmuh khawh ning kha tahchunhnak pe. (Salm 148:7-10)

¹⁵ David bantukin sermi thil kong ṭha tein ruah awkah kokek thil hna kha lamhlapi ah kawl a hau lo. Na pawngkam na zoh tikah Jehovah sining tampi na hmuh khawh. Tahchunhnak ah, nika nih lumnak aan pek tikah Jehovah ṭhawnnak kha na hmuh khawh. (Jer. 31:35) Va pakhat nih a bu a sermi na hmuh tikah Pathian fimnak kong kha ruat. A mei a dawimi uico fate na hmuh tikah Jehovah cu aa nuammi a sinak kong kha ruat. A fate he lente aa celhmi nu pakhat na hmuh fatin Jehovah dawtnak cungah i lawm. Jehovah thil sermi nih—a ngan siseh, a hme siseh, lamnai ah a ummi siseh, lamhla ah a ummi siseh an dihlak in amah an thangṭhat caah Jehovah kong cawn awkah caanṭha tampi kan ngei.—Salm 148:7-10 rel.

16. Zei tuah awkah dah bia kan khiah awk a si?

¹⁶ Kan Pathian cu a fimmi, dawtnak a ngeimi le a ṭhawngmi a si i a sermi thil vialte cu an i dawh dih. Kan pawngah a ummi sermi thil vialte kha ṭha tein kan zoh tikah mah a sining hna le a dang a kong tampi zong kan cawn khawh. Sermi thil kong hlathlai awk le mah nih Jehovah kong a kan cawnpiakmi kha ṭha tein ruah awkah a caan hmaan tein kan pek awk a si. Cutin tuahnak thawngin Sertu he kan hun i naih deuh lai. (Jeim 4:8) A hnu capar ah nulepa nih an fale kha Jehovah he i naih dingin an bawmh hna tikah sermi thil an hman khawh ning kong kan i ruah hna lai.