1. Ki en fason ki Zob ti aprann konn Zeova pli byen?

 PARMI tou bann konversasyon ki Zob in annan dan son lavi, i annan enn ki i pa pou zanmen oubliye. Sa i sa konversasyon ki i ti fer avek Zeova. Dan sa konversasyon, Zeova ti dir Zob obzerv serten keksoz merveye ki I’n kree. Sa ti pou ed Zob pour konnen ki Zeova i vreman saz e i ti pou ed Zob annan plis konfyans ki Zeova i kapab donn son bann serviter tou sa ki zot bezwen. Par egzanp, Bondye ti fer Zob rapel ki i pran swen avek bann zannimo, alor i kapab pran swen avek Zob osi. (Zob 38:39-41; 39:1, 5, 13-16) Ler Zob ti reflesir lo serten keksoz ki Zeova in kree, Zob ti aprann en kantite keksoz lo personnalite Bondye.

2. Akoz parfwa i kapab difisil pour nou obzerv kreasyon Zeova?

² Nou osi, nou kapab aprann en kantite keksoz lo nou Bondye ler nou obzerv bann keksoz ki I’n kree. Me parfwa i difisil pour nou fer sa. Si nou reste dan en lavil, petet pa toulezour ki nou pou vwar bann keksoz ki Zeova in kree. Menm si nou pa reste dan lavil, i kapab ki nou santi ki nou napa ase letan pour obzerv bann keksoz ki Zeova in kree. Alor, annou vwar akoz i enportan ki nou pran letan e fer zefor pour obzerv kreasyon Zeova. Nou pou vwar ki mannyer Zeova ek Zezi ti servi bann keksoz dan kreasyon pour ansennyen e ki nou kapab fer pour aprann plis avek kreasyon.

3. Kwa ki montre ki Zeova ti anvi Adan i apresye kreasyon?

³ Zeova ti anvi ki sa premye imen i apresye Son kreasyon. Ler Bondye ti kree Adan, i ti donn li en zoli paradi pour reste ladan e i ti donn li sa responsabilite pour pran swen avek  sa paradi e agrandi li. (Zen. 2:8, 9, 15) Imazin ki mannyer Adan ti eksite ler i ti vwar bann lagrenn pe zermen e bann fler pe fleri. I ti en gran loner pour Adan pran swen avek zarden Edenn. Zeova ti osi demann Adan pour donn non tou bann zannimo. (Zen. 2:19, 20) Zeova ti’n kapab fer sa li menm me i ti donn Adan sa responsabilite. San dout, avan ki Adan ti deside pour donn non bann zannimo, i ti etidye zot byen e egzamin byen zot konportman. I bezwen ki Adan ti kontan pour fer sa. Sa ti sirman ed li pour konpran ki Zeova i vreman saz e ki bann keksoz ki Zeova in kree i enteresan e zoli.

4. (a) Ki en rezon akoz nou devret obzerv kreasyon? (b) Kwa ki ou pli kontan dan kreasyon?

⁴ En rezon ki nou obzerv kreasyon i akoz Zeova ki anvi nou fer li. Zeova i dir nou: “Get anler e regarde.” Apre i dir: “Lekel ki’n kree sa bann keksoz?” Larepons i kler. (Iza. 40:26) Zeova ki’n kree tou keksoz ki dan lesyel, lo later e dan lanmer. Tou sa bann keksoz i ansenny nou lo Zeova. (Ps. 104:24, 25) Mazin lafason ki Bondye in kree nou. I’n fer li posib pour nou apresye bann zoli keksoz dan lanatir. I’n donn nou abilite pour vwar, tande, touse, goute e santi. Tousala i ed nou pour apresye bann diferan keksoz ki Zeova in kree.

5. Dapre Romen 1:20, ki byenfe nou gannyen ler nou etidye kreasyon Zeova?

⁵ Labib i donn nou en lot rezon enportan akoz nou devret obzerv kreasyon. Kreasyon i ansenny nou lo personnalite Zeova. (Lir Romen 1:20.) Par egzanp, obzerv bann keksoz ki I’n kree e ou pou vwar ki zot in ganny fer dan en fason merveye. Zot ansenny nou ki Zeova i vreman saz. Mazin osi sa varyete manze ki i annan pour nou manze. Sa i montre ki Zeova i kontan bann imen en kantite. Ler nou vwar personnalite Zeova dan bann keksoz ki i fer, sa i ed nou pour konn li pli byen e pour vin pli pros avek li. Aprezan, annou vwar serten fason ki Zeova in servi kreasyon pour ansenny bann imen bann leson enportan.

6. Ki leson nou kapab aprann ler nou obzerv bann zwazo ki pe imigre?

⁶ Zeova ki deside kan ki bann levennman pou arive. Tou le lannen, ant finisyon Fevriye ek milye Me, bann Izraelit ti kapab vwar bann sigonny pe anvole par lao zot pei, pour al imigre dan nor. Bondye ti dir  bann Izraelit: “Sigonny dan lesyel i konn sezon kan i devret ale.” (Zer. 8:7) Zeova in deside kan ki sa bann zwazo pou imigre. Dan menm fason, i’n fini deside kan ki i pou egzekit son zizman. Ozordi ler nou obzerv bann zwazo pe imigre, sa i fer nou rapel ki nou kapab annan konfyans ki Zeova i annan en “letan fikse” pour li detri sa move lemonn.​—Aba. 2:3.

7. Ki nou kapab aprann avek lafason ki en zwazo i anvole? (Izai 40:31)

⁷ Zeova i donn son bann serviter lafors. Atraver profet Izai, Zeova ti promet ki ler son pep ti pou santi zot fay oubyen dekouraze, I ti pou donn zot lafors pour “anvol pli o konmsi zot annan lezel leg.” (Lir Izai 40:31.) Bann Izraelit ti abitye vwar bann leg pe anvole dan lesyel san ki zot bezwen bat zot lezel en kantite. Bann leg i kapab fer sa par servi bann kouran ler ki soufle anba zot lezel e ki tenir zot dan lezer. Sa i fer nou rapel ki Zeova i kapab donn nou lafors zis parey i donn sa bann zwazo. Ler ou vwar en zwazo ki vreman o dan lesyel e i pa pe bat son lezel, rapel ki Zeova i kapab donn ou lafors pour fer fas avek ou bann problenm.

8. Ki Zob ti aprann avek kreasyon Zeova e ki nou kapab aprann?

⁸ Zeova i diny konfyans. Zeova ti ed Zob pour devlop plis konfyans dan Li. (Zob 32:2; 40:6-8) Ler Bondye ti koz avek Zob, i ti koz lo en kantite keksoz ki I ti’n kree, sa ti enkli bann zetwal, nyaz ek zekler. Zeova ti osi koz lo bann zannimo parey toro maron ek seval. (Zob 38:32-35; 39:9, 19, 20) Tou sa bann keksoz i montre ki Zeova i vreman pwisan e i osi montre son lanmour ek son lasazes. Sa konversasyon ti ed Zob pour annan plis konfyans dan Zeova. (Zob 42:1-6) Pareyman, ler nou etidye kreasyon, sa i fer nou rapel ki Zeova i bokou pli saz e bokou pli pwisan ki nou. Zeova i kapab e i pou met en lafen avek tou nou problenm. Sa i kapab ed nou pour annan plis konfyans dan li.

9-10. Ki soley ek lapli i ansenny nou lo Zeova?

⁹ Zezi ti konn en kantite lo lanatir. Konman “en zouvriye abil,” Zezi ti travay avek son Papa pour kree liniver. (Prov. 8:30) Pli tar, ler Zezi ti lo later, i ti servi kreasyon pour ansenny son bann disip konsernan son Papa. Annou vwar serten leson ki i ti ansennyen.

¹⁰ Zeova i demontre lanmour anver tou dimoun. Dan Sermon lo Montanny, Zezi ti koz avek son bann disip lo de keksoz dan kreasyon ki en kantite dimoun pa vwar li spesyal. Sa i soley ek lapli. Tou le de i neseser pour nou kapab kontinyen viv. Zeova ti kapab pa donn sa bann keksoz bann dimoun ki pa servi li. O kontrer, Zeova i kontan pour donn soley ek lapli avek tou dimoun. (Mat. 5:43-45) Zezi ti servi sa legzanp pour ansenny son bann disip ki Zeova i anvi ki nou demontre lanmour anver tou dimoun. Sak fwa nou pe admir soley kouse oubyen nou pe apresye lapli ki pe tonbe, nou kapab mazin lanmour ki Zeova i annan pour tou dimoun. Legzanp Zeova i kapab motiv nou pour demontre sa menm lanmour par anons sa bon nouvel avek tou dimoun.

11. Ki lankourazman nou kapab gannyen ler nou get bann zwazo dan lesyel?

¹¹ Zeova i donn nou sa ki nou bezwen pour viv. Dan Sermon lo Montanny, Zezi ti osi dir: “Get byen bann zwazo dan lesyel, zot pa senm lagrenn, ni rekolte, ni anmas dan stor, pourtan zot Papa dan  lesyel i donn zot manze.” I tre probab ki bann dimoun ki ti pe ekout Zezi ti vwar zwazo pe anvole ler Zezi ti demann zot: “Pa zot annan plis valer ki sa bann zwazo?” (Mat. 6:26) I dan sa fason ki Zezi i ed nou pour vwar ki Zeova pou donn nou sa ki nou bezwen pour viv. (Mat. 6:31, 32) Sa i en zoli leson ki nou aprann avek kreasyon e sa legzanp i kontinyen ankouraz bann serviter fidel Zeova. En zenn ser ki ti en pionye Lespanny, ti santi li dekouraze parski i pa ti kapab trouv en bon landrwa pour li reste. Me apre ki i ti vwar bann zwazo pe manz bann lagrenn ek fri, sa ti fer li annan kouraz. I dir: “Sa bann zwazo i fer mwan rapel ki Zeova i enterese avek mwan e ki i pou osi pran swen avek mwan.” Pa bokou letan apre, sa ser ti trouv en landrwa reste.

12. Dapre Matye 10:29-31, ki bann sren i ansenny nou lo Zeova?

¹² Zeova i apresye sakenn parmi nou. Avan Zezi ti anvoy son bann zapot pour anons sa bon nouvel, Zezi ti ed zot pour sirmont zot lafreyer ler dimoun i opoz zot. (Lir Matye 10:29-31.) I ti fer sa par koz lo bann sren ki ti en zwazo ki ti annan en kantite Izrael. Dan letan Zezi, sa bann zwazo ti napa bokou valer. Me i ti dir son bann disip: “Napa ni enn parmi zot ki tonm ater san ki zot Papa i konnen.” Apre sa i ti dir: “Zot annan bokou plis valer ki en kantite sren.” Zezi ti asir son bann disip ki Zeova ti apresye sakenn parmi zot. Alor zot ti napa rezon pour per ki zot ganny persekite. Nou kapab asire ki bann disip ti rapel parol Zezi ler zot ti vwar bann sren pandan ki zot ti fer predikasyon dan bann lavil ek vilaz. Sak fwa ki ou vwar en pti zwazo, rapel ki Zeova i apresye ou parski ou osi ou “annan bokou plis valer ki en kantite sren.” Alor ler dimoun i opoz ou, ou pa pou per parski Zeova pou ed ou.​—Ps. 118:6.

13. Kwa ki pou ed nou pour aprann bann leson atraver kreasyon?

¹³ Nou kapab aprann en kantite lezot keksoz konsernan Zeova atraver kreasyon. Ki mannyer nou kapab fer sa? Premyerman, nou bezwen pran letan pour obzerv kreasyon. Apre nou bezwen reflesir lo sa ki kreasyon i ansenny nou lo Zeova. Petet i pa pou toultan fasil pour fer sa. Géraldine, en ser ki reste Kameroun, i dir: “Mon’n grandi dan lavil alor mon ti bezwen fer bokou plis zefor pour obzerv kreasyon.” En ansyen ki apel Alfonso i dir: “Mon’n vwar ki mon bezwen met letan dekote kot mon tousel pour mwan kapab obzerv kreasyon Zeova e medit lo sa ki kreasyon i ansenny mwan lo Zeova.”

14. Ki David ti aprann ler i ti medit lo kreasyon Bondye?

 ¹⁴ David ti medit lo kreasyon Bondye. I ti dir Zeova: “Ler mon vwar ou lesyel, sa ki ou’n fer, lalin ek zetwal ki ou’n met an plas, ki en imen i ete pour ki ou mazin li?” (Ps. 8:3, 4) Ler David ti get dan lesyel aswar, i pa ti pe zis get zetwal. I ti pe osi medit lo sa ki bann zetwal i ansenny li lo Bondye. I ti aprann ki Zeova i annan en kantite lasazes e i pwisan. Parfwa David ti medit lo lafason ki son lekor ti’n devlope dan vant son manman. Ler i ti reflesir lo fason merveye ki son lekor in ganny fer, i ti devlop plis lapresyasyon pour lasazes Zeova.​—Ps. 139:14-17.

15. Ki bann kalite ki Zeova i annan ki ou’n vwar dan kreasyon? Donn legzanp. (Psonm 148:7-10)

¹⁵ Parey David, i tre probab ki i fasil pour ou trouv en keksoz dan kreasyon pour medit lo la. I annan en kantite keksoz otour nou ki kapab ed nou pour konn Zeova pli byen. Par egzanp, ler ou santi lasaler soley lo ou lapo, sa i fer ou realize ki Zeova i pwisan. (Zer. 31:35) Ler ou vwar en zwazo pe konstri son nik, sa i fer ou realize ki Bondye i saz. Ler ou vwar en pti lisyen pe zwe avek son lake, sa i fer ou realize ki Zeova i en Bondye ere. Sak fwa ou vwar en manman pe zwe avek son pti baba, ou remersye Zeova akoz i kontan ou. Nou annan en kantite loportinite pour aprann konsernan Zeova parski tou sa ki Zeova in kree i ed nou aprann konsernan bann kalite ki Zeova i annan. Ki swa sa bann keksoz i gro, pti, zot pros avek nou oubyen lwen avek nou, zot ed nou aprann konsernan bann kalite ki Zeova i annan.​—Lir Psonm 148:7-10.

16. Ki nou devret determinen pour fer?

¹⁶ Nou Bondye i kontan nou, i saz, pwisan e tou sa ki i fer i zoli. Si nou obzerv kreasyon otour nou, nou kapab aprann konsernan sa bann kalite ek lezot ankor. Nou tou nou devret fer letan regilyerman pour obzerv kreasyon e reflesir lo sa ki kreasyon i ansenny nou konsernan Zeova. Ler nou fer sa, nou pou vin pli pros avek nou Kreater. (Zak 4:8) Dan sa lartik ki swiv, nou pou vwar ki mannyer bann paran i kapab servi kreasyon pour ed zot zanfan pour vin pli pros avek Zeova.