1. ¿Jobʼbara sãwũã ũdukʼawuasi Jeowara?

 JOBʼRA ẽbẽrarãbawara mejãcha bedʼeabasi, mamina maʉ̃ranebema iyi mawũã bedʼeabadara audre yibiabasi Jeowaʉ̃me bedʼeadata. Jobʼba audre bia kʼawuaita Jeowa buru bia ʉ̃rʉ, Jeowabara jaradiasi iya nekʼãrẽ parãnaneba iyi buru biara sãwũãbʉta. Bari jaraita, iya ũdubisi Jobʼa nedʉwʉrʉ zakerãra Daizezeba akʉbʉta akʉza maʉ̃ kĩrãkʼa Daizezebara iyira akʉseabʉta (Job 38:39-41; 39:1, 5, 13-16). Jeowaba nekʼãrẽ parãna ʉ̃rʉ bedʼeaside Jobʼba mejãcha kʼawuasi Daizezeba nebia erbʉdebemarata.

2. ¿Kʼãrẽa zarea baseabʉ dayirãitara Jeowaba nekʼãrẽ parãna ʉ̃rʉ krĩchaita?

² Dayirãbida Daizeze ʉ̃rʉ kʼawuaseapanʉ akʉpanʉbʉrʉ iya nekʼãrẽ parãkʉadata, mamina ʉ̃kʉrʉ dayirãnebemaita zarea baseabʉ Jeowaba nekʼãrẽ parãkʉada akʉira, pʉwʉrʉ zromane panʉ baera, mawũã nekʼãrẽ kʼawuaita maʉ̃raneba, mamina edaʉde dayi meabʉbʉsida ewari neẽ maʉ̃ ʉ̃rʉ krĩchaita, nekʼãrẽ mejãcha oibara baera. Maʉ̃ kʼarea dayirãba naʉ̃ artikulode akʉdayi kʼãrẽa bigata dayirãba ewari jʉrʉita akʉza zarea oita Jeowaba nekʼãrẽ parãna ʉ̃rʉ krĩchadaita. Akʉza kʼawuadayi Jeowaba Jesuʉ̃meba sãwũã nekʼãrẽ parãnaneba jaradiabasita akʉza dayirãba kʼãrẽta kʼawuapanʉta maʉ̃neba.

3. ¿Kʼãrẽba ũdubibʉ Jeowaba kãgabasita Adánʼra sobia bamarẽã iya nekʼãrẽ parãnaneba?

³ Jeowaba kãgabasi yumakẽrã nãã parãnara sobia bamarẽã iya nekʼãrẽ parãnaneba. Jeowaba Adán Evaʉ̃me  parãside diasi drʉa kʼai bakabadata, adewara jarasi maʉ̃ drʉara umarẽã akʉza akʉ erbamarẽã (Gén. 2:8, 9, 15). Krĩchara Adán sãwũã mejãcha sobiabasita iya ũduside neta zakera sãwũã pãwãrabasita, chiruarata, neponorata, adewara kʼãrẽaba yibiabasi Jeowaba Adánʼa nedʉwʉrʉ zakera trʉ̃ diamarẽã jaraside akʉza iduaribisi Edén drʉa kĩrãwãreãta akʉ erbamarẽã (Gén. 2:19, 20). Jeowabara iyikʉzaʉba jʉrʉseabasi nedʉwʉrʉ zakera trʉ̃ra, mamina maʉ̃ra amaesi Adán juwade, mawũẽra Adánbara nedʉwʉrʉ zakerãra ũdukʼawuaibarabasi aba abaka, mawũã trʉ̃ diaita. Krĩchaseapanʉ Adán kʼãrẽaba sobianʉmasita Jeowaba maʉ̃ta omarẽã jaraside, adewara iya kʼawuasibaibara Jeowara kʼãrẽaba buru biata akʉza Jeowaba parãnara jõma biʼia parãsita.

4. (1) Adewara, ¿kʼãrẽa dayirãbara krĩchadaibara Jeowaba nekʼãrẽ parãna ʉ̃rʉra? (2) Jeowaba nekʼãrẽ parãnanebemara, ¿saʉ̃ta audre kãga bʉara?

⁴ Jeowaba kãgabʉ iya neparãkʉadara akʉdamarẽã, maʉ̃ba iya jarabʉ «Bajãena ʉ̃ta akʉidua». Mõbe widibʉ: «¿Kʼaiba parãsi kaʉ̃ra?». Maʉ̃ra jõmaʉ̃ba kʼawuabʉ (Is. 40:26). Jeowabara nejõma parãsi ʉ̃tʉ bajãnebʉta, nama egorodebʉta akʉza jõma pusadebʉsida, iya mawũã nekʼãrẽ awuara awuaraka parãkʉadadeba dayirãba nemejãcha kʼawuaseapanʉ (Sal. 104:24, 25). Krĩchara Jeowaba dayirã sãwũã parãnata. Iya dayirãra parãsi ũdukʼawuakĩrã bamarẽã akʉza kãgamarẽã iya nekʼãrẽ parãkʉadata. Jeowaba nekʼãrẽ awuara awuaraka parãkʉasi dayirãba akʉmarẽã, dayi kĩbʉba ʉ̃marẽã, dayi kĩrãmeba warra sentimarẽã, dayi juwaba tõbari bamarẽã iya neparãnata akʉza dayi kʉwʉrʉba ũrĩ bamarẽã.

5. Romanos 1:20de jarabʉdebara, ¿kʼãrẽ nebiata ũdupanʉ pikãga akʉpanʉbʉrʉ Jeowaba nekʼãrẽ parãna ʉ̃rʉ?

⁵ Adewara Daizeze Bedʼeabara jarabʉ dayirãba pikãga krĩchapanʉbʉrʉ iya nekʼãrẽ parãkʉadara, mawũãra nebiata kʼawuadaita Daizeze Jeowaba erbʉta (akʉra Romanos 1:20). Krĩchara Jeowaba iya nekʼãrẽ sãwũã parãkʉadata, ¿naʉ̃ba ũdubibʉ ẽka iyira kʼãrẽaba buru biata? Adewara krĩchara yikora kĩrã awuara awuaraka ũduseapanʉta. Naʉ̃ba ũdubibʉ Jeowabara ẽbẽrarã mejãcha kãgata akʉza iya nekʼãrẽ parãkʉadadeba dayirãba ũdupanʉ iyi nebiata. Maʉ̃ kʼarea dayirãba iyita orrakĩrãpanʉ. Akʉdaya Jeowaba sãwũã  nejaradiasita ẽbẽrarã iya nekʼãrẽ parãkʉadadeba.

6. ¿Kʼãrẽta kʼawuapanʉ ibanara awuru drʉaeda wãbʉdebara?

⁶ Jeowabara erbʉ ewari iya krĩchabʉ aripe berabaribira. Poagaza israelitarabara ũdupanasi ibana cigüeñara febrerodeba mayobayeda wãbari wãbʉta awuru drʉaeda. Jeowabara jarasi israelitara cigüeñabara kʼawuabʉta kʼãrẽ ewaride wãibarata awuru drʉaeda (Jer. 8:7). Jeowaba naʉ̃ra ibanara kʼawuabida kĩrãkʼa kʼãrẽ ewaride awuru drʉaeda wãibarata, Jeowabida kʼawuabʉ kʼãrẽ ewaride kʼawua oita ẽbẽrarã. Dayirãba kʼawuabʉrʉde ibanaraba kʼawuabʉta kʼãrẽ ewaride drʉa jãpe wãibarata, naʉ̃ba Jeowa ʉ̃rʉ ĩjãbibʉ iyara kʼawuabʉta kʼãrẽ ewari zeita ẽbẽrarã kayiruarãra makenaita (Hab. 2:3).

7. ¿Kʼãrẽta kʼawuapanʉ ibana wãbaribʉdebara? (Isaías 40:31).

⁷ Jeowabara zarea diabʉ iyi odepanʉara. Jeowaba Isaíasdeba jarasi iyi pʉwʉrʉʼa zarea diaita aukʼarabʉde, mawũã «wabaribayi nejõbʉ i erbʉ kĩrãkʼa» (akʉra Isaías 40:31). Israelitarabara akʉbasi nejõbʉra sãwũã ewarade wãbaribʉta akʉza pʉãdrʉra yi edebibasita. Dayirãba ũdubʉrʉde nejõbʉ ʉ̃tʉ ewarade kʼãrẽ zarea oẽã wãbari jirabʉta, kĩrãbedaibara Jeowabara dayirã zarea diaseabʉta bedʼea zroma erbʉ awuantamarẽã.

8. ¿Kʼãrẽta kʼawuasi Jobʼbara Jeowaba nekʼãrẽ parãna ʉ̃rʉ krĩchabʉdeba akʉza kʼãrẽta kʼawuabʉ dayirãba?

⁸ Jeowabara kãgabʉ iyi ʉ̃rʉ ĩjãnamarẽã. Jeowabara kʼarebasi Jobʼba iyi ʉ̃rʉ audre ĩjãmarẽã (Job 32:2; 40:6-8). Jeowa Jobʼʉ̃me bedʼeasidera jara ũrĩbisi chĩdau ʉ̃rʉ, bajã ʉ̃rʉ akʉza ba ʉ̃rʉ, adewara Jeowara bedʼeasi toro ʉ̃rʉ akʉza kabayo ʉ̃rʉ (Job 38:32-35; 39:9, 19, 20). Naʉ̃ nekʼãrẽ jõmaʉ̃ba ũdubisi Jeowara buru biata, kãga barabʉta akʉza zarea mejãcha erbʉta, mawũã bedʼeadaba Jobʼbara audre ĩjã zesi Jeowa ʉ̃rʉ (Job 42:1-6). Dayirãba bia krĩchadara Jeowaba nekʼãrẽ parãna ʉ̃rʉ, kʼawuadayi Jeowara buru biata akʉza zarea mejãcha erbʉta dayirãira. adewara iyara jõbiyi dayirã zʉbʉriapanʉra, maʉ̃ba kʼarebayi audre ĩjãita iyi ʉ̃rʉ.

9, 10. ¿Kʼãrẽta jaradiabʉ ũmadaʉba akʉza kueba Jeowa ʉ̃rʉ?

⁹ Jesubara bia kʼawuabasi Jeowaba nekʼãrẽ jõma parãnara, adewara ãba trajasi yi Zezeʉ̃me nekʼãrẽ jõmabʉ parãita (Prov. 8:30). Jesu nama egorode basidera iyi kʼaidubemara nejaradiasi nekʼãrẽ Daizezeba parãnaneba, atia akʉdaya kʼãrẽta kʼawuaseabʉta iya jaradiadadeba.

¹⁰ Jeowabara jõmaʉ̃ta kãgabʉ. Katumane Bedʼea Bia jaradade Jesuba yi kʼaidubemara Jeowaba nekʼãrẽ parãnaneba jaradiasi, ũmadaʉdeba akʉza kuedeba, maʉ̃ra ẽbẽrabara badua ũdubʉ baera kʼãrẽ ẽ kĩrãkʼa akʉpanʉ. Dayirã zokʼai bʼaira nesidapanʉ kueta akʉza ũmadaʉta, Jeowabara krĩchaseabasi ẽbẽra kayiruara dia ẽ baita naʉ̃ra, mamina iya ẽbẽra jõmaʉ̃ta kãgabʉ baera jõmaʉ̃ʼa diabʉ (Mat. 5:43-45). Jesubara naʉ̃ nekʼãrẽ parãnaneba jaradiasi yi kʼaidubemara Jeowabara kãgabʉta ẽbẽra jõmaʉ̃ta abarika kãgadamarẽã. Dayirãba ũdubʉrʉde ũmadaʉ baedogota akʉza kue zenʉmʉta  Jeowabara krĩchamarẽã kãgabʉ iyara ẽbẽra jõmaʉ̃ta abarika kãgabʉta. Maʉ̃ba dayirãbara ẽbẽra jõmaʉ̃ʼa jaradiaibara Daizeze Bedʼea ʉ̃rʉ, Jeowade kĩrãkʼa ẽbẽra jõmaʉ̃ta abarika kãgabʉ ũdubita.

11. ¿Kʼãrẽta kʼawuapanʉ ibananebara?

¹¹ Jeowaba jõma diabʉ dayirãba nesidabʉra. Katumane Bedʼea Bia jaradade akʉza Jesuba jarasi: «Biʼia akʉidua ibana ewaradebʉta. Ãyira ne u ẽ, mia jʉrepe ẽ, mia nekʼãrẽ wuagabarimae wuagada ẽ. Mamina Daizezebara ne diabʉ. ¿Kõbe marara ibanaira audre yibia ẽka?». Jesubara ẽbẽrarã mawũã jarasibaibara ibanata ũdusi baera (Mat. 6:26). Jesubara mawũã jaradiasi ẽbẽrarãba kĩrãduada ẽ marẽã Jeowabara dayirãba nesidabʉra jõma diabʉta (Mat. 6:31, 32). Jesubara nekʼãrẽ biata jaradiasi nekʼãrẽ parãnaneba iyi kʼaidubemara, maʉ̃ra idi Daizeze odepanʉraitabida yibia. Mebẽã wẽrã yi nãã edebari Españanebemara krĩcha zroma obasi iyi sama bʼaita neẽbasi baera, mamina iya ũduside ibana nekobʉta naʉ̃ba aduʼa babisi. Iya jarabʉ: «Naʉ̃ ibana Jeowaba akʉbʉ kĩrãkʼa mʉ̃sida iya akʉyi». Maʉ̃ra aripe berabarisi, iya tẽã ũdusi sama bʼaita.

12. Mateo 10:29-31 bayeda jarabʉdebara, ¿kʼãrẽta kʼawuapanʉ Jeowa ʉ̃rʉ gorrionʼraneba?

¹² Jeowaba kãga dayirã aba abaka. Jesuba iyi kʼaidupanʉra zokʼakʉaside jaradia wãmarẽã jaradiasi perada ẽ bamarẽã ãyi pẽwãnai kʼareara (akʉra Mateo 10:29-31). Iyara mawũã jaradiasi ibana zake Israeldebemaneba: gorrionʼneba. Naʉ̃ra ibanarãra mejãcha bale ba ẽ basi Jesu ewaridera, mamina Jesubara iyi kʼaidubemara jarasi: «Maʉ̃ta miã abʼabidʼa egorodʼe beu bʼae ẽã marã Zezeba idaribi ẽãrã». Maʉ̃ tẽã iya jarasi: «Marã audre vale bʼea ibana zaketa bio kʼãñabara». Jesuba ãyaʼa jaradiasi Jeowaba ãyira aba abaka kãgabʉta akʉza maʉ̃ kʼarea pera ẽ baibarata pẽwãbʉdadera. Jesu kʼaidupanʉraba jaradia wãpanaside ũdupanasi naʉ̃ra ibanarãra mõbe kĩrãbepanasibaibara Jesuba ãyaʼa jaradiadata. Ibana zake ũdubʉrʉde kĩrãbera Jeowaba kãgabʉta bʉra, bʉra audre balebʉ baera ibana zakeraira. Daizeze kʼarebadeba awuantaseabʉ bʉ pẽwãbʉdadera (Sal. 118:6).

13. ¿Sãwũã audre kʼawuaseapanʉ Jeowa ʉ̃rʉ iya parãnaneba?

¹³ ¿Sãwũã audre kʼawuaseapanʉ Jeowa ʉ̃rʉ iya parãnaneba? Nããra ewari jʉrʉdaibara akʉdaita Jeowaba nekʼãrẽ parãnata, tẽã krĩchadaibara naʉ̃neba kʼãrẽta kʼawuapanʉta Jeowa ʉ̃rʉ, mamina edaʉde zare mawũã odaira. Mebẽã Géraldine Camerúnʼnebemaba jarasi: «Mʉ̃ pʉwʉrʉ zromane warisi, mawũẽra mʉ̃a  kʼawuabʉrʉ zarea oibarata nekʼãrẽ parãna akʉira». Zõrãrã kongregasionebema yi trʉ̃ Alfonsoba jarasi: «Mʉ̃a kʼawuasi ewari jʉrʉibarata nekʼãrẽ parãna akʉita akʉza krĩchaita kʼãrẽta kʼawuabʉta Jeowa ʉ̃rʉ».

14. ¿Kʼãrẽta kʼawuasi Davidbara iya pikãga krĩchaside Jeowaba nekʼãrẽ parãna ʉ̃rʉ?

¹⁴ Davidba kĩrãkita krĩchabasi Jeowaba nekʼãrẽ parãna ʉ̃rʉ. Iya jarasi: «Mʉ̃a bʉ bajã akʉbʉrʉde, bʉ juwaba nekʼãrẽ parãnata, jedekota akʉza chĩdaurata bʉa parãkʉadata, ¿kʼai ẽbẽrarã beibaribʉra bʉa krĩchabaira?» (Sal. 8:3, 4). Davidba ʉ̃ta bajã akʉbaside bari akʉba ẽ basi chĩdaurata, awuarabʉrʉ krĩchabasi kʼãrẽta jaradiabʉta maʉ̃neba Jeowa ʉ̃rʉ. Kʼawuasi Jeowara kʼãrẽaba yi zromata, iya krĩchaside iyi kakua sãwũã parãchuta biga diasi Jeowaʼa jipa buru bia baera (Sal. 139:14-17).

15. Yizata jara ũrĩbira, sãwũã Jeowa nebiata ũdu zebʉrʉta iya nekʼãrẽ parãnaneba (Salmo 148:7-10).

¹⁵ Dayirãbida Davidʼde kĩrãkʼa ũduseapanʉ nekʼãrẽ parãnanebema ʉ̃rʉ pikãga krĩchaita. Bʉ audu sãwũãnʉmʉta akʉbʉbʉrʉ ũduseabʉ Jeowa nebiata. Bari jaraita, Jeowa zareata ũduseabʉ akʉbʉrʉde bisia sãwũã jʉ̃wʉrʉanʉmʉta (Jer. 31:35). Akʉseabʉ Jeowara sãwũã buru biata ũdubʉrʉde ibana zakeba iyi de parãnʉmʉta. Krĩchara Jeowasida dayirã kĩrãkʼa ipidabaibarabʉta akʉpanʉne usa zakeba aribia iyi drʉta pẽwã jirbʉde akʉza Jeowa kãgara ũdupanʉ yi papata yi wũãwũã zakeʉ̃me jemenepanʉne. Dayirãba mejãcha kʼawuaseapanʉ Jeowa ʉ̃rʉ nekʼãrẽ wĩkakirudeba, yi zromaneba, nekʼãrẽ wawaradeba akʉza arakʼaitabʉdeba Jeowa ʉ̃rʉ bia bedʼeabʉ baera (akʉra Salmo 148:7-10).

16. ¿Kʼãrẽta oita krĩchapanaibara?

¹⁶ Dayirã Daizezera jipa buru bia, ẽbẽra bia, neparã kaʉ akʉza jipa zarea barabʉ. Dayirãba maʉ̃ra jõma ũduseapanʉ akʉpanʉne jõma iya nekʼãrẽ parãkʉadata, bigabayi dayirãba ewari jʉrʉita akʉdaita Jeowaba nekʼãrẽ parãnata akʉza pikãga krĩchadaita kʼãrẽta kʼawuapanʉta Jeowa ʉ̃rʉ, mawũã odara audre Jeowa kʼawapanañi (Sant. 4:8). Wuarebema artikulode kʼawuadayi sãwũã yibariraba kʼarebaseabʉta ãyi warrarata ne parãnaneba audre Jeowa kʼawa panamarẽã.