1. Ðɔ ali e nu Jɔbu kplɔ́n bo tuun Jexóva ganjí ɖe é ɖokpó.

 JƆBU ɖɔ xó gěgé xá mɛ lɛ́ ɖo gbɛzán tɔn bǐ mɛ, amɔ̌, éé dɔn mɛ hú gǎn é wɛ nyí xó e é ɖɔ xá Jexóva Mawu é. Ðo xóɖɔɖókpɔ́ énɛ́ hwenu ɔ, Jexóva dɔn ayi Jɔbu tɔn wá nǔ ɖaaɖagbe e é dá lɛ́ é ɖé lɛ́ jí. Énɛ́ ná d’alɔ Jɔbu bɔ é ná tuun lě do Jexóva ɖó nǔnywɛ́ sɔ é, bo ná lɛ́ ná hlɔ̌nhlɔ́n jiɖe e é ɖó ɖɔ Jexóva sixú ná nǔ ɖěbǔ e hudó mɛsɛntɔ́ tɔn lɛ́ é yě é. Ði kpɔ́ndéwú ɔ, Jexóva flín Jɔbu ɖɔ émí nɔ kpé nukún dó kanlin lɛ́ wú, hǔn, émí sixú kpé nukún dó é lɔmɔ̌ wú. (Jɔb. 38:39-41; 39:1, 5, 13-16) Tamɛ linlin dó nǔ e Jexóva dá lɛ́ é jí d’alɔ Jɔbu bɔ é kplɔ́n nǔ gěgé dó Mawu tɔn sín jijɔ lɛ́ wú.

2. Étɛ́wú é ka nɔ vɛ́ wǔ nú mǐ hweɖélɛ́nu bónú mǐ ná kplɔ́n nǔ dó nǔɖíɖó Jexóva tɔn lɛ́ wú?

² Ényí mǐ nɔ kpɔ́n nǔ ɖěɖěe Mawu mǐtɔn dá lɛ́ é céɖécéɖé ɔ, mǐ lɔmɔ̌ sixú kplɔ́n nǔ dó wǔ tɔn d’é jí. Amɔ̌, mɔ̌ wiwa nɔ bɔ wǔ hwebǐnu ǎ. Nú toxo mɛ wɛ mǐ nɔ nɔ ɔ, ényí azǎn lɛ́ bǐ jí wɛ mǐ ná nɔ mɔ nǔ e Jexóva dá lɛ́ é gěgé ǎ. Nú é ná bo tlɛ lɛ́ nyí gletoxo mɛ wɛ mǐ nɔ nɔ ɔ, mǐ sixú mɔ ɖɔ mǐ kún ɖó hwenu sɔmɔ̌ bo ná kplɔ́n nǔ dó nǔ ɖěɖěe Jexóva dá lɛ́ é wú ó. Énɛ́ wú ɔ, mi nú mǐ ní ɖɔ xó dó nǔ e wú é nyɔ́ ɖɔ mǐ ní ba hwenu, bo lɛ́ dó gǎn bo kpɔ́n nǔ ɖěɖěe Jexóva dá lɛ́ é wú. Mǐ ná gbéjé lěe Jexóva kpó Jezu kpó zán nǔɖíɖó lɛ́ dó kplɔ́n nǔ mɛ gbɔn é kpó nǔ e mǐ sixú wa dó kplɔ́n nǔ gěgé dó nǔɖíɖó e ɖo gbɛ ɔ mɛ lɛ́ é wú d’é jí é kpó kpɔ́n.

3. Étɛ́ ka xlɛ́ ɖɔ Jexóva ba ɖɔ Adámu ní ɖu nǔɖíɖó lɛ́ sín vǐví?

³ Jexóva ba ɖɔ gbɛtɔ́ nukɔntɔn e émí dá é ní ɖu nǔɖíɖó émítɔn lɛ́ sín vǐví. Hwenu e Mawu dá Adámu é ɔ, é ná ɛ palaɖísi ɖɛkpɛ ɖɛkpɛ ɖé, ɖɔ é ní nɔ nɔ mɛ, bo zɔ́n ɛ ɖɔ é ní nɔ kpé nukún dó palaɖísi énɛ́ wú bo bló bónú é ní gbló ada. (Bǐb. 2:8, 9, 15) Dǒ nukúnmɛ bo kpɔ́n lěe xomɛ ná ko hun Adámu sɔ hwenu e é mɔ bɔ atínkwín lɛ́ nɔ wú, bɔ folówa lɛ́ nɔ gba sɛ́ é. Wǔjɔmɛ ɖaxó ɖé wɛ é nyí nú Adámu ɖɔ é ní kpé nukún dó jikpá Edɛ́ni tɔn wú. Jexóva lɛ́ byɔ́ Adámu ɖɔ é ní ná nyǐkɔ kanlin tɛnmɛ tɛnmɛ lɛ́. (Bǐb. 2:19, 20) Jexóva ɖésúnɔ hɛn ɔ, é ná ko ba nyǐkɔ nú kanlin lɛ́ có, é ka sɔ́ azɔ̌ énɛ́ d’así nú Adámu. É ɖo wɛn ɖɔ, cóbónú Adámu ná ɖɔ lěe è ná nɔ ylɔ́ kanlin ɖé ɖɔ é ɔ, é nɔ tó kpɔ́n lěe kanlin ɔ cí é kpó lěe é nɔ wa nǔ gbɔn é kpó ganjí hwɛ̌. Azɔ̌ énɛ́ wiwa ná ko víví nú Adámu tawun. É ɖo wɛn ɖɔ, énɛ́ d’alɔ ɛ bɔ é mɔ nukúnnú jɛ lě do Jexóva ɖó nǔnywɛ́ sɔ, bɔ nǔ e é dá lɛ́ é nyɔ́ ɖɛkpɛ, bo nɔ lɛ́ dɔn mɛ sɔ é wú.

4. (a) Ðɔ hwɛjijɔ e wú mǐ ɖó ná nɔ kplɔ́n nǔ dó nǔɖíɖó lɛ́ wú é ɖokpó. (b) Nǔɖíɖó tɛ́ lɛ́ a ka yí wǎn ná hú gǎn?

⁴ Hwɛjijɔ e wú mǐ ɖó ná nɔ kpɔ́n nǔɖíɖó lɛ́ kpó sɔxwixwe kpó é ɖokpó wɛ nyí ɖɔ, Jexóva wɛ ba ɖɔ mǐ ní nɔ wa mɔ̌. É ɖɔ nú mǐ ɖɔ: “Mi kpɔ́n jǐxwé aga dɔ̌n sɛ́ dó.” Énɛ́ gúdo ɔ, é kanbyɔ́ ɖɔ: “Mɛ̌ ka bló sunví lɛ́?” Xósin ɔ ɖo wɛn. (Eza. 40:26) Jexóva wɛ dá nǔ e ɖo jǐnukúnsin lɛ́ é bǐ, bo lɛ́ dá nǔ e ɖo ayǐkúngban jí lɛ́ é kpó éé ɖo xu mɛ lɛ́ é kpó bǐ, bɔ nǔ énɛ́ lɛ́ bǐ nɔ kplɔ́n nǔ mǐ dó wǔ tɔn. (Ðɛh. 104:24, 25) Din ɔ, lin tamɛ kpɛɖé dó lěe Mawu bló mǐ gbɔn é wú. É bló bɔ mǐ sixú kpé wú bo ɖu nǔ ɖɛkpɛ ɖɛkpɛ e ɖo wɛ̌kɛ́ ɔ mɛ lɛ́ é kpínkpɔ́n sín vǐví. É lɛ́ bló bɔ mǐ sixú zán nǔ vovo atɔ́ɔ́n élɔ́ lɛ́ dó ɖu nǔ tɛnmɛ tɛnmɛ e é dá lɛ́ é sín vǐví: nukún, tó, alɔ, ɖɛ̌ kpó awɔntín kpó.

5. Sɔgbe kpó Hlɔ̌manu lɛ́ 1:20 kpó ɔ, nɛ̌ nǔkplɔ́nkplɔ́n dó nǔ e Jexóva dá lɛ́ é wú ka nɔ hɛn le wá nú mǐ gbɔn?

⁵ Biblu lɛ́ ɖɔ hwɛjijɔ tají e wú mǐ ɖó ná nɔ kplɔ́n nǔ dó nǔɖíɖó lɛ́ wú é ɖěvo nú mǐ. Yě nɔ kplɔ́n nǔ mǐ dó jijɔ Jexóva tɔn lɛ́ wú. (Xa Hlɔ̌manu lɛ́ 1:20.) Ði kpɔ́ndéwú ɔ, kpɔ́n nǔ ɖěɖěe Jexóva dá lɛ́ é, bo kpɔ́n lě do yě nyɔ́ ɖɛkpɛ sɔ é. Yě nɔ xlɛ́ ɖɔ Mawu ɖó nǔnywɛ́ tawun ǎ cé? Lɛ̌ lin tamɛ dó nǔɖuɖu tɛnmɛ tɛnmɛ e sín vǐví mǐ nɔ ɖu lɛ́ é jí. Énɛ́ xlɛ́ lě do é yí wǎn nú gbɛtɔ́ lɛ́ sɔ é nyi wɛn. Ényí mǐ ɖo jijɔ Jexóva tɔn lɛ́ mɔ wɛ ɖo nǔ e é dá lɛ́ é mɛ ɔ, é nɔ zɔ́n bɔ mǐ nɔ tuun i d’é jí; é nɔ lɛ́ sísɛ́ mǐ bɔ mǐ nɔ sɛkpɔ́ ɛ d’é jí. Din ɔ, mi nú mǐ ní kpɔ́n ali e nu Jexóva zán nǔɖíɖó lɛ́ dó kplɔ́n nǔ tají lɛ́ gbɛtɔ́ lɛ́ ɖe é ɖé lɛ́.

6. Étɛ́ mɔ e mǐ nɔ mɔ bɔ xɛ lɛ́ nɔ sɛ tɛn sín fí ɖé jɛ fí ɖé é ka sixú kplɔ́n mǐ?

⁶ Nǔ lɛ́ bǐ wɛ ɖo ganmɛ jí ɖo Jexóva gɔ́n. Ðo vivɔnu février tɔn jɛ 15 mai xwe ɖokpó ɖokpó tɔn ɔ, Izlayɛ́li ví lɛ́ nɔ mɔ aɖɔwé lɛ́ bɔ yě nɔ ɖo zinzɔn wɛ gbɔn jɔ mɛ wá xweyǐgbe totaligbé. Mawu ɖɔ nú Izlayɛ́li ví lɛ́ ɖɔ: “Aɖɔwé lɛ́ tuun hwenu e yě ná wá dó ɔ.” (Jel. 8:7) Lěe Jexóva bló tito hwenu e xɛ énɛ́ lɛ́ ná sɛ tɛn sín fí ɖé jɛ fí ɖé tɔn gbɔn é ɔ, mɔ̌ wɛ é lɛ́ bló tito hwenu e é ná ɖɔ hwɛ xá gbɛtɔ́ lɛ́ dó é tɔn gbɔn. Égbé ɔ, ényí mǐ mɔ xɛ lɛ́ bónú yě ɖo tomɛ yi wɛ ɔ, é nɔ flín mǐ ɖɔ mǐ sixú ɖeji ɖɔ Jexóva “ko ɖó hwenu” ɖé bo ná sú kún dó nú gbɛ nyanya élɔ́.—Xab. 2:3.

7. Ényí mǐ mɔ xɛ ɖé bɔ é ɖo zinzɔn wɛ ɔ, gǎnjɛwú tɛ́ é ka sixú ná mǐ? (Ezayíi 40:31)

⁷ Jexóva nɔ ná hlɔ̌nhlɔ́n mɛsɛntɔ́ tɔn lɛ́. Jexóva gbɔn Ezayíi jí bo d’akpá ɖɔ émí ná ná hlɔ̌nhlɔ́n togun émítɔn, b’ɛ ná “zɔn hɔ̌nsúhɔ́nsú ɖɔhun,” hwenu e gǎn vɔ ɖo wǔ tɔn, alǒ awakanmɛ kú i é. (Xa Ezayíi 40:31.) Izlayɛ́li ví lɛ́ nɔ ko mɔ hɔ̌nsúhɔ́nsú lɛ́ bɔ yě nɔ ɖo zinzɔn wɛ gbɔn jɔhɔn syɛ́nsyɛ́n mɛ, có hɔ̌nsúhɔ́nsú énɛ́ lɛ́ ka nɔ dó gǎn nabí ɖé ǎ. Énɛ́ flín mǐ ɖɔ Jexóva sixú ná hlɔ̌nhlɔ́n mǐ lěe é nɔ ná hlɔ̌nhlɔ́n xɛ énɛ́ lɛ́ gbɔn é. Ényí a mɔ xɛ ɖaxó ɖé bɔ é ɖo zinzɔn wɛ gbɔn aga ɖéé, bo ma ka ɖo awa káká ɖé xo wɛ ǎ hǔn, flín ɖɔ Jexóva sixú ná we hlɔ̌nhlɔ́n bɔ a ná ɖí xwi xá tagba towe lɛ́ b’ɛ ná kpa we.

8. Étɛ́ tamɛ e Jɔbu lin dó nǔɖíɖó Mawu tɔn lɛ́ wú é ka kplɔ́n ɛ? Étɛ́ é ka sixú kplɔ́n mǐ lɔ?

⁸ É jɛxá ɖɔ mǐ ní gán jɛ Jexóva wú. Jexóva d’alɔ Jɔbu bɔ jiɖe e é ɖó dó wǔ tɔn é lɛ́ jɛjí. (Jɔb. 32:2; 40:6-8) Ðo xó e Mawu ɖɔ xá Jɔbu é mɛ ɔ, é ɖɔ xó dó nǔ e é dá lɛ́ é gěgé wú, ɖi sunví lɛ́, akpɔ́kpɔ́ lɛ́ kpó jǐ kɛwun kpó. Jexóva lɛ́ ɖɔ xó dó kanlin lɛ́ wú, ɖi agbo gbě tɔn kpó sɔ́ kpó. (Jɔb. 38:32-35; 39:9, 19, 20) É nyí hlɔ̌nhlɔ́n aditi e Mawu ɖó é kɛ́ɖɛ́ wɛ nǔ énɛ́ lɛ́ nɔ xlɛ́ ǎ, loɔ, yě nɔ lɛ́ xlɛ́ wǎnyíyí tɔn kpó nǔnywɛ́ ɖaxó e é ɖó é kpó. Xóɖɔɖókpɔ́ énɛ́ zɔ́n bɔ Jɔbu wá ɖeji dó Jexóva wú hú ɖ’ayǐ tɔn. (Jɔb. 42:1-6) Mɔ̌ ɖokpó ɔ, ényí mǐ nɔ kplɔ́n nǔ dó nǔɖíɖó lɛ́ wú ɔ, yě ná flín mǐ ɖɔ Jexóva ɖó nǔnywɛ́ hú mǐ flaflá tɔn, bo lɛ́ ɖó hlɔ̌nhlɔ́n hú mǐ b’ɛ vɛ́ jlɛ́. É sixú lɛ́ ɖó nǔ mɛtɛ́nkpɔ́n mǐtɔn lɛ́ bǐ nu, bo ka ná wa mɔ̌. Nǔ énɛ́ hinhɛn ayi mɛ sixú d’alɔ mǐ bɔ jiɖe e mǐ ɖó dó wǔ tɔn é ná syɛ́n d’é jí.

9-10. Étɛ́ hwe kpó jǐ kpó ka nɔ kplɔ́n mǐ dó Jexóva wú?

⁹ Nǔ gěgé wɛ Jezu tuun dó wɛ̌kɛ́ ɔ wú. Ðó azɔ̌ bí alɔ n’i wútu ɔ, Tɔ́ tɔn jɔ wǔ i, bɔ é w’azɔ̌ xá ɛ hwenu e é ɖo wɛ̌kɛ́ ɔ dá wɛ é. (Nǔx. 8:30) Nukɔnmɛ hwenu e é ɖo ayǐkúngban jí é ɔ, é zán nǔɖíɖó lɛ́ dó kplɔ́n nǔ ahwanvú tɔn lɛ́ dó Tɔ́ tɔn wú. Mi nú mǐ ní kpɔ́n nǔ e é kplɔ́n mɛ é ɖé lɛ́.

¹⁰ Jexóva nɔ ɖe wǎnyíyí xlɛ́ mɛ lɛ́ bǐ. Ðo mawuxóɖiɖɔ só jí tɔn Jezu tɔn hwenu ɔ, é dɔn ayi ahwanvú tɔn lɛ́ tɔn wá hwe kpó jǐ kpó jí; nǔɖé lɛ́ wɛ bɔ mɛ gěgé nɔ lin tamɛ dó yě jí ǎ. Nǔ we énɛ́ lɛ́ bǐ wɛ ka ɖo tají cóbɔ mǐ ná sixú nɔ gbɛ. Jexóva hɛn ɔ, é ná tɛ nǔ énɛ́ lɛ́ mɛ ɖěɖěe ma nɔ sɛn ɛ ǎ lɛ́ é. Amɔ̌, wǎnyíyí nɔ sísɛ́ ɛ bɔ é nɔ bló bɔ hwesivɔ́ nɔ hun dó mɛ bǐ jí, bɔ jǐ nɔ lɛ́ ja nú mɛ bǐ. (Mat. 5:43-45) Jezu zán kpɔ́ndéwú énɛ́ dó kplɔ́n ahwanvú tɔn lɛ́ ɖɔ Jexóva ba ɖɔ mǐ ní yí wǎn nú mɛ bǐ. Hweɖébǔnu e mǐ ɖo hwe gba amizɛ́n ɖɛkpɛ ɖɛkpɛ ɖé kpɔ́n wɛ bo ɖo vǐví tɔn ɖu wɛ, alǒ mɔ bɔ jǐ ɖo jija wɛ cɛ́ncɛ́ncɛ́n bɔ gbɛ mɛ fá é ɔ, énɛ́ nɔ flín mǐ ɖɔ Jexóva kún nɔ ɖe mɛɖé ɖó vo ɖo mɛɖé mɛ ó. Kpɔ́ndéwú tɔn sixú sísɛ́ mǐ bɔ mǐ lɔ ná nɔ jlá wɛn ɖagbe ɔ mɛ lɛ́ bǐ dó xlɛ́ ɖɔ mǐ yí wǎn nú yě.

11. Wǔsyɛ́n tɛ́ xɛví lɛ́ kpínkpɔ́n ka sixú dó lanmɛ nú mǐ?

¹¹ Jexóva nɔ ná nǔ e sín hudó mǐ ɖó ɖo agbaza lixo lɛ́ é mǐ. Jezu lɛ́ ɖɔ xó élɔ́ ɖo mawuxóɖiɖɔ só jí tɔn ɔ hwenu: “Mi kpɔ́n xɛ lɛ́ ganjí; yě nɔ dó nǔkún alǒ ya nǔkún abǐ kplé nǔkún dó agɔ̌ mɛ ǎ, có Tɔ́ mitɔn jǐxwé tɔn ɔ nɔ ná nǔɖuɖu yě.” Bóyá mɛ e ɖɔ xó ná wɛ Jezu ɖe lɛ́ é sixú ko ɖo xɛví lɛ́ mɔ wɛ, bɔ yě ɖo zinzɔn gbɔn ta yětɔn nu wɛ hwenu e Jezu kan nǔ élɔ́ byɔ́ yě é: “Mi ma xɔ akwɛ́ hú yě ǎ cé?” (Mat. 6:26) Ali e nu Jezu ná jiɖe mǐ kpó wǎnyíyí kpó ɖe ɖɔ Jexóva ná kpé nukún dó hudó agbaza tɔn mǐtɔn lɛ́ wú ɖe é ɖokpó nɛ́. (Mat. 6:31, 32) Nǔ énɛ́ e nǔɖíɖó lɛ́ sixú kplɔ́n mɛ é kpo ɖo wǔsyɛ́n dó lanmɛ nú mɛsɛntɔ́ Jexóva tɔn gbejínɔtɔ́ lɛ́ wɛ. Nɔví nyɔ̌nu gběxosín-alijítɔ́ wínnyáwínnyá ɖé nɔ nɔ Espagne bɔ awakanmɛ kú i tawun, ɖó é ɖó fí e jɛxá bɔ é ná nɔ é ǎ wútu. Amɔ̌, mɔ e é nɔ mɔ bɔ xɛ lɛ́ nɔ ɖo nǔkún lɛ́ kpó atínkwín lɛ́ kpó ɖu wɛ é zɔ́n bɔ agbɔ̌n tɔn jɛ do hú gǎn. É ɖɔ: “Énɛ́ xlɛ́ ɖɔ Jexóva nɔ kpé nukún dó xɛ énɛ́ lɛ́ wú, hǔn, é ná wa mɔ̌ nú nyi lɔ.” Táan kpɛɖé ɖo énɛ́ gúdo ɔ, nɔví nyɔ̌nu ɔ wá mɔ fí e é ná nɔ nɔ é.

12. Sɔgbe xá Matíe 10:29-31 ɔ, étɛ́ gboli lɛ́ ka kplɔ́n mɛ dó Jexóva wú?

¹² Mǐ mɛ ɖokpó ɖokpó xɔ akwɛ́ nú Jexóva. Cóbónú Jezu ná sɛ́ mɛsɛ́dó tɔn lɛ́ dó wɛn ɖagbe ɔ jlá gbé ɔ, é d’alɔ yě bɔ yě ɖu ɖo xɛsi e yě nɔ ɖi nú gbeklánxámɛ é jí. (Xa Matíe 10:29-31.) É wa mɔ̌ gbɔn xóɖiɖɔ dó xɛví e mɛ lɛ́ tuun hú gǎn ɖo Izlayɛ́li lɛ́ é ɖokpó wú gblamɛ: gboli wɛ. Xɛví énɛ́ lɛ́ xɔ akwɛ́ káká ɖé ɖo Jezu hwenu ǎ. Amɔ̌, é ɖɔ nú ahwanvú tɔn lɛ́ ɖɔ: “Ðokpó yětɔn ná flɛ́ jɛ kɔ́mɛ bónú Tɔ́ mitɔn ná gɔn tuuntuun ǎ.” Énɛ́ gúdo ɔ, é ɖɔ gɔ́ ná ɖɔ: “Mi xɔ akwɛ́ hú gboli gěgé.” Mɔ̌ mɛ ɔ, Jezu ná gǎnjɛwú ahwanvú tɔn lɛ́ ɖɔ yě mɛ ɖokpó ɖokpó xɔ akwɛ́ nú Jexóva, énɛ́ wú ɔ, yě ɖó hwɛjijɔ ɖěbǔ bo ná ɖi xɛsi nú gbeklánxámɛ ǎ. É ɖo wɛn ɖɔ ahwanvú lɛ́ flín xó Jezu tɔn, hwenu e yě ɖo mawuxó ɖɔ wɛ gbɔn toxo lɛ́ kpó gletoxo lɛ́ kpó mɛ, bo mɔ gboli lɛ́ é. Hweɖébǔnu e a ná mɔ xɛví kpɛví ɖé é ɔ, flín ɖɔ hwiɖésúnɔ xɔ akwɛ́ nú Jexóva, ɖó hwi lɔmɔ̌ “xɔ akwɛ́ hú gboli gěgé.” Kpó alɔdó Jexóva tɔn kpó ɔ, a sixú ɖí xwi xá gbeklánxámɛ kpó jiɖiɖe kpó.—Ðɛh. 118:6.

13. Cóbónú nǔɖíɖó lɛ́ ná kplɔ́n nǔ mǐ ɔ, étɛ́ mǐ ka ɖó ná nɔ wa?

¹³ Nǔɖíɖó lɛ́ sixú kplɔ́n nǔ gěgé ɖěvo lɛ́ mǐ dó Jexóva wú. Gbɔn nɛ̌ é? Nukɔntɔn, mǐ ɖó ná nɔ ba hwenu bo nɔ kpɔ́n nǔɖíɖó lɛ́. Énɛ́ gúdo ɔ, mǐ ɖó ná nɔ lin tamɛ dó nǔ e yě kplɔ́n mǐ dó Jexóva wú é jí. É sixú nɔ ma bɔ wǔ nú mǐ hwebǐnu bónú mǐ ná ɖe afɔ énɛ́ lɛ́. Nɔví nyɔ̌nu ɖé nɔ nyí Géraldine bo nɔ nɔ Cameroun bo ɖɔ: “Toxo hun nukún mɛ wɛ un su ɖe, énɛ́ wú ɔ, é nɔ byɔ́ gǎndídó tawun cóbɔ è ná kpɔ́n nǔɖíɖó lɛ́.” Mɛxó agun tɔn ɖé nɔ nyí Alfonso, bo tínmɛ ɖɔ: “Un wá mɔ ɖɔ un ɖó ná bló tuto, bo ná nɔ nɔ nyiɖokpó, bo kpɔ́n nǔ e Jexóva dá lɛ́ é, lobo lin tamɛ dó nǔ e yě kplɔ́n mì dó wǔ tɔn é jí.”

14. Étɛ́ Davídi ka kplɔ́n hwenu e é ɖo tamɛ lin dó nǔɖíɖó Mawu tɔn lɛ́ jí wɛ é?

 ¹⁴ Davídi nɔ lin tamɛ dó nǔɖíɖó Mawu tɔn lɛ́ wú dó nǔjɔnǔ mɛ. É ɖɔ nú Jexóva ɖɔ: “Ényí un kpɔ́n jǐxwé, alɔ towe núwiwa ɔ, bo kpɔ́n sun kpó sunví kpó e a sɔ́ ɖó tɛn yětɔn yětɔn mɛ lɛ́ ɔ, un nɔ kanbyɔ́ nyɛɖée ɖɔ étɛ́ gbɛtɔ́ ka nyí, bɔ a nɔ ké ya n’i sɔmɔ̌?” (Ðɛh. 8:4, 5) È ná ɖɔ ɔ, ényí Davídi ɖo jǐxwé kpɔ́n wɛ zǎnmɛ ɔ, sunví lɛ́ kpínkpɔ́n kɛ́ɖɛ́ sín vǐví wɛ é nɔ ɖu ǎ. É nɔ lɛ́ lin tamɛ dó nǔ e sunví lɛ́ kplɔ́n ɛ dó Mawu wú lɛ́ é jí. É kplɔ́n lě do Jexóva d’agba sɔ é. Ðo hwe ɖěvo lɛ́ nu ɔ, Davídi lin tamɛ dó lěe é su ɖo nɔ tɔn xomɛ gbɔn é jí. Ée é ɖo tamɛ lin dó gǒflɛ́mɛ jí wǔ énɛ́ lɛ́ jí wɛ é ɔ, nǔnywɛ́ Jexóva tɔn lɛ́ su nukún tɔn mɛ d’é jí.—Ðɛh. 139:14-17.

15. Nǎ kpɔ́ndéwú lěe a mɔ bɔ nǔɖíɖó Jexóva tɔn lɛ́ nɔ ɖe jijɔ tɔn lɛ́ xlɛ́ gbɔn é tɔn ɖé lɛ́. (Ðɛhan 148:7-10)

¹⁵ É sixú bɔ wǔ nú mǐ Davídi ɖɔhun bɔ mǐ ná mɔ nǔɖé ɖo wɛ̌kɛ́ ɔ mɛ bo lin tamɛ d’é jí dó nǔjɔnǔ mɛ. Ényí a kpɔ́n nǔ e lɛ́ lɛ̌ dó we lɛ́ é ɔ, a sixú mɔ nǔ gěgé bɔ yě ná ɖe jijɔ Jexóva tɔn lɛ́ xlɛ́. Ði kpɔ́ndéwú ɔ, ényí agbaza towe ɖo zozo e hwesivɔ́ nɔ ná é mɔ wɛ hǔn, nɔ ɖ’ayi hlɔ̌nhlɔ́n Jexóva tɔn wú. (Jel. 31:35) Ényí a mɔ xɛ ɖé bɔ é ɖo adɔ̌ bló wɛ hǔn, nɔ ɖ’ayi nǔnywɛ́ Mawu tɔn wú. Ényí a mɔ cukúví ɖé bónú é ɖo sí tɔn sɔ́ dó d’ayihún wɛ hǔn, nɔ lin tamɛ dó lěe Jexóva nɔ dó nǔkiko nú mɛ gbɔn é jí. Gɔ́ ná ɔ, ényí a mɔ hweɖébǔnu bɔ vǐnɔ ɖé ɖo ayihún da xá yɛ̌yɛ́ví tɔn wɛ hǔn, nɔ dó kú nú Jexóva ɖó wǎnyíyí tɔn wú. Ali gěgé nu wɛ mǐ sixú kplɔ́n nǔ dó Jexóva wú ɖe, ɖó nǔɖíɖó tɔn lɛ́ bǐ, kpɛví kpó ɖaxó kpó, éé sɛkpɔ́ mǐ é kpó éé ɖo zɔ dó mǐ é kpó nɔ kpa susu n’i.—Xa Ðɛhan 148:7-10.

16. Étɛ́ mǐ ka ɖó ná kan ɖ’é jí bá wa?

¹⁶ Nǔnywɛ́, wǎnyíyí kpó hlɔ̌nhlɔ́n kpó Mawu tɔn ɖó dogbó ǎ; gɔ́ ná ɔ, nǔ ɖěbǔ e é bló é nɔ nyɔ́ kpɔ́n. Mǐ sixú kplɔ́n nǔ dó jijɔ énɛ́ lɛ́ kpó gěgé ɖěvo lɛ́ kpó wú, ényí mǐ xwe sɔ bo kpɔ́n nǔ ɖěɖěe lɛ́ lɛ̌ dó mǐ lɛ́ é bǐ ɔ nɛ́. Mi nú mǐ bǐ ní nɔ ba hwenu bo nɔ ɖu nǔɖíɖó lɛ́ sín vǐví, lobo nɔ lɛ́ lin tamɛ dó nǔ e yě kplɔ́n mǐ dó Jexóva wú lɛ́ é wú hwɛhwɛ. Ényí mǐ nɔ wa mɔ̌ ɔ, mǐ ná sɛkpɔ́ Gbɛɖótɔ́ mǐtɔn hú gǎn. (Ja. 4:8) Ðo xóta e bɔ d’é wú é mɛ ɔ, mǐ ná mɔ lěe mɛjitɔ́ lɛ́ sixú zán nǔɖíɖó lɛ́ dó d’alɔ vǐ yětɔn lɛ́ bɔ yě ná sɛkpɔ́ Jexóva gbɔn é.