1. Bay roun fason Jòb anprann konnèt Jéova pi byen.

 ANNAN tout kozé Jòb pran annan so lavi, i gen roun i pa janmen bliyé : sa-la i pran ké Jéova. Jéova doumandé Jòb gadé déztrwa bèl bagaj i té kréyé. A té pou fè li sonjé ki i sa roun Bondjé plen ké sajès é pou i té plis sir ankò ki i pouvé bay so sèrvitèr tousa yé bézwen. Parèkzanp lò i montré li ki i té ka bay zannimo-ya tousa yé bézwen, i pèrmèt li sir ki i té ké okipé di li osi (Job 38:39-41 ; 39:1, 5, 13-16). Lò i réfléchi asou kréyasyon-an, Jòb anprann roun patché bagaj asou bèl kalité so Bondjé gen.

2. Détan poukisa sa rèd pou nou pran tan gadé sa Bondjé kréyé ?

² Nou menm osi, nou pouvé anprann konnèt nou Bondjé pi byen lò nou ka gadé sa i kréyé. Mé pitèt sa pa toujou fasil pou nou fè l’. Si nou pa ka rété lakanpagn, pitèt a pa touléjou nou ka wè bokou bagaj Jéova fè. É menm si nou ka rété lakanpagn, pitèt nou pa gen tan pou pran tan byen gadé sa bagaj-ya. Annan sa artik-a, nou ké wè poukisa i bon pou nou fè tousa nou pouvé pou nou pran tan gadé lanatir. Nou ké wè osi ki Jéova ké Jézi sèrvi kréyasyon-an pou ansényé nou. Pou fini, nou ké wè sa nou divèt fè pou nou anprann plis bagaj gras a kréyasyon-an.

3. Kisa ki ka montré ki Jéova té lé Adan pran plézi annan tousa i té fè ?

³ Jéova té lé prémyé moun i fè-a pran plézi annan tousa i té fè. A pou sa, lò i fè Adan, i mété li annan roun bèl paradi tou pròp pou i té pouvé viv annan l’ é i doumandé li  okipé di sa jarden-an épi fè tout latè-a divini roun paradi (Gen. 2:8, 9, 15). Imajiné kouman Adan té divèt tou kontan lò i wè grenn-yan ka pousé épi flèr-ya ka louvri. I té pouvé pran swen di jarden Édèn-an. A té roun gran lònò pou li ! Jéova doumandé li osi bay chak zannimo roun non (Gen. 2:19, 20). Jéova té pouvé chwazi non zannimo-ya li menm, mé pasé i fè sa i doumandé Adan fè l’. Anvan Adan bay chak zannimo yé non, i dèt byen gadé kouman yé té fika épi kouman yé té ka aji. É i dèt pran plézi fè sa. Nou pouvé sir ki sa idé li konprann ki Jéova gen sajès, é ki tousa i fè entérésan é bèl toubonnman.

4. a) Poukisa nou divèt pran tan gadé sa Bondjé kréyé ? b) Kisa to pi kontan annan sa Bondjé kréyé ?

⁴ Nou divèt pran tan gadé tousa Jéova fè paské a li menm ki ka doumandé nou fè sa. Men sa i ka di nou : « Lévé zòt wéy laro syèl-a é gadé. » Apré sa i ka doumandé nou : « A kimoun ki fè sa bagaj-ya ? » (Is. 40:26). Répons-a klè. Jéova fè tousa i gen annan syèl-a, asou latè-a ké annan lanmè-a. Tout sa bagaj-ya bèl toubonnman é yé ka anprann nou roun patché bagaj asou li (Ps. 104:24, 25). Épi sonjé kouman Jéova fè nou. I fè nou roun fason pou nou pran plézi gadé tousa i fè annan lanatir. Anplis di sa, i bay nou posibilité wè, tandé, touché, gouté é santi pou pèrmèt nou pran plézi annan tousa i fè.

5. Dapré Romains 1:20, poukisa sa bon pou nou étidyé kréyasyon-an ?

⁵ Labib-a ka bay rounòt rézon ki divèt fè nou kontan gadé sa Bondjé kréyé. Nou ka jwenn li annan Romains 1:20 (li). I ka montré nou ki bèl kalité Jéova gen. Parèkzanp gadé kouman tousa Jéova fè byen fèt. Ès yé pa ka fè nou wè ki i gen sajès ? Épi sonjé kantité manjé diféran i gen. A rounòt bagaj ki ka montré ki i kontan nou ! Lò nou ka gadé sa Jéova kréyé é ki nou ka wè bèl kalité i gen, nou ka anprann konnèt li pi byen é sa ka bay nou anvi vin pi pròch ké li. Aprézan, annou wè déztrwa fason Jéova sèrvi kréyasyon-an pou anprann moun-yan bagaj enpòrtan.

6. Kisa zozo-ya ki ka vwayajé ka anprann nou ?

⁶ Jéova gen roun kalandriyé. Chak lannen, ant lafen févriyé ké mitan mwa mé,  Israyélit-ya té ka wè sigògn-yan volé laro syèl-a pou alé annan dirèksyon nòr-a. Men sa Jéova té èspliké yé : « Sigògn-an ki annan syèl-a savé annan ki sézon i divèt pati » (Jér. 8:7). Menm fason Jéova chwazi roun moman pou sa zozo-a chapé rounòt koté, i chwazi roun moman osi pou fè so jijman-an fèt. Lò nou ka gadé sa zozo-ya ki gen roun jou pou lésé koté yé fika, sa ka fè nou sonjé ki nou pouvé sir ki Jéova gen roun « jou i divèt » fè sa monn méchan-an fini (Hab. 2:3).

7. Lò nou ka wè kouman sèrten zozo ka volé, di kisa nou pouvé sir ? (Isaïe 40:31).

⁷ Jéova ka bay so sèrvitèr fòrs. I sèrvi profèt Izayi pou promèt ki i té ké bay so sèrvitèr fòrs lò yé té ké fèb ouben dékourajé. Gras a fòrs i té ké bay yé-a, yé té ké pouvé « volé kousidiré yé té gen zèl, kou zèg » (li Isaïe 40:31). Israyélit-ya té abitchwé wè zèg-ya volé annan syèl-a san yé pa té gen pou bat yé zèl bokou. A van-an ki fò é ki ka monté ki ka pèrmèt yé fè sa. Lò nou ka wè kouman zèg-a ka volé, sa ka fè nou sonjé ki Jéova pouvé bay nou fòrs menm fason i ka bay sa zozo-ya fòrs. Lò to ka wè roun zozo ka volé laro syèl-a é ka monté ankò pi ròt annan syèl-a san i pa menm bat so zèl bokou, sonjé ki Jéova pouvé bay to fòrs pou to fè ké tout problèm to ka jwenn.

8. Kisa Jòb anprann lò i pran tan byen gadé sa Bondjé kréyé, é kisa sa ka anprann nou ?

⁸ Nou pouvé fè Jéova konfyans. I idé Jòb fè li plis konfyans (Job 32:2 ; 40:6-8). Lò i kozé ké li, i fè li réfléchi asou roun patché bèl bagaj i fè, kou zétwèl-ya, niyaj-ya ké zéklè. Jéova palé osi di zannimo-ya kou toro sovaj-a ké chouval-a (Job 38:32-35 ; 39:9, 19, 20). Tout sa bagaj-ya té ka montré ki Jéova té gen pwisans, mé osi ki i kontan nou é ki i gen bokou sajès. Gras a sa kozé-a, Jòb anprann fè Jéova konfyans ankò plis (Job 42:1-6). Menm fason-an, lò nou ka pran tan gadé sa Jéova kréyé, sa ka pèrmèt nou wè ki i gen lontan plis sajès épi plis fòrs pasé nou. Donk i pouvé fini ké tout problèm nou gen é a sa i ké fè. Lò nou savé sa, ès nou pa anvi fè li plis konfyans ankò ?

9-10. Kisa solèy-a ké lapli ka anprann nou asou Jéova ?

⁹ Jézi té byen konnèt lanatir. I travay ké so papa kou « roun ouvriyé ki ka travay byen » lò i fè tout inivèr-a (Prov. 8:30). Pita, lò Jézi té asou latè-a, i sèrvi kréyasyon-an pou fè so disip konnèt so Papa. Annou wè déztrwa bagaj i anprann yé.

¹⁰ Jéova ka montré so lanmou pou tout moun. Annan diskour Jézi fè asou montangn-an, i palé di dé bagaj Jéova fè mé ki roun patché moun pa ka menm pran tan gadé : solèy-a ké lapli. Pourtan, nou pa té ké pouvé viv san sa dé bagaj-ya. Jéova té pouvé anpéché moun-yan ki pa mérité profité di sa. Mé kou i sa roun moun ki bon, i ka pèrmèt tout moun profité di solèy-a ké lapli (Mat. 5:43-45). Jézi sèrvi sa èkzanp-a pou anprann so disip ki Jéova lé so sèrvitèr kontan tout kalité moun. Chak kou nou ka wè solèy-a ka kouché ouben nou ka wè lapli ka tonbé, annou réfléchi asou lanmou i gen pou tout moun. So èkzanp pouvé pousé nou montré sa menm kalité lanmou-a lò nou ka préché pou tout moun.

11. Poukisa sa pouvé ankourajé nou si nou ka pran tan gadé zozo-ya ?

¹¹ Jéova ka bay nou sa nou bézwen pou nou viv. Annan sa menm diskour-a, Jézi di osi : « Byen gadé zozo-ya : yé pa ka sonmen, yé pa ka rékòlté é yé pa ka mété manjé asou koté ; pourtan, zòt Papa ki annan syèl-a ka bay yé manjé. » Pitèt sa-ya ki té ka kouté Jézi té pouvé wè zozo-ya ka volé laro yé tèt lò i doumandé yé : « Ès zòt pa gen plis valò ki yé ? » (Mat. 6:26). A konsa, ké bokou lanmou, Jézi idé nou konprann ki Jéova ké pran swen di nou (Mat. 6:31, 32). É sa èkzanp-a ka kontinyé ankourajé sèrvitèr Bondjé-ya jòdla. Roun jenn sò ki pyonyé an Èspagn té dékourajé paské i pa té ka rivé trapé roun bon kaz. Mé roun jou, i wè plizyèr zozo ki té ka manjé grenn ké frwi é sa ankourajé l’. I ka di : « Lò mo wè ki Jéova té ka pran swen di sa zozo-ya, sa fè mo sonjé ki i té ké pran swen di mo osi. » Roun ti moso tan apré, i trapé roun kaz.

12. Kisa Matthieu 10:29-31 ka di asou mwano-ya, é kisa sa ka anprann nou asou Jéova ?

¹² Nou chak gen valò pou Jéova. Anvan i voyé so apot préché, Jézi pran roun èkzanp pou idé yé pa pè yé lèlmi (li Matthieu 10:29-31). I palé yé di mwano-a. A té roun zozo tout moun té konnèt an Israyèl é ki pa té gen bokou valò. Pourtan, men sa i di yé : « Pyès annan yé pa ka tonbé atè san zòt Papa pa wè sa. » Apré sa i di yé : « Zòt gen plis valò pasé roun patché mwano. » A té pou montré yé ki yé chak té gen valò pou Jéova, donk yé pa té pou pè pèrsékisyon-an. Apré sa, lò disip-ya wè mwano lò yé té ka préché annan vil-ya ké vilaj-ya, yé dèt sonjé sa Jézi té di. Chak fwa to ka wè roun ti zozo, to menm osi sonjé ki pou Jéova to gen valò, to « gen plis valò pasé roun patché mwano ». Si roun moun ka éséyé baré to chimen, sa lidé-a ké bay to kouraj (Ps. 118:6).

13. Kisa nou divèt fè pou nou profité di sa kréyasyon-an ka anprann nou ?

¹³ Nou pouvé anprann roun patché ròt bagaj asou Jéova gras a sa i kréyé. Mé pou fè sa, nou divèt pran tan gadé sa i kréyé épi réfléchi asou sa sa ka anprann nou. A pa tout tan sa fasil pou nou fè sa. Géraldine, roun sò ki ka rété o Kamroun ka di : « Mo pa lévé lakanpagn, donk sa ka doumandé mo fè bokou éfòr pou mo gadé lanatir. » É roun ansyen yé ka aplé Alfonso ka di : « Mo ka randé mo kò kont ki pou mo pran tan gadé kréyasyon Jéova-a é pou mo réfléchi asou sa sa ka anprann mo asou li, mo divèt pran roun tan pou mo rété mo rounso pou fè sa. »

14. Kisa David anprann lò i réfléchi asou sa Bondjé kréyé ?

 ¹⁴ Rwa David té ka réfléchi bokou asou kréyasyon-an. A sa ki fè li di Jéova : « Lò mo ka wè syèl to fè-a, tousa to lanmen fè, lalin ké zétwèl to préparé-ya, mo ka di mo kò : “Moun-an ki ka mouri-a, kimoun i sa pou to sonjé l’ ?” » (Ps. 8:3, 4). Lò David té ka gadé syèl-a plen ké zétwèl, i pa té ka yenki di ki zétwèl-ya té bèl toubonnman épi i bon. I té ka réfléchi osi asou sa zétwèl-ya té ka anprann li asou Bondjé. A konsa i anprann kouman Jéova pwisan é i gen sajès. David réfléchi osi asou fason i té fèt annan vant so manman. Sa fè li rété èstébékwé, é i konprann ki a pa ti sajès Jéova gen (Ps. 139:14-17).

15. Bay roun èkzanp annan lanatir ki ka montré nou roun kalité Jéova gen (Psaume 148:7-10).

¹⁵ Kou David, to pa bézwen alé chaché lwen pou to trapé roun bagaj annan kréyasyon-an pou to réfléchi asou l’. Si to ka gadé a to lantou, to ké pouvé wè roun patché kalité Jéova gen. Parèkzanp, lò to ka santi chalò solèy-a asou to lapo, ès sa pa ka fè to sonjé so pwisans ? (Jér. 31:35). Lò to ka wè roun zozo ka fè so nik, ès sa pa ka fè to sonjé so sajès ? Lò to ka wè roun ti chyen ka kouri dèyè so latcho, ès sa pa ka fè to wè ki Jéova kontan ari ? É lò to ka wè roun manman jwé ké so bébé, ès sa pa ka bay to anvi di li mèrsi pou so lanmou ? Nou gen roun patché okazyon pou nou anprann konnèt nou Bondjé ! Tousa i fè, ki a piti ki a gran bagaj, ki a bagaj ki lwen ki a bagaj ki tou pròch ké nou, ka louwé li (li Psaume 148:7-10).

16. Kisa nou divèt byen désidé fè ?

¹⁶ I pa gen pyès moun ki entélijan, ki ka gadé pou nou, ki pwisan é ki ka fè bèl bagaj kou nou Bondjé. Nou pouvé wè tout sa bèl kalité-ya ké ròt ankò annan lanatir si nou ka jis pran tan gadé l’. Annou tout pran tan pran plézi annan sa Jéova fè é annou réfléchi asou sa sa ka anprann nou asou li. Si nou ka fè sa, nou ké toujou vin pi pròch ké li (Jacq. 4:8). Annan artik ki ka vin dèyè-a, nou ké wè kouman papa ké manman-yan pouvé sèrvi kréyasyon-an pou idé yé timoun vin pròch ké yé Kréyatèr.