1. Job Jehovak anik bore toren zannam zaunk pavlo ti ek vatt khoinchi?

 JOB APLEA jivitant zaitea zannam lagim uloilo astolo. Punn Jehova tache lagim jem uloilo, tem to kednanch visronk na astolo. Jehovan Jobak apnnem rochlolea ojapvont vostuncher dhean diunk sanglem. Oxem kelolean Jehovak kitli zannvai asa tem Jobak kollon ailem. Toxench, aplea sevokank goroz asa tem soglem Jehova tankam diunk xokta mhunn Jobacho visvas vaddlo. Udharonnak, apunn zonvaranchi kallji gheunk xokta toso, apunn tachi pasun kallji gheunk xokta mhunn Jehovan Jobachea ugddasak haddlem. (Job 38:39-41; 39:1, 5, 13-16) Hea toren rochnnecher niall kelolean, Job Jehovachea gunnam vixim anik bore toren zannam zaunk pavlo.

2. Rochnnecher niall korunk amkam thodde pavtti kiteak kotthin zaunk xokta?

² Ami pasun rochnnecher bariksannen dhean diun, Jehova vixim anik zannam zaunk zata. Punn thodde pavtti oxem korunk amkam kotthin zaunk xokta. Udharonnak, ami eka xarant ravtat zalear, amkam ghoddie Jehovan rochloleo zaiteo vostu pollounk mellonant astoleo. Vo rochnna pollounk melltta toslea zagear ami ravtat zalear pasun, amche lagim vell na oxem amkam dista zait. Tor hea lekhant, rochnna pollounk ami kiteak vell kaddunk zai ani vavr korunk zai tem ami polloitolim. Toxench, Jehovan ani Jezun rochnna uzar korun koxem xikoilem, ani rochnne thaun anik xikonk ami kitem korunk zai, tem pasun ami polloitolim.

3. Rochnna polloun Adanv khuxal zalʼlo Jehovak zai aslem mhunn koxem kolltta?

³ Jehovan poilea munxak rochlo tednam, apnnem rochloleo  vostu polloun to khuxal zalʼlo taka zai aslem. Jehovan Adanvak ek sobit bagent dovorlo ani tea bagechi kallji gheunk, ani akʼkhi prithum tea bage bhaxen korunk taka kam dilem. (Ut. 2:8, 9, 15) Eden bagechi kallji ghevop, Adanvak ek vhodd sueog zaun aslo. Jehovan rochloleo vostu, zoxem ek bim kirlota vo ek ful fulta tem polloun, Adanv kitlo umedin bhorlo astolo tea vixim chintat. Toxench Jehovan Adanvak, zonvarank nanvam diunk lailim. (Ut. 2:19, 20) Jehovak zai zalear, hem kam to apunnuch korunk xoktalo. Punn tannem hi sondhi Adanvak dili. Ani zonvarank nanvam diunchea poilim, tim koxim distat vo tim kitem kortat, tea vixim Adanvan bariksannen obheas kelo, mhunn kainch dubhav na. Khorench, hem soglem korunk Adanvak khub moja aili astoli! Ani hea vorvim Jehovak kitli zannvai asa, ani tannem rochloleo vostu kitleo sobit ani ojapvont asat, tem zannam zaunk taka ek sondhi mellʼlli.

4. (a) Rochnnecher dhean diunk ek karonn kitem? (b) Tumkam khas korun Jehovachi khoinchi rochnna avoddtta?

⁴ Rochnnecher dhean diunk ek karonn mhunnttlear, ami toxem kelʼlem Jehovak zai. To amkam oxem sangta: “Dolle voir ubarun polleiat: him noketram konnem rochleant?” (Iz. 40:26) Jehovan fokot sorgaruch nhoi, punn prithumer ani doriant pasun zaiteo ojapvont vostu rochleat, jea vorvim ami tache vixim xikonk pavtat. (St. 104:24, 25) Ani Jehovan amkam koxim rochleant, tea vixim chintat. Jehovan rochloleo veg-veglleo vostu ami pollounk, chakunk, aikonk, vas gheunk ani hat lavunk xoktat. Khorench, hantunt amkam kitli khuxalkai melltta!   

5. Romkarank 1:20-a pormonnem, rochnnecher dhean dilolean amkam koxi modot zata?

⁵ Bible-ant amkam rochnnecher dhean diunk anik ek karonn melltta. Tem mhunnttlear, rochnne thaun ami Jehovache gunn zannam zatat. (Romkarank 1:20 vachat.) Udharonnak, Jehovan rochleat teo vostu tannem koxe toren rochleat, tea vixim chintat. Tantunt tumkam tachi zannvai dison iena kai? Toxench, amkam khuxal korunk Jehovan tore-torecheo khavpacheo vostu rochleat. Hantuntlean to amcho kitlo mog korta tem spoxtt toren kollon ieta. Tor rochnnentlean Jehovak kosle gunn asat tem amkam kolltta tednam, ami taka anik bore toren zannam zaunk pavtat, toxench taka anikui lagim soronk pavtat. Tor Jehovan rochnna uzar korun munxank mhotvachim lisanvam koxim xikoileant tem atam polloum-ia.

6. Bollar vo bokim hea suknneam thaun ami kitem xikonk zata?

⁶ Jehovan dor eke vostuk ek vell tharaila. Dor vorsa, Febrer mhoineachea xevottak thaun, May mhoineachea don sumanam meren, Israelitkarank  bollar vo bokim him suknnim, utʼtore vatten uddttat tim dixtti poddttalim. Hea suknneam vixim Jehovan Israelitkarank oxem sanglolem: “Mollba veli bollar aplo iukt vell zanna.” (Jer. 8:7) Jehovan hea suknneank provas korunk ek vell tharaila tea bhaxen, noxtteancho nas korunk pasun tannem ek vell tharaila. Tor aiz, dor vorsa eka zagear thaun dusrea zagear voitat tim suknnim ami polloitat tednam, Jehova ‘nemlolea vellar’ hea noxttea sonvsaracho nas kortolo mhunn amchea ugddasak ieta. Ani hea toren amcho visvas vaddtta.—Hab. 2:3.

7. Ek suknnem jea toren uddtta tantuntlean ami kitem xiktat? (Izaias 40:31)

⁷ Jehova aplea sevokank xokti dita. Jehovan Izaias provadea udexim aplea lokank bhas dili ki tankam niraxiponn bhogta tednam, “ghonnim porim tankam pakhtte futtʼtole.” Tem mhunnttlear, to tankam xokti ditolo. (Izaias 40:31 vachat.) Ek ghonn gorom vareachea adaran aple pakhotte chodd pavtti haloinastana, khub voir uddtta tem Israelitkaramnim zaite pavtti polloilʼlem. Jehova hea suknneak xokti dita toso, to amkam pasun xokti ditolo mhunn hem amchea ugddasak haddtta. Tor aiz ek vhoddlem suknnem, aple pakhotte chodd pavtti haloinastana, voir varear uddtta tem tumi polloitat tednam, amchea oddchonneancho fuddo korunk Jehova amkam xokti ditolo mhunn ugddas korat.

8. Jehovache rochnnecher dhean dilolean Job kitem xikonk pavlo, ani ami kitem xikonk zata?

⁸ Ami Jehovacher purnn visvas dovrunk zata. Jehovan Jobak apleacher aslolo tacho visvas anik ghott korunk taka modot keli. (Job 32:2; 40:6-8) Joba lagim uloitana, apnnem rochlolea zaitea vostum vixim Jehovan taka sanglem. Zoxem noketram, kupam ani zoglam. Toxench, to ranvotti boil ani ghoddo, hea zonvaram vixim pasun uloilo. (Job 38:32-35; 39:9, 19, 20) Hea soglea vostum vorvim Jobak, Jehovak kitli xokti asa tench nhoi, punn to kitlo zannvaiecho ani mogall, tem pasun kollon ailem. Hea uloupantlean Jehovacher Jobacho visvas anikui ghott zalo. (Job 42:1-6) Tor aiz ami pasun rochnnecher dhean ditat tednam, Jehovak amchea poros khub zannvai ani xokti asa mhunn amkam kollon ieta. Ani Jehova amche sogle tras kabar korunk xokta, ani to toxem kortoloch mhunn amkam khatri melltta.

9-10. Suria ani pausa thaun ami Jehova vixim kitem xiktat?

⁹ Jezu rochnne vixim zaitem zannam aslo. Karonn Jehovan ho vixv rochlo tednam, Jezun tachea sangata ek ‘huxar vavraddea’ bhaxen kam kelem. (Mho. 8:30) Ani Jezu hea prithumer ailo tednam, aplea Bapai vixim xikounk tannem rochnnam uzar keli. Tor, Jezun xikoilʼlea thoddea lisanvacher dhean dium-ia.

¹⁰ Jehova sogleancho mog korta. Dongrar Dilʼlea Xikounnent, Jezu aplea xisam lagim suria ani pausa vixim uloilo. Thoddo lok, hea vostum vixim titlo chodd chintina. Punn jivit jieunk heo vostu khub gorjecheo asat. Jehovak zai zalear, tannem teo, fokot apli seva kortat tankanch diunk zataleo. Punn to mogan, sogleancher aplo suria ude-so korta ani paus dhaddtta. (Mt. 5:43-45) Jezun suria ani pausa vixim sangon, ami sogleancho mog kelʼlo Jehovak zai mhunn aplea xisank xikoilem. Tor, suria buddtta vo paus zhoddtta tem ami polloitat tednam, Jehova bhedbhav korinastana soglea lokancho mog korta mhunn ami ugddas dovrunk zata. Oxem kelolean, ami Jehovachi dekh gheun soglea torechea lokank porgottunk pavtolim.

11. Suknneank polloun amkam kosli khatri melltta?

¹¹ Jehova amcheo gorzo purnn korta. Dongrar Dilʼle Xikounnent Jezun oxem-i sanglem: “Varear uddttat tea suknneancher dhean diat, tim roinant, lunvnant ani gudanvamnim bhorun dovornant, tori astana tumcho sorgincho Bap  tankam khaunk dita.” Ani Jezun tankam, “Tor tumi tanchea poros chodd molachim nhoi?” oxem vicharlem tednam, tim varear uddttat tea suknneank polloitalim astolim. (Mt. 6:26) Jezun kitle mogall toren Jehova amchi kallji ghetolo mhunn vollkhon gheunk amkam modot keli nhoi! (Mt. 6:31, 32) Hea lisanvantlean, Jehovacher amchi khatri vaddtta. Spain-ant ravtole eke pioneer bhoinnin oxench onubhovlem. Hea tornnatte bhoinnik ravonk ek ghor mellonaslem dekhun ti niraxi asli. Punn uprant, bim ani follam khatolea suknneank tinnem polloilem tednam Jehovacher tichi khatri vaddli. Ti oxem mhunnonk pavli: “Jehova hea suknneanchi kallji gheta zalear, to mhoji-i ghetolo.” Ani toxench zalem. Tika rokddoch ravonk ek zago mellʼllo.

12. Matev 10:29-31-ant, lhan suknneam vixim jem sanglam tantuntlean Jehova vixim ami kitem xiktat?

¹² Jehova amcho dor ekleacho valor korta. Aplea apostlank porgottnnek dhaddchea poilim, virodh kortat tankam bhiena zaunk Jezun tankam modot keli. (Matev 10:29-31 vachat.) Oxem korunk, Israelant choddxe pavtti distalim, tea xerkam vo chimnnea vixim tannem tankam sanglem. Jezuchea disamnim hea suknneank kainch valor naslo. Punn Jezun aplea xisank sanglem: “Tantuntlem ekui tumchea Bapak kollonastana zomnir poddona.” Ani tannem fuddem mhunnttlem: “Zaitea lhan suknneam poros tumi chodd molachim asat.” Tor xisamnim dhumalleak bhieunchi koslich goroz nasli. Karonn, Jehova tancho dor ekleacho valor kortalo mhunn Jezun tankam khatri dili. Ani ganvamnim, toxench xaramnim porgottʼttana, him lhan suknnim xisank distalim tednam, tankam Jezuchea utrancho ugddas ietalo mhunn kainch dubhav na. Tor tumi-i eka lhan suknneak polloitat tednam, Jehova tumcho valor korta mhunn ugddas dovrat. Karonn, tumi pasun “zaitea lhan suknneam poros . . . chodd molachim asat.” Jehovache modotin tumi pasun dhiran virodhacho fuddo korunk pavtolim.—St. 118:6.

13. Rochnne thaun anikui lisanvam xikonk ami kitem korunk zai?

¹³ Jehovachea rochnne thaun ami anikui zaitim lisanvam xikonk zatat. Oxem korunk ami kitem korunk zai? Sogleant poilim ami Jehovache rochnnecher dhean diunk vell kaddunk zai. Uprant, tantuntlean Jehova vixim ami kitem xiktat tea vixim ami chintunk zai. Oxem korop ghoddie sodanch sompem aschem na. Tor ami kitem korunk zata? Cameroon-ant ravpi Géraldine nanvachi bhoinn oxem sangta: “Hanv xarant vaddlam dekhun, rochnnecher dhean diunk hanvem vavr korunk zai mhunn mhaka kollon ailam.” Toxench, Alfonso nanvacho ek vhoddil mhunntta: “Jehovache rochnnecher dhean diunk ani tantuntlean Jehova vixim mhaka kitem xikonk melltta tacher niall korunk hanvem ek vell tharaunk zai mhunn hanv xiklam.”

14. Rochnnecher niall kelolean David kitem xikonk pavlo?

 ¹⁴ David Jehovache rochnnecher bariksannen dhean ditalo dekhun to oxem mhunnonk pavlo: “Mollob, Tujea hatanchem kam, hanv pollein zalear, tunvem thoim lailʼlea chondra-noketrancher nodor ghalin zalear, monis konn Ga, Tunvem tacho ugddas korcheak?” (St. 8:3, 4) Hoi, David ratchea vellar mollbantlim noketram polloun fokot khuxal zainaslo. Punn tantuntlean to Jehova vixim kitem xikta tacher to niall kortalo. Oxem kelolean, Jehovak kitli zannvai ani xokti asa tem to xikonk pavlo. Tea bhair, avoichea kusveant astana apunn koxe toren vaddlo, tea vixim pasun Davidan bariksannen chintlem. Ani Jehovan ojapache ritin apleak koxe toren rochla tacher niall kelolean, Jehovache zannvaie pasot tachem upkariponn anikui vaddlem.—St. 139:14-17.

15. Rochnnentlean tumi Jehovachea khoinchea gunnam vixim xikleant? Udharonnam diat. (Stotr 148:7-10)

¹⁵ Davida bhaxen, Jehovache rochnne vixim niall korunk amkam pasun sompem zaunk xokta. Koxem? Ami amchech bhonvtonnim aslolea rochnnecher dhean diunk zata. Oxem kelolean, Jehovachea zaitea gunnam vixim ami xikonk pavtolim. Udharonnak, amkam suriachi gormi lagta tednam, Jehova kitlo xoktivont asa tea vixim ami chintunk zata. (Jer. 31:35) Toxench, ek suknnem aplo ghontter bandta tem ami polloitat tednam, Jehovak kitli zannvai asa tacher ami dhean diunk zata. Tea bhair, ek sunno aplich xempddi dhorunk proitn korta tednam, Jehova ek khuxal Dev mhunn ami ugddasak haddunk zata. Toxench, ek avoi aplea lhan ballxea sangata khelltta tednam, Jehova ek mogall Dev mhunn ami niall korunk zata. Jehova vixim xikonk amkam zaiteo sondhi asat. Karonn tachi sogli rochnna, ti lhan vo vhodd zaum, pois vo lagim asum, taka vakhanntta.—Stotr 148:7-10 vachat.

16. Tumi kitem korunk nichov korunk zai?

¹⁶ Amcho Dev Jehova, khub mogall, zannvaiecho ani xoktivont asa. Toxench, tachi sogli rochnna ekdom sobit asa. Ami Jehovachea rochnnecher bariksannen dhean ditat tednam, amkam hea ani Jehovachea anikui zaitea gunnam vixim kollon ietolem. Tor Jehovachi rochnna polloun khuxal zaunk, ani tantuntlean amkam Jehova vixim kitem xikonk melltta tea vixim niall korunk, ami chukonastana vell kaddum-ia. Oxem kelolean, ami taka anik lagim soronk pavtolim. (Jak. 4:8) Fuddlea lekhant, avoi-bapaimnim rochnna uzar korun aplea bhurgeank Jehovak lagim soronk koxi modot korunk zata tem ami polloitolim.