1. Muaj ib yam qhia tau Yauj kom huab yam paub Yehauvas ntxiv yog li cas?

 NYOB hauv Yauj lub neej, nws yeej nrog coob leej ntau tus sib txuas lus mus mus los los tiam sis qhov uas nws nrog tau Vajtswv Yehauvas sib txuas lus mas zoo tshaj plaws li. Thaum Yauj thiab Yehauvas nkawd sib txuas lus, Yehauvas tau qhia rau Yauj kom saib tej uas Nws tau tsim. Tej no yuav pab Yauj pom tias Yehauvas muaj tswv yim npaum li cas thiab kom Yauj tso siab tias Yehauvas yeej yuav pab tau Nws cov tib neeg yog lawv xav tau ib yam twg. Xws li Vajtswv hais rau Yauj tias yog Nws twb saib xyuas tau tej tsiaj txhu ces Nws yeej saib xyuas tau Yauj tib yam nkaus. (Yauj 38:39-41; 39:1, 5, 13-16) Thaum Yauj saib tej uas Yehauvas tau tsim, Yauj yeej pom Yehauvas tej yeeb yam qhuas lug.

2. Vim li cas peb tsis lauj sij hawm los soj ntsuas tej uas Yehauvas tsim?

² Thaum peb ua tib zoo soj ntsuas tej uas Yehauvas tau tsim ces peb yuav kawm tau ntau ntau yam txog nws. Tiam sis muaj ntau zaus yeej tsis yooj yim rau peb lauj sij hawm los xav txog li. Yog peb nyob rau hauv nroog ces peb yeej tsis tshua pom tej uas Yehauvas tsim. Txawm peb nyob rau yaj sab los tej thaum peb yeej nrhiav tsis tau sij hawm los kawm kiag li thiab. Yog li ntawd, cia peb ua tib zoo soj ntsuas tias vim li cas ho tsim nyog rau peb lauj sij hawm los kawm tej uas Yehauvas tau tsim. Tsis tas li ntawd, peb yuav kawm seb Yehauvas thiab Yexus nkawd tau siv tej uas Yehauvas tau tsim los mus qhia peb li cas rau li cas thiab peb yuav ua li cas kom thiaj kawm tau tej uas Yehauvas tsim.

3. Muaj dab tsi qhia tias Yehauvas xav kom Adas txaus siab rau tej Nws tsim?

³ Yehauvas xav kom thawj tug tib neeg txaus siab rau tej uas nws tau tsim. Yog li ntawd thaum Yehauvas tsim tau Adas, Yehauvas muab nws tso rau hauv ib lub vaj kaj siab zoo zoo nkauj kom nws tau mus ncig xyuas thiab tu lub vaj ntawd kom mus  thoob ntiaj teb. (Chivkeeb 2:8, 9, 15) Ntshe Adas zoo siab kawg li thaum nws pom tej noob nthaw kaus thiab tej paj tawg ua nrw niab. Yog ib yam uas zoo heev Adas tau muaj lub cij fim los tu lub vaj Edees. Yehauvas kuj hais kom Adas tis npe rau tej tsiaj txhu huv tib si thiab. (Chivkeeb 2:19, 20) Txawm Yehauvas xav tis npe rau tej tsiaj txhu ntawd los yeej tau tiam sis nws muab tes hauj lwm no cob rau Adas ua. Ua ntej Adas yuav tis npe rau ib tug tsiaj twg, nws yeej ua tib zoo soj ntsuas seb tus tsiaj ntawd coj li cas rau li cas ces nws mam tis npe rau. Tej zaum ntshe Adas yuav zoo siab heev tau ua ib teg hauj lwm li no. Tej Adas ua no pab tau kom nws ris txiaj ntsig tias Yehauvas muaj tswv yim npaum li cas thiab tsim tau tej ub tej no zoo nkauj zoo saib kawg li.

4. (1) Vim li cas peb yuav tau soj ntsuas tej uas Vajtswv tsim? (2) Koj nyiam dab tsi tshaj uas Vajtswv tau tsim?

⁴ Tos peb soj ntsuas tej uas Yehauvas tsim los, yeeb vim yog nws xav kom peb ua li ntawd. Nws hais tias: “Tsa koj ob lub qhovmuag ntsia saum nruab ntug saib!” Ces nws nug li no tias: “Leejtwg yog tus tsim tej hnubqub uas koj pom ntawd?” Peb yeej paub meej meej tias yog leej twg tsim. (Yaxayas 40:26) Yehauvas tsim txhua yam uas nyob saum ntuj, hauv ntiaj teb, thiab hauv nruab tiv txwv. Txhua yam no yeej qhia tshwm txog Vajtswv rau peb. (Phau Ntawv Nkauj 104:24, 25) Tsis tas li ntawd, nws muab qhov uas peb nyiam saib tej nws tsim tso rau hauv peb nruab siab. Ntxiv ntawd, nws kuj pub kom peb muaj rab peev xwm pom kev, hnov lus, chwv, txawj saj, thiab hnov ntxhiab xwv peb thiaj li paub txog txhua yam uas nws tau tsim.

5. Raws li Loos 1:20, yog peb kawm tej uas Yehauvas tsim pab tau peb li cas?

⁵ Nyob hauv phau Vajlugkub qhia peb dua ib yam uas vim li cas peb yuav tau soj ntsuas tej uas Yehauvas tsim. Qhov ntawd yog qhia txog Yehauvas tej yeeb yam qhuas lug. (Nyeem Loos 1:20.) Xws li saib tej uas Yehauvas tau tsim ces peb yuav pom tias nws tsim tau txhua yam zoo kawg nkaus li. Tej no qhia tias Vajtswv muaj tswv yim tshaj plaws. Cia peb ua tib zoo xav txog txhua yam zaub mov uas peb tau noj. Tej ntawd yeej qhia tseeb tseeb tias Vajtswv hlub noob neej kawg nkaus li. Thaum peb pom Yehauvas tej yeeb yam qhuas lug los ntawm tej uas nws tau tsim, peb txoj kev sib raug zoo nrog nws yuav loj zuj zus tuaj thiab ua rau peb yim huab xav paub nws. Cia peb mus ua zoo soj ntsuas qhov uas Yehauvas siv tej uas nws tau tsim los mus cob qhia noob neej.

6. Peb khaws tau li cas los ntawm cov noog uas ya ib qho dhau ib qho?

⁶ Yehauvas teem caij teem nyoog rau txhua yam. Txhua txhua xyoo thaum lub 2 Hlis nqeg  mus txog rau lub 5 Hlis nra nra, cov neeg Ixayees yeej pom cov noog pas hawv ya ua nroo ntws los mus rau sab qaum teb. Vajtswv hais rau cov Ixayees tias: “Txawm yog tej noog pashawv los twb paub lub caij uas ya rov los rau ntawm nws lub chaw.” (Yelemis 8:7) Zoo ib yam li Yehauvas teem caij teem nyoog rau cov noog no ya mus mus los los, nws kuj tau teem caij teem nyoog rau nws tej kev txiav txim. Niaj hnub no thaum peb saib tej noog uas ya ib qho dhau ib qho, cia peb nco ntsoov rau nruab siab tias Yehauvas twb teem tau ib “lub sij hawm” uas nws yuav muab lub qab ntuj phem no rhuav tshem tawm mus.​—Hanpakus 2:3.

7. Peb khaws tau li cas los ntawm qhov uas noog ya? (Yaxayas 40:31)

⁷ Yehauvas ntxiv dag ntxiv zog rau nws cov tib neeg. Yehauvas siv Yaxayas kom txhawb Nws cov tib neeg tias Nws yeej yuav pab Nws cov tib neeg kom lawv “nthuav tis ya ib yam li tus dav” thaum lawv qaug zog los sis tag kev cia siab. (Nyeem Yaxayas 40:31.) Cov Ixayees pom tej dav ya saum nruab ntug tsis ntxuaj tis li. Cov dav ua tau li no, yeeb vim yog lawv ya raws cua. Tej no ua rau peb pom tias yog Yehauvas twb pub dag zog rau tej noog ces nws kuj yuav pub dag zog rau nws cov tib neeg tib yam nkaus. Thaum koj pom ib tug noog ya tsis ntxuaj tis siab zuj zus mus rau puag saum ntuj, nco ntsoov tias Yehauvas yeej yuav muab dag zog rau koj kov yeej tej teeb meem koj raug tib yam nkaus.

8. Yauj kawm tau dab tsi los ntawm tej uas Vajtswv tsim, thiab peb ho kawm tau dab tsi?

⁸ Yeej tsim nyog rau peb tso siab rau Yehauvas. Yehauvas pab kom Yauj huab yam tso siab rau nws. (Yauj 32:2; 40:6-8) Thaum Yauj thiab Yehauvas nkawd sib txuas lus, Yehauvas piav txog tej uas nws tau tsim xws li tej hnub qub, tej huab, thiab tej xob laim. Tsis tas li ntawd, Yehauvas kuj hais txog tej tsiaj nruab nrag xws li tus nyuj qus thiab tus nees. (Yauj 38:32-35; 39:9, 19, 20) Tag nrho txhua txhua yam no tsis yog qhia txog Vajtswv lub tshwj chim xwb tiam sis kuj qhia txog nws txoj kev hlub thiab nws lub tswv yim. Qhov uas nkawd sib txuas lus li no ua rau Yauj huab yam tso siab rau Yehauvas dua tshaj qhov qub. (Yauj 42:1-6) Zoo tib yam li ntawd, thaum peb kawm txog tej uas Yehauvas tsim, peb yuav pom tau tias Yehauvas yeej ntse thiab muaj zog loj zog nchav tshaj peb. Yehauvas muaj rab peev xwm muab peb tej kev sim siab tshem tawm mus. Thaum peb paub li no, ua rau peb yim huab ruaj siab rau nws.

9-10. Lub hnub thiab tej dej nag qhia peb li cas txog Yehauvas?

⁹ Yexus yeej paub ntau yam txog tej uas Vajtswv tsim. Nws zoo yam nkaus “tus kws tsa tsev,” nws thiaj muaj lub cij fim nrog nws Txiv tsim ib puas tsav yam. (Pajlug 8:30) Tom qab no thaum nws los rau hauv ntiaj teb, nws thiaj li siv tej uas tau tsim ntawd los mus qhia nws cov thwj tim txog nws Txiv. Cia peb mus kawm txog ob peb yam uas nws tau qhia ntawd.

¹⁰ Yehauvas qhia nws txoj kev hlub rau txhua leej txhua tus. Thaum Yexus piav nws zaj lus qhia saum roob, nws qhia nws cov thwj tim txog ob yam uas Yehauvas tau tsim es neeg saib tsis khuab qhov muag, xws li tshav ntuj thiab los nag. Yuav tsum muaj ob yam no thiaj muaj sia. Yog Yehauvas tsis xav muab rau cov neeg uas tsis kam teev tiam nws los yeej tau. Tiam sis nws txaus siab hlo muab lub hnub thiab tej dej nag rau txhua tus. (Mathais 5:43-45) Yexus siv zaj no los mus qhia nws cov thwj tim tias Yehauvas xav kom peb ib leeg hlub ib leeg. Thaum twg peb saib lub hnub poob qho los sis tab tom los nag, cia peb nco ntsoov txog Yehauvas txoj kev hlub uas nws pub rau txhua leej txhua tus. Yog peb xav li no, yuav ua rau peb txaus siab hlo mus qhia Vajlugkub rau sawv daws.

11. Thaum peb saib tej noog txhawb tau peb li cas?

¹¹ Yehauvas muab tej uas yug peb txoj sia rau peb. Yexus kuj hais li no ntxiv tias: “Tsa muag ntsia tej noog uas ya saum nruab ntug. Tej noog twb tsis txawj cog tsis txawj sau qoob los cia hauv txhab. Txawm li ntawd los, nej Leej Txiv saum ntuj tseem pub tej noog tau noj.” (Mathais 6:26) Raws li hais no, Yexus pab kom peb pom tias Yehauvas yeej saib xyuas peb txhua tus. (Mathais 6:31, 32) Zaj no haj tseem qhia peb quj qees niaj hnub nim no. Muaj ib tug ntxhais hluas tho kev nyob rau teb chaws Xapee (Spain) ntxhov siab hnyo vim nws nrhiav tsis tau ib qho chaw zoo rau nws nyob. Tiam sis thaum nws pom tej noog khaws tej noob thiab tej txiv pos los noj ces nws txawm tuaj zog lawm. Nws thiaj hais tias, “Cov noog no ua rau kuv ras dheev tias yog Yehauvas twb saib xyuas lawv ces nws yeej yuav saib xyuas kuv tib yam nkaus.” Tsis ntev tom qab ntawd, nws txawm nrhiav tau ib qho chaw rau nws nyob lawm.

12. Raws li Mathais 10:29-31, cov noog tsev qhia peb li cas txog Yehauvas?

¹² Yehauvas saib peb ib tug dhau ib tug muaj nuj nqis heev. Ua ntej Yexus yuav txib nws cov tub txib mus qhia tib neeg, nws txhawb kom lawv tsis txhob ntshai cov uas tawm tsam lawv. (Nyeem Mathais 10:29-31.) Nws thiaj li tham txog cov noog uas cov neeg Ixayees ib txwm pom uas yog tej noog tsev. Nyob rau lub caij ntawd, tej noog tsev tsis muaj nqis dab tsi li. Tiam sis Yexus qhia rau nws cov thwj tim tias: “Yog ib tug poob rau hauv av, nej Leej Txiv yeej paub tib si.” Nws hais ntxiv li no tias: “Nej tseem muaj nqis dua tej noog tsev huv si.” Yexus hais rau nws cov thwj tim tias Yehauvas saib lawv ib tug dhau ib tug muaj nqis heev, yog li ntawd kom lawv tsis txhob ntshai kev tsim txom kiag li. Thaum cov thwj tim mus tshaj tawm ib lub zos dhau ib lub zos es pom cov noog tsev, ua rau lawv nco txog Yexus cov lus. Yog li ntawd, thaum koj pom ib tug me nyuam noog twg, nco ntsoov tias Yehauvas saib koj “muaj nqis dua tej noog tsev huv si.” Yog muaj Yehauvas nyob koj tog lawm, tsis txhob ntshai kev tawm tsam.​—Phau Ntawv Nkauj 118:6.

13. Dab tsi pab tau kom peb kawm txog tej uas Vajtswv tsim?

¹³ Peb yeej kawm tau ntau yam los ntawm tej uas Yehauvas tsim. Yuav ua li cas peb thiaj kawm tau? Peb yuav tau lauj sij hawm los soj ntsuas tej uas Vajtswv tsim. Tom qab ntawd, peb yuav tau muab coj los ua zoo xav seb ho qhia peb li cas txog Yehauvas. Tej zaum yuav yooj yim hais tiam sis tsis yooj yim ua. Muaj ib tug muam nyob rau teb chaws Kamaloos (Cameroon) npe hu ua Zeledees (Géraldine) tau hais tias: “Kuv loj hlob nyob rau hauv nroog ces kuv yuav tau lauj sij hawm los mus saib tej uas Vajtswv tsim.” Muaj ib tug txwj laus hu ua Efantxaum (Alfonso) tau hais tias: “Kuv kawm tau tias kuv yuav tau lauj sij hawm los nyob ib leeg ntsiag to xwv kuv thiaj muaj sij hawm los saib tej uas Yehauvas tsim thiab xav seb tej ntawd qhia li cas rau kuv txog nws.”

14. Daviv khaws tau dab tsi thaum nws ua zoo xav txog tej Vajtswv tsim?

 ¹⁴ Daviv yeej ua tib zoo xav txog tej uas Vajtswv tsim. Nws hais li no rau Yehauvas tias: “Thaum kuv tsa qhovmuag ntsia saum lub ntuj uas koj tsim cia, kuv pom lub hli thiab tej hnubqub uas koj muab teeb nyias nyob muaj nyias chaw, neeg ntiajteb tsim txiaj npaum li cas, koj thiaj nco txog lawv? (Phau Ntawv Nkauj 8:3, 4) Tsis yog tias Daviv nyiam nyiam ntsia tej hnub qub saum nruab ntug xwb tiam sis nws ua tib zoo xav txog tej hnub qub seb qhia nws li cas txog Vajtswv. Nws khaws tau tias Yehauvas muaj tswv yim thiab muaj hwj chim tshaj. Hos tej thaud nws kuj xav txog thaum nws lub cev xeeb rau hauv nws niam plab. Thaum nws muab tej no xav mus xav los ua rau nws xav tsis thoob li thiab ua rau nws huab yam ris txiaj ntsig rau Yehauvas tej tswv yim.​—Phau Ntawv Nkauj 139:14-17.

15. Piav seb koj pom Yehauvas tej yeeb yam qhuas lug los ntawm tej nws tsim li cas. (Phau Ntawv Nkauj 148:7-10)

¹⁵ Zoo ib yam li Daviv, koj tsis tas yuav mus nrhiav deb deb es mam pom tej uas Vajtswv tsim. Yog koj ua tib zoo saib puag ncig, koj yuav pom Yehauvas tej yeeb yam qhuas lug rau txhua qhov. Xws li thaum lub hnub ci ntuas ua rau koj lub cev sov so, koj yeej paub Yehauvas lub zog loj npaum li cas. (Yelemis 31:35) Thaum koj pom noog ua zes, koj yeej paub tau tias Yehauvas muaj tswv yim npaum li cas. Thaum koj pom ib tug me nyuam dev pheej caum nws tus tw, koj yeej paub tias Yehauvas nyiam ua rau peb luag ntxhi. Thaum koj pom ib leej niam ua si nrog nws tus me nyuam, yuav ua rau koj xav txog Yehauvas txoj kev hlub. Yog li ntawd, peb yeej muaj peev xwm kawm txog Yehauvas, yeeb vim yog tej uas nws tsim nyob puag ncig, tsis hais loj thiab me, deb los ze, puav leej qhuas nws.​—Nyeem Phau Ntawv Nkauj 148:7-10.

16. Peb yuav tsum kub siab lug ua dab tsi?

¹⁶ Peb tus Vajtswv muaj tswv yim, muaj kev hlub, muaj zog loj zog nchav, thiab txhua yam nws tsim puav leej zoo nkauj zoo saib. Peb yeej kawm tau Vajtswv tej yeeb yam qhuas lug thiab tej uas hais tsis txhij tsis txhua yog peb ua tib zoo soj ntsuas tej uas nws tsim puag ncig peb. Cia peb lauj sij hawm los saib tej uas Vajtswv tau tsim thiab ua zoo xav txog tej ntawd seb qhia peb li cas txog nws. Yog peb ua li ntawd ces peb yuav yim huab nrog Vajtswv sib raug zoo tshaj qhov qub. (Yakaunpaus 4:8) Nyob rau zaj txuas ntxiv tom ntej no, peb yuav kawm txog tias cov niam txiv siv tej uas Yehauvas tsim los qhia lawv cov me nyuam li cas rau li cas xwv cov me nyuam thiaj nrog tau Yehauvas sib raug zoo.