1. Edena dala ai Iobu ese Iehova ia diba namonamo?

 IOBU ena mauri lalonai ma haida ida ia herevahereva, to Iehova ida ia herevahereva karana be mai anina bada. Iehova ese Iobu ia hamaoroa Ia havaraia gaudia haida amo Iena aonega bona diba do ia itaia. Unai ese Iobu ena abidadama ia hagoadaia bona ia diba Iehova ese ena hesiai taudia edia dabu gaudia ibounai do ia henia. Hegeregere, Dirava ese Iobu ia hamaoroa animal ia naridia hegeregerena, Iobu danu do ia naria. (Iobu 38:39-41; 39:1, 5, 13-16) Iobu ese havaraia gaudia ia laloa dobu neganai, Dirava ena kara namodia momo ia dibaia.

2. Dahaka dainai nega haida ia auka havaraia gaudia ita stadilaia totona?

² Havaraia gaudia ita stadilaia neganai, Dirava ena kara do ita dibaia namonamo. Reana, nega haida ia auka unai bamona ita karaia totona. Bema siti lalonai ita noho, reana Dirava ese ia havaraia gaudia momo do ita itaia lasi. Ena be eda noho gabuna ai havaraia gaudia momo ita itaia, to ita bisi dainai nega be lasi unai gaudia ita stadilaia totona. Hari, ita hekwarahi nega ita atoa havaraia gaudia ita stadilaia namonamo ena badina do ita herevalaia. Iehova bona Iesu ese havaraia gaudia amo ita idia hadibaia bona diba ma haida ita abia dalana do ita herevalaia danu.

3. Dahaka ese ia hahedinaraia Iehova ia ura Adamu ese havaraia gaudia do ia moalelaia?

³ Iehova ia ura Adamu ese havaraia gaudia do ia moalelaia. Dirava ese Adamu ia havaraia neganai, ia dekenai uma gabu  hairaina ia henia bona unai uma gabu ia naria bona habadaia gaukarana ia henia danu. (Gen. 2:8, 9, 15) Adamu ia itaia uhe idia tubu bona flaoaflaoa idia atoa neganai, ia moale bada herea. Adamu ese Eden umana ia naria be hahenamo badana! Danu, Iehova ese Adamu ia noia animal idauidau edia ladana do ia hatoa. (Gen. 2:19, 20) Iehova be unai gaukara ia karaia diba, to Adamu dekenai ia henia. Unai ia karaia totona Adamu be animal ta ta edia kara ia stadilaia namonamo, bena edia ladana ia hatoa. Adamu ese unai gaukara ia moalelaia. Unai ese ia durua Iehova ena aonega ia lalopararalaia bona ia havaraia hairai gaudia ia moalelaia totona.

4. (a) Havaraia gaudia ita stadilaia ena badina ta be dahaka? (b) Edena havaraia gaudia oi moalelaia?

⁴ Havaraia gaudia ita stadilaia ena badina ta be, Iehova ia ura unai do ita karaia. Ita ia hamaoroa: “Emui matana umui abia isi bona guba umui itaia.” Bena ia gwau: “Inai gaudia be daika ese ia karaia?” Haere be ita diba vadaeni. (Isa. 40:26) Iehova ese guba, tanobada bona davara gaudia ibounai ia havaraia bona idia ese ena kara namodia idia hahedinaraia. (Sal. 104:24, 25) Bona Iehova ese ita ia havaraia dalana mani oi laloa. Hairai gaudia ita moalelaia ena ura be ita dekenai ia atoa. Danu, ita ese gau idauidau ita itaia, kamonai, dogoatao, mamia bona bonaia dainai, Dirava ese ia havaraia gau idauidau ita moalelaia diba.

5. Roma 1:20 hegeregerena, havaraia gaudia ita stadilaia karana amo dahaka namo ita davaria?

⁵ Baibel ese havaraia gaudia ita stadilaia ena badina ma ta ia gwauraia. Havaraia gaudia ese ita dekenai Iehova ena kara namodia idia hadibaia. (Roma 1:20 duahia.) Hegeregere, ita itaia Iehova ese gau ibounai ia karaia namonamo. Idia ese Dirava ena aonega idia hahedinaraia, ani? Bona mani ita moalelaia aniani idauidau oi laloa. Unai ese ia hahedinaraia ia ese taunimanima ia lalokau henia bada. Havaraia gaudia amo Iehova ena kara namodia ita itaia neganai, ia ita diba namonamo bona ita ura ita tura henia. Mani Iehova ese havaraia gaudia ia gaukaralaia taunimanima dekenai mai anina bada gaudia ia hadibaia daladia ita itaia.

6. Noko manudia amo dahaka ita dibaia?

⁶ Iehova ese nega ia makaia. Lagani ta ta ai, February dokona ela bona May huanai, Israela taudia idia itaia noko manudia be not kahanai idia roho lao. Dirava ese Israela taudia  ia hamaoroa, “noko manu be edia giroa mai negadia idia diba.” (Ier. 8:7) Iehova ese unai manu ena nega ia makaia hegeregerena, ia ese hahemaoro dinana ena nega ia makaia danu. Hari, manu be gabu ta idia roho lao ita itaia neganai, ita abia dae momokani Iehova be “nega korikori” ai inai tanobada dikana do ia hadikaia ore.​—Hab. 2:3.

7. Ugava manu ena roho dalana amo dahaka ita dibaia? (Isaia 40:31)

⁷ Iehova ese ena hesiai taudia dekenai goada ia henia. Isaia amo Iehova ia gwauhamata lalomanoka taudia do ia hagoadaia bona “idia be ataiai do idia roho, ugava bamona.” (Isaia 40:31 duahia.) Nega momo Israela taudia idia itaia ugava manu be ataiai momokani idia roho bona edia apena idia hamarerea lasi. Unai ese ita ia hadibaia Iehova ese unai manu dekenai ia henia goada hegeregerena, iena hesiai taudia dekenai unai goada do ia henia diba! Bema oi itaia unai bamona manu goadadia be ataiai momokani idia roho, bona edia apena idia hamarerea lasi, laloatao Iehova ese oi dekenai unai bamona goada do ia henia emu hekwakwanai oi haheaukalaia totona.

8. Iobu be havaraia gaudia amo dahaka ia dibaia, bona ita danu dahaka ita dibaia?

⁸ Iehova ita abidadama henia be namo. Iehova be Iobu ia durua ia abidadama henia totona. (Iobu 32:2; 40:6-8) Iehova ese Iobu ia hereva henia neganai, ia havaraia gaudia momo ia herevalaia. Hegeregere, hisiu, ori bona kevaru. Iehova ese animal idauidau ia herevalaia danu, hegeregere uda boromakau bona hosi. (Iobu 38:32-35; 39:9, 19, 20) Unai gaudia ibounai ese Dirava ena siahu sibona ia hahedinaraia lasi, to iena lalokau bona aonega badana ia hahedinaraia danu. Iehova bona Iobu edia herevahereva be mai anina bada, badina unai amo Iobu ena abidadama ia goada. (Iobu 42:1-6) Unai hegeregerena, havaraia gaudia ita stadilaia neganai, do ita diba Iehova ena aonega bona siahu be bada herea. Danu, Ia hegeregere iseda hekwakwanai ibounai ia haorea totona. Unai ese ita do ia durua iseda abidadama Iehova dekenai do ita hagoadaia.

9-10. Edena dala ai dina bona medu ese Iehova ena lalokau idia hahedinaraia?

⁹ Iesu be havaraia gaudia ia diba namonamo. Ia be “gaukara karaia namonamo tauna,” bona ena Tamana ida ia gaukara guba bona tanobada idia karaia totona. (Aon. 8:30) Gabeai, tanobada ai havaraia gaudia ia gaukaralaia ena hahediba taudia dekenai iena Tamana ia hahedibalaia totona. Ia hadibaia gaudia haida mani ita herevalaia.

¹⁰ Iehova ese taunimanima ibounai ia lalokau henia. Ororo Harorona ai, Iesu ese ena hahediba taudia dekenai dina bona medu ia herevalaia. Unai gaudia be taunimanima ese idia laloa bada lasi. Ita mauri totona unai gaudia rua be mai anina bada. Bema Iehova ia ura, ia idia tomadiho henia lasi taudia dekenai unai gaudia do ia henia lasi. To, mai lalokau ida taunimanima dekenai dina ia henia bona medu ia siaia. (Mat. 5:43-45) Iesu ese unai dala amo ena hahediba taudia ia hadibaia, Iehova ia ura taunimanima ibounai dekenai lalokau ita hahedinaraia. Dina ia diho ena hairai ita moalelaia eiava medu ese gabu ia hakerua ita mamia neganai, Iehova ese taunimanima ibounai ia lalokau henia karana ita laloa. Iena haheitalai ese ita ia hagoadaia haroro gaukara ai taunimanima ibounai dekenai lalokau do ita hahedinaraia.   

11. Manu ita itaia neganai, edena dala ai ita idia hagoadaia?

¹¹ Iehova be iseda dabu gaudia ia henia. Unai haroro herevana lalonai, Iesu ma ia gwau: “Guba manudia umui itaia namonamo. Idia be uhe idia hadoa lasi, anina idia gogoa lasi bona aniani haboua rumadia ai aniani idia haboua lasi, to emui guba Tamana ese idia ia ubua.” Reana kamonai taudia be manu idia roho hanai idia itaia lalonai, Iesu ia henanadai: “To, umui be idia umui hereaia, ani?” (Mat. 6:26) Lalokau dalana ai Iesu ese ita ia hagoadaia Iehova be iseda dabu gaudia do ia henia! (Mat. 6:31, 32) Iesu ena hereva ese hari abidadama hesiai taudia ia hagoadaia noho. Spain ai, painia taihu matamata ta be ia lalomanoka badina noho gabuna ta ia davaria lasi. To manu haida be uhe bona au huahua idia ania ia itaia murinai, unai ese ena lalona ia hagoadaia, ia gwau: “Unai manu ese lau ia hadibaia Iehova ese idia ia naria hegeregerena, lau danu do ia naria.” Daudau lasi murinai, taihu be noho gabuna ia davaria.   

12. Mataio 10:29-31 hegeregerena, Iehova dekenai dahaka ita dibaia?

¹² Iehova be ita ta ta ia laloa bada. Iesu be haroro gaukara totona iena hahediba taudia ia do siaia lasi neganai, ia hagoadadia dagedage karana dekenai idia gari lasi totona. (Mataio 10:29-31 duahia.) Unai ia karaia totona Israela ai ia noho manu maragina ta ia herevalaia, unai be sparrow manu. Iesu ena nega ai unai manu maragidia edia davana be bada lasi. To ena hahediba taudia ia hamaoroa: “Bema idia ta be tano dekenai ia moru, emui Tamana be ia diba.” Ma ia gwau: “Umui ese unai manu maragidia ibounai umui hereaia.” Iesu be ena hahediba taudia ia hagoadaia Iehova be idia ta ta ia laloa bada, unai dainai dagedage dekenai idia gari lasi. Hahediba taudia be taoni bona hanua lalonai idia haroro bona manu maragidia idia itaia neganai, Iesu ena hereva idia laloatao. Unai dainai manu maragina ta oi itaia neganai, laloatao Iehova be oi ia laloa bada badina oi be “unai manu maragidia ibounai oi hereaia.” Iehova ena heduru dainai taunimanima edia dagedage karana dekenai do oi gari lasi.​—Sal. 118:6.

13. Edena dala ai havaraia gaudia amo diba ita abia?

¹³ Havaraia gaudia ese ita dekenai Iehova ena kara namodia ma haida idia hadibaia. Edena dala ai? Ginigunana be, nega ita atoa havaraia gaudia ita itaia totona. Iharuana be, Iehova ena kara ia hahedibalaia dalana do ita laloa. Nega haida ia auka unai ita karaia totona. Cameroon ai taihu ta ladana Géraldine, ia gwau: “Siti ai lau bada dainai, lau laloparara namona be lau hekwarahi havaraia gaudia lau itaia totona.” Elda ta ladana Alfonso, ia gwau: “Lau laloparara Iehova ese ia havaraia gaudia  lau itaia bona idia amo gau haida lau dibaia totona, namona be nega lau atoa.”

14. Davida ese havaraia gaudia ia laloa dobu neganai, dahaka ia dibaia?

¹⁴ Davida be Dirava ena havaraia gaudia ia laloa dobu. Iehova dekenai ia gwau: “Guba ai, emu imana amo oi karaia gaudia lau itaia neganai, hua bona hisiu danu lau itaia neganai, taunimanima be dahaka bona oi ese ia oi laloa noho?” (Sal. 8:3, 4) Oibe, Davida be hanuaboi ai hisiu edia hairai ia moalelaia sibona lasi, to Dirava ena kara namodia idia hahedinaraia dalana ia laloa bada. Ia dibaia gauna be Iehova ena aonega be bada herea. Nega ma haida ai, Davida be ena sinana ena bogana lalonai ia tubu dalana ia laloa dobu. Unai kara amo Iehova ena aonega ia laloa bada.​—Sal. 139:14-17.

15. Havaraia gaudia amo oi dibaia gaudia haida mani oi herevalaia. (Salamo 148:7-10)

¹⁵ Ita danu be Davida bamona, havaraia gauna ta ita itaia bona ita laloa dobu diba. Emu badinai idia noho havaraia gaudia idauidau oi itaia neganai, Iehova ena kara namodia momo do oi dibaia. Hegeregere, emu kopina ai dina ena siahu oi mamia neganai, Iehova ena siahu do oi laloa. (Ier. 31:35) Oi itaia manu ta be ena ruma ia karaia neganai, Dirava ena aonega do oi laloa. Sisia maragidia idia gadara ita itaia neganai, unai ese ia hahedinaraia Iehova be moale Diravana. Bona oi itaia sina ta be ena beibi ida ia gadara neganai, Iehova ena lalokau dainai oi tanikiu henia. Dala idauidau ai Iehova ena kara ita dibaia diba badina ia havaraia gaudia ibounai, badana eiava maragina, kahirakahira eiava daudau, ese iena ladana idia hanamoa.​—Salamo 148:7-10 duahia.

16. Iseda lalona ita hadaia dahaka ita karaia totona?

¹⁶ Iseda Dirava be mai ena aonega, lalokau, siahu bada bona ia havaraia gaudia be mai edia hairai. Havaraia gaudia ita stadilaia karana amo, unai kara namodia momo ita dibaia. Namona be nega ita atoa havaraia gaudia ita moalelaia bona Iehova idia hahedibalaia dalana do ita laloa dobu. Unai amo Havaraia tauna ena turana ai do ita lao. (Iam. 4:8) Atikol 13 ai, tama sina ese havaraia gaudia amo edia natudia idia hadibaia Iehova ena turana ai do idia lao dalana do ita herevalaia.