1. Otjikeṋa tji tja vatera Job okutjiwa Jehova nawa?

 JOB wa kara novihungiriro ovingi ku novandu varwe mehupo re. Posi yokutja ehungi enanḓengu ra ri pokati ke na Jehova Mukuru. Mehungi ndo, Jehova wa raera Job okutara koviṋa tjiva oviwa eye mbya uta. Iho tja vatera Job okutjiwa ounongo wa Jehova nu tja pamisa ongamburiro ye kutja Jehova ma yenene okuyandja oviṋa ngamwa ovakarere ve mbi mave hepa. Otjotjihorera, Mukuru wa zemburukisa Job kutja eye u yenena okuparura ovinamuinyo, ku nao eye ma yenene okutumba Job wina. (Job 38:39-41; 39:1, 5, 13-16) Job we rihonga ovingi ohunga novikaṋena vya Mukuru we mokurihongera koviutwa.

2. Ongwaye tje ri ouzeu kweṱe povikando tjiva okurihongera koviutwa vya Jehova?

² Eṱe wina matu yenene okurihonga ovingi ohunga na Mukuru wetu indu tji matu konḓonona oviutwa vye. Posi ya, povikando tjiva i rira ouzeu kweṱe okutjita nao. Indu tji twa tura motjihuro, eṱe kaaruhe tji tu muna oviutwa vya Jehova. Indu tji twa tura popezu noviutwa vya Jehova, eṱe mape ya katu munu oruveze okurihongera ku vyo. Ngatu tare kutja ongwaye tji tji ri otjiṋa otjinanḓengu okutwa po oruveze nokutjita ozongondjero okurihongera koviutwa vya Jehova. Eṱe matu kerihonga ohunga nomuano Jehova na Jesus mu ve ungurisa oviutwa okutuhonga, nokutja  eṱe matu yenene okutjita ye kokutja tu rihongere ko ovingi okuza koviutwa.

3. Otjikeṋa tji matji raisa kutja Jehova aa vanga kutja Adam ma yorokere oviutwa?

³ Jehova aa vanga kutja omundu omutenga a yorokere oviutwa vye. Indu Mukuru tja mema Adam, eye we mu pa oparadisa ombwa okutura mo, nu we mu pa oviungura okutjevera nokuneneparisa oparadisa ndjo. (Gen. 2:8, 9, 15) Ripura ondjoroka Adam ndjaa ri na yo otja tjaa munu ozondwi tji maze nyomoka novimbloma tji mavi hapa. Ya ri ondjingonekero yapeke Adam ndjaa ri na yo okutjevera otjikunino tja Eden. Jehova wina wa ningira Adam okuyandja omana kovipuka pekepeke. (Gen. 2:19, 20) Jehova atja tjita nao eye omuini, posi yokutja wa yandja otjiungura ho ku Adam. Komurungu wokutya kutja me vi ruku vi, Adam wa konḓonona nawa ovipuka ama tara kombuniko vyavyo nomuano maavi ritjindi. Adam mape ya aa yorokere otjiungura ho. Iho tjiri tje mu vatera okumuna ounongo wa Jehova nomuano oviutwa vye mu vi ri oviwa novinanambango.

4. (a) Otjikwaye tji tji tjita kutja tu konḓonone oviutwa vya Jehova? (b) Oviutwa viṋe vya Jehova mbi ku tjatera tjinene?

⁴ Eṱe tu konḓonona oviutwa mena rokutja Jehova u vanga kutja tu tjite nao. Eye u tja: “Ṱumununeye omeho weṋu nu mu tare kevaverwa!” Okuzambo, eye wa pura kutja, ‘Owaṋi ngwe vi mema?’ Eziriro kepuriro ndo ekahu. (Jes. 40:26) Jehova wa mema oviṋa avihe meyuru na kombanda yehi na momeva kokuvare. Nu oviṋa avihe mbi vi tu honga ohunga na ye. (Eps. 104:24, 25) Nu ripurira komuano Mukuru me tu mema. Eye we tu mema kutja tu yorokere oviṋa oviwa mbya ungura. Eye we tu pa oviṋa vitano mbi: okumuna, okuzuva, okuṱuna, okurora, nokuṋuka, mbi tjita kutja tu yorokere oviṋa pekepeke avihe eye mbya ungura.

5. Okuza kOvaroma 1:20, ouwa waye mbu tu muna otja tji matu rihongo ohunga noviutwa vya Jehova?

⁵ Ombeibela i tu raera epu rarwe enanḓengu rokutja omena raye eṱe tji matu sokukonḓonona oviutwa. Oyo i tu honga ohunga novikaṋena vya Jehova. (Lesa Ovaroma 1:20.) Otjotjihorera, tara koviṋa Jehova mbya ungura nomuano omuwa ovyo mu vya memwa. Ovyo vi tu honga kutja Mukuru eye omunaunongo. Ripurira komihoro vyovikurya pekepeke eṱe mbi tu yenena okuyorokera. Otjo tji raisa kutja Jehova wa suvera ovandu tjinene. Otja tji matu tara kovikaṋena vya Jehova noviṋa eye mbya mema, otjo tji tjita kutja tu tjiwe Jehova nawa nu tji tu hinga okutumbuka popezu na ye. Nambano ngatu tare komuano Jehova ma ungurisa oviutwa vye okuhonga ovandu omapu omananḓengu.

6. Matu rihongere ko ye okuza komuano ozonḓera mu ze tjindatjinda?

⁶ Jehova u noruveze rwe rwokuyenenisa oviṋa avihe. Ombura aihe komaandero wa Februari ngandu mokati ka Mei, Ovaisrael aave munu ozonḓera nḓaaze isanewa kutja omandongo otja tjaaze tjindatjinda okuyenda komanene wehi. Mukuru wa raera Ovaisrael kutja, “nangarire endongo ri tjiwa oruveze rwokuyaruka.” (Jer. 8:7) Jehova wa twa po oruveze kozonḓera nḓa okutjindatjinda, nu momuano otjingewo Jehova wa twa po oruveze keyuva rombanguriro ye. Ndino otja tji matu tara ozonḓera omuano mu ze tjindatjinda, otjo tji tu zemburukisa kutja tu kare nongamburiro yokutja Jehova wa twa po “oruveze” ndu mee ku yandeka ouye ourunde mbwi.—Hab. 2:3.

7. Hapo matu rihongere ko ye komuano ozonḓera mu ze tuka? (Jesaja 40:31)

⁷ Jehova u yandja omasa kovakarere ve. Okupitira mu Jesaja, Jehova wa kwizikira ovakarere ve kutja eye me ve pe omasa kutja ve “yere ovivava tjimuna ozonguvi,” indu tji va ngundipara poo tji va u momuinyo. (Lesa Jesaja 40:31.) Ovaisrael aave munu ozonguvi amaze tuka meyuru nokuhinokupakapakisa oviva vyazo tjinene. Ozo aaze tjiti nao kokutja ze yenene okutuka oupupu nokuhinokuungurisa omasa omingi otja tji maze hingwa i yombepo. Ihi matji tu zemburukisa kutja Jehova ma yenene okutupa omasa, tjimuna eye tje yandja kozonḓera nḓo. Otja tji mo munu onḓera amai tuka okuyenda kombanda tjinene meyuru nokuhinokupakapakisa ovivava vyayo tjinene, zemburuka kutja Jehova ma yenene okukupa omasa wokutjinda omazeu woye.

8. Ovikeṋa Job mbye rihonga okuza koviṋa Mukuru mbya uta nu matu rihongere ko ye?

⁸ Eṱe matu sokukara nongamburiro mu Jehova. Jehova wa vatera Job okukurisa ongamburiro ye mu ye. (Job 32:2; 40:6-8) Indu tja hungire ku na Job, Mukuru wa hungirira koviṋa ovingi mbya ungura, tjimuna ozonyose, ovikamba, norutjeno rwombura. Jehova wina wa hungira ohunga novipuka tjimuna onyati nokakambe. (Job 38:32-35; 39:9, 19, 20) Oviṋa avihe mbi aavi raisa omasa wa Mukuru nu wina aavi raisa orusuvero nounongo we. Tjiri ehungi ndi ra tjita kutja Job ma kare nongamburiro onyingi mu Jehova. (Job 42:1-6) Momuano tjingewo, indu tji matu rihongo ohunga noviutwa, mavi tu zemburukisa kutja Jehova onongo nu u nomasa okukapita eṱe. Eye wina ma yenene okuisa po omauzeu wetu, nu tjiri ma katjita nao. Ihi matji yenene okutuvatera okukurisa ongamburiro yetu mu ye.

9-10. Eyuva nombura vi tu raera tjike ohunga na Jehova?

⁹ Jesus aa tjiwa ovingi ohunga noviutwa. Otja “omuungure onongo,” eye wa ungura pu na Ihe indu tja meme oviṋa meyuru na kombanda yehi. (Omiano 8:30) Kombunda indu Jesus tja ri kombanda yehi, eye aa ungurisa oviutwa okuhonga ovahongewa ve ohunga na Ihe. Tara koviṋa tjiva mbya honga.

¹⁰ Jehova u raisa orusuvero rwe kovandu avehe. Komazuvarisiro we wokondundu, Jesus wa hungira kovahongewa ve ohunga neyuva nombura, mbi ri oviṋa ovandu ovengi mbi ve he ripurire ko tjinene. Oviṋa mbi ovyo ovinanḓengu mehupo retu. Jehova atja yenena okuhinokuyandja oviṋa mbi kovandu mbe he mu karere. Nungwari, mena rorusuvero rwe, eye u pitisa eyuva nokuyorokisa ombura kovandu avehe. (Mat. 5:43-45) Jesus wa ungurisa ehungi ndo okuhonga ovahongewa ve kutja Jehova u vanga kutja tu raisire ovandu avehe orusuvero. Eṱe tu kara nondjoroka indu tji matu munu eyuva tji mari hiti poo ombura tji mai roko, mena rokutja iho tji tjita kutja tu ripurire korusuvero rwa  Jehova kovandu avehe. Otjihorera tje matji yenene okutuhinga kutja tu raise orusuvero otjingero kovandu avehe ku matu zuvarisa ko.

11. Okutara kozonḓera maku yenene vi okutuyanḓiparisa?

¹¹ Jehova u tu pa oviṋa mbi matu hepa kutja tu hupe. Momazuvarisiro wokondundu, Jesus wina wa tja: “Tareye kozonḓera zokuti: Ozo kaze kunu nu kaze kondo, nu kaze wongere momatuwo womapwikiro, nungwari Iho meyuru Eye ngo u ze kora.” Mape ya imba mbaave puratene ku Jesus, aave munu ozonḓera tji maze tuka kombanda yawo indu Jesus tja pura nai: “Neṋe kamu vananḓengu pozonḓera are?” (Mat. 6:26) Momuano worusuvero mbwo, Jesus we tu vatera okumuna kutja Jehova u rikendera kweṱe. (Mat. 6:31, 32) Oviṋa mbi matu rihongo okuza koviutwa vi kayenda komurungu okutunduuza ovakarere ve ovaṱakame. Omukazendu omukambure omukandjira omutanda ngwa tura moSpain, wa wire momuinyo mena rokutja eye kaa munu oruveze orusemba okutura po. Posi ya, kombunda yaindu tja munu ozonḓera tji maze ri ozondwi nomandjembere, iho tja tjita kutja ma porimane momuinyo. Eye wa tja: “Ozonḓera nḓo aaze ndji zemburukisa kutja Jehova u ze parura, neye ma yenene okundjiparura wina.” Kombunda yanao, omukazendu omukambure ngo, wa kamuna poṋa okukara po.

12. Otja ku Mateus 10:29-31, ozondjandja ze tu honga tjike ohunga na Jehova?

¹² Jehova u vara auhe wetu kourike we. Ngunda e hi ya hinda ovaapostele ve okukazuvarisa, Jesus we ve vatera kutja ave ha tira imba mbu mave ve pirukire. (Lesa Mateus 10:29-31.) Eye wa tjita nao mokuveraera ohunga nonḓera ondjandja, ndjaai tjiukwa moIsrael. Moruveze ndwi, Jesus tja ri kombanda yehi, ozonḓera nḓo za ri nonḓengu yokehi. Nungwari eye wa raera ovahongewa ve kutja, “kape na imwe yazo ndji mai wire pehi, Iho e hi nokuvanga nao,” poo “Iho e hi nokutjiwa.” (NWT) Neye wina wa tja: “Oweṋe ovananḓengu tjinene pozondjandja ozengi!” Jesus wa yanḓiparisa ovahongewa ve kutja Jehova u vara auhe wawo otja kourike we, ku nao owo kave nokuhepa okutira ondatumisire. Ovahongewa mape ya aave zemburuka omambo wa Jesus indu tji mave munu ozondjandja ngunda amave zuvarisa movihuro na movirongo. Indu tji mo munu okazera, zemburuka kutja Jehova u ku vara kourike woye, mena rokutja ove wina oove ‘omunanḓengu tjinene pozondjandja ozengi.’ Nombatero ya Jehova, ove ko nokuhepa okutira varwe tji mave ku pirukire.—Eps. 118:6.

13. Ovikeṋa mbi mavi tu vatere okurihongera koviutwa?

¹³ Eṱe matu yenene okurihonga ovingi ohunga na Jehova okuza moviutwa. Omomuano uṋe? Rutenga, eṱe matu hepa okutwa po oruveze okukonḓonona oviutwa. Okuzambo, matu hepa okuripura kutja mavi tu hongo ye ohunga na Jehova. Kaaruhe tje rira oupupu okutjita nao. Géraldine, omukazendu omukambure okuza koCameroon, wa tja: “Ami mbe kurira motjihuro  nu mba muna kutja pe hepa ongondjero okukonḓonona oviutwa.” Omunene wombongo wena Alfonso wa tja: “Ami mbe rihonga kutja me hepa okutwa po oruveze okukara erike okukonḓonona oviutwa vya Jehova nokuripurira ko oukoto kutja mavi ndji hongo tjike ohunga na ye.”

14. Ovikwaye David mbye rihonga indu tje ripurire ko oukoto koviutwa vya Mukuru?

¹⁴ David ee ripurire ko oukoto koviutwa vya Mukuru. Eye wa tja ku Jehova: “Tji me tara kevaverwa Ove ndi wa ungura, na komueze na kozonyose nḓu wa twa poṋa pazo – , hapo omundu omukwatjike kutja u mu zemburuka?” (Eps. 8:3, 4) Otja David tja tara meyuru ongurova, eye ka yorokere okutara ozonyose uriri, nungwari ee ripurire ko oukoto ku imbi ozonyose nḓu ze mu honga ohunga na Mukuru. Eye we rihonga ounene wa Jehova. Povikando vyarwe, David ee ripurire komuano orutu rwe maaru kuru mezumo raina. Indu tje ripurire komuano omuhimise orutu rwe mu rwa ungurwa, eye wa ri nondangi kounongo wa Jehova.—Eps. 139:14-17.

15. Yandja ovihorera komuano mbu wa muna ovikaṋena vya Jehova moviutwa. (Epsalme 148:7-10)

¹⁵ Tjiri oupupu kweṱe tjimuna David, okutara koviutwa nokuripurira ko oukoto ku vyo. Indu tji wa tara ongondoroka, mo yenene okumuna oviṋa ovingi mbi mavi ku vatere okutjiwa ovikaṋena vya Jehova nawa. Otjotjihorera, ove mo yenene okumuna omasa wa Jehova indu tji mo fula oupyu weyuva korutu rwoye. (Jer. 31:35) Ripura nounongo wa Jehova indu tji mo munu okazera tji make tungu otjiruwo. Ripurira komiṱuka vya Jehova, tji mo munu okambona tji make kondjo okukambura omutjira wako. Nu i tja okuhepa ku Jehova korusuvero rwe indu tji mo munu ina tji ma nyanda pu nokanatje ke. Eṱe tu nouyara ouingi okurihonga ohunga na Jehova, mena rokutja oviṋa eye mbya uta vi mu tanga nandarire kutja ovinene, oviṱiṱi, oviṋa mbi ri popezu, poo mbi ri kokure tjinene.—Lesa Epsalme 148:7-10.

16. Eṱe matu sokurimanena okutjita tjike?

¹⁶ Mukuru wetu onongo, omunarusuvero, omunamasa, nu oviṋa avihe mbya uta oviwa. Eṱe matu yenene okurihonga ohunga novikaṋena avihe mbi na vyarwe ovingi, indu tji matu tara nawa koviutwa ongondoroka na eṱe. Eṱe matu sokukondja okutwa po oruveze aruhe okuyorokera oviutwa nokuripura noviṋa mbi matu rihongere ko ohunga na Jehova. Mokutjita nao, eṱe matu tumbuka popezu nOmuute wetu. (Jak. 4:8) Morupa ndu maru kongorere ko, eṱe matu katara komuano ovanene mu mave yenene okuungurisa oviutwa okuvatera ovanatje vawo okutumbuka popezu na Jehova.