1. Nama siti chara ke dikena Jop ngambika ulih ngelala Jehovah enggau manah agi?

 JOP BISI berandau enggau mayuh orang ba pengidup iya, tang randau ti pemadu penting ba pengidup Jop, iya nya randau iya enggau Jehovah. Ba randau nya, Jehovah ngasuh Jop beratika utai manah ke udah ditempa Iya. Tu deka nulung Jop nemu penalam penemu Jehovah, lalu nya deka negapka pengandal Jop ngagai Jehovah ke ulih nyediaka semua utai ti diguna bala nembiak Iya. Ambika chunto, Petara ngingatka Jop pasal chara Iya ngintu bala jelu. Nya alai, Iya mega tentu ulih nyaga Jop. (Jop 38:39-41; 39:1, 5, 13-16) Lebuh Jop beratika sekeda chunto ari utai ke ditempa, iya ulih belajar mayuh utai pasal sifat Petara.

2. Nama kebuah kitai kekadang tusah deka beratika utai ti ditempa Jehovah?

² Kitai mega ulih belajar mayuh agi pasal Petara kitai lebuh kitai beratika utai ti ditempa Iya. Tang kekadang kitai tusah deka ngereja nya. Enti kitai diau ba nengeri, kitai engka tusah deka meda utai ti ditempa Jehovah ba pengidup kitai besehari-sehari. Lalu enti kitai enda diau ba nengeri pan, kitai engka ngasaika diri nadai awak beratika utai ti ditempa Jehovah. Nya alai, aram meh kitai berandauka nama pemanah iya enti kitai ngena awak sereta bebendar beratika utai ti ditempa Jehovah. Kitai mega deka meda chara Jehovah enggau Jesus ngajar ngena utai ti ditempa sereta utai ti ulih dikereja kitai ngambika belajar mayuh agi ari utai ti ditempa Jehovah.

3. Baka ni kitai nemu Jehovah dekaka Adam rindu ati enggau utai ti ditempa Iya?

³ Jehovah dekaka Adam rindu ati enggau utai ti ditempa Iya. Lebuh Petara ngaga Adam, Iya meri Adam Paradais ti manah nyadika endur diau lalu Jehovah mega ngasuh iya nyaga sereta ngemesaika agi endur Paradais nya. (P-kal. 2:8, 9, 15) Gambarka pengagit ati Adam lebuh iya meda benih berengkah tumbuh sereta bungai ngerembai. Endang basa ti besai ke Adam laban ulih nyaga Kebun Eden! Jehovah mega ngasuh Adam meri nama ngagai semua jelu. (P-kal. 2:19, 20) Jehovah ulih meri nama ngagai semua jelu nya kediri empu, tang Iya meri pengawa nya ngagai Adam. Endang amat, sebedau meri nama ngagai semua jelu nya, Adam tentu bebendar beratika tiap iku jelu nya. Adam deka beratika gamal sereta ulah sida. Adam tentu rindu ngereja tu. Pengawa tu nulung iya meretika penalam penemu Jehovah sereta pemanah utai ti udah ditempa Jehovah.

4. (a) Nama siti ari kebuah kitai patut beratika utai ti ditempa Jehovah? (b) Nama sekeda utai ti digaga Jehovah ke amat dikerinduka nuan?

⁴ Siti ari kebuah kitai patut beratika utai ti ditempa Jehovah iya nya, laban Iya ngasuh kitai ngereja nya. Iya mai kitai “engkadah ke langit, lalu peda.” Udah nya, Iya nanya: “Sapa ngaga bintang ti dipeda nuan nya?” Saut nya endang terang. (Isa. 40:26) Jehovah nempa semua utai ba serega, ba dunya, sereta ba dalam tasik. Semua tu ngajar kitai pasal Iya. (Mas. 104:24, 25) Lalu perundingka chara Iya nempa kitai. Iya meri kitai penau ngambika kitai rindu ati enggau utai ti ditempa Iya ba alam semula jadi. Iya mega udah meri kitai penau ngambika ulih meda, ninga, negu, nyepi, sereta nyium bau. Semua tu nulung kitai rindu ati enggau semua utai ti ditempa Jehovah.

5. Nitihka Rome 1:20, nama penguntung iya enti kitai belajar pasal utai ti ditempa Jehovah?

⁵ Bup Kudus madahka siti agi kebuah ti penting kitai patut beratika utai ti ditempa Jehovah. Kitai ulih belajarka sifat Jehovah ari semua tu. (Bacha Rome 1:20.) Ambika chunto, peratika utai ti ditempa Jehovah lalu peda pemanah chara sida digaga. Endaka tu nunjukka Jehovah nya bepenemu-dalam? Lalu pikirka pasal bemacham bansa pemakai ti ulih diempa kitai. Tu enggau terang nunjukka pemesai pengerindu Iya ke mensia. Lebuh kitai meda personaliti Jehovah ari utai ti ditempa Iya, kitai deka ngelala Iya enggau manah agi. Lalu tu deka meransang kitai datai semak ngagai Iya. Diatu, aram kitai meda sekeda chara Jehovah ngena utai ti ditempa Iya kena ngajar kitai utai ti penting.

6. Nama ulih dipelajarka kitai ari burung undan ke mindah?

⁶ Jehovah bisi netapka jam kena ngereja sesiti utai. Ninting taun entara ujung bulan Februari enggau tengan bulan Mei, orang Israel deka meda burung undan terebai mansa menua sida lalu nuju ngagai utara. Petara madah ngagai orang Israel, “indah burung undan deh nemu maya diri pulai.” (Jer. 8:7) Jehovah udah netapka jam kena burung tu mindah, baka nya mega Iya udah netapka jam maya Iya deka ngakim. Kemayaharitu, seraya kitai meda burung mindah ari siti endur ngagai siti endur, nya ngasuh kitai ingat kitai ulih andalka Jehovah udah netapka jam alai Iya deka mai pengerusak ngagai dunya ti jai tu.—Hab. 2:3.

7. Nama ulih dipelajarka kitai ari chara burung terebai? (Isaiah 40:31)

⁷ Jehovah meri pengering ngagai bala nembiak Iya. Nengah Isaiah, Jehovah besemaya Iya deka ngeringka nembiak Iya ngambika sida ulih “ngindang tinggi baka menaul” lebuh sida berasai lemi tauka asa ati. (Bacha Isaiah 40:31.) Orang Israel suah meda burung menaul terebai ba langit, tang burung menaul nya enda suah ngebapka sayap iya. Iya ngindang ngena arus angin ti angat ke benung niki. Tu ngingatka kitai pasal Jehovah ke ulih meri kitai pengering sama baka chara Iya ke ulih meri pengering ngagai burung tu! Lalu nuan engka meda burung ti besai ke terebai majak tinggi ba langit sereta enda ibuh ngebapka sayap iya. Tu ngingatka kitai Jehovah mega ulih meri kitai pengering ngambika ulih napi semua penanggul kitai.

8. Nama udah dipelajarka Jop ari utai ti ditempa Petara, lalu nama ulih dipelajarka kitai?

⁸ Jehovah endang ulih dikearapka kitai. Jehovah udah nulung Jop arapka Iya agi. (Jop 32:2; 40:6-8) Ba randau Iya enggau Jop, Petara bisi nyebut mayuh utai pasal utai ke ditempa Iya. Tu nyengkaum bintang, remang, sereta kilat. Jehovah mega bejaku pasal bala jelu, baka sapi ti siga enggau kuda. (Jop 38:32-35; 39:9, 19, 20) Semua tu ukai aja nunjukka kuasa Petara ti besai, tang mega ngayanka pengerindu sereta penemu-dalam Iya. Ketegal randau tu, Jop arap agi ke Jehovah. (Jop 42:1-6) Pia mega, lebuh kitai belajar pasal utai ti ditempa, tu ngingatka kitai pasal Jehovah nya jauh bepenemu-dalam sereta bekuasa ari kitai. Iya mega ulih sereta deka ngujungka semua penguji ke ditapi kitai. Utai tu ulih nulung ngeringka pengarap kitai ngagai Iya.

9-10. Nama ulih dipelajarka kitai pasal Jehovah ari mata panas enggau ujan?

⁹ Jesus nemu mayuh utai pasal alam semula jadi. Bup Kudus madahka, Jesus nya orang ke landik gawa. Nya alai, Jesus tentu bisi peluang begulai gawa enggau Apai iya lebuh Iya nempa dunya raya. (J-lam. 8:30) Udah nya, lebuh Jesus ba dunya, iya ngena utai ti ditempa kena ngajar bala murid iya pasal Apai iya. Peratika sekeda utai ti diajar iya.

¹⁰ Jehovah ngayanka pengerindu ngagai semua orang. Dalam Jaku Ajar ba Atas Bukit, Jesus bejaku enggau bala murid iya pasal mata panas enggau ujan. Mayuh orang enda entu berunding pasal tu. Ujan enggau mata panas nya utai ti penting ngambika kitai ulih terus idup. Jehovah ulih nagang orang ke enda nyembah Iya ari nerima semua utai tu. Tang Iya enggau bepengerindu nyediaka mata panas enggau ujan ngagai semua orang. (Mat. 5:43-45) Jesus ngena utai tu kena ngajar bala murid iya pasal Jehovah ti dekaka kitai ngayanka pengerindu ngagai semua orang. Tiap kali kitai meda mata panas padam tauka meda ujan, kitai ulih berunding pasal pengerindu Jehovah  ke semua orang. Teladan Jehovah ulih meransang kitai ngayanka pengerindu ti sama lebuh kitai nginjil ngagai semua orang.

11. Nama peransang ke diulih kitai lebuh beratika burung?

¹¹ Jehovah meri utai ke diguna kitai ngambika ulih terus idup. Dalam Jaku Ajar ba Atas Bukit ti sama nya, Jesus mega madah: “Peratika burung ba langit. Sida nadai betanamka utai, nadai ngetau, tauka besimpanka utai dalam setor. Taja pia, Apai kita ti ba serega nupi sida.” Bala peninga Jesus engka ulih meda burung terebai ba langit lebuh iya nanya sida: “Endaka kita berega agi ari burung?” (Mat. 6:26) Enggau chara ti bepengerindu tu, Jesus nulung kitai yakin Jehovah deka nyaga kitai! (Mat. 6:31, 32) Nyentukka diatu, jaku ajar tu agi meransang bala nembiak ti tetap ati. Siku menyadi indu ke nyadi pengerintis ba Sepanyol berasai amat tusah ati laban iya enda ulih tetemuka endur diau ti sesuai. Tang pengudah iya meda burung makai benih enggau buah, iya berasai tenang agi. Ku iya, “Semua burung nya ngingatka aku pasal Jehovah ke benung nyaga sida lalu Iya mega tentu deka nyaga aku.” Enda lama udah nya, menyadi indu tu tetemuka endur diau ti sesuai.

12. Nitihka Matthew 10:29-31, nama ulih dipelajarka kitai pasal Jehovah ari burung pipit?

¹² Tiap iku kitai berega ba Jehovah. Sebedau nganjung bala rasul iya nginjil, Jesus nulung sida ngambika enda takut ke orang ti deka nyakal sida. (Bacha Matthew 10:29-31.) Iya ngereja nya enggau bejaku pasal siti bansa burung ti biasa ditemu ba Israel, iya nya burung pipit. Burung nya enda entu berega ba jeman Jesus. Tang Jesus madah ngagai bala murid iya: “Taja pan siku ari burung nya labuh ke tanah, Apai kita deka nemu pasal nya.” Ku iya nampung agi: “Kita jauh berega agi ari mayuh burung pipit.” Udah nya, Jesus ngasuh sida yakin tiap iku sida nya berega ba Jehovah. Nya alai, sida nadai kebuah takut kena perinsa. Bala murid nya tentu ingat baru jaku Jesus lebuh sida meda burung pipit maya nginjil ba nengeri enggau genturung pendiau. Tiap kali nuan meda burung ti mit, kingatka meh nuan berega ba Jehovah laban nuan mega “jauh berega agi ari mayuh burung pipit.” Enggau sukung ari Jehovah, nuan enda ibuh takut lebuh orang bukai nyakal nuan.—Mas. 118:6.

13. Nama deka nulung kitai belajar ari utai ti ditempa?

¹³ Kitai ulih belajar mayuh utai bukai pasal Jehovah ari utai ti ditempa. Baka ni? Keterubah, kitai patut ngatur awak kena beratika utai ti ditempa. Udah nya, kitai patut berundingka utai ke ulih dipelajarka kitai pasal Jehovah ari utai ti ditempa. Kitai engka ngasaika tusah deka ngereja tu. Géraldine, siku menyadi indu ari Cameroon, madahka, “Aku dibesaika ba bandar, nya alai aku patut berusaha ngambika ulih beratika alam semula jadi.” Siku tuai gempuru ke benama Alfonso nerangka, “Aku nemu aku patut netapka jam ngambika ulih kediri kena beratika utai ti ditempa Jehovah, sereta  berundingka utai ke ulih dipelajarka aku pasal Jehovah ari utai nya.”

14. Nama utai ti dipelajarka David lebuh iya belematika utai ti ditempa Petara?

¹⁴ David berunding enggau dalam pasal utai ti ditempa Petara. Iya madah ngagai Jehovah: “Lebuh aku engkadah ke langit ti udah digaga Nuan, engkadah ngagai bulan enggau bintang ti udah di atur Nuan, aku lalu nanya: ‘Sapa mensia, alai Nuan deka bedulika sida?’” (Mas. 8:3, 4) Amat, lebuh David engkadah ke langit maya malam hari, iya ukai semina gaga ati meda semua bintang. Tang iya mega belematika utai ke ulih dipelajarka iya pasal Petara ari semua bintang nya. Iya belajar pasal pemesai kuasa Jehovah. Kelimpah ari nya, David mega berundingka chara tubuh iya ulih nyadi dalam kandung indai iya. Lebuh iya berundingka chara tubuh iya digaga, asai ati iya ti beterima kasihka penemu-dalam Jehovah majak nambah.—Mas. 139:14-17.

15. Beri chunto pasal sifat Jehovah ke udah dipelajarka nuan ari utai ti ditempa. (Masmur 148:7-10)

¹⁵ Baka David, nuan ulih ngiga utai ti bisi ngelingi nuan kena belematika utai ti ditempa Jehovah. Bisi mayuh ari utai ti ditempa ke ulih nulung kitai ngelala Jehovah enggau manah agi. Ambika chunto, nuan ulih beratika kuasa Jehovah lebuh nuan ngasaika pengangat mata panas ba kulit nuan. (Jer. 31:35) Pikirka pasal penemu-dalam Petara lebuh nuan tepedaka siku burung benung ngaga tansang iya. Lebuh nuan meda siku anak ukui nangkap iku diri empu, nuan ulih ngambarka Jehovah nya Petara ti nemu begagai, sereta rindu merindang ati Diri. Lebuh nuan meda siku indai bemain enggau anak iya ke baru ada, nuan ulih beterima kasihka pengerindu Jehovah. Kitai bisi mayuh peluang belajar pasal Jehovah laban semua utai ke ditempa Iya ngemuliaka Iya enda ngira utai nya besai, mit, semak, tauka jauh.—Bacha Masmur 148:7-10.

16. Nama utai ti keran deka dikereja kitai?

¹⁶ Petara kitai nya bepenemu-dalam, bepengerindu, besai kuasa, sereta semua utai ke digaga Iya manah magang. Kitai ulih belajar pasal semua sifat tu enggau ke bukai, enti kitai beratika utai ti ditempa ke ngelingi kitai. Semua kitai patut seruran magi awak kena beratika utai ti ditempa sereta berundingka utai ti ulih dipelajarka kitai pasal Jehovah ari nya. Enggau tu, kitai deka majak semak enggau Penempa kitai. (Jas. 4:8) Dalam artikel ke nangkanka tu, kitai deka meda baka ni apai indai ulih ngena utai ti ditempa kena nulung bala anak sida datai semak ngagai Jehovah.